1 A̱vu Ahabu damma Yezebel suru ili i na Iliya yuwain, nu ununa suru wu unai ama̱sula̱ na̱ matsun me pe'eni. 2 Ɗaɗa Yezebel lyungu yi malingata a̱ tyo ya Iliya a na wa a damma, << Lyawa musula̱ ma̱ ge'eto mu, acina nfa'an na̱ mo o to wuma wa̱ wu tsa a ama a n ɗe shi.>>

3 Iliya uwwa ta̱ wovon, reve u 'yon suma adama a wuma wa̱ yi. Ana u rawai a̱tsuma̱ lyuci va Biyasheba va Yahuda, reve u lyawa agbashi a̱ yi lo, 4 amma a̱vu a̱ yi na aciya yi u reme mmalu mo urana uta̱ a̱ tyo o a̱tsuma̱ o una. A̱vu u rawa uba̱ta̱ wu uɗanga u ro, a̱vu u da̱nu pe u yuwan avasa adama u kuwa̱. Reve u damma, <<A̱sulazuva ili i rawa mu ta̱.>> N la'a nkaya n va̱ shi, <<Tara wuma u va.>> 5 A̱vu uvon o ululu wu u ɗanga'a reve nlavu n pura̱i.

Suru nu uta̱ reve malingata ma̱ A̱sulazuva ma̱ jisan yi u damma, <<'Yon adama a na va lyuwa ilyalya.>> 6 Ana u ka̱lyuwa̱i uba̱ta̱ suru, lo zuzu na aciya yi reve we ene e meshe a na a yuwain naa atali o usuɗuwu, na̱ medele me mini waru. A̱vu u lyuwa u sowo a̱vu u vowison waru.

7 Reve malingata ma̱ A̱sulazuva ma̱ ta̱wisa̱ ya̱ a̱yi wa̱ ire reve u ju'wa̱in u damma, <<'Yon! vu lyuwa, adama a na vu ta̱ na̱ mmalu ma alanga.>> 8 A̱vu u 'yon u lyuwa u sowo mini'i, Ilyalya'a gba i ca yi ta̱ ucira u na u yuwain mmalu mu ulivu amunga, naa ayin amunga hali she na u rawai Horeb, masasan ma̱ A̱sula̱. 9 Ɗe ɗa u tyo yi a̱tsuma̱ a̱a̱ba̱nu o ro adama a na wa asa pe.

Reve adanshi A̱sulazuva a̱ ta̱wa̱ ya̱ a̱yi, u damma, << Iliya nye ɗa va yuwusan pa nda?>>

10 Reve usu, <<Na̱ a̱ɓula̱ ɗa n da̱na̱i a yuwusan wu ulinga, A̱sulazuva A̱sula̱ o oɓolo a̱ a̱soja a zuva. Amma ama Isra'ila a 'yuwan ta̱ a na a yuwan tsutoni na̱ nzuwulai ma̱ wu, a̱vu o kototo masa'a ma̱ wu, a̱vu o una ama̱sula̱ a̱ wu na̱ matsun me pe'eni. A̱mu ɗa goon n buwai, gba gogo a ta a zama o una mu fo.>>

11 A̱vu A̱sulazuva a damma,<<Ka̱ra̱ o uta̱ alanga vi isawan zuva masasan a̱ ma̱ka̱ka̱n ma̱ A̱sulazuva, adama a na A̱sulazuva a̱ ta̱ ka̱ra̱la̱i pa.>>

A̱vu upepu wu ucira u ro u ne'eshenlei masasan a̱vu wu ɓoso fo atali elime A̱sulazuva, Amma a̱ yi u da̱na̱ pe a̱tsuma̱ o upepu'u shi. Ana o kotoi upepu reve a yuwaan ijinga̱ɗu wi iɗa, amma yi u da̱na̱ pe a̱tsuma̱ o ijinga̱ɗu wi iɗa'a shi. 12 Ana o kotoi ijinga̱ɗu wi iɗa'a, reve akina a̱cipa̱, amma A̱sulazuva da̱na̱ pe a̱tsuma̱ akina'a shi. Ana akina o kotoi, apa uɗyo u ro ke'en. 13 Ana Iliya uwwai uɗyo'o, reve u pala urewesu wa̱ yi nu utugu wa̱ yi reve wu uta̱ wi isawan o una̱ntsu ma uwa ma̱ a̱ba̱nu'u.

Reve uɗyo'o u damma yi, << Iliya nye ɗa va yuwusan pa nda'a?>> 14 Reve u usu, <<Na̱ a̱ɓula̱ ɗa n da̱na̱i a yuwusan wu ulinga, A̱sulazuva A̱sula̱ o oɓolo a̱ a̱soja a zuva. Amma ama Isra'ila a 'yuwan ta̱ a na a yuwan tsutoni na̱ nzuwulai ma̱ wu, a̱vu o kototo masa'a ma̱ wu, a̱vu o una ama̱sula̱ a̱ wu na̱ matsun me pe'eni. A̱mu ɗa goon n buwai, gba gogo a ta a zama o una fo.>> 15 Reve A̱sulazuva a damma yi, << Ka̱mba̱ nu ure u na vu ta̱wa̱i, a̱vu vu ka̱mba̱ a̱ tyo A̱tsuma̱ o una wa Dimaska. A mantsa ma na vu rawai ɗe, a̱vu vu tsuwa̱n Hazayel mani'i a na wo wo'o mogono ekere aza a Aram. 16 Reve waru vu tsuwa̱n Yehu ulobo wa Nimishi mani'i adama a na wo o mogono ekere aza a Isra'ila, a̱vu vu tsuwa̱n Elisha ulobo wa Shafa mani'i diga lyuci va Abel Mehola wo o vumava̱sula̱ o una̱ wa̱ wu. 17 Yehu to o una suru za na la'ai diga a matsun me pe'eni ma Hazayel, agba Elisha to o una fo suru za na la'ai diga a matsun me pe'eni ma Yehu. 18 Suru na̱ tsu ndolo n lyawa ta̱ ama ukpakukupo ucindere (7,000) a̱tsuma̱ Isra'ila, a za na a 'yuwain a na kingyo wa̱ musula̱ ma Ba'al, agba a̱vu a 'yuwan a na a katala yi.>>

19 Reve diga lo Iliya 'ya̱wa̱ u cina Elisha ulobo wa Shafa. U da̱na̱ ta̱ e iluma ni inan yi iluma kupa ne ejere, agba a̱ yi na aciya yi u da̱na̱ ta̱ na̱ wunlu wa kupa ne ejere. Reve Iliya 'ya̱wa̱ ya̱'a̱ yi reve u zuwa umuna wa̱ yi a̱ nlyungu ma̱ yi. 20 Reve Elisha lyawa lo ina'an, reve u suma u cina Iliya. U damma,<<Lyawa n 'ya̱wa̱ n katala dada va̱ na̱ mma va̱ reve n damma le n ka̱ra̱ ta̱, a̱vu n ta̱wa̱ n 'ya̱wa̱ oɓolo na̱ a̱vu.>>

Reve Iliya usu, <<Vu wala, nye ɗa gba n yuwaan nu wu?>>

21 Reve Elisha lyawai u ka̱mba̱. A̱vu u tara inan ya̱ yi reve u paɗa le. A̱vu wu ɓatsa uɗanga u na wa̱a̱ nla̱sa̱ ina'an, ɗaɗa u su'wain i inama'a. Reve u ne'eshen a ama, a̱vu a tama. Reve u 'yon u ka̱ra̱ u kuru Iliya a̱vu wo o'wo za vi ikambi ya̱ yi.