1 CHRONICLES 5

Pi’in Owchen Ruben

1 Irera’ e pi’in owchen Ruben, ni en nganni’ ko pi pumo’on ni pifak Jakob. (Bochan e ra pirew reb fapi bpin rok e chitamngin, me mul u pa’ mat’wun e en nib nganni’ e pagel u fakay, min pi’ ngak Josef e pi mat’wun nem. 2 Ma aram e fare ganong rok Judah e par ni ir e th’abi gel me ir e pi’ ba tagagiyeg ni fan ngak urngin fapi ganong.) 3 I Ruben ni nganni’ ko pumo’on ni fak Jakob e immoy aningeg i pumo’on ni fak: Hanok, Pallu, Hezron, nge Karmi.

4-6 Irera’ e pi’in owchen Joel u reb e mfen ngu reb: Shemayah, Gog, Shimei, Mikah, Reayah, Baal, nge Beerah. Me Tiglath Pileser ni ir e pilung nu Assyria e kol Beerah ni ba tagagiyeg ko fare ganong nge pi’ ni nge kalbus nga reb e nam.

7 Babyoren fare tabnaw e bay riy e pi tagagiyeg ni ba’aray nu lan e ganong rok Ruben: Jeyel, Zekariah, 8 nge Bela, nib mo’on ni fak Azaz ni fak Shema, ni be’ ko fare ke girdi’ rok Joel. Re ke girdi’ ney e ur pired u lan yu Aroer ngu lan fare gi nug ni yan u rom ko lel’och nge mada’ nga Nebo nge nga Baal Meon. 9 Immoy yu ran’ i gamanman ni fakrad nib yo’or u lan fare nam nu Gilead, ma aram mu’ur pired u rom ko fare binaw ni yan ko ngek nge mada’ ko fare gi ted ni dariy ban’en riy me k’iy u rom nge mada’ ko fare lul’ ni Eufrates.

10 Nap’an ni Saul e pilung me yan fare ganong rok Ruben ra chamgad ngak e pi Hagrite, ngar thanged e pogofan rorad u fithik’ e mael, miyad par u lan fare nam rorad ni bay ko ngek u Gilead.

Pi’in owchen Gad

11 Ganong rok Gad e ur pired ko lel’och rok Ruben u lan fare nam nu Bashan nge yan ngalan e ngek nge mada’ nga Salekah. 12 I Joel e ga’ ko fare ke girdi’ nib ga’ lungrad ko gagiyeg, me Shafam e ga’ ko kaen ni migid e girdi’ ni kub ga’ farad. Me Janai nge Shafat e yow ba ga’ rok boch e yuke girdi’ nu lan yu Bashan. 13 Ma tin kabay e girdi’ ni girdi’en fare ganong e ba milfarad ko medlip ke girdi’ ni ba’aray: Maikal, Meshullam, Sheba, Jorai, Jakan, Zia, nge Eber. 14 Yad e pi’in owchen i Abihail nib mo’on ni fak Huri, ni ba’aray e pi chitamngin kakrom ni yad ba kakrom ngak: Abihail, Huri, Jaroah, Gilead, Maikal, Jeshishai, Jahdo, Buz. 15 Ahi, nib mo’on ni fak Abdiel ni fak Guni, e ir e ba ga’ lungun rok e pi yuke girdi’ ney. 16 Ur pired u Bashan ngu Gilead, nge pi yochi binaw u rom ngu ga’ngin yang fa yungi binaw ni yima chugliy yu ran’ i gamanman riy u Sharon. ( 17 Pi marang’ag ney e ni yoloy nga babyor nnap’an e Jotham e pilung nu Judah nge bin l’agruw e Jeroboam ni Pilung u Israel.)

Yu raba’ i salthaw rok e pi ganong nu Ba’ ni Ngek

18 U lan e pi ganong rok Ruben, Gad nge ba’ ni Ngek e Manasseh, e immoy 44,760 e salthaw riy nri yad ba salap ko saydon nge mun gat’ing nge rogon i fanay e shield. *5:18 SHIELD: Bangi ban’en nma rungrung e salthaw nga fon ko pi gan e gat’ing nge sarey. 19 Mranod ko mael ngak e pi Hagrite nge ganong ko Jetur, Nafish, nge Nodab. 20 Miyad tay e pagan’ rorad nga daken Got ngar meybilgad ngak ni nge ayuwegrad, me fulweg Got taban e pi meybil rorad nge gagiyeg nagrad ngar gelgad ngak e pi Hagrite nge pi’in yad ngabang. 21 Miyad fek rok e pi to’ogor rorad 50,000 e kamel, 250,000 e saf, nge 2,000 e dongki, mu ku ra feked 100,000 e pumo’on u tan e mael ni kalbus. 22 Pire’ e pi to’ogor nra li’ed nge yim’, ya fare mael e Got e turguy. Ra pired u rom nge mada’ ko ngiyal’ nfekrad nga wuru’ e nam ni kalbus.*5:22 WURU’ E NAM NI KALBUS: Gonap’an 733 B. C. me yib piyu Assyria ngar koled e ba’ ni yimuch yu Israel nge ba’ ni ngek fare Lul’ ni Jordan ngar pi’edrad nga wuru’ e nam ni kalbus (ku arrogon ni bay ko 2 Ki 15:29).

Pi Girdi’ u ba’ ni Ngek e Manasseh

23 Pi girdi’ u ba’ ni Ngek e Manasseh e ra pired u lan e gin nib milfan nga Bashan i yan ko lel’och nge mada’ nga Baal Hermon, Senir, nge Burey ni Hermon, ma kar yo’or ra yo’orgad. 24 Pi cha’ ni ba’aray e yad lolgen e yuke girdi’ rorad: Efer, Ishi, Eliel, Azriel, Jeremiah, Hodaviah, nge Jahdiel. Yad gubin ma bogi salthaw nrib cheag, yi go’ yim nangrad ni yad e ga’ ko yuke girdi’ rorad.

Pi ganong u ba’ ni ngek nni chuwegrad ko nam ni ur pired riy

25 Machane fapi girdi’ e da ur yul’yul’gad ngak e Got rok e pi chitamngirad kakrom miyad digey ngu ur tedfan e pi got rok e pi girdi’ nike tulufrad Got nga wuru’ fare nam. 26 Ere me pag Got i Pul ni Pilung nu Assyria (ni ku yima yog Tiglath Pileser ngak) nge yib i mael ko fare nam rorad. Me pi’ e pi ganong rok Ruben, Gad nge Ba’ ni Ngek e Manasseh ngranod ni kalbus nga Halah, Habor, ngu Hara, ngu to’oben fare lul ni Gozan, miyad magay ko yungi n’em nda ku ra chuwgad.