1 Reve Sulemanu yuwan nzuwulai na̱ Firi'awuna mogono ma Masar a̱vu u zuwa usheli wa̱ yi. A̱vu u ta̱wa̱ na̱ a̱yi a̱tsuma̱ a̱ lyuci va̱ Da̱wuda adama u da̱nu lo a cina mantsa ma na woo koto usaa wu u'wa wa̱ yi na̱ A̱a̱'isamapaɗa a̱ A̱sulazuva, oɓolo nu ukari a̱ka̱nda̱ruwa̱ Urishelima. 2 A mantsa mo ndolo ama a̱ shi ta̱ a̱ da̱na̱ a yuwusan kucci a̱ ba̱ta̱ va̱ a̱ga̱nda̱ a̱ a̱ma̱li, adama a na koto a̱ shi a suwa A̱a̱'isamapaɗa na ala a̱ A̱sulazuva shi. 3 Sulemanu ciga ta̱ A̱sulazuva reve u yuwan mmalu o ure wa dada va̱ yi Da̱wuda, she de u ca ta̱ kucci reve u kula̱to ili i ma̱guru a̱ ba̱ta̱ va̱ a̱ga̱nda̱.

4 A̱vu mogono Sulemanu ma̱ ka̱ra̱ a̱ tyo Gibiyon adama u ca kucci adama a na a̱yi ɗa uba̱ta̱ wa̱ a̱ga̱nda̱ a gbain a na a̱ shi a la'ai suru suru. Reve u ca kucci vu ukula̱tosu ukpakukupa (1,000) a masa'a. 5 Reve A̱sulazuva a̱ ta̱wa̱ uba̱ta̱ wa̱ Sulemanu a Gibiyon na ayin a̱tsuma̱ a alavu, a̱vu A̱sula̱ a damma, <<Pati ili i na vu cigai n ca wu biti.>>

6 A̱vu Sulemanu damma, <<Vu roco ta̱ aagbashi a̱ wu, dada va̱ Da̱wuda isa'ani, adama a na u shi na amayun e ekere a̱ wu na̱ a̱ɓula̱ waru na̱ mejege o okolo. Vu lyuwa ta̱ elime o rocosu yi isa'ani i nda a̱vu vu ca yi ulobo u na wa̱a̱ da̱nu o ootogu o tsugono tsa̱ yi ana'an.

7 <<Gogo, A̱sulazuva A̱sula̱ a̱ va̱, vu zuwa ta̱ aagbashi a̱ wu mo o'wo mogono o una̱ wa dada va̱ Da̱wuda. Agba a̱mu mawun me ke'en ma ɗa waru koto n reve cine mee reme ulinga u va̱ shi. 8 Aagbashi a̱ wu a̱ ta̱ pa a̱tsuma̱ a ama a na vu ɗangulai, ama a̱ a̱bunda̱ a na a̱ ka̱ra̱i ucira u na aa gura kece. 9 Adama o ndolo vu ca aagbashi a̱ wu okolo o urevu a na maa gura guza̱ ama a̱ wu, waru a na maa gura kakasa ili i na i ri mejege ni ili i na i ri mejege shi. Adama a na zane ɗa aa gura guza̱ ama a̱ a̱bunda̱ a̱ wu a nda?>>

10 Reve gba A̱sulazuva a uwwa uyo'o a na Sulemanu patiyi ili i nda. 11 Ɗaɗa A̱sula̱ a damma niyi, <<Adama a na vu patiyi ili i nda, ba wuma u na vaa jima shi ko utsuru adama a aciya̱wu shi, ko vu pati ukwa̱ wu n'yuwatan ma̱ wu shi, amma wu urevu u na vaa yuwan ili i na i ri mejege, 12 n ta yuwan ili i na vu patiyi. N ta ca wu okolo o ugbozu na̱ za vu urevu, hali na a̱a̱ tsura̱ vuma tsa̱ wu shi, waru a̱a̱ da̱shi tsura̱ shi. 13 Waru gba, n ta ca wu ili i na vu patiyi shi, a̱yi ɗa utsuru na̱ tsugbain, hali na wo o'wo a mantsa ma wuma wa̱ wu a̱a̱ tsura̱ mogono tsa̱ wu shi. 14 Na̱ vu yuwan mmalu a̱tsuma̱ o ure u va̱ a̱vu vu yuwan tsutoni ni ili i na n zuwai, na̱ wila̱ u va̱ cine Da̱wuda dada va̱ wu yuwain, n ta ca wu wuma u na waa jima.>> 15 Ana Sulemanu 'yoyin reve u cina alavu a ɗa u yuwain. Reve u ka̱ra̱ a̱ ka̱mba̱ Urishelima, a̱vu wi isawan elime a Akpati a Nzuwulai a̱ A̱sulazuva, a̱vu u yuwan kucci vu ukula̱tosu na̱ kucci muwwulai. Reve u yuwaan azagbain a̱ yi a̱buki.

16 Urana u ro reve ashakala e re a̱ ta̱wa̱ uba̱ta̱ u mogono a̱vu e isawan a̱ ma̱ka̱ka̱n ma̱ yi. 17 A̱vu za ta̱ le damma, <<Zagbain va̱, ka nda na̱ a̱mu tsu ta̱ nden o u'wa u ta̱. M matsan ta̱ mawun a̱yi oɓolo na̱ a̱mu pe o u'wa'a. 18 Ana a yuwain ayin a ta'atsu a na m matsain mawu'un, a̱vu a̱yi fo u matsan. A̱tsu ɗa tsu shi ama e re, ko za shi pe o u'wa'a oɓolo na̱ a̱tsu shi.

19 <<A̱tsuma̱ a ayin a̱vu ulobo wu ka nda u kuwa̱, adama a na u tsugba niyi. 20 Ɗaɗa u 'yoyin na ayin uɓatsu, a̱vu u tara ulobo u va̱ e eɓele a̱ va̱ a̱mu aagbashi a̱ wu a nlavu. A̱vu u zuwa yi zuzu na̱ maani ma̱ yi, a̱vu u zuwa a̱kwa̱kwa̱ o ulobo wa̱ yi zuzu na̱ maani ma̱ va̱. 21 Na̱ wasasa, n 'yon nda na maa ca mawun ma̱ va̱ maani, reve me ene yi ukwa̱! Agba a na m petelyuwe niyi ulobonu nu usana, reve me ene ulobo u na m matsain ɗa shi.>>

22 Amma a̱vu ka ire ndolo u damma, <<O'o! Za wuma ɗa ulobo u va̱, a̱kwa̱kwa̱ a ɗa za va̱ wu.>>

Amma a̱vu za vu ufaru ndolo damma, <<O'o! A̱kwa̱kwa̱ a ɗa za va̱ wu, za na ri wuma ɗa za va̱.>> Ne ɗa e remei mawasan a̱ ma̱ka̱ka̱n mo mogono.

23 A̱vu mogono ma damma, <<Za nda damma, <Ulobo u va̱ u ta̱ wuma amma za va̱ wu kuwa̱ ta̱,> a̱vu gba za ndeɗe damma, <O'o! ulobo wa̱ wu u kuwa̱ ta̱ za va̱ gba ta̱ wuma.> >>

24 Reve mogono ma damma, <<Ta̱wa̱a̱ numu na̱ matsun me pe'eni.>> Ɗaɗa a̱ ta̱wa̱a̱ niyi na̱ matsun me pe'eni. 25 A̱vu u damma, <<Koɗuloi mawun ma wuma'a ure, reve a ca vuma ta̱ uɓatsulai vuma ta̱ waru uɓatsulai.>>

26 Ka na mawun ma̱ yi ma ɗa ma̱ ri wuma ma shiwan ta̱ ni icigi yu ulobo wa̱ yi, reve u damma mogono, <<Yuwan ankuri, zagbain va̱, ca niyi mawun ma wuma'a! She o una yi wan.>> Agba a̱vu za ve ire'e u damma, <<Ko a̱mu ko a̱vu ko za o o'wo na̱ a̱yi shi. Koɗuloi niyi ure.>>

27 Reve mogono ma damma, <<Cayi ka vu ufaru mawun ma wuma'a. She yi una yi wan, a̱yi ɗa mma va̱ yi.>> 28 Ana ama a Isra'ila suru a uwwai uge'etosu u na mogono ma yuwain, reve a ca yi tsugbain lon, adama a na e ene ta̱ A̱sula̱ a ca yi ta̱ ugbozu cine waa yuwan uge'etosu mejege.