1 Reve mogono Ben Hada va Aram ɓoloto suru a soja a̱yi. Ngono mata'atsu na̱ ejere a̱ da̱na̱ ta̱ oɓolo na̱ yi. Oɓolo ni ido ni ikeke, a̱vu u ka̱ra̱ agawan adama u ka̱nda̱ruwa̱ Samariya nu uvon. 2 A̱vu u lyungu nlingata a̱ tyo wa̱ lyuci va Ahabu mogono ma aza a Isra'ila u damma, <<Apa ili i na Ben Hada dammai, 3 <Azurufa na̱ zinariya a̱za̱ va̱ ɗa, a̱tsuma̱ a̱ma̱ci a̱ wu waru aza a na ala'a yi ulobonu a̱za̱ va̱ a ɗa oɓolo na̱ muwun ma̱ wu fo a̱za̱ va̱ a ɗa.> >>

4 A̱vu mogono ma Isra'ila ma̱ usu, <<Ununa vu dammai, zagbain va̱ mogono. A̱mu na̱ suru ili i na n ri na̱ yi suru a̱za̱ wu a ɗa tsu ri.>>

5 Reve nlingata'a a̱da̱shi ka̱mba̱ a damma, <<Apa ili i na Ben Hada dammai, <N lyungu ta̱ adama a na va ca a̱mu azurufa na̱ zinariya, na̱ a̱ma̱ci a̱ wu, na̱ muwun ma̱ wu. 6 Acina mantsa ma nda nfa'a n ta̱ lyungu azagbain a̱ va̱ adama a na a̱ ta̱wa̱ a gbangaɗa ukobu wa̱ wu na̱ 'wa va azagbain a̱ wu. A̱ ta̱ pura̱ suru ili i na vu la'a cigai lon a̱vu a tara le a̱ka̱ra̱.> >>

7 A̱vu mogono ma Isra'ila mo ɓoloto suru mbara mi i iɗa u damma le, << Ka̱lyuwa̱ yi cine vuma nda a zami shi nla̱ngi! Ana u lyungu yi adama a̱ma̱ci va̱ na̱ muwun va̱, na̱ azurufa va̱ oɓolo na̱ zinariya, agba n putsa yi shi.>>

8 A̱vu mbara'a oɓolo na a akapi ama'a suru a̱ usu, << She vu zuwayi atsuvu wan, ko vu usu ili i na u cigai.>>

9 A̱vu u usu nlingata ma Ben Hada, <<Damma yi zagbain va̱ mogono, <Agbashi a̱ wu a̱ ta̱ usu suru ili i na vu dammai nu ufaru, amma za vu ukosu nda ma gurai shi.> >> Reve a̱ ka̱ra̱ a tara u usuwu a̱ tyo ya Ben Hada.

10 A̱vu Ben Hada lyunguwisa̱ ikaka i ro a̱ tyo ya Ahabu, <<Lyawa musula̱ n tara uge'etosu o ukere u va nu usuɗuwu, n na̱ ta̱wa̱ na ama a na o kototo Samariya shi. O to kototo wi iɗa'a hali acina ma̱buta̱ me e iɗa'a a gura ke ne yi nu ukere shi.>>

11 A̱vu mogono ma Isra'ila usu,<<Damma yi, <She soja da̱na̱ u wotowu ni itana yu uvon, a̱vu u reme uvaɗu a na wo oto yi itana yu uvon wan, she nu u lyuwa aci.> >>

12 Ana Ben Hada uwwai ikaka i ndolo a mantsa ma na a̱yi na akapi ngono a̱da̱na̱i yi so wi shi ogodo le, reve u damma a̱soja yi, <<Foɓoi adama a na ya̱ kototo le.>> A̱vu ofoɓo adama a na o kototo lyuci'i.

13 Ele lo reve vumava̱sula̱ ta̱wa̱ ya Ahabu mogono ma a aza a Isra'ila u damma yi, <<Apa ili i na A̱sulazuva a dammai, <Ve ene ta̱ a̱soja a gbain o ndolo? N ta ca wu le ekere wu ana'an nda, adama ndolo ɗa ye reve a na a̱mu ɗa A̱sulazuva.> >>

14 Ahabu yuwaan ta̱ yeci, <<Amma za ne ɗa a gura yuwan tsun ndolo?>> A̱vu vumava̱sula̱ usu, <<Apa ili i na A̱sulazuva a dammai, ekere ali o ucira a nan gwamna wu upasu.>>

A̱vu we ece, <<Agba za ne ɗa a fara uvo'on?>>

A̱vu vumava̱sula̱ usu, <<A̱vu ɗa za na va fara.>>

15 Reve Ahabu ɓoloto ali o ucira a nan gwamna wu upasu ukpaku ure na̱ mata'atsu ne ejere (232). A̱vu waru u ɓoloto suru a̱soja ukpakukupa ucindere (7,000) diga a̱tsuma̱ akapi a̱soja a Isra'ila suru. 16 Acina urana aci a ɗa e temei uvon a mantsa ma na Ben Hada oɓolo na̱ ngono mata'atsu ne ejere a̱da̱na̱i a̱ yisowishi a̱tsuma̱ o ogodo. 17 Ali o ucira o uvon a nan gwamna a ɗa a fara ka̱ra̱i.

Agba Ben Hada lyungu tu ɗe aza a matawa mo utyo, aza a na a̱ ta̱wa̱i nu dammu,<<Oɓolo a̱ a̱soja o ro a̱ ta̱ utusa̱ diga Samariya.>>

18 A̱vu u damma, << N na̱ o uta̱ ta̱ adama nden ma lafiya, a̱vu i reme le wuma, ko na̱ uta̱ adama o uvon, a̱vu i reme le wuma.>>

19 Ali o ucira o uvon a nan gwamna o uta̱ ta̱ a̱tsuma̱ lyuci waru a̱soja ana a buwai a̱ a̱da̱na̱ ta̱ oto ne le a̱ca̱pa̱ 20 a̱vu za suru una ma'yuwatan ma̱ yi. Na̱ tsun ndolo a̱vu akapi aza a Aram a suma, aza a Isra'ila a saɓusa le. Amma a̱vu mogono Ben Hada va Aram la'a zuva vi ikeke yi ido oɓolo na akapi ama e ikeke yi ido ya̱ yi. 21 A̱vu mogono ma Isra'ila mo o uta̱ oɓolo na a̱soja yi reve a usaa ido ni ikeke ido le. Reve waru o una aza a Aram na̱ a̱bunda̱.

22 Ele lo, a̱vu vumava̱sula̱ ta̱wa̱ uba̱ta̱ u mogono ma Isra'ila u damma yi, << Vu caa aciya̱wu adanshi ve ene ili i na yaa fara, adama a na acina a'wan na̱ ta̱wa̱ mogono ma a Aram ma̱ ta̱ da̱shi ta̱wa̱ wu nu uvon.>>

23 Ele lo, a̱vu azagbain mogono ma Aram a ca yi a̱sa̱la̱,<<Musula̱ ma aza a Isra'ila musula̱ ma a agaɗi n ɗa. Adama o ndolo ɗa a la'a n tsu ucira. Amma n na̱ tsu yuwan nla̱ngi na̱ le agalaci, amayun tsu ta la'a le ucira. 24 Apa nda ili i na va yuwan: Tawa suru ngono reve vu zuwa nan yali a̱soja o una̱ u le. 25 Reve vu da̱shi ɓoloto a̱soja, ni ido, ni ikeke yi ido una̱ ta̱ na ozo o ufaru na vu lambai. Adama a na tsa yuwan uvon na a aza a Isra'ila a agalaci. Amayun a ɗa tsu ta la'a le ucira.>> A̱vu usu wa̱ a̱sa̱la̱ le a̱vu u yuwan ununa a damma ni yi.

26 Ana a'wan a̱ ka̱nda̱ruwa̱i a̱vu Ben Hada oɓoloto a̱soja a Aram, a na a̱ ka̱ra̱ atyo Afe adama a na a yuwan uvon na aza a Isra'ila. 27 A na oɓoloto yi aza a Isra'ila a ca n le itana yu uvon, a̱vu a̱ka̱ra̱ adama a na a ci na le. Aza a Isra'ila oɓoloto ta̱ a̱nka̱nlula̱i na̱ le ununa vu revei oɓolo e mgbele ejere, amma a̱vu aza Aram e bete'we suru a̱tsuma̱ a agalaci.

28 A̱vu vumava̱sula̱ ta̱wa̱ uba̱ta̱ mogono ma aza a Isra'ila u damma yi, <<Apa ili i na A̱sulazuva a dammai, adama a na aza Aram a yuwan ta̱ majiyan a na A̱sulazuva ma̱sula̱ ma a agaɗi a ɗa ba ma̱sula̱ ma a agalaci shi, n ta ca oɓolo a̱soja nda e ekere a̱ wu, adama o ndolo vu ta̱ reve a na a̱mu A̱sulazuva a ɗa.>>

29 Reve a yuwaan rana cindere a̱nka̱nlula̱i uba̱ta̱ una a̱ va̱la̱i, o urana wa cindere reve e teme uvon. A̱vu aza a Isra'ila o una̱ a̱soja Aram e iɗa ukpakukupa (100,000) a̱tsuma̱ o uranu uta̱.

30 A̱vu akapi a̱soja asuma ala'a a̱ tyo a̱tsuma̱ e iɗa ya Afe, a̱vu ukari lyuci u riya̱ le a̱vu wu una a̱soja ukpakukupa kpaku ushin na̱ a̱za̱ cindere. A̱vu Ben Hada suma a̱ tyo a̱ lyuci a̱vu upan pe asula a̱tsuma̱.

31 A̱vu azagbain a̱yi a damma yi,<<Ka̱lyuwa̱, tsu uwwa ta̱ a na ngono ma aza a 'wa va aza a Isra'ila a̱ ta̱ na̱ iliyali. Lyawa tsu 'ya̱wa̱ uba̱ta̱ u mogono ma a aza a Isra'ila wotowu na̱ a̱tugu a̱tsuma̱lima̱ wunlu e nkyun naa amunga wunlu a aci yaa tsu, adama tsu pati yi. Uta gura o'wo u lyawa wu wuma.>>

32 Reve oto a̱tugu a̱tsumola̱ngu e nkyun i le, reve nla̱ amunga aci yaa ele, a̱vu a̱ka̱ra̱ atyo uba̱ta̱ u mogono ma a aza a Isra'ila a damma yi, << Agbashi a̱ wu Ben Hada a damma ta̱: N ta pati shi wu vu lyawa mu wuma.>>

A̱vu mogono ma̱ usu,<<U tu lo wuma hali na na'an? A̱yi mmaci n va̱ n ɗa.>>

33 Tsun ndolo tsa ɗa ama o ndolo a cigai a na a uwa babu usa̱n ɗaɗa a̱ ushi yi adanshi diga o una̱ wa̱ yi. <<Ee, mmaci ma̱ wu Ben Hada!>>

A̱vu mogono ma damma, << Ka̱ra̱ yi adama na ya̱ ta̱wa̱ na̱ yi.>> A na Ben Hada uta̱i, a̱vu Ahabu damma a katsa toyi e ikeke yi ido oɓolo na̱ yi.

34 << A̱vu Ben Hada damma yi n ta̱ ka̱mbuwa̱ wu na̱ ilyuci i na dada va̱ usaa yi dada va wu i ɗa, reve vu zuwaa aciya̱wu a̱ wu ba̱ta̱ wu eden a̱tsuma̱ Dimaska, ununa dada va̱ yuwain a̱tsuma̱ a Samariya.>>

Reve Ahabu damma, << N ta lyawa wu a na va̱ ka̱ra̱ adama o ununa tsu yuwain nda'a.>> Reve a yuwaan akucunu ɗaɗa a lyawa ni u ka̱ra̱i.

35 Ununa a adanshi A̱sulazuva a dammai za ta̱ a̱tsuma̱ oɓolo ama̱sula̱ damma ta̱ za va yi,<<Faba mu na̱ matsun me pe'eni ma̱ a̱ wu,>> amma aagbashi'i a 'yuwan ta̱.

36 Reve vumava̱sula̱ u damma, <<Adama a na vu 'yuwain a na va yuwaan tsutoni na̱ A̱sulazuva, a mantsa ma na vu lyawa nu a̱mu biti kamu to o una wu.>> A mantsa ma na vuma'a u ka̱ra̱i, a̱vu kamu cinai wu una yi.

37 A̱vu vumava̱sula̱'a̱ cina vuma ro waru u damma yi, <<N ta pati shi wu a na va faba mu.>> reve vuma ndolo faba yi hali cina wa amaton yi. 38 A̱vu vumava̱sula̱'a̱ ka̱ra̱ wi isawan ege'en mu ure e piri i mogono. Reve wu pala aciya yi na akashi acina urewesu wa̱ yi. 39 A mantsa ma na mogono ma̱ ka̱ra̱la̱i, reve vumava̱sula̱ a saala u damma yi, <<Agbashi a̱ wu a̱ 'ya̱wa̱ ta̱ uvon wu usuɗu, a̱vu nanza ta̱wa̱ a̱mu na̱ vuma ro za na e remei a̱tsuma̱ o uvon a̱vu u damma a̱mu, <Mi idana vuma nda'a. Na̱ vuma ndolo fa̱tsa̱, a ta tsupa na̱ wuma u va̱ o una̱ wuma wa̱ yi, ko waru gba a zuwa a na ma tsupa azurufa ukpakukupa uta'atsu (3,000).> 40 Amma a mantsa ma na ili i ro i pura̱i ugbozu u va̱, reve vuma'a upuwa̱n.>>

Reve mogono ma Isra'ila ma̱ usu u damma, <<Nu una̱ wa̱ wu ɗa vu cuɗuwai unusu wa̱ wu, adama o ndolo a̱ ta̱ e ge'eto wu.>>

41 A mantsa mo ndolo a̱vu vumava̱sula̱'a̱ u jika̱ wu kara akashi o umuna u na u pala yi urewesu wa̱ yi, reve mogono ma Isra'ila me revei a na yi fo za ta̱ a̱tsuma̱ ama̱sula̱ a ɗa. 42 Reve u damma mogono, <<Apa ili i na A̱sulazuva a dammai,<Vu lyawa ta̱ vuma na n ɗangulai adama a na wa̱ kuwa̱. Adama o ndolo a ta ca wuma wa̱ wu ekere za va yi, ama wa̱ wu waru ekere za̱ yi.> >> 43 Reve mogono ma Isra'ila ma̱ ka̱ra̱ a̱ tyo o u'wa wa̱ yi a̱tsuma̱ a Samariya nu upan na̱ a̱tsuma̱la̱ngu.