1 Me fith David ni Pilung laniyan’ urngin e tolang ko salthaw ni yad ma gafaliy yu raba’ i salthaw ni yu bbiyu’ nge yu ra’ay girdi’en. 2 Ma aram me yog ngak urngin e girdi’ nu Israel ni ga’ar, "Fa’an gimed ra pining e kefel’ ngay ma fa’anra bm’agan’ SOMOL ni Got rodad ngay, ma gadad l’oeg e pi tamal’og ngranod ngak e tin kabay e girdi’ ko nam rodad nge prist nge piyu Levi u lan e pi binaw rorad, nganog ngorad ngarbad ngad mu’ulunggad nga ta’bang. 3 Ma aram ma gadad yan ngad feked fare Kahol ko M’ag rok Got, ni un sabalbalyang nigey riy nnap’an nib pilung Saul." 4 Ma bfel’ u wan’ e girdi’ e n’en keyog David miyad pining e kefel’ ngay.

5 Aram me kunuy David urngin e girdi’ nu Israel nga ta’bang u ga’ngin yang fare nam, ni tabab ko fare mathil nu Egypt u lan e yimuch nge mada’ ko wo’ u thilin e burey u Hamath u lan e lel’och, ni bochan e nge yag ni ngan fek fare Kahol ko M’ag u Kiriath Jearim nga Jerusalem. 6 Me yan David nge fapi girdi’ ngalan fare binaw nu Baalah, ni ku yima yog ni Kiriath Jearim, u lan yu Judah, ni ngar feked fare Kahol ko M’ag rok Got, ni bay fithingan SOMOL riy ya be par u tagil u daken fa gali kerubim.✝ 7 Miyad fek fare Kahol ko M’ag nga wean u lan e naun rok Abinadab ngar ted nga daken reb e cart ni kab be’ech. Me Uzzah nge Ahio e ur gafaliyew fare cart, 8 nnap’an ni be churu’ David nge urngin fapi girdi’ ni karimus rograd ko liyor ni yad be tay ngak Got. Yad be tang ma yad be chubeg talin e musik ni harp, drum, cymbal, nge rappa’.

9 Nap’an nrabad ko gin yima n’ag keru’ e grain riy u Kidon, me tun ay fare garbaw me k’iyag Uzzah pa’ nge kol fare Kahol ko M’ag. 10 Ma kangiyal’nem me damumuw SOMOL ngak Uzzah nge thang e fan rok ni bochan e ke math ko fare Kahol. Me yim’ u rom u p’eowchen Got, 11 aram min pining fithingan e re gin’em ni Perez Uzzah.* Mri damumuw David ni bochan e ke gechignag SOMOL i Uzzah u fithik’ e damumuw.

12 Ma aram me rus David ngak Got me ga’ar, "Bu uw rogon mu gu fek fare Kahol ko M’ag nge un ngog e chiney?" 13 Aram made fek David nge un ngak nga Jerusalem. Ya n’en ni rin’ e digey u lan e naun rok be’ nib mo’on ni Obed Edom fithingan, nri be’ ko fare binaw nu Gath. 14 Me par u rom ni dalip e pul, me fal’eg SOMOL wa’athan e tabnaw rok Obed Edom nge urngin e tirok ban’en.