1 Ele lo a̱vu vumava̱sula̱ za na a̱ tsu ɗe Iliya za va Tishibe diga o upasu wa Giliyadu, u damma mogono Ahabu, <<Na̱ A̱sulazuva, A̱sula̱ a Isra'ila za na maa yuwusaan a̱ga̱nda̱ a̱ ri wuma, a yuwan a'iza ko o ro'o shi a̱tsuma̱ a a'wan a na a̱a̱ ta̱wa̱, she na̱ n damma.>>

2 Reve adanshi a̱ A̱sulazuva a̱ ta̱wa̱ uba̱ta̱ wa Iliya: 3 <<Lyawa uba̱ta̱ u nda, vu vadala a̱ tyo o upasu wa asana a̱vu vu pa'an o Uɗolu wa Kerit, asana o Uɗolu wa̱ Urudu. 4 Vu ta̱ da̱na̱ o sowuso mini diga o uka̱ri'i, waru n zuwa ta̱ akakan a lyuwato wu ɗe.>>

5 Ɗaɗa Iliya yuwain ili i na A̱sulazuva a damma niyi. U ka̱ra̱ ta̱ a̱ tyo o Uɗolu wa Kerit, asana a̱ Urudu, a̱vu u da̱nu ɗe. 6 Akakan a̱ ta̱wusa̱a̱ yi ta̱ no opopofu ni inama nu usana nu ulivu. A̱vu waru u sowuso mini diga o uka̱ri'i.

7 Ana a jimai ke'en reve uka̱ri'i wu ukwan adama a na a̱ shi e iro'i e iɗa'a shi.

8 Reve adanshi a̱ A̱sulazuva a̱ ta̱wa̱ uba̱ta̱ wa̱ yi: 9 <<Ka̱ra̱ a̱ tyo Zarefat wu upasu wa Sidon, vu da̱nu ɗe. N zuwa ta̱ ma̱runa̱ mo ro ɗe uba̱ta̱'a̱ u casu wu ilyalya.>> 10 Ɗaɗa u ka̱ra̱i a̱ tyo Zarefat. Ana u rawai o una̱ntsu u lyuci'i, a̱vu u cina ma̱runa̱ mo ro lo o ɓolotosu ɗanga. Reve u ɗe yi u damma, <<Ne'e mu ma̱ mini n sowo.>> 11 Ana u vadalai adama u tara u ta̱wa̱a̱ yi, reve u ɗe yi u damma, <<Reve waru vu ne'e mu fo mabushi mo opopofu.>>

12 Reve ka'a u usu, <<N kucina ta̱ na̱ wuma A̱sulazuva A̱sula̱ a̱ wu, n ri na̱ opopofu shi, mayira i lashi i ɗa goon n ri na̱ a̱yi a̱ a̱a̱ka̱bu na̱ ma mani'i ma zetun e medele. N to ɓolotosu ɗanga na maa tara a̱ tyo o u'wa adama n yuwan ilyalya adama a̱ va̱ nu ulobo u va̱ na tsaa lyuwa a̱vu tsu kuwa̱.>>

13 A̱vu Iliya damma yi, <<She vu uwwa wovon wan. Ka̱ra̱ a̱ tyo o u'wa vu yuwan cine vu dammai. Amma vu fara yuwaan mu memeshen ne'en diga a̱tsuma̱ e ili i na vu ri na̱ a̱yi a̱vu vu ta̱wa̱a̱ mu. Reve vu yuwan za va̱ wu nu ulobo wa̱ wu. 14 Adama a na apa ili i na A̱sulazuva, A̱sula̱ a Isra'ila a dammai: a̱a̱ka̱bu a yira woo koto shi medele ma mani'in waru waa ukwan shi, hali she urana u na A̱sulazuva a̱ lyunguyi ni iro'i e iɗa'a.>>

15 Reve ka'a u ka̱ra̱ u yuwan cine Iliya damma niyi. A̱vu Iliya na̱ ka'a nu u'wa wa̱ yi suru a̱ da̱na̱ ni ilyalya usana suru. 16 A̱a̱ka̱bu a mayira i yira i lashi'i u koto shi medele ma mani'in waru wu ukwan shi cine adanshi a̱ A̱sulazuva a dammai o una̱ wa Iliya.

17 Ana a tarai mantsa a̱vu ulobo wu ka'a, za vu u'wa'a u banakan. A̱vu ubanaku'un u suɗuwa lon, o ukosu reve u kuwa̱. 18 Reve ka'a u damma Iliya, <<Vuma va̱ A̱sula̱, cine vu yuwan numu tsunda? Vu ta̱wa̱ ta̱ adama vu cuwaan mu nu unusu u va̱ a̱vu vu una ulobo u va̱?>>

19 A̱vu Iliya damma yi,<<Ta̱wa̱a̱ mu na̱ ulobo wa̱ wu'u.>> A̱vu u ushi mawu'un e ekere a ka'a, a̱vu u sheɗe yi a gawan a aasula a zuva uba̱ta̱ u na wasusa, a̱vu u voton yi a̱ a̱ga̱da̱ a̱ yi. 20 Reve u yuwaan avasa uba̱ta̱ wa̱ A̱sulazuva,<<A̱sulazuva A̱sula̱ a̱ va̱, adama a̱ nye vu ta̱wa̱yi ma̱runa̱ ma nda ma na n ri nden uba̱ta̱ wa̱ yi na̱ a̱tsuma̱lima̱ na vu unai ulobo wa̱ yi?>> 21 A̱vu Iliya von a̱ lipu mawun mo ndolo toto uta'atsu, a̱vu u showen A̱sulazuva, u damma, <<A̱sulazuva A̱sula̱, lyawa wuma u mawun ma nda u ka̱mba̱a̱ yi!>>

22 A̱vu A̱sulazuva a uwwa avasa a Iliya, reve wuma u mawu'un u ka̱mba̱, a̱vu u jiwan. 23 Reve Iliya sheɗe mawu'un u tara yi a̱ cipa̱ diga a aasula a zuva a uwa a̱tsuma̱ o u'wa. A̱vu u ca mma va̱ yi a̱yi a̱vu u damma, <<Ka̱lyuwa̱, ulobo wa̱ wu ɗa nda wuma.>>

24 Reve ka'a u damma Iliya, <<Gogo n reve ta̱ a na a̱vu vuma va̱ A̱sula̱ a ɗa, waru a adanshi a̱ A̱sulazuva diga o una̱ wa̱ wu amayun a ɗa.>>