1 A̱tsuma̱ a aa'wan a kupa na̱ kunla̱ o tsugono tsa Yerobowam ulobo wa Neba, ɗaɗa Abija o'woi mogono ma Yahuda. 2 U yuwan ta̱ tsugono tsa a'wan a ta'atsu a̱tsuma̱ a̱ Urishelima. Aala a mma va̱ yi a ɗa Ma'aka, usheli wa Abishalom.

3 U yuwan ta̱ unusu u na dada va̱ yi yuwain suru kafu a̱yi, okolo a̱ yi a̱ shi uba̱ta̱ wa̱ A̱sulazuva A̱sula̱ a̱ yi suru suru cine okolo a̱ Da̱wuda akaya a̱ yi a̱ shi shi. 4 Agba suru na̱ ne, adama a̱ Da̱wuda, A̱sulazuva A̱sula̱ a̱ yi a ca ta̱ Abija ulobo adama a na wa yuwaan tsugono a̱tsuma̱ a̱ Urishelima a̱ca̱pa̱ a̱ yi, na̱ waru u wawa Urishelima diga ekere a n'yuwatan ma̱ a̱ yi. 5 A̱sulazuva a yuwan ta̱ ne adama a na Da̱wuda yuwan ta̱ ili i na i ri mejege e ekere a̱ yi agba u kuɗa̱ a yuwan ili i na A̱sulazuva a zuwai shi a mantsa ma wuma wa̱ yi, she de adama a ɗa a Uriya za va Hitiya.

6 Rehobowam na̱ Yerobowam a yuwusan ta̱ uvon a mantsa ma wuma wa Abija suru. 7 Akapi o ulinga u tsugono tsa a Abija, ni ili i na u yuwain suru, a ɗana le ta̱ a̱tsuma̱ aatagada a alabari o ngono ma Yahuda. Abija na̱ Yerobowam a yuwusan ta̱ uvon. 8 A̱vu Abija kuwa̱ ucina nkaya ma̱ yi, a̱ ciɗo yi ta̱ a̱ Lyuci va̱ Da̱wuda. Reve ulobo wa̱ yi Asa o o'wo mogono o una̱ wa̱ yi.

9 A̱tsuma̱ a aa'wan o ushin u tsugono tsa Yerobowam mogono ma Isra'ila, Asa o'woi mogono ma Yahuda. 10 U yuwan ta̱ tsugono a̱tsuma̱ a̱ Urishelima a'wan amunga na̱ za ta̱. Aala a kaka va̱ yi ɗa Ma'aka usheli wa Abishalom.

11 Asa yuwan ta̱ ili i na i i ri mejege e ekere a̱ A̱sulazuva, cine akaya a̱ yi Da̱wuda yuwain. 12 U gba̱ra̱ ta̱ ashakala a̱a̱'isa̱ ali diga e iɗa'a, reve wu tawa a̱ma̱li a na nkaya ma̱ yi n yuwain. 13 Reve waru u cipa̱to akaya a̱ yi Ma'aka tsu egbere, adama a na u yuwan ta̱ uruma wa̱ a̱ a̱ma̱li e idaba a Ashera. Asa gasa ta̱ uruma a̱vu u kula̱to yi o Uka̱ri wa Kidron. 14 Ko na wo o'woi u tawa ba̱ta̱ va̱ a̱ga̱nda̱ wa̱ a̱ma̱li suru shi, okolo a Asa a̱ shi ta̱ uba̱ta̱ wa̱ A̱sulazuva a wuma wa̱ yi suru suru. 15 Reve u ta̱wa̱ ni itana i azurufa na aza a zinariya na akwanu a na a̱yi na̱ dada va̱ yi a cayi A̱a̱'isa̱mapaɗa a̱ A̱sulazuva.

16 A yuwusan ta̱ uvon na̱ Asa na̱ Basha mogono ma Isra'ila a mantsa ma tsugono tsa̱ le. 17 A̱vu Basha Mogono ma Isra'ila ma̱ 'ya̱wa̱a̱ Yahuda nu uvon. Reve u suwa ukari wu ucira wa Rama adama u putsa vuma suru o uta̱ ko a uwa upasu wa Asa mogono ma Yahuda.

18 Reve Asa tara azurufa oɓolo na̱ zinariya na shi buwai e izuwa ya̱ A̱a̱'isamapaɗa a̱ A̱sulazuva na̱ a̱za̱ o ukobu wa̱ yi. Reve u ca azagbain a̱ yi ele, a̱vu u lyunguwa̱ Ben Hada ulobo wa Tabrimon mawun ma tsukaya ma Heziyon, mogono ma Aram za na ri na̱ nden a̱tsuma̱ a Dimaska, u damma, 19 <<Lyawa a̱mu na̱ a̱vu tsu yuwan nzuwulai, cine u shi na̱ dada va̱ na̱ dada va̱ wu. A̱yi ɗa nda, n lyunguwa̱ wu ta̱ nu une'e u azurufa na̱ zinariya. Vu kuɗa nzuwulai ma̱ wu na̱ Basha mogono ma Isra'ila adama u rono na̱ a̱ca̱pa̱ u lyawa mu.>>

20 A̱vu mogono Ben Hadad usu adanshi a Asa. Reve u lyungu nan yali ya̱ a̱soja a̱ yi a yuwan uvon ni ilyuci ya Isra'ila. A̱vu u lyuwa Iyon na̱ Dan na̱ Abel Bet Ma'aka oɓolo na̱ Kineret suru ni iɗa ya Nafutali suru. 21 A mantsa ma na Basha uwwai ili i nda, reve u lyawa usaa wa Rama, reve u vadala a̱ tyo Tirza. 22 Reve Asa Mogono u zuwa udammu a̱tsuma̱ a Yahuda suru, ko za a lyawa shi. Reve a̱ pura̱ atali na̱ ɗanga diga a̱tsuma̱ a Rama a na Basha da̱na̱i aa yuwusaan ulinga. Ele ɗa Asa Mogono u suwayi Gibiya a̱tsuma̱ a Banyami na̱ Mizfa waru.

23 Adama a akapi o ulinga u tsugono wa Asa, ni ili i na u yuwain suru, ni ilyuci i na u suwai suru, a ɗana le ta̱ a̱tsuma̱ a aatagada a alabari o ngono ma Yahuda. Amma a̱tsuma̱ a tsukutsa tsa̱ yi, reve u reme na̱ mɓa̱la̱ ma ana. 24 Reve Asa kuwa̱ ucina nkaya ma̱ yi a̱vu a̱ ciɗo a̱tsuma̱ a̱ lyuci va̱ Da̱wuda dada va̱ yi. A̱vu Yehoshafa ulobo wa̱ yi wo o'wo mogono o una̱ wa̱ yi.

25 Nadab ulobo wa Yerobowam wo o'wo ta̱ mogono ma Isra'ila a̱tsuma̱ a aa'wan e ire a Asa mogono ma Yahuda. U yuwan ta̱ tsugono tsa Isra'ila a'wan e re. 26 U yuwan ta̱ ili i iwuya e ekere a̱ A̱sulazuva, u kuru ta̱ ure wa dada va̱ yi, a̱vu u zuwa Isra'ila yuwan unusu.

27 Basha ulobo wa Ahija za vu u'wa wa Isaka zami ta̱ ure u na woo una Nadab, reve u ga̱la̱ yi a Gibeton, lyuci va aza a Filistiya, a mantsa ma na Nadab na aza a Isra'ila suru a̱ shi ta̱ a̱ ka̱nda̱ruwa̱ yi nu uvon. 28 Basha una ta̱ Nadab a̱tsuma̱ aa'wan a ta'atsu o tsugono tsa Asa mogono ma Yahuda. A̱vu u lyuwa tsugono o una̱ wa̱ yi.

29 A̱yi e reme tsugono, a̱vu wu una ama o u'wa wa Yerobowam suru. U lyawaa Yerobowam ko za wuma shi, amma u kototo le ta̱ suru, cine adanshi a̱ A̱sulazuva a na u dammai o una̱ wa aagbashi a̱ yi Ahija za va Shilo. 30 Ili i nda i fara ta̱ adama o unusu u na Yerobowam yuwain a na u zuwai aza a Isra'ila a yuwain unusu, waru na u zuwai A̱sulazuva A̱sula̱ a Isra'ila a yuwain upan.

31 Akapi o ulinga u tsugono tsa Nadab ni ili i na u yuwain suru, a ɗana le ta̱ a̱tsuma̱ a aatagada o tsugono tso o ngono ma Isra'ila. 32 Asa na̱ Basha mogono ma Isra'ila a̱ da̱na̱ ta̱ o uvon kuci a mantsa mo tsugono tse le.

33 A̱tsuma̱ a aa'wan a ta'atsu o tsugono tsa Asa mogono ma Yahuda, Basha ulobo wa Ahija o o'woi mogono ma Isra'ila suru a̱tsuma̱ a Tirza. U yuwan ta̱ tsugono a'wan ushin na̱ a̱za̱ a̱ na̱shi. 34 U yuwan ta̱ iwuya e ekere a̱ A̱sulazuva, u yuwan ta̱ mmalu o ure wa Yerobowam nu unusu wa̱ yi na u zuwai Isra'ila yuwain unusu.