1 CHRONICLES 18

Pi mael ni gel David riy

1 Miki yan i bangiyal’ me mael David ni Pilung ngak piyu Filistia ngki gel ngorad. Me fek fare binaw nu Gath u pa’rad nge yuchi binaw nib liyeg. 2 Miki gel ngak piyu Moab, miyad par nga tan pa’ ngu’ur pi’ed e tax ngak. 3 Me migid me mael David ngak Hadadezer ni Pilung ko nug nu Zobah ko nam nu Soyria, nib chugur nga bang ni tafen Hamath, ya be guy Hadadezer rogon ni nge tafnay e ba’ ni talang fare lul’ ni Eufrates. 4 Me kol David reb e bbiyu’ e chariot rok, nge medlip e bbiyu’ e salthaw nma yan u os, nge rliw’ e bbiyu’ e salthaw nma yan u but’. Me fek e os nra gaman u ra’ay e chariot me t’ar ay e tin kabay os.

5 Nap’an ni l’oeg e pi Syrian nu Damaskus ba raba’ i salthaw ni ngar ayuweged Hadadezer ni Pilung, me mael David ngorad nge thang e fan rok rliw’ nge l’agruw e bbiyu’ e salthaw. 6 Ma aram me n’uf e pi tent ko salthaw rok u lan taferad, miyad par nga tan pa’ ngu’ur pi’ed e tax ngak. Me gagiyegnag SOMOL David nge gel u gubin yang. 7 Me fek David u fithik’ e yargel fapi shield ni gol ni i fek e pi tolang ko salthaw rok Hadadezer nga Jerusalem. 8 Miki fek e bronze ni yo’or u Tibhath ngu Kun, gal binaw ney e i gagiyegnag Hadadezer. (Pi bronze ney e munmun me fanay Solomon nge ngongliy ba teng ngay, nge yuler i duga’, nge mam’en e Tempel.)

9 Me rung’ag Toi ni Pilung nu Hamath nike gel David ngak fa raba’ i salthaw rok Hadadezer ni ga’ngin. 10 Ma aram me l’oeg Joram nib mo’on ni fak ni nge nang salpen David ni Pilung me pining e magaer ngak ko gel nike tay ngak Hadadezer, ni aram facha’ ni ur chamgow Toi nike bokun yay. Me fek Joram e tow’ath i yan ngak David nni ngongliy ko gol, silber nge bronze. 11 Me ognag David ni Pilung fa pin’en ni ngan fanay ko liyor, nge dachug ko pi silber nge gol ni fek rok e pi nam ni gel ngay, yu Edom, Moab, Ammon, Filistia, nge Amalek.

12 Abishai ni chitiningin Zeruyah, e gel ngak piyu Edom u lan ba loway ni Loway ni Sol fithingan ni thang e fan rok ragag nge meruk e biyu’ i yad. 13 Me n’uf e pi tent ko salthaw u lan yu Edom i yan, me par e girdi’ nu rom nga tan pa’ David ni Pilung. I SOMOL e gagiyegnag David nge gel u gubin yang.

14 Me gagiyeg David u daken yu Israel ni ga’ngin me guy ni ngi i par e girdi’ rok nib mat’aw ma ba yal’uw rogon ni yibe ayuwegrad. 15 Joab nib mo’on ni walagen Abishai e ir e ga’ ko fa raba’ i salthaw rok David; Jehoshafat nib mo’on ni fak Ahilud e ba milfan babyoren ban’en ngak; 16 Zadok nib mo’on ni fak Ahitub nge Ahimelek nib mo’on ni fak Abiathar e yow e prist; Serayah e tayol u tafen e puf oloboch; 17 Benayah nib mo’on ni fak Jehoyada e ba milfan e pi matnag rok David ngak; ma pi pumo’on ni fak David e yad e th’abi tolang ko pigpig ni yima tay ngak David ni Pilung.