1 CHRONICLES 28

Tin ni yog David rogon ni ngan rin’ ko fare Tempel

1 David ni Pilung e pining gubin fapi tolang nu Israel ngar mu’ulunggad nga Jerusalem. Ere gubin e pi tayugang’ ko pi ganong, nge pi tolang ni yad ma tay murung’agen e maruwel u gil’ilungun e en pilung, nge pi mitethin ko yuke girdi’, nge pi’in yad ma gonpiy rogon e binaw nge yu ran’ i gamanman nib milfan ngak e en pilung nge fapi pagel ni fak — gubin e pi ga’ u lan fare naun rok e pilung, nge pi’in gireng ko salthaw, nge pi pumo’on nib ga’farad e go’ ra mu’ulunggad ngalan yu Jerusalem.

2 Me sak’iy David nga p’eowcherad me ga’ar ngorad: "Gimed e pumo’on ko nam rog, motoyilgad ngog. Kug leamnag ni nggu toy tafen fare Kahol ko M’ag, ni nge tagl’iy rifrifen ay SOMOL ni Got rodad. Ku gu t’ar madlin ba tempel ni ngan toy ni ngu’un liyor ngak riy, 3 machane ke siyegeg ni nggu rin’, ni bochan e gu ba salthaw ma kaygi yo’or ba racha’ ni ku gu pu’og. 4 I SOMOL ni fare Got nu Israel, e ke mel’egeg nge pi’in owcheg ni ngu’ug gagiyeg niged yu Israel ndariy n’umngin nap’an. Ke mel’eg fare ganong rok Judah ni yad e ngu’ur gafaliyed, mu lan yu Judah e ke mel’eg e tabnaw rok e chitamag. Mu lan e re tabnaw nem ni ga’ngin mab felan’ SOMOL ngay ni nge pilung nigeg u daken ga’ngin yu Israel. 5 Ke pi’ e pagel gu fakay nib yo’or, mu fithik’rad ni yad gubin e ke mel’eg Solomon ni nge gagiyegnag ga’ngin yu Israel, ni fare nam rok SOMOL.

6 "I SOMOL e ga’ar ngog, ‘Fare mo’on ni fakam i Solomon e ir e bayi toy fare Tempel rog. Ku gu mel’eg ni nge mang ba pumo’on ni fakag, ma bay gu mang chitamngin. 7 Bay gu tay gil’ilungun ngi i par ndariy n’umngin nap’an ni fa’anra i par ni be fol u gubin e pi motochiyel rog nge tin kugog ni bod ni be rin’ e chiney.’

8 "Ere gimed e pi girdi’ rog, chiney u p’eowchen e Got rodad nge re ulung ney ni ga’ngin yu Israel, ni girdi’en SOMOL, gu be teg ngomed ni ngrim folgad u gubin ban’en nike yog SOMOL ni Got rodad, ya nge yag ni ngkum pired u daken e re nam ney nib manigil me yag ni mpi’ed nga pa’ e tin bay feni yib e mfen ndariy n’umngin nap’an."

9 Me ga’ar ngak Solomon, "Fakag, gu be yog ngom ni ngam nang e Got rok e chitamam mag pigpig ngak u polo’ i gumircha’em ngu lanin’um, ni bod ni ug rin’. Manang gubin e tafnay rom nge tin ga be ar arnag, ma fa’an ga ra sul ngak ma ra rung’ag e meybil rom. Machane fa’anra mu fek yathin, ma ra n’agem ni manemus. 10 Thingar mu nang ni SOMOL e ke mel’egem ni ngam toy e Tempel rok nib thothup. Ere mu ngongliy e chiney ni dab mu sulsul riy nga tomur."

11 David e pi’ ngak Solomon rogon ni ngan toy gubin naun ko fare Tempel, pi senggil ni tafen e cha’ar nge gubin e tin kabay e senggil, nge fa Gin Th’abi Thothup, ni aram e gin yima n’agfan e denen riy. 12 Miki pi’ ngak babyoren rogon ni leamnag ni ngan ngongliy lan e yoror nge pi senggil nib liyeg, nge pi senggil ni yima cha’riy e pi tatalin e Tempel nge pi tow’ath ni kan ognag ngak SOMOL riy. 13 Miki pi’ David ngak babyoren rogon ni ngan yarmiy fapi prist nge yu Levi u rogon e maruwel rorad, ni ngan rin’ e maruwel u Tempel, ma ngar ayuweged gubin tatalin fare Tempel. 14 Me yog rogon urngin e silber nge gol ni ngan fanay ngan ngongliy pi tatalin e gam’ing nem 15 tin ngan fanay nga reb e magal nge tagil’ fare magal, 16 nge pi tabel ni silber, nge reb e tabel nib gol ni aram e gin yima tay fapi flowa ni lof ngay ni kan ognag ngak Got. 17 Miki yog ko bu uw urngin e gol ni ngan fanay ngan ngongliy e pi fok riy, nge yu raba’ i dabiy, nge pi rume’, nge uw urngin e silber nge gol ni ngan ngongliy e yu raba’ i pilet ngay, 18 nge bu uw urngin e gol ni ngan ngongliy fare altar ni yima urfiy e incense u daken nge tin ngan ngongliy fare chariot riy ni fan ko fa gali n’en ni bay pon ni kerubim fithingan ni kar pithigew porow nga daken fare Kahol ko M’ag rok SOMOL. 19 Me ga’ar David ni Pilung, "Gubin e pin’ey ni bay u babyor ma ni yoloy nrogon ni yog SOMOL ngog ni ngan rin’."

20 Me ga’ar David ni Pilung ngak Solomon ni fak, "Nge pagan’um me muthan’um. Mu tabab ko maruwel ma dab mu pag ban’en nge talegem. I SOMOL ni Got, ni ir e gu ma pigpig ngak e bayi par rom. Dabi pagem, machane ra par rom nge mada’ ko ngiyal’ ni kam mu’ i muruwliy fare Tempel rok. 21 Pi prist nge yu Levi e kan mu’ i pi’ e maruwel ngorad ni ngu’ur rin’ed u lan fare Tempel. Girdi’en e maruwel ni gubin mit e salap e ba m’aguwan’rad ni ngar ayuweged gur, nge gubin e girdi’ nge pi’in yad ma yog e thin rorad e yad be motoyil ngom."