1 Reve Sulemanu ɓoloto mbara ma Isra'ila suru a̱ ma̱ka̱ka̱n ma̱ yi a̱tsuma̱ a̱ Urishelima, azagbain o gundo suru na azagbain vu 'wa va aza a Isra'ila adama a gawan na Akpati a Nzuwulai A̱sulazuva diga Sihiyona, lyuci gbain va̱ Da̱wuda. 2 Ama a Isra'ila suru a̱ ta̱wa̱ ta̱ uba̱ta̱ u Mogono Sulemanu a mantsa ma̱ a̱buki o ogodo a̱tsuma̱ o woto wa Etanim, woto we cindere.

3 Ana mbara ma Isra'ila suru n rawai, reve nan ganu a tanu Akpati a Nzuwulai. 4 Reve a̱ ta̱wa̱ na Akpati a Nzuwulai a̱ A̱sulazuva oɓolo no Oogodo o Uga'asusan oɓolo ni itana yu ulinga ya akiza i na i ri pe o oogodo'o. Nan ganu na̱ nan Levi a ɗa a̱ ta̱wa̱i ne ele. 5 Mogono Sulemanu gba ni iɓolo ya aza a Isra'ila suru i na o ɓolotoi uba̱ta̱ wa̱ yi a̱ shi ta̱ elime a Akpati'i, a casu kucci vi ikyon ya̱ a̱bunda̱ ni inan i na aa gura kece shi.

6 Ɗaɗa nan ganu a̱ ta̱wa̱i na Akpati a Nzuwulai a̱ A̱sulazuva uba̱ta̱ wa̱ yi pe a̱tsuma̱ a̱ A̱a̱'isa̱ a̱ A̱a̱'isamapaɗa, Upasu u na u La'ai Akiza, reve a zuwa yi za̱la̱ ve evelu a nan ikerobobi. 7 Nan ikerobobi'i a̱ ba̱ruwa̱ ta̱ evelu e le zuva vu uba̱ta̱ u na Akpati'i a̱ ri a̱vu a pala yi oɓolo na aɗanga o utanusu wa̱ yi. 8 Aɗanga'a a̱ shi ta̱ uga'an hali na aa gura ene le diga Upasu wa Akiza elime a̱ A̱a̱'isa̱ a na a̱ ri pe a̱tsuma̱, amma aa gura ene le diga a alanga o Upasu wa Akiza shi. Waru a̱ ta̱ lo hali na ana'an. 9 Ko ili i da̱na̱ pe a akpati'i shi she aɓaci a atali e re a na Musa zuwai pe a Horeb uba̱ta̱ u na A̱sulazuva a yuwain akucunu na aza a Isra'ila cina o uta̱ e iɗa ya Masar. 10 Ana nan ganu o uta̱i Upasu wa Akiza, reve eleshe a̱ ɓa̱ru A̱a̱'isamapaɗa a̱ A̱sulazuva. 11 Hali gba nan ganu a gura yuwan ulinga u le shi adama e eleshe'e, adama a na tsugbain tsa̱ A̱sulazuva tsa shitoyin a̱ A̱a̱'isamapaɗa.

12 Reve Sulemanu damma, <<A̱sulazuva a damma ta̱ u ta̱ da̱nu a̱tsuma̱ e eleshe e irumbu. 13 Gogo n suwaa wu ta̱ A̱a̱'isamapaɗa a sa'ani, uba̱ta̱ u na va̱a̱ da̱nu babu ukotu.>>

14 Iɓolo ya aza a Isra'ila suru ubuwu lo mishin, reve mogono ma vadala u zuwaa le aba'un. 15 A̱vu u damma: <<Ica a̱ tyo e ekere a̱ A̱sulazuva, A̱sula̱ a Isra'ila, za na ne ekere a̱ yi u shitoyin ili i na u yuwayin dada va̱ Da̱wuda nzuwulai nu una̱ wa̱ yi, a na u dammai, 16 <Diga urana u na mu uta̱i ama a̱ va̱ Isra'ila diga a̱tsuma̱ a Masar, koto n ɗangula lyuci diga o ugundo a̱tsuma̱ aza a Isra'ila uba̱ta̱ u na maa suwa A̱a̱'isamapaɗa adama a Ala a̱ va̱ shi, amma n ɗangula ta̱ Da̱wuda u yuwan tsugono tsa ama a̱ va̱ Isra'ila.>

17 <<Dada va̱ Da̱wuda zuwa ta̱ okolo a̱ yi na wa aa suwa A̱a̱'isamapaɗa adama a na a ca ala a̱ A̱sulazuva, A̱sula̱ a Isra'ila tsugbain. 18 Agba A̱sulazuva a damma ta̱ dada va̱ Da̱wuda, <O una̱ u na u ri o okolo a̱ wu na vaa suwaa Ala a̱ va̱ A̱a̱'isamapaɗa adama vu ca ala a̱ va̱ tsugbain, vu yuwan ta̱ mejege na vu ri ni ili i nda o okolo a̱ wu. 19 Agba suru na̱ ne, a̱vu ɗa vaa suwa A̱a̱'isamapaɗa'a shi, amma ulobo wa̱ wu u na a matsan wu a̱yi ɗa waa suwaa Ala a̱ va̱ A̱a̱'isamapaɗa.>

20 <<A̱sulazuva o shiton ta̱ nzuwulai n na u yuwain: N 'yon ta̱ o una̱ wa dada va̱ Da̱wuda, gogo n ta̱ nden o ootogu o tsugono tsa Isra'ila, cine A̱sulazuva a yuwain nzuwulai, a̱vu n suwaa Ala a̱ A̱sulazuva, A̱sula̱ a Isra'ila A̱a̱'isamapaɗa. 21 N foɓo ta̱ uba̱ta̱ pe adama a Akpati a̱ Nzuwulai, za na akucunu a na A̱sulazuva a yuwayin nkaya n tsu a̱ ri pe mantsa ma na wu uta̱a̱ nle e iɗa ya Masar.>>

22 Reve Sulemanu isawan elime a masa'a a̱ A̱sulazuva elime e iɓolo ya aza a Isra'ila suru, a̱vu u 'ya̱sa̱n ekere a̱ yi a̱ tyo zuva, 23 a̱vu u damma: <<A̱sulazuva, A̱sula̱ a Isra'ila, A̱sula̱ o ro a̱ ri lo tsa̱ wu zuva gon ko o uvaɗi za̱la̱ shi, a̱vu za na o shiton su akucunu e icigi ya̱ wu na agbashi a̱ wu aza a na a̱ ri a mmalu a̱tsuma̱ o ure wa̱ wu no okolo e le ma̱ɓula̱. 24 A̱vu na vu shitoyin nzuwulai ma̱ wu na aagbashi a̱ wu Da̱wuda dada va̱, vu yuwan ta̱ adanshi nu una̱ wa̱ wu vu yuwan akucunu nu ucigu ne ekere a̱ wu a̱vu vu shiton yi, cine u ri ana'an.

25 <<Adama o ndolo gogo A̱sulazuva, A̱sula̱ a Isra'ila vu shitowon aagbashi a̱ wu Da̱wuda dada va̱ nzuwulai n na vu yuwaan niyi, ana vu dammai, <Vaa lamba vuma na a̱ da̱nu a̱ ma̱ka̱ka̱n ma̱ va̱ o ootogu o tsugono tsa Isra'ila shi, nna̱ olobo a̱ wu a yuwan ugbozu a̱tsuma̱ e ili i na aa yuwusan, a yuwan mmalu a̱ ma̱ka̱ka̱n ma̱ va̱ cine vu yuwain.> 26 Gogo, A̱sula̱ a Isra'ila, lyawa adanshi a̱ wu na vu yuwayin aagbashi a̱ wu Da̱wuda dada va̱ wo o'wo amayun.

27 <<Agba na amayun A̱sula̱ a̱ ta̱ da̱nu o uvaɗi? A̱yi ɗa nda zuva, zuva suru suru, u gura guza̱ wu shi, bele gba A̱a̱'isamapaɗa a nda na n suwai! 28 Suru na̱ ne, vu poloo avasa a aagbashi a̱ wu atsuvu ni ipati ya̱ yi yi isa'ani, A̱sulazuva A̱sula̱ a̱ va̱. Vu uwwa mesun na avasa a na aagbashi a̱ wu a yuwusan a̱ ma̱ka̱ka̱n ma̱ wu ana'an. 29 Lyawa esu a̱ wu a̱ da̱na̱ ukpa̱tu'u a̱ ka̱lyuwusa̱ A̱a̱'isamapaɗa a nda ayin nu urana, adama o uba̱ta̱ u nda na vu dammai, <Ala a̱ va̱ a̱ ta̱ da̱na̱ pe.>Lyawa vu uwwa avasa a na maa yuwan kuci adama uba̱ta̱ u nda. 30 Vu uwwusa ipati ya aagbashi a̱ wu na̱ va ama a̱ wu Isra'ila a mantsa ma na aa yuwusan avasa ele a̱a̱ ka̱lyuwusa̱ uba̱ta̱ u nda. Vu uwwa diga zuva, o uda̱na̱ta̱ wa̱ wu, a̱vu na̱ vu uwwa vu yuwan gafura.

31 <<Na̱ vuma nusaan moron ma̱ nden ma̱ yi, reve a zuwa yi u tara akucunu, reve u ta̱wa̱ u kucina elime a masa'a ma̱ wu a̱ A̱a̱'isamapaɗa a nda, 32 A̱sulazuva vu uwwa diga zuva reve vu yuwan ili i ro, vu ge'eto agbashi a̱ wu, vu ca za vu unusu oforo, vu zuwa yi u tara ume wu unusu wa̱ yi. Reve vu zuwa za na ri nu unusu shi wo o'wo fa̱a̱n, reve a tsupaa yi na̱ a̱ɓula̱ a̱ yi.

33 <<Na̱ n'yuwatan n lyuwa ama a̱ wu Isra'ila nu uvon adama a na a yuwaan nuwu unusu, reve na a vadala a̱ ka̱mba̱ uba̱ta̱ wa̱ wu a̱vu a cuwa ala a̱ wu, a yuwusan avasa ni ipati a̱ tyo ya̱'a̱ wu a̱tsuma̱ a̱ A̱a̱'isamapaɗa a nda, 34 reve vu uwwa diga zuva vu yuwaan ama a̱ wu Isra'ila gafura vu unusu u le, reve vu ka̱mba̱to le e iɗa i na vu cayi nkaya n le.

35 <<Na̱ a̱ ɓa̱ru zuva reve wo o'wo babu iro'i adama a na ama a̱ wu a yuwaan nuwu unusu, agba na a yuwan avasa a̱ ka̱lyuwusa̱ uba̱ta̱ u nda reve a cuwa ala a̱ wu reve a vadala a lyawa unusu u le adama a na vu ca nle oforo, 36 vu uwwa diga zuva a̱vu vu yuwaan nusu va agbashi a̱ wu gafura, ama a̱ wu aza a Isra'ila. Vu roco le cine u lobonoi a̱ da̱nu, reve vu lyungu iro'i e iɗa i na vu cayi ama a̱ wu agadu.

37 <<Mantsa ma na ambulu ko mɓa̱la̱ n uwai e iɗa, ko mu upa̱luwusa̱ ko a akpala ko akyun ko apapari, ko gba shi mantsa ma na n'yuwatan n ka̱nda̱ruwa̱ nle nu uvon a̱tsuma̱ a̱ lyuci le, meleshe ko mɓa̱la̱ n ne n ɗa ma̱a̱ ta̱wa̱, 38 reve vuma ta̱ a̱tsuma̱ a ama a̱ wu aza a Isra'ila u yuwan avasa ko ipati, vuma na okolo a̱ yi a dada'wain, reve u 'ya̱sa̱n ekere a̱ yi a̱ tyo a̱ A̱a̱'isamapaɗa a nda, 39 vu uwwa diga zuva, a̱ nda̱na̱ta̱ ma̱ wu. Vu yuwan gafura reve vu yuwan ili iro, vu yuwan na̱ vuma biti o una̱ wi ili i na u yuwain suru, a na wo o'woi vu reve ta̱ okolo a̱ yi adama a na a̱vu a̱ nde'en ɗa vu revei okolo a ama suru, 40 adama a uwwa wovon wa̱ wu a mantsa ma na suru a̱ ri nden a̱tsuma̱ e iɗa i na vu cayi nkaya n tsu.

41 <<Ne ɗa waru, na̱ mocin na ri a̱tsuma̱ a ama a̱ wu za va Isra'ila ɗa shi, amma wu uta̱ ta̱ diga e iɗa ya alanga adama a ala a̱ wu, 42 adama a na ama a ta uwwa aɗa a ala a̱ wu nu ukere wu ucira wa̱ wu. Nu u ta̱wa̱ u yuwan avasa a̱ ka̱lyuwusa̱ A̱a̱'isamapaɗa a nda, 43 vu uwwa diga zuva, a̱ nda̱na̱ta̱ ma̱ wu, a̱vu vu yuwan ili i na moci'in u pati nuwu suru, adama ama o uvaɗi suru e reve na ala a̱ wu reve a uwwa wovon wa̱ wu tsa ama a̱ wu aza a Isra'ila. Adama waru e reve A̱a̱'isamapaɗa a na n suwai u ta̱ na Ala a̱ wu.

44 <<A mantsa ma na ama a̱ wu o uta̱i a̱ 'ya̱wa̱ uvon na̱ n'yuwatan n le, uba̱ta̱ u na suru vu lyungu nle, na aa yuwan avasa a̱ tyo e ekere a̱ A̱sulazuva a̱ ka̱lyuwusa̱ lyuci na vu ɗangulai na̱ A̱a̱'isamapaɗa a na n suwai adama a Aala a̱ wu, 45 vu uwwa avasa ni ipati i le diga zuva, a̱vu vu ca le ulyuwu wa aci.

46 <<Na a yuwaan wu unusu, ana wo o'woi babu vuma na tsu yuwan unusu shi, reve vu yuwan upan ne ele hali vu ca le e ekere a n'yuwatan, a̱vu a pura̱ le a̱ 'ya̱wa̱ tsugbashi e iɗa i le, alanga ko zuzu, 47 reve na a vadala okolo ɗe e iɗa i na a zuwusa le tsugbashi, reve a vadala a pati wu pe e iɗa yi za na lyuwa nle a̱vu a damma, <Tsu yuwan ta̱ unusu, tsu yuwan ta̱ ili i na i ri mejege shi, waru tsu yuwan ta̱ iwuya,> 48 reve a vadala a̱ ka̱mba̱ ya̱'a̱ wu no okolo e le na asuvu e le suru suru pe e iɗa yi n'yuwatan n le n na m pura̱ nle a̱ 'ya̱wa̱ tsugbashi, reve gba a yuwan avasa a̱ tyo e ekere a̱ wu a̱ ka̱lyuwusa̱ iɗa i na vu cayi nkaya n le a̱ ka̱lyuwusa̱ lyuci na vu ɗangulai na̱ A̱a̱'isamapaɗa a na n suwai adama a Ala a̱ wu, 49 reve diga zuva, a̱ nda̱na̱ta̱ ma̱ wu, vu uwwa avasa e le ni ipati i le reve vu kamba e le, vu ca le ulyuwu wa aci. 50 A̱vu vu yuwaan ama a̱ wu gafura, aza a na a yuwaan nuwu unusu, vu yuwaan le gafura vu nusu na a yuwaan nuwu suru, a̱vu vu zuwa aza a na lyuwa nle o roco le isa'ani. 51 Adama a na ele ama a̱ wu a ɗa na agadu a̱ wu, aza a na vu uta̱yi diga e iɗa ya Masar, diga e memere ma̱ rumu madala ma akina mo ndolo.

52 <<Lyawa esu a̱ wu a̱ da̱na̱ ukpa̱tu'u uba̱ta̱ wi ipati ya aagbashi a̱ wu oɓolo ni ipati ya ama a̱ wu aza a Isra'ila, lyawa waru vu uwwa le a mantsa ma na suru e showen nuwu. 53 Adama a na vu tawa le ta̱ diga a̱tsuma̱ a nɗa mu uvaɗi suru o o'wo agadu a̱ wu, cine vu dammai o una̱ wa aagbashi a̱ wu Musa, a mantsa ma na, a̱vu A̱sulazuva Mogono, vu uta̱yi nkaya n tsu e iɗa ya Masar.>>

54 Ana Sulemanu kotoi avasa a nda ni ipati i nda suru a̱ tyo e ekere a̱ A̱sulazuva, reve u 'yon elime a masa'a ma̱ A̱sulazuva, uba̱ta̱ u na u shi nkingi ne ekere a̱ yi u'ya̱sun a̱ tyo zuva. 55 Reve wi isawan u zuwaa iɓolo ya ama a Isra'ila suru aba'un nu uɗyo u gbain, adansa:

56 <<Ica za va̱ A̱sulazuva a ɗa, za na cayi ama a̱ yi aza a Isra'ila wivuwun cine u yuwain nzuwulai. Ko danshi ta̱ a̱ riya̱ e iɗa shi a̱tsuma̱ a nzuwulai n sa'ani n na u cayi o una̱ wa aagbashi a̱ yi Musa. 57 Lyawa A̱sulazuva A̱sula̱ a̱ tsu a̱ da̱na̱ oɓolo na̱ a̱tsu cine u da̱na̱i na̱ nkaya n tsu, she u lyawa tsu ko u vari tsu wan. 58 Lyawa u vadala okolo a̱ tsu a̱ tyo uba̱ta̱ wa̱ yi, adama tsu yuwan mmalu e re va̱ yi suru reve tsu guza̱ wila̱ ni ili i na u zuwai ni ili i na a̱a̱ kuru na u cayi nkaya n tsu. 59 Lyawa waru idanshi i va̱ i nda, i na n yuwain avasa a̱ ma̱ka̱ka̱n ma̱ A̱sulazuva, a̱ da̱na̱ zuzu na̱ A̱sulazuva, A̱sula̱ a̱ tsu urana na ayin adama u ca aagbashi a̱ yi na ama a̱ yi Isra'ila ili i na a cigai vu urana suru. 60 Adama ama o uvaɗi suru e reve a na A̱sulazuva a̱yi ɗa A̱sula̱, waru A̱sula̱ o ro o lo shi. 61 Amma a̱ɗu gba ni ciga i 'yuwan i ca A̱sulazuva A̱sula̱ a̱ tsu okolo suru suru. I yuwan mmalu a̱tsuma̱ e ili i na u dammai, reve i yuwan tsutoni na̱ wila̱ wa̱ yi, tsoyi cine yaa yuwan ana'an.>>

62 Ɗaɗa mogono oɓolo na aza a Isra'ila suru a cayi A̱sulazuva ikucci. 63 Sulemanu ca ta̱ A̱sulazuva kucci muwwulai nda: ogono e inan ukpakukupa ushin ne ejere (22,000) ni ikyon ukpakukupa ukpaku nu ushin (120,000) na̱ vu mgbele. Ne ɗa mogono na aza a Isra'ila suru a cayi A̱a̱'isamapaɗa a̱ A̱sulazuva.

64 O urana u ndolo'o reve mogono ma tawa upasu u memere wu ukowo we elime wa̱ A̱a̱'isamapaɗa a̱ A̱sulazuva, reve u yuwan lo kucci vu ukula̱tosu, na̱ za vi ishina na abaji a mani'in a̱ kucci muwwulai, adama a na masa'a ma̱ rumushili na ri a̱ ma̱ka̱ka̱n ma̱ A̱sulazuva'a ma̱ shi ta̱ ma̱ ka̱la̱ma̱ a na waa tara kucci vu ukula̱tosu na̱ za vi ishina na̱ za mani'in ma̱ kucci muwwulai'i suru.

65 Ne ɗa Sulemanu yuwain a̱buki a mantsa mo ndolo, na aza a Isra'ila suru oɓolo na̱ a̱yi, iɓolo i gbain, ama diga Lebo Hamat a̱ tyo o utyo wa Masar. A yuwan ta̱ a̱buki'i a̱ ma̱ka̱ka̱n ma̱ A̱sulazuva A̱sula̱ a̱ tsu rana cindere na̱ rana cindere ukurula̱i, rana kupa na̱ a̱za̱ a̱ na̱shi suru suru. 66 O urana wa̱ kula̱ reve u bete'we ama. Ama a zuwaa ta̱ mogono aba'un a̱vu a̱ ka̱ra̱ a̱ tyo a 'wa le, na̱ ma̱za̱nga̱ na̱ mere o okolo adama e ili i sa'ani i na suru A̱sulazuva a yuwayin aagbashi a̱ yi Da̱wuda na ama a̱ yi Isra'ila.