1 CHRONICLES 15

Fare Kahol ko M’ag nni fal’eg rogoy ni ngan fek

1 Me toy David boch e naun ni fan ngak u lan fare Binaw rok David.*15:1 BINAW ROK DAVID: Gin’em u Jerusalem e kol David rok e pi’in nri girdi’en, ni piyu Jebus (ku arrogon ni bay ko 2 Sa 5:6–10). Miki ngongliy rogon bang ni fan ko fare Kahol ko M’ag rok Got me n’uf ba tent ni fan ngay. 2 Ma aram me ga’ar, "Kemus ni pi Levite e yad ra fek fare Kahol ko M’ag, ni bochan e yad e pi’in ke mel’egrad SOMOL ni ngu’ur feked ma yad be pigpig ngak ni manemus." 3 Aram me kunuy David e girdi’ nu Israel ni gubin nga Jerusalem ni bochan e ngan fek fare Kahol Ko M’ag i yib ko gin ke fal’eg rogon ntagil’. 4 Me migid me mol’og nge yan ngak e pi’in owchen Aron nge pi Levite. 5 Uriel e ir e ga’ ko karok Kohath e girdi’, ma ir e ma yog e thin rok 120 e girdi’ ni yad tabnaw; 6 Asayah e ir e ga’ ko karok Merari e girdi’, ma ir e ma yog e thin rok 220 e girdi’; 7 Joel e ir e ga’ ko karok Gershon e girdi’, ma ir e ma yog e thin rok 130 e girdi’; 8 Shemayah e ir e ga’ ko karok Elizafan e girdi’, ma ir e ma yog e thin rok 200 e girdi’; 9 Eliel e ir e ga’ ko karok Hebron e girdi’, ma ir e ma yog e thin rok merak i ragag e girdi’; 10 ma Amminadab e ir e ga’ ko karok Uzziel e girdi’, ma ir e ma yog e thin rok 112 e girdi’.

11 Me pining David fa gali prist ni aram Zadok nge Abiathar nge nel’ e pumo’on ko Levi, Uriel, Asayah, Joel, Shemayah, Eliel, nge Amminadab. 12 Me ga’ar ngorad, "Gimed e pi tayugang’ ko Levi. Mu machalbog niged gimed nge pi’in gimed ni pi Levite, ya nge yag nim feked fare Kahol ko M’ag rok SOMOL ni Got nu Israel i yan ko gin ku gu ngongliy ntagil’. 13 Bochan e dammoyed u rom ko yay nsom’on nni fek, me gechig nagmad SOMOL ni Got rodad ya da gu liyorgad ngak nrogon thingar gu rin’ed."

14 Ma aram me machalbognag fa gali prist nge piyu Levi yad ya ngar feked fare Kahol ko M’ag rok SOMOL ni Got nu Israel. 15 Me fek e Levi fare Kahol ni kar mat’ niged, ni bod ni yog SOMOL ngak Moses.

16 Me yog David ngak fapi ga’ ko Levi ni ngrogned ngak boch e Levite ni ngar tanggad ma yad be chubeg e musik nib felfelan’ lingan ko harp nge cymbal. 17-21 Fa yuke girdi’ ko girdi’en e tang e ra mel’eged e pi pumo’on ni ba’aray ni nge musik ko cymbal: Heman nib mo’on ni fak Joel, nge reb e girdi’ rok ni Asaf nib mo’on ni fak Berekiah, nge Ethan nib mo’on ni fak Kushayah, ni be’ ko fare ke girdi’ rok Merari. Mu kun mel’eg e tin ba’aray e Levite ni ngar musikgad ko harp ni bin lang e ton: Zekariah, Jaaziel, Shemiramoth, Jehiel, Unni, Eliab, Maaseyah, nge Benayah.

Mu kur mel’eged e tin ba’aray e Levite ni ngar musikgad ko harp ni bin but’ e ton: Mattithiah, Elifelehu, Mikneyah, nge Azaziah, nge fa gal matnag ko Tempel, Obed Edom nge Jeyel.

22 Me Kenaniah e ni mel’eg ni nge milfan e girdi’en e musik ko pi Levite ngak, ni bochan e be’ nrib salap ko musik.

23,24 I Berekiah nge Elkanah e ni puthuyrow ngak Obed Edom nge Jehiah ngan mel’egrad ni ngar matnagiyed fare Kahol ko M’ag. Fapi prist ni aram Shebaniah, Joshafat, Nethanel, Amasai, Zekariah, Benayah, nge Eliezer e ni mel’egrad ni ngu’ur thoyed e rappa’ u mit fare Kahol ko M’ag.

Fare Kahol ko M’ag nni fek nga Jerusalem

25 Ma aram me yan David ni Pilung nge pi ga’ nu Israel, nge pi ga’ ko salthaw ko naun rok Obed Edom ni ngar feked fare Kahol ko M’ag, miyad tay ba madnom nib ga’. 26 Ra maligachgad nga medlip i garbaw ni pumo’on nge medlip i saf, ni bochan e nga ri muduwgil nra ayuweg Got e pi Levite ni yad be chibiy fare Kahol ko M’ag. 27 Ke chuw David ngab mad nni ngongliy ko mad ni wech’, ma ku errogon fapi girdi’en e musik, nge Kenaniah ni ir e ma gafaliyrad, nge pi Levite ni yad be fek fare Kahol. Miki chuw David ngab mad ni efod. 28 Ma aram e urngin e girdi’ nu Israel ma ra’uned ko fare Kahol ko M’ag nga talang u Jerusalem ni yad be tolulnag e felfelan’, ma be yan lingan e rappa’, yabul, nge cymbal, nge harp.

29 Nap’an ni yibe fek fare Kahol i yib ngalan fare binaw, me Mikal ni be’ ni bpin ni fak Saul e changar nga wean u winda me guy David ni Pilung ni be churu’ ma be og ngalang ko felfelan’, mri fanenikan daken David.