1 CHRONICLES 10

Yam’ ni tay Saul ni Pilung

1 Piyu Filistia e ra maelgad ngak piyu Israel u daken fare Burey ni Gilboa. Bo’or piyu Israel nli’rad ngar mad’ u rom, ma tin ni magey nib mu’un Saul ngay nge fapi pagel ni fak ni go’ rmilgad. 2 Machane me tulufrad piyu Filistia ngan kolrad ngan thang e fan rok dalip e pagel ni fak Saul, i Jonathan, Abinadab, nge Malkishua. 3 Yi be cham nib gel mirin u to’oben Saul, me kaen ko pi gan e gat’ing rok e to’ogor me maad’ad nib gel. 4 Me ga’ar Saul ngak fare pagel ni be fek talin e cham rok, "Mu girengiy e saydon rom ngam thang e fan rog, ya nge dabi girig e pi Filistia ngog ndar nanged Got." Machane ri be rus fare pagel ni nge rin’. Ma aram me fek Saul e saydon rok nge pag ir nga p’ebugul. 5 Me guy fare pagel nike yim’ Saul, ma aram miki pag ir nga p’ebugul e gi rok e saydon nge yim’. 6 Ere Saul nge fa dalip i pagel ni fak e go’ rm’ad u ta’bang, ma dariy reb e pi’in owchen niki gagiyeg bi’id. 7 Nap’an ni rung’ag piyu Israel ni yad ma par u lan fare loway ni Jezreel fithingan nike mil fa raba’ i salthaw me Saul nge fapi pagel ni fak e karm’ad, miyad pag fa yuchi binaw rorad ngar milgad. Ma aram me yib e pi Filistine ngar pired nga langgin fa yochi binaw.

8 Me reb e rran riy me sul e pi Filistine ko gin un mael riy ni ngar feked fapi talin e cham ko fapi salthaw nu Israel ni karmad’. Nap’an nra pir’eged downgin Saul nge fapi pagel ni fak u daken fare burey ni Gilboa. 9 Miyad th’ab lolgen Saul, ngar lufed madan e mael rok, miyad l’oeg e pi tamal’og ni ngar feked e pin’ey u ga’ngin yu Filistia ni yad be weliy fapi thin ni bfel’ ngak e pi liyos rorad nge ngak e girdi’ rorad. 10 Miyad tay fapi talin e cham rok ngalan reb e pi tempel rorad miyad tining fare ll’ug ngalan e tempel rok fare got rorad i Dagon. 11 Nap’an ni rung’ag e girdi’ nu Jabesh u lan yu Gilead e n’en ke rin’ e pi Filistine ngak Saul, 12 me yan e pi pumo’on ni falu’ ra feked fapi ldow rok Saul nge fapi pagel ni fak nga Jabesh. Miyad k’eyag nga tan ba ke gek’iy ni oak miyad pag e abich ni medlip e rran.

13 Saul e yim’ ni bochan e de yul’yul’ ngak SOMOL. De fol ko tin ni yog SOMOL: I mang pi thagith e i fithrad u rogon ni nge rin’ ban’en 14 ma de fith laniyan’ SOMOL. Ere me thang SOMOL owchen me pi’ e gagiyeg ko pilung ngak David nib pagel ni fak Jesse.