10 <<Vu zuwa le a yuwan aakpati a ɗanga akashiya uga’an wa̱ yi ana a ta’atsu na akapi, washin wa̱ yi waru ana e re na akapi, mishin waru ana e re na akapi. 11 A̱vu vu sura yi na̱ zinariya can, a̱ a̱tsuma̱ na alanga suru, reve vu ginda̱la̱ nge’en ma̱ yi na̱ zinariya. 12 Vu zuɗa̱ nkawani n zinariya n na̱shi reve vu zuwa le a ana a̱ na̱shi va aakpati’i, ejere a̱ nge’en n ta̱ ejere waru a̱ nge’en n ro. 13 Vu yuwan aɗanga a ɗanga akashiya, reve vu sura le na̱ zinariya. 14 A̱vu vo otoloi aɗanga’a a̱ wungu wu nkawani wu nge’e’en adama o utanusu wa aakpati’i.>> 15 Aɗanga’a a̱ ta̱ da̱na̱ pe a̱ wungu wa aakpati’i; o foɗo le shi. 16 Reve vu zuwa pe a̱tsuma̱ a akpati’i Nzuwulai n na maa ca wu. 17 Vu yuwaan aakpati’i ikpa̱ta̱tsu i zinariya can i na yoo o’wo uba̱ta̱ u matara mo ume mo unusu uga’an wa̱ yi ana a ta’atsu na akapi washin waru ana e re na akapi. 18 A̱vu vu yuwan nan kerobobi* e re n zinariya na a rumai a̱ nge’en n re mi ikpa̱ta̱tsu m matara mo ume mo unusu’u. 19 Vu zuwa kerobi ta̱ o ukosu u ta̱ za ve ire waru a̱ nge’en n ndeɗe. Vu yuwan nan kerobobi’i ili i ta̱ ni ikpa̱ta̱tsu’u a̱ nge’en n re’e. 20 Evelu a nan kerobobi’i a̱ da̱na̱ ta̱ mishin ubapu, e ikpa̱ta̱tsu i matara mo ume mo unusu. Nan kerobobi’i a̱ da̱na̱ a̱ nka̱la̱la̱i a̱ ka̱lyuwusa̱ ikpa̱ta̱tsu’u. 21 Vu zuwa ikpa̱ta̱tsu’u zuva va akpati’i, reve vu zuwa pe atali a na a ɗanai ɗe Nzuwulai’i, za na maa ca wu.

22 Ɗe ɗa maa ga’asan na̱ a̱vu, reve n yuwan adanshi na̱ a̱vu e ikpa̱ta̱tsu ya Akpati a Nzuwulai 'i e memere ma nan kerobobi n re n na n ri zuva vi ikpa̱ta̱tsu’u adama e ili i na n zuwai i na maa ca wu adama a aza a Isra’ila.

1 Bezale yuwan ta̱ aakpati’i na̱ ɗanga akashiya. Uga’an wa̱ yi u ta rawa ana uta̱li na akapi, washin wa̱ yi u ta rawa ana ushin na akapi, mishin ma̱ yi u rawa ta̱ ana e re na akapi.

1 A̱vu A̱sulazuva a damma Musa, 2 <<O urana wu ufaru u woto wu ufaru vu ta̱ shuwa̱ Oogodoꞌo, Oogodo o Uga’asusan. 3 Vu ta zuwa Akpati a Nzuwulai’i a̱tsuma̱ a̱ yi, reve vu sa̱ga̱do a̱ba̱jini o umuna wu una̱ntsu za na e geshe Akpati’i.

20 A̱vu u tara Nzuwulai’i a̱vu u zuwa yi a akpati’i, a̱vu wo otoloi aɗanga’a a akpati’i, a̱vu u zuwa ikpa̱ta̱tsu i matara mo ume mo unusu’u zuva va̱ yi. 21 Reve wo oto akpati’i o oogodoꞌo. A̱vu u sa̱ga̱do umuna wu una̱ntsu’u na we geshe Akpati’i, cine A̱sulazuva a dammai Musa.

89 Mantsa ma na Musa uwai a̱tsuma̱ o Oogodo o Uga’asusan adama u yuwan adanshi na̱ A̱sulazuva biti, reve wu uwwa uɗyo a yuwusan adanshi na̱ a̱yi e memere ma nan kerobobi e re zuva vi ikpa̱ta̱tsu ya Akpati a Nzuwulai.

33 Ɗaɗa aza a Isra’ila a̱ 'yoyin diga a masasan ma̱ A̱sulazuva, reve a yuwan mmalu mu rana ta’atsu. Akpati a Nzuwulai a̱ A̱sulazuva a ɗa a walaa nle elime a mantsa ma ayin a ta’atsu o ndolo adama u zamiya le uba̱ta̱ u na ee ivuwan. 34 Waru eleshe a̱ A̱sulazuva a̱ da̱na̱ ta̱ zuva le nu urana a mantsa ma na a̱ 'yoyin diga o uva̱la̱ta̱. 35 A mantsa ma na suru akpati’i a̱ 'yoyin, Musa tsu damma ta̱,

<<Yon A̱sulazuva!

Lyawa n’yuwatan ma̱ wu m bete’we,

aza a na a 'yuwan nuwu a suma a̱ ma̱ka̱ka̱n ma̱ wu.>>

36 Reve a mantsa ma na u cipa̱i biti, a̱vu u damma,

<<A̱sulazuva,

ka̱mba̱ uba̱ta̱ wa ama a Isra’ila ukpakukupa kupa a na a̱ ri n kece shi.>>

1 A̱sulazuva a yuwan ta̱ adanshi na̱ Musa u damma, 2 <<Vu damma ama a Isra’ila a̱ ta̱wa̱ na aɗanga kupa ne ejere, aaɗanga a̱ ta̱ diga uba̱ta̱ wu zagbain vu ugundo wu nkaya n le. Vu ɗana aala a vuma suru a aaɗanga a̱ yi. 3 A̱vu vu ɗana aala a Haruna a aaɗanga a̱ Levi. Adama a na a ta zuwa aaɗanga a̱ ta̱ adama a zagbain vu ugundo wu nkaya suru. 4 Vu zuwa aɗanga’a o Oogodo o Uga’asusan a̱ ma̱ka̱ka̱n ma Akpati a Nzuwulai, uba̱ta̱ u na n tsu ga’asusan na̱ a̱vu. 5 Aaɗanga a vuma na n ɗangulai o to topo. Ne ɗa ma̱a̱ ta̱wa̱ nu ukosu wa adanshawuya a na ama a Isra’ila a yuwusaan ɗu.>>

6 A̱vu Musa yuwan adanshi na ama a Isra’ila, a̱vu azagbain e le a ca yi aɗanga kupa ne ejere, aaɗanga a̱ ta̱ o una̱ wu zagbain suru vu ugundo wu nkaya n le, aaɗanga a Haruna fo a̱ shi ta̱ pe a̱tsuma̱ e le. 7 A̱vu Musa zuwa aɗanga’a a̱ ma̱ka̱ka̱n ma̱ A̱sulazuva a̱tsuma̱ Oogodo o Uga’asusan.

8 Ana usana u tawai a̱vu Musa uwa a̱tsuma̱ o Oogodo o Uga’asusan, a̱vu we ene aaɗanga a Haruna za na ri o una̱ wu u’wa wa̱ Levi, u topo goon shi agba hali u yuwan ta̱ yipa̱lu, u ɓoso u matsan alumon. 9 A̱vu Musa pura̱ aɗanga’a suru diga a̱ ma̱ka̱ka̱n ma̱ A̱sulazuva, a̱ ta̱wa̱ uba̱ta̱ wa aza a Isra’ila suru. A̱vu a̱ ka̱lyuwa̱, a̱vu vuma suru tara aaɗanga a̱ yi.

10 A̱vu A̱sulazuva a damma Musa, <<Ka̱mbuwa̱ aaɗanga a Haruna elime a Akpati a Nzuwulai, a zuwa yi iroci e ekere a aza aciyogbamu. A̱yi nda u ta zuwa a̱tyo a adanshawuya a aci a̱ va, ta̱wa̱ a̱ kuwa̱ wan.>> 11 A̱vu Musa yuwan cine A̱sulazuva a damma niyi tsoyi.

14 Ana aza a Isra’ila a̱ pura̱i diga a̱ va̱la̱ta̱ le adama a pasa Uɗolu wa̱ Urudu, reve nan ganu a na a̱ ri utanuwu na Akpati a Nzuwulai’i a wala elime e le. 15 Mini’i u shi ta̱ u shiwan hali a̱ nge’en cine u tsu yuwan a mantsa ma wandari mantsa mo ugasa. Suru na̱ ne ana nan ganu gba o otoshi ana e le a̱tsuma̱ a̱ mini’i, 16 reve mini ma na mee yeneshe ma̱ gulu a̱vu u ɓoloto u yuwan aganga uba̱ta̱ u ta̱ gon alanga a̱ lyuci na a̱ tsu ɗe Ada̱mu za na ri zuzu na̱ Zaretan, mini ma na gba ma̱a̱ zurusu a Mala ma Araba, za na a̱yi ɗa Mala ma Akpaɗi u koɗo ta̱ suru suru. Ne ɗa ama a pasai a̱ nka̱la̱la̱i na̱ Jeriko. 17 Reve nan ganu a na a tanuyi Akpati a Nzuwulai a̱ A̱sulazuva e isawan nu ucira e iɗa yu u’yewu e memere mo Uɗolu wa̱ Urudu. Aza a Isra’ila gba suru a pasa ta̱ e iɗa yu u’yewu hali she ana o kotoi mapasa.

18 Reve nan ganu a na a̱ ri utanuwu na Akpati a Nzuwulai a̱ A̱sulazuva o uta̱ pe e memere ma̱ Urudu. Ana e le a dasa iɗa yu u’yewu, reve mini ma̱ Urudu ma̱ ka̱mba̱ cine u shi. A̱vu u shiwan hali a̱ nge’en cine u shi.

1 Reve a katsu na̱ntsu lyuci va̱ Jeriko a̱tsuma̱ na alanga adama o wovon wa aza a Isra’ila. Babu za na uwai a̱tsuma̱ a̱ lyuci’i, waru babu za na uta̱i a alanga. 2 Reve gba A̱sulazuva a damma Josuwa, <<Ka̱lyuwa̱, n ca ta̱ Jeriko e ekere a̱ wu oɓolo na̱ mogono ma̱ yi na̱ a̱soja o ucira a̱ yi. 3 A̱vu na ali o uvon a̱ wu i ka̱nda̱ruwa̱ lyuci’i ma̱ɓula̱ uta̱ urana u ta̱ hali rana ta̱li. 4 Vu zuwa nan ganu e cindere a tara avana a̱ a̱giri’i, reve vu zuwa le a wala elime na Akpati a Nzuwulai. O urana we cindere, reve a̱vu oɓolo na̱ a̱soja a̱ wu i ka̱nda̱ruwa̱ lyuci’i toto ucindere, nan ganu waru e ivulusa̱ avana’a. 5 No o koto uka̱nda̱ruwusa̱ u lyuci’i, na̱ vu uwwa e ivulula̱i avana’a na̱ yisaali ya̱ a̱bunda̱ lon, reve vu zuwa ama’a suru o ɓosho na̱ yisaali ya̱ a̱bunda̱. Ukari u lyuci’i u ta̱ riya̱, reve ama’a a gawan a uwa a̱tsuma̱ a̱ lyuci’i mejege.>>

6 Reve gba Josuwa ulobo wa̱ Nun u ɓoloto nan ganu’u uba̱ta̱ u ta̱, reve u damma le, <<Tanuyi Akpati a Nzuwulai, reve i zuwa nan ganu e cindere o ro a wala elime a Akpati’i uguzu na avana a̱ a̱giri’i.>> 7 Reve u damma ama’a, <<Walai i ka̱nda̱ruwa̱ lyuci’i, a̱soja o ro gba ni itana yu uvon a ta uwa elime a Akpati a Nzuwulai a̱ A̱sulazuva.>>

20 *Ana ama’a a uwwai mesun ma avana, reve o ɓosho na̱ yisaali ya̱ a̱bunda̱. Babu usa̱n ɗaɗa ukari wa̱ Jeriko u riya̱i suru suru, reve aza a Isra’ila suru a gawan a uwa pe a̱tsuma̱ a̱ lyuci mejege, reve a lyuwa yi nu uvon.

2 Reve aza a Filistiya e gere adama o uvon. Ana a yuwain uvon wu usuɗuwu, reve a lyuwa aza a Isra’ila nu uvon, reve o una ama ukpakukupa una̱shi (4,000) uba̱ta̱ wu uvon. 3 Ana a̱soja a Isra’ila a̱ ka̱mba̱i o uva̱la̱ta̱, reve mbara ma aza a Isra’ila e ece, <<Nye i zuwai A̱sulazuva a lyawai aza a Filistiya a lyuwa ntsu ana’an? Lyawai tsu ta̱wa̱ na Akpati a Nzuwulai a̱ A̱sulazuva pa nda za na ri Shilo, adama u 'ya̱wa̱ oɓolo na̱ a̱ tsu waru u wawa tsu e ekere a n’yuwatan n tsu.>>

4 Reve a̱ lyungu ama a̱ 'ya̱wa̱ Shilo, a̱vu a̱ ta̱wa̱ na̱ Akpati a Nzuwulai a̱ A̱sulazuva o oɓolo a̱ a̱soja a̱ zuva, za na ri nden a̱ memere me ikerobobi. Olobo e re a Eli, Hofini na̱ Finiha, a̱ shi ta̱ oɓolo na Akpati a Nzuwulai a̱ A̱sula̱’a̱.

5 Ana Akpati a Nzuwulai a̱ A̱sulazuva a̱ ta̱wa̱i a̱tsuma̱ o uva̱la̱ta̱, reve aza a Isra’ila suru o oruwo lon adama a̱ ma̱za̱nga̱ hali iɗa i jinga̱ɗa̱. 6 Ana aza a Filistiya a uwwai yorori a̱vu a damma, <<Nye i ɗa i ta̱wa̱i na̱ yorori i nda lon o uva̱la̱ta̱ wu mmaci ma Ibrahim?*>> Ana a uwwai a na Akpati a̱ A̱sulazuva a ɗa a̱ ta̱wa̱i a̱tsuma̱ o uva̱la̱ta̱, 7 reve wovon u reme aza a Filistiya’a. Reve a damma, <<Musula̱ a̱ ta̱wa̱ ta̱ a̱tsuma̱ o uva̱la̱ta̱’a̱.>>

A̱vu a damma, <<Addama a cina tsu ta̱, adama a na koto a yuwan cu’un vi ili tsunda shi. 8 A̱tsuma̱lima̱ a cina tsu ta̱, zane ɗa aa wawa tsu e ekere a̱ musula̱ mu ucira n nda? Ele ɗa musula̱ n na n lapai aza a Masar na̱ cu’un vu mɓa̱la̱ suru a̱tsumona. 9 A̱ɗu aza a Filistiya, gbamai okolo yo o ali adama yo o’wo agbashi a mmaci ma Ibrahim a nda cine a̱ shi agbashi a̱ ɗu wan. Yuwain ali, i yuwan uvon!>>

10 Reve gba aza a Filistiya a yuwan uvon lon, reve a lyuwa aza a Isra’ila. A̱vu vuma suru suma a̱ ka̱mba̱ o oogodo a̱ yi. O una ta̱ ama a̱bunda̱ lon. Aza a Isra’ila a lamba ta̱ a̱soja a ana a na a̱ da̱na̱i a ana ukpakukupa mataꞌatsu (30,000) o urana u ndolo. 11 A usa ta̱ Akpati a Nzuwulai a̱ A̱sula̱. Reve waru o una olobo e re a̱ Eli, Hofini na̱ Finiha.

6 A̱vu ukere wu ume wa̱ A̱sulazuva u ga̱la̱ aza a Ashido, oɓolo na̱ mulyuci n na a̱ ri uka̱nda̱ruwu ne ele na̱ meleshe ma̱ a̱bunda̱ ma amicin. 7 Ana ama a Ashido enei ne, ɗaɗa a dammai, <<She tsu lyawai Akpati a Nzuwulai a̱ ma̱sula̱ a aza a Isra’ila ma̱ da̱na̱ pa oɓolo na̱ a̱tsu wan! Adama a na ukere wu ume wa̱ A̱sulazuva u ta̱ a̱ nla̱ngi na̱ tsu lon, oɓolo na̱ Dagon ma̱sula̱ ma̱ a̱ tsu.>> 8 A̱vu ama a Ashido a̱ lyunguwa̱ a azagbain a Filistiya suru na̱ nlingata o ɓoloto, reve e ece le, <<Nye i ɗa tsaa yuwain na Akpati a Nzuwulai a̱ ma̱sula̱ ma aza a Isra’ila?>>

Reve a̱ usu, <<Tarai Akpati a Nzuwulai a̱ ma̱sula̱ ma a aza a Isra’ila a̱ tyo a̱ lyuci va Gat.>> Ɗaɗa a tarai Akpati a Nzuwulai a̱ ma̱sula̱ ma a aza a Isra’ila a̱ tyo Gat.

9 Agba ana a tara niyi a̱ tyo ɗe, a̱vu ukere wu ume wa̱ A̱sulazuva u ga̱la̱ lyuci’i, a̱vu wu da’waton le lon. A̱vu u lyunguwa̱ ama a̱ lyuci’i na̱ mɓa̱la̱ ma amici. Zagbain na̱ mawun suru e reme ta̱ amici’in.

10 Ɗaɗa a tarai Akpati a Nzuwulai a̱ A̱sula̱ a̱ tyo Ekuron. Ana Akpati a Nzuwulai a̱ A̱sula̱’a̱ a uwai pe, a̱vu a aza a Ekuron o ɓosho na̱ yisali, a damma, <<A̱ ta̱wa̱ ta̱ na Akpati a Nzuwulai a̱ ma̱sula̱ ma a aza a Isra’ila pa ya̱’a̱ tsu adama wu una tsu oɓolo na ama a̱ tsu.>> 11 A̱vu a̱ lyunguwa̱ azagbain a aza a Filistiya suru na̱ nlingata reve o ɓoloto le, reve a damma, <<Tarai Akpati a Nzuwulai a̱ ma̱sula̱ ma a aza Isra’ila a̱ ka̱mba̱ uba̱ta̱ u na wu uta̱i, ta̱wa̱ wu una tsu na ama a̱ tsu suru wan.>> Adama a na lyuci’i u shiwan ta̱ na̱ wovon wu ukwa̱ lon, adama a na ukere wu ume wa̱ A̱sulazuva u ga̱la̱ le ta̱ uga̱lu lon.

1 Akpati a Nzuwulai a̱ A̱sulazuva a yuwan ta̱ woto cindere e iɗa ya Filistiya. 2 Reve aza a Filistiya e ɗe nan ganu na̱ a̱za̱ a̱ yindi a̱vu a damma le, <<Nye i ɗa tsaa yuwan na Akpati a Nzuwulai a̱ A̱sulazuva? Damma ntsu cine tsa̱a̱ ka̱mbuwa̱ yi uba̱ta̱ u na wu uta̱i.>>

3 Reve a̱ usu, <<Na̱ ya̱a̱ ka̱mbuwa̱ Akpati a Nzuwulai a̱ ma̱sula̱ ma aza a Isra’ila, she i ka̱mbuwa̱ yi lya̱nga̱ wan, amma i ta lyungu yi oɓolo na̱ kucci makuɗa ma̱ wila̱. Ne ɗa ya̱a̱ ka̱mba̱ gbaga, waru i te reve ili i na i zuwai ukere wa̱ A̱sulazuva a̱a̱ ga̱ga̱la̱ nɗu.>>

10 Reve ama’a a yuwan cine a damma nle. A̱vu a zami inan i re a̱vu a̱ nla̱a̱ le keke vi inan, reve e reme muwu’un a̱ gutsu le o u’wa. 11 Reve a zuwa Akpati a Nzuwulai a̱ A̱sulazuva e keke’e oɓolo na akpati o ro o uma’an u zinariya va̱ a̱ga̱ɗa̱ nu uma’an wa amicin oɓolo na̱ yi. 12 A̱vu ina’an i kuru ure mejege a̱ tyo ugawun wu upasu wu utyo wa Bet Shemesh, a̱vu e reme ure na a sali o ure, agba a vadaluwa usa’ani ko ugula̱ shi. A̱vu azagbain a aza a Filistiya a̱ kuru le hali a̱ tyo wu upasu wu utyo wa Bet Shemesh.

13 A mantsa’a ama a Bet Shemesh a̱ da̱na̱ ta̱ o ugasa wo oroci a yitabo o uka̱ri. Ana a̱ 'ya̱sa̱in aaci e le reve e ene Akpati’i, a̱vu a uwa ma̱za̱nga̱ ma na e ene niyi. 14 Ana keke’e u rawai o uɗuma̱ wa̱ Josuwa va Bet Shemesh a̱vu wi isawan lo zuzu na aatali a gbain o ro. A̱vu ama’a a ɓatsa a̱gba̱la̱ a̱ keke’e reve a paɗa ina’an, a̱vu a yuwaan A̱sulazuva kucci vu ukula̱tosu na̱ le. 15 Ama o ugundo wa̱ Levi a̱ shi ta̱ ɗe a̱ cipa̱to Akpati a Nzuwulai a̱ A̱sulazuva’a zuva keke’e, oɓolo na akpati a na a̱ ri nu uma’an u zinariya. A̱vu a zuwa le a aatali a gbai’in. O urana u ndolo ama a Bet Shemesh a ca ta̱ kucci vu ukula̱tosu na̱ kucci ro uba̱ta̱ wa̱ A̱sulazuva.

1 Reve ama a Kiriyat Jeyarim a̱ cipa̱ a tara a gawan Akpati a Nzuwulai a̱ A̱sulazuva a̱ tyo o u’wa wa Abinada za na ri a aagaɗi. A̱vu a tawa Eliyaza ulobo wa̱ yi u yuwan ipiri ya Akpati a Nzuwulai a̱ A̱sulazuva’a.✝

2 Akpati a Nzuwulai’i a jima ta̱ a̱ lyuci va Kiriyat Jeyarim hali a’wan ushin. A̱tsuma̱ a mantsa mo ndolo, reve aza a Isra’ila suru e showen A̱sulazuva adama u kamba le.

12 Reve a damma Da̱wuda mogono, <<A̱sulazuva a zuwaa ta̱ u’wa wa̱ Obed Edom ni ili i na u ri na̱ a̱yi suru aba’un, adama a Akpati a̱ A̱sula̱.>> Ɗaɗa Da̱wuda 'ya̱wa̱i u tarai Akpati a̱ A̱sula̱ diga o u’wa wa̱ Obed Edom a̱ tyo Lyuci va̱ Da̱wuda na̱ ma̱za̱nga̱. 13 Mantsa ma na aza a na a tanuyi Akpati a̱ A̱sulazuva a yuwain udasuwu u ta̱li reve e isawan, ɗaɗa Da̱wuda cayi kucci vo ogono a nan na̱ ma̱dindim ma̱ lipu. 14 Da̱wuda wotowu na̱ ma̱tugu ma̱ epo vo okoro, reve u yuwan uje’en nu ucira wa̱ yi suru a̱ ma̱ka̱ka̱n ma̱ A̱sulazuva. 15 Ne ɗa Da̱wuda nu u’wa wa Isra’ila suru a̱ ta̱wa̱i na Akpati a̱ A̱sulazuva na̱ yisali i ma̱za̱nga̱ na̱ wivulu wa avana.

1 Reve Sulemanu ɓoloto mbara ma Isra’ila suru a̱ ma̱ka̱ka̱n ma̱ yi a̱tsuma̱ a̱ Urishelima, azagbain o gundo suru na azagbain vu 'wa va aza a Isra’ila adama a gawan na Akpati a Nzuwulai A̱sulazuva diga Sihiyona, lyuci gbain va̱ Da̱wuda. 2 Ama a Isra’ila suru a̱ ta̱wa̱ ta̱ uba̱ta̱ u Mogono Sulemanu a mantsa ma̱ a̱buki o ogodo a̱tsuma̱ o woto wa Etanim, woto we cindere.

3 Ana mbara ma Isra’ila suru n rawai, reve nan ganu a tanu Akpati a Nzuwulai. 4 Reve a̱ ta̱wa̱ na Akpati a Nzuwulai a̱ A̱sulazuva oɓolo no Oogodo o Uga’asusan oɓolo ni itana yu ulinga ya akiza i na i ri pe o oogodo’o. Nan ganu na̱ nan Levi a ɗa a̱ ta̱wa̱i ne ele. 5 Mogono Sulemanu gba ni iɓolo ya aza a Isra’ila suru i na o ɓolotoi uba̱ta̱ wa̱ yi a̱ shi ta̱ elime a Akpati’i, a casu kucci vi ikyon ya̱ a̱bunda̱ ni inan i na aa gura kece shi.

6 Ɗaɗa nan ganu a̱ ta̱wa̱i na Akpati a Nzuwulai a̱ A̱sulazuva uba̱ta̱ wa̱ yi pe a̱tsuma̱ a̱ A̱a̱’isa̱ a̱ A̱a̱’isamapaɗa, Upasu u na u La’ai Akiza, reve a zuwa yi za̱la̱ ve evelu a nan ikerobobi. 7 Nan ikerobobi’i a̱ ba̱ruwa̱ ta̱ evelu e le zuva vu uba̱ta̱ u na Akpati’i a̱ ri a̱vu a pala yi oɓolo na aɗanga o utanusu wa̱ yi. 8 Aɗanga’a a̱ shi ta̱ uga’an hali na aa gura ene le diga Upasu wa Akiza elime a̱ A̱a̱’isa̱ a na a̱ ri pe a̱tsuma̱, amma aa gura ene le diga a alanga o Upasu wa Akiza shi. Waru a̱ ta̱ lo hali na ana’an. 9 Ko ili i da̱na̱ pe a akpati’i shi she aɓaci a atali e re a na Musa zuwai pe a Horeb uba̱ta̱ u na A̱sulazuva a yuwain akucunu na aza a Isra’ila cina o uta̱ e iɗa ya Masar. 10 Ana nan ganu o uta̱i Upasu wa Akiza, reve eleshe a̱ ɓa̱ru A̱a̱’isamapaɗa a̱ A̱sulazuva. 11 Hali gba nan ganu a gura yuwan ulinga u le shi adama e eleshe’e, adama a na tsugbain tsa̱ A̱sulazuva tsa shitoyin a̱ A̱a̱’isamapaɗa.

14 Reve A̱sulazuva a damma,

i vadala a̱ɗu ama o ulambu wa̱ a̱ɓula̱,

adama a na a̱mu ɗa vali ɗu.

N ta tara ɗu a̱za̱ ta̱ ta̱

diga a̱tsuma̱ e ilyuci i ɗu

ne ejere re diga a̱tsuma̱ o gundo ɗu

reve n ta̱wa̱to ɗu Sihiyona.>>

15 <<Reve n ca ɗu aza aguɓa a na aa yuwusan ili i na okolo a̱ va̱ a cigai, aza a na o ronoo ɗu aaɗanga nu ugbozu nu urevu. 16 A rana ndolo na i da̱shiyi a̱bunda̱ a̱tsuma̱ e iɗa’a, ne ɗa A̱sulazuva a dammai, ama a̱ da̱shi yuwisan adanshi adama Akpati a nzuwulai a̱ A̱sula̱ shi.>> Wa̱a̱ da̱shi uwisa okolo e le, ko a̱ da̱shi cuwan na̱ yi shi, wa̱a̱ puwa̱a̱n shi, ko a̱ da̱shi yuwisan cu’un va̱ yi shi.