1 A mantsa mo ndolo reve Abija ulobo wa Yerobowam u banakan. 2 A̱vu Yerobowam damma ka va̱ yi, <<'Yon vu pusa̱n iroci ya̱ wu adama e reve a na a̱vu ka va̱ ɗa wan. A̱vu vu ka̱ra̱ a̱ 'ya̱wa̱ Shilo, Ahija vumava̱sula̱ ta̱ ɗe, za na damma numu n to o'wo mogono ma ama a nda. 3 Vu tara akpatali o opopofu kupa, ne emeshen na̱ a̱a̱ka̱bu e ishiki, vu 'ya̱wa̱ vu cina yi. U ta damma wu ili i na yaa cina ulobo'o>> 4 A̱vu ka va Yerobowam yuwan ili i na u dammai reve u ka̱ra̱ a̱ 'ya̱wa̱ o u'wa wa Ahija a Shilo. Ahija gba buwa e inda shi adama a na esu a̱ yi a yuwan ta̱ ga̱lu adama a tsukutsa. 5 Amma A̱sulazuva a damma yi ta̱, <<Nlo ka va Yerobowam a̱ ta̱wa̱ uba̱ta̱ wa̱ wu we ece wu aɗa o ulobo wa̱ yi, adama a na u tu ubanakun. A̱vu vu damma yi ili i nda ni ili i nda.>> A mantsa ma na u rawai u ta̱ pusa̱n iroci ya̱ yi. 6 Ɗaɗa a na Ahija uwwai ilama yu udasuwu wa̱ yi o una̱ntsu, a̱vu u damma, <<Uwa, ka va Yerobowam. Adama a̱ nye ɗa va̱a̱ pususa̱a̱n iroci ya̱ wu she damma a̱vu vuma ro ɗa? A ca mu ta̱ ikaka ya alabari a vanvama n ca wu.>> 7 Ka̱mba̱ vu 'ya̱wa̱ vu damma Yerobowam, apa ili i na A̱sulazuva, A̱sula̱ a Isra'ila a dammai, <<N 'ya̱sa̱n wu ta̱ a̱tsuma̱ a ama reve n zuwa wu vo o'wo zagbain va ama a̱ va̱ aza a Isra'ila. 8 N karalai ta̱ tsugono diga o u'wa wa̱ Da̱wuda a̱vu n ca wu, agba suru na̱ ne vu ri tsa aagbashi a̱ va̱ Da̱wuda shi, za na guza̱i ili i na n zuwai a̱vu u kuru mu no okolo a̱ yi suru, a yuwusan ili i na i ri mejege goon e esu a̱ va̱. 9 Vu yuwan ta̱ iwuya hali vu la'a aza a na a yuwain wuma kafu a̱vu. Vu yuwaan ta̱ aciya̱wu musula̱ n ro, a̱ma̱li a na a̱ zuɗa̱i. Reve vu zuwa mu n yuwan upan, vu vari mu a̱ca̱pa̱ a̱ wu.

10 <<Adama ndolo, n ta̱ ta̱wa̱ na̱ a̱tsuma̱lima̱ o u'wa wa Yerobowam. N to kototo mawun mo ulobo ma Yerobowam a̱tsuma̱ a Isra'ila suru, aagbashi ko umatsun wu u'wa. N ta̱ kula̱to u'wa wa Yerobowam cine a̱ tsu kula̱to edemu hali she nu u puwa̱n suru. 11 Musa̱n n ɗa maa tama vuma va Yerobowam na suru kuwa̱i a̱tsuma̱ a̱ lyuci, a̱vu asala a̱ ka̱ɗa̱ aza a na a̱ kuwa̱i a atsusa. A̱sulazuva a ɗa a dammai!>>

12 Reve Ahija damma ka va Yerobowam, <<Vu 'yon vu ka̱mba̱ o u'wa. A̱vu a ma'uwaa a̱ lyuci'i, mawu'un ma̱ ta̱ kuwa̱. 13 Ama Isra'ila suru a ta yuwan mesun ma̱ a̱tsumola̱ngu ma̱ yi reve a̱ ciɗo yi. A̱yi ɗa goon a̱tsuma̱ o u'wa wa Yerobowam a na a̱a̱ ciɗo adama a na a̱yi ɗa goon a̱tsuma̱ o u'wa wa Yerobowam za na A̱sulazuva A̱sula̱ a Isra'ila, a uwwai uyo'o wa̱ yi. 14 A̱sulazuva a̱ ta̱ 'ya̱sa̱a̱n aciya̱yi mogono a aci a aza a Isra'ila za na o kototo u'wa wa Yerobowam, ana'an gogo nda. 15 A̱sulazuva a ta faba Isra'ila, reve wo o'wo she damma apumpu a agara a̱tsuma̱ a̱ mini. U ta̱ mula̱ Isra'ila diga a̱tsuma̱ e iɗa i sa'ani i nda i na u cayi nkaya n le reve u bete'we le mavada mo Uɗolu wa̱ Yufiriti, adama a na a zuwai A̱sulazuva a yuwain upan u na a̱ shuwa̱i a̱shuwutsu a Ashera. 16 Reve wu kasa na aza a Isra'ila adama o unusu u na Yerobowam yuwain, na̱ za na waru u zuwai ama a Isra'ila a yuwain.>>

17 A̱vu ka va Yerobowam 'yon u ka̱ra̱ a̱ ka̱mba̱ o u'wa a̱ lyuci va Tirza. A̱yi a uwa a̱tsuma̱ o u'wa'a, a̱vu ulobo'o u kuwa̱. 18 A̱vu ama a Isra'ila suru a̱ ciɗo yi, a̱vu a yuwan mesun ma̱ a̱tsumola̱ngu adama a̱ yi, cine A̱sulazuva a dammai o una̱ wa aagbashi a̱ yi Ahija vumava̱sula̱.

19 Akapi o ulinga u tsugono tsa Yerobowam nu uvon wa̱ yi na̱ cine u yuwain tsugbain, a ɗana le ta̱ a̱tsuma̱ a aatagada a alabari o ngono ma Isra'ila. 20 Yerobowam yuwan ta̱ tsugono a'wan ushin ne ejere ɗaɗa u kuwa̱i u cinai nkaya ma̱ yi. A̱vu Nadab ulobo wa̱ yi o'wo mogono o una̱ wa̱ yi.

21 Rehobowam ulobo wa Sulemanu u yuwan ta̱ tsugono a̱tsuma̱ a Yahuda. U da̱na̱ ta̱ na a'wan amunga na̱ za ta̱ ana wo o'woi mogono. U yuwan ta̱ tsugono tsa̱ Urishelima a'wan kupa na̱ aza cindere, lyuci na A̱sulazuva a ɗangwai diga a̱tsuma̱ o gundo va Isra'ila uba̱ta̱ u na aala a̱ yi a̱da̱na̱. Aala a mma va̱ yi a ɗa Na'ama, a̱yi za va Amon ɗa. 22 Ama a Yahuda a yuwan ta̱ ili i wuya e ekere a̱ A̱sulazuva. Reve a zuwai u yuwan tsushu'un adama o unusu u le a na a yuwain upasu na̱ cine nkaya n le n yuwain. 23 A̱ shuwa̱a̱ ta̱ aciyele a̱ma̱li a̱ ba̱ta̱ va̱ a̱ga̱nda̱, na̱ atali a̱ a̱ga̱nda̱ na̱ a̱shuwutsu a Ashera a agaɗi suru na̱ waru a ɗanga na ri kpa̱la̱m. 24 Hali gba waru a̱ da̱na̱ ta̱ na ali ashakala a̱ a̱a̱'isa̱ a̱tsuma̱ e iɗa'a. A̱vu ama e reme a yuwusan ili yi idaba suru yi nɗa n na A̱sulazuva a̱ gba̱ra̱i a̱ ma̱ka̱ka̱n ma aza a Isra'ila.

25 A aa'wan a tawun a̱ Rehobowam Mogono, Shisha mogono ma Masar ma̱ riya̱a̱ ta̱ Urishelima nu uvon. 26 U pura̱ ta̱ utsuru wa̱ A̱a̱'isamapaɗa a̱ A̱sulazuva na̱ waru utsuru wu ukobu u mogono. U pura̱ ta̱ ili biti, oɓolo na̱ a̱ra̱ga̱ a zinariya suru a na Sulemanu yuwain. 27 Reve Rehobowam mogono ma yuwan a̱ra̱ga̱ a̱ rumushili o una̱ we ele ndeɗe, reve u ca nan yali ya̱ a̱soja e piri a na a̱ da̱na̱i o ulinga o una̱ntsu wu ukobu u mogono. 28 Mantsa ma na suru mogono ma̱ 'ya̱wa̱i a̱ A̱a̱'isamapaɗa a̱ A̱sulazuva, a̱za̱ e piri a tsu tara ta̱ a̱ra̱ga̱'a̱, avu na a yuwan a̱ ka̱mba̱wu le a aasula e ipiri'i.

29 Adama a akapi o ulinga u tsugono tsa Rehobowam, ni ili i na u yuwain suru, a ɗana le ta̱ a̱tsuma̱ a aatagada a alabari o ngono ma Yahuda. 30 Rehobowam na̱ Yerobowam a yuwusan ta̱ uvon a mantsa suru. 31 Reve Rehobowam kuwa̱ ucina nkaya ma̱ yi, reve a̱ ciɗo yi uba̱ta̱ u ta̱ ne ele a̱ Lyuci va̱ Da̱wuda. Aala a mma va̱ yi a ɗa Na'ama, za va Amon. Avu Abija ulobo wa̱ yi wo o'wo mogono o una̱ wa̱ yi.