1 Mogono Sulemanu yuwan ta̱ tsugono tsa aza a Isra'ila suru. 2 Ele nda ele ɗa ala a azagbain a̱ yi: Azariya ulobo wa Saduku ganu,

3 Elihore na̱ Ahiya, olobo a Shisha a̱za̱ e iɗana. Jehoshafa ulobo wa Ahilu a̱yi ɗa za na tsu ɗanasa ili i na i farai,

4 Benaya ulobo wa̱ Yehoyida yali ya̱ a̱soja. Saduku na̱ Abiyata nan ganu.

5 Azariya ulobo wa Natan a̱yi ɗa za na e idanasa azagbain o upasu, Zabud ganu ulobo wa Natan a̱yi ɗa za na aa casu mogono a̱sa̱la̱.

6 Ahisha a̱yi ɗa za na e idanasa ukobu u mogono, Adoniram ulobo wa Abda ɗa za na ee idanasa a̱za̱ o ulinga u tsugbashi.

7 Sulemanu da̱na̱ ta̱ na̱ nan gwamna o upasu kupa ne ejere a̱tsuma̱ a Isra'ila suru. Ele ɗa aza a na a̱ ri na̱ a̱ga̱nda̱ a na a̱ tsura̱a̱ mogono nu u'wa wa̱ yi ilyalya. Za ta̱ suru ta̱ ta̱wa̱a̱ u'wa mogono ni ilyalya i woto a̱tsuma̱ a'wan. 8 Apa ala e le: Ben Hur, za na da̱na̱i zagbain wu upasu wi iɗa ya agaɗi ya Ifiramu.

9 Ben Deka zagbain wu upasu wa Makaz, Shalbim na̱ Bet Shemesh na̱ Elon Bet Hanan,

10 Ben Hese zagbain wu upasu wa Arubot, Soko na̱ suru upasu wa Hefa a̱za̱ a̱ yi a ɗa.

11 Ben Abinada zagbain wu upasu wa Napo Do, u da̱na̱ ta̱ a zuwusa Tafa usheli wa Sulemanu.

12 Bana ulobo wa Ahilu zagbain wu upasu wa Ta'ana na̱ Megido, na̱ suru upasu wa Bet Shan za na ri zuzu na̱ Zaretan za̱la̱ va Yezireyel, diga Bet Shan a̱ tyo Abel Mehola a cina upasu wa Yokmeyam.

13 Ben Geba zagbain wu upasu wa Ramot Giliyadu, na̱ mulyuci ma Jayi ulobo wa Manase a̱tsuma̱ a Giliyadu a̱za̱ a̱ yi a ɗa, nu upasu wi iɗa wa Argo fo va Bashan oɓolo na̱ ilyuci gbain yi kari kupota̱li na̱ na̱ntsu vu irumushili.

14 Ahinada ulobo wa Ido zagbain wu upasu wa Mahanayim.

15 Ahima zagbain wu upasu wa Nafutali u zuwa ta̱ Basema usheli wa Sulemanu.

16 Bana ulobo wa Hushai, zagbain wu upasu wa Asha na̱ a̱tsuma̱ a Balo.

17 Jehoshafa ulobo wa Faruwa, zagbain wu upasu wa Isaka,

18 Shimai ulobo wa Ela, zagbain wu upasu wa Banyami,

19 Geba ulobo wa Uri a̱tsuma̱ a Giliyadu iɗa ya Sihon mogono ma aza a Amoriya ni iɗa yo Og mogono ma Bashan. Waru a̱ da̱na̱ ta̱ na̱ gwamna ta̱ na da̱na̱i zagbain vi iɗa ya Yahuda.

20 Ama a Yahuda na aza a Isra'ila a̱ da̱na̱ ta̱ a̱bunda̱ cine vu revei ayuwun a̱ nge'en m mala. A̱vu a lyuwa o sowo a yuwan ma̱za̱nga̱. 21 A̱vu Sulemanu yuwan tsugono tsa nɗa n tsugono suru diga o Uɗolu wa̱ Yufiriti a cina iɗa ya aza a Filistiya, hali a cina utyo wa Masar. Nɗa nda a̱ ta̱wa̱ ta̱ nu utafa u le, a̱vu a yuwaan Sulemanu a̱ga̱nda̱ a mantsa ma wuma wa̱ yi suru.

22 Ilyalya yu u'wa wa Sulemanu za vu uranu uta̱ u rawa ta̱ ibuhu mata'atsu u yira i lashi, ni ibuhu kupota̱li u yira yi ishina, 23 ni inan kupa i na a̱ gutsuyi, ni inan ushin i na i ri e ekere a azaguɓa ni ikyon ukpaku na̱ mgbele, oɓolo na̱ nshon na̱ nre'on ni inama yu una oroci a̱ nre'on ni iɗo i gbagbain. 24 Mogono Sulemanu yuwan ta̱ tsugono tsa nɗa i tsugono tsa na tsa̱ ri a̱livu wu Uɗolu wa̱ Yufiriti suru, diga Tifsa a̱ tyo Gaza, reve u da̱na̱ na̱ nden ma asuvu a̱ mɓa̱nga̱ suru. 25 A̱tsuma̱ a wuma wa Sulemanu Yahuda na̱ Isra'ila, diga upasu wu ugana u lyuci wa Dan a̱ tyo upasu wu uyagi u lyuci wa Biyasheba, a̱ da̱na̱ ta̱ gbaga, za suru nden a̱tsuma̱ o u'wa wa̱ yi na ataci a̱ ina̱bi na̱ ɗanga vu ubiri va̱ yi.

26 Sulemanu da̱na̱ ta̱ no ogodo ukpakukupa amunga (40,000) adama e ido yi ikeke yu uvon ya̱ yi, ni ido ukpakukupa nu ukpakukupa ure (12,000).

27 Nan gwamna kupa ne ejere'e, za suru a̱tsuma̱ o woto u ta̱wusa̱ ta̱ Sulemanu na aza a na a lyuwusai a apada o mogono suru ilyalya. E reve a na a lamba ili i ro shi. 28 Waru a̱ ta̱wusa̱ ta̱ nu ukunzuwu u yitabo na̱ uruna̱ uba̱ta̱ u na wu ntsayi adama e ido yi ikeke yu uvon na akapi e ido.

29 A̱sula̱ a ca ta̱ Sulemanu ugbozu nu urevu nu uguru lon. Ugbozu wa̱ yi u ri n rito shi cine wuyun wu nge'en m mala n ri. 30 Urevu wa Sulemanu u la'a ta̱ urevu wa ama a Asana suru, na̱ a̱za̱ o urevu a Masar suru. 31 U la'a ta̱ ama a na a buwai suru urevu, oɓolo na̱ Etan na̱ Ezura na̱ Heman na̱ Kalkol na̱ Darda olobo a Mahol. A̱vu u yuwan ala a̱tsuma̱ a nɗa n na n ri uka̱nda̱ruwu suru. 32 U yuwan ta̱ udammu ukpakukupa uta'atsu (3,000), waru u ɓatsa ta̱ ishipa ukpakukupa no ozo o ton (1,005). 33 U cuɗuwa ta̱ wuma wu ɗanga, diga a sida va Lebanon a cina ototopi a̱ hiso aza a na a kungwai o uta̱ o ukari. U yuwan ta̱ uritosu adama e inama na̱ nnunu, ili yi ika̱ta̱pu na̱ mugula. 34 A̱vu ngono diga a nɗa koko'o suru n lyungu aza a na a̱ ta̱wa̱ adama a uwwa urevu wa Sulemanu.