1 CHRONICLES 21

David ni matha’eg Girdi’

1 Mo’onyan’ e ba’adag ni nge girengiy e tin ba mo’maw’ nga daken e girdi’ nu Israel, ma aram me k’aring lanyan’ David ni nge matha’eg girdi’. 2 Me yog David ngak Joab nge ku boch e tolang ni ga’ar, "Mmarod u balay yu Israel nga balay ngam the’eged e girdi’. Gu ba’adag ni nggu nang urngin e girdi’."

3 Me fulweg Joab ni ga’ar, "Mang e yi gi yo’ornag SOMOL e girdi’ nu Israel nge man e ra’ay yay ni yad ba yo’or ko chiney! Gur e en ni pilung, yad gubin ni go’ yad e tapigpig rom. Mang ni ga ba’adag ni ngam rin’ e ran’ey nge buch e rok e re nam ney ni ga’ngin?" 4 Machane me yog fare pilung ngak Joab ni kemus ni nge fol ko tin keyog ngak ni nge rin’. Me yan Joab nge milekag u daken fare nam nu Israel ni ga’ngin, ma aram me sul nga Jerusalem. 5 Me yib i yog ngak David ni Pilung urngin u gubin e pumo’on nrayag ni ngar uned ko salthaw: 1,100,000 u lan yu Israel ma 470,000 u lan yu Judah. 6 Bochan e de magan’ Joab ko tin keyog fare pilung ngak ni nge rin’, ma aram e de the’eg e girdi’ ko fa gali ganong rok Levi nge Benjamin.

7 De fel’ u wan’ Got e tin kan rin’, ma aram me gechignag yu Israel. 8 Me ga’ar David ngak Got, "Kug ngongliy ba denen nib ga’ ko ran’ey ni kug rin’! Wenig ngom mun’ag fan rog. Ya kug ngongol u fithik’ e balyang."

9 Ma aram me ga’ar SOMOL ngak Gad ni profet rok David, 10 "Mman ngamog ngak David ni dalip ban’en ni ku gu mel’eg. Ni ir e nge mel’eg reb riy ni arme bin nggu pi’ ngeb ngak." 11 Me yan Gad ngak David nge yog ngak e n’en keyog SOMOL, me fith David ni ga’ar, "Ere bin bu uw riy? 12 Uyngol ni dalip e duw, fa dalip e pul ni ngu’um mil rok e yu raba’ i salthaw ni to’ogor rom; fa dalip e rran ni nge cham SOMOL ngom ko saydon rok me pi’ ba misilpig nga daken e nam rom; me maruwel nga reb e engel rok nge fek e yam’ nga daken yu Israel ni ga’ngin? Mang e fulweg ni nggu pi’ ngak SOMOL?"

13 Me fulweg David lungun Gad ni ga’ar, "Kug aw nga bang nrib gel e gafgow riy! Machane dabug ni girdi’ e nge gechig nigeg. Mu pag nge mang SOMOL e gechig nigeg, ya ir e bmurunguy."

14 Ma aram me pag SOMOL ba misilpig nge yib ngak e girdi’ nu Israel, ma medlip i ragag e bbiyu’ i yad e yim’. 15 Aram me l’oeg ba engel ni ngki thang e fan rok e girdi’ nu Jerusalem, machane me thilyeg e tafinay rok me ga’ar ngak fare engel, "Mu tal, ke gaman!" Ma ke sak’iy fare engel ko gin ma n’ag Araunah keru’ e grain riy, cha’anem e be’ nu Jebu.

16 Me guy David fare engel nib sak’iy u daken e nifeng nike kol e saydon rok nga pa’ nike fal’eg rogon ni nge gathay yu Jerusalem. Ma aram e David nge pi tayugang’ ni karon’ed e mad ni tutuw e go’ ra siro’gad nge math owcherad nga daken e but’. 17 Me meybil David ni ga’ar, "Got i gag e cha’ ni gu rin’ e kireb. I gag e gog ni ngan the’eg e girdi’. Ere ba mang e ke bucheg e pi girdi’ ney nike gafgow? SOMOL ni Got rog, mu gechig nigeg nge chon e tabnaw rog, ma ga pag e girdi’ rom."

18 Me yog fare engel rok SOMOL ngak Gad ni nge yog ngak David nge yan i toy ba altar ni fan ngak SOMOL ko gin’em nma n’ag Araunah keru’ e grain rok riy. 19 Me fol David ko n’en keyog SOMOL nge yan, ni bod nike yog Gad ngak. 20 U rom ko gin man’ag Araunah keru’ e grain riy e bay Araunah nge fa aningeg i pagel ni fak riy ni yad be n’ag keru’ e wheat, ma nap’an e ra guyed fare engel, me mil fapi pagel ni fak ngranod ra mithgad. 21 Ma yug nap’an ni guy Araunah i David ni Pilung nike yib i yib me chuw ko fa gin man’ag keru’ e grain riy nge yan i siro’ ngak David nge math owchen nga but’. 22 Me ga’ar David ngak, "Mu pi’ ngog nchuway’ e re gin’ir ni ga man’ag keru’ e grain rom riy, ya nge yag ni gu toy ba altar riy ni fan ngak SOMOL, nge tal e re misilpig ney. Gu ra pi’ pulwon ngom ni ga’ngin."

23 Me ga’ar Araunah, "Mu fek, i gur pilung, ngam rin’ e tin ga ba’adag ngay. Ba’aray e garbaw ni ga ra pi’ ni maligach ni mo’oruf u daken e altar, ma ba’aray e yungi plang ni yi man’ag keru’ e grain ngay nra mang l’ud, nge wheat ni ga ra pi’ ni maligach. Gubin ni kug pi’ ngom."

24 Machane me fulweg fare pilung ni ga’ar, "Dangay, gu ra pi’ pulwon ngom ni ga’ngin. Dab gu pi’ ni maligach ngak SOMOL ban’en nib milfan ngom, ni ban’en nda gu pi’ pulwon." 25 Me pi’ pulwon ngak Araunah fare gi tagil’ e man’ag keru’ e grain ni nel’ mir’ay e salpiy ni gol. 26 Me ubung ba altar rok SOMOL u rom nge pi’ e maligach ni mo’oruf nge maligach nma gapaseg thilin Got nge girdi’ riy. Me meybil me fulweg SOMOL taban e meybil rok ko nifiy ni pi’ u lang nge urfiy fapi maligach u daken e altar.

27 Me yog SOMOL ngak fare engel ni nge fulweg e saydon rok nge tay, me fol fare engel riy. 28 Me guy David nike fulweg SOMOL taban e meybil rok, ma aram me pi’ e maligach u daken fare altar u rom ko fa gin’en ntagil’ e man’ag keru’ e grain rok Araunah. 29 Ma fare Tent u p’eowchen SOMOL ni ngongliy Moses u daken e ted, nge fapi altar ni yima pi’ e maligach ni mo’oruf riy e go’ kabay ko gin tagil’ e meybil u Gibeon e ngiyal’nem; 30 machane dakiyag rok David ni nge yan e ngaram e ngiyal’nem ni nge liyor ngak Got, ya kerus ko fare saydon rok fare engel ku SOMOL.