1 Ana mantsa mo ukwisa̱ ma rawai na mogono Da̱wuda a̱a̱ kuwa̱, a̱vu u yuwaan Sulemanu ulobo wa̱ yi tsuɓari u damma,

2 << A̱mu ɗa nda a zama ma̱kuwa̱a̱ cine za suru aa yuwan o uvaɗi. Adama o ndolo vi isawan nu ucira, vu roco a̱vu vali ɗa. 3 A̱vu vu toni ili i na A̱sulazuva A̱sula̱ a̱ wu a cigai: Vu yuwan mmalu a̱tsuma̱ o ure wa̱ yi, a̱vu vu guza̱ ili i na u zuwai, na̱ udammu wa̱ yi, na̱ wila̱ wa̱ yi, ni ili i na i ri yu uɗanu a̱tsuma̱ a̱ wila̱ wa Musa. Adama vu lyuwa aci a̱tsuma̱ e ili i na vaa yuwan biti nu uba̱ta̱ u na va̱a̱ 'ya̱wa̱ suru. 4 Waru adama A̱sulazuva o shiton nzuwulai n na u yuwaan numu na u dammai: <Na̱ olobo a̱ wu a̱ ka̱lyuwa̱ cine a yuwusan wuma u le, waru na a yuwan mmalu mejege e ekere a̱ va̱ no okolo e le suru na asuvu e le suru, vaa lamba vuma na a̱ da̱na̱ o ootogu o tsugono tsa Isra'ila shi.>

5 <<Gogo a̱vu na aciya̱wu vu reve ta̱ ɗe ili i na Yowab za na mma va̱ yi ɗa Zeruya yuwaan na̱ a̱mu, ili i na u yuwain na̱ nan yali e re ya̱ a̱soja a Isra'ila, Abna ulobo wa Ner na̱ Amasa ulobo wa Yeta. Wu una le ta̱, reve wo oco mpasa n le mantsa ma̱ nden n lafiya she damma a̱tsuma̱ o uvon. Agba gogo mo o ta̱ atsupu e ili i na u yuwain, reve n sowo a̱tsuma̱lima̱ e ili i na u yuwain. 6 Vu yuwan na̱ a̱yi ili i na ve enei wu ntsayi, agba she vu lyawa yi u kutsa a̱vu u kuwa̱ gbaga wan.

7 <<Amma vu roco olobo a Bazilai va Giliyadu isa'ani, a̱vu vu lyawa le a lyuwa oɓolo na̱ a̱vu apada a̱ wu. Ee isawaan mu ta̱ mantsa ma na n suma yi mawun ma̱ a̱na̱wun ma̱ wu Absalom.

8 <<A̱vu vu cuwan, vu to oɓolo na̱ Shimeyi ulobo wa Gera, vuma va Banyami diga Bahurim. Wi isula mu ta̱ lon a mantsa ma na n ka̱ra̱i a̱ tyo Mahanayim. Amma a mantsa ma na wu uta̱i adama a na wa raba mu o Uɗolu wa̱ Urudu, n kucinaa yi ta̱ na̱ A̱sulazuva: <Moo una wu na̱ matsun me pe'eni shi.> 9 Agba gogo she vu tara yi za na ri babu unusu wan. A̱vu vuma vu urevu ɗa vu reve ta̱ ili i na vaa yuwan na̱ a̱yi. Vu ca̱co aaci o yono ya̱ yi a̱ cipa̱ a̱ tyo a aason a̱tsuma̱ a mpasa.>>

10 Reve Da̱wuda kuwa̱ ucina nkaya ma̱ yi, a̱vu a̱ ciɗo yi a̱tsuma̱ a̱ lyuci va̱ Da̱wuda. 11 U yuwan ta̱ tsugono tsa Isra'ila a'wan amunga, a'wan e cindere a̱tsuma̱ a Heburon na a'wan mata'atsu na aza a ta'atsu a̱tsuma̱ a̱ Urishelima. 12 A̱vu Sulemanu da̱nu zuva vo ootogu o tsugono tsa dada va̱ yi Da̱wuda, a̱vu tsugono tsa̱ yi tsa̱ da̱na̱ nu ucira lon.

13 Urana u ro, a̱vu Adonija ulobo wa Hagit u ka̱ra̱ adama we ene Bashaba mma va Sulemanu. Reve Bashaba ece yi, lafiya ɗa vu ta̱wa̱i pa nda?

A̱vu u usu yi, <<Amayun, lafiya ɗa.>> 14 Reve u damma yi, << N ta̱ na adanshi a na n cigai a na maa damma wu.>>

Reve usu yi, <<Yuwan adanshi n ta uwwusa wu.>> 15 A̱vu u damma, <<Vu reve ta̱ ana tsugono tsa a nda za va̱ ɗa, waru a ama a Isra'ila a zuwa ta̱ okolo e le suru a na a̱mu ɗa maa yuwan tsugono. Agba ili i ɗa a nda i vadalai, a̱vu tsugono tsa̱ ka̱mba̱ uba̱ta̱ wu zawa'a va̱, adama a na u ta̱wa̱ ta̱ uba̱ta̱ wa̱ yi diga uba̱ta̱ wa̱ A̱sulazuva. 16 Agba gogo n ta̱ ni ili i ta̱ i na n cigai m pati wu, she vu putsaa mu a̱yi wan.>>Reve Bashaba damma yi, damma n ta uwwusa wu. 17 A̱vu u lyuwa elime, << Kamba mu a na va aa patiya mu mogono Sulemanu ca mu Abisha va Shunem wo o'wo ka va̱, n reve ta̱ ana wa̱ kuɗa̱ a uwwa wu shi.>> 18 A̱vu Bashaba usu yi,<<U ta̱ da̱na̱ ulobonu, n ta yuwan adanshi na̱ mogono adama a̱ wu.>> 19 A matsan ma na Bashaba ka̱ra̱i a na we ene mogono Sulemanu adama a na waa yuwan adanshi o una̱ wa Adonija, a̱vu mogono ma̱ yon adama u ga'aton yi, a̱vu u ka̱ɗa̱towa̱ yi a̱vu u da̱nu ootogu o tsugono tsa̱ yi. A̱vu u zuwa a̱ ta̱wa̱a̱ yi no ootogu, a̱vu u da̱nu o ukere wu usa'ani wa̱ yi. 20 Reve u damma yi, << N ta̱ ni ipati ke'en i na n cigai a na ma̱a̱ ta̱wa̱a̱ e ekere wu she vu putsa mu wan.>> A̱vu mogono ma̱ usu yi, << Damma, mma va̱, maa putsa wu shi.>>

21 A̱vu u damma, <<Lyawa a ca Abisha va Shunem olo vawun va̱ wu Adonija.>>

22 A̱vu mogono Sulemanu usu mma va yi, <<Adama a̱ nye a ɗa vu patiyi Abisha va̱ Shunem adama a Adonija? U shi ta̱ a̱ da̱na̱ ulobonu vu patiya yi tsugono, adama a na a̱yi zakpara va̱ ɗa, waru Abiyata ganu na̱ Yowab ulobo wa Zeruya a̱ da̱na̱ ta̱ o ucina̱ wa̱ yi.>> 23 A̱vu mogono Sulemanu kucina na̱ A̱sulazuva,<<Lyawa A̱sulazuva a tara wuma u va̱, na̱ Adonija tsupa na̱ wuma wa̱ yi shi e ekere e ipati i na u yuwain shi! 24 Agba gogo a na A̱sulazuva a zuwa numu ootogu o tsugono a dada va̱ Da̱wuda na amayun cine u yuwain nzuwulai, a̱vu waru u zuwa ugundo u va̱ a na a̱ da̱na̱ ozo o tsugono, n kucina ta̱ ana'an nda na ala A̱sulazuva a wuma, she na̱ Adonija kuwa̱!>> 25 A̱vu mogono Sulemanu ca udammu e ekere Benaya ulobo wa̱ Yehoyida a na wo o una Adonija. Ne tsundolo tsa ɗa Adonija kuwa̱i.

26 A̱vu mogono ma damma Abiyata ganu, <<Vu ka̱mba̱ e iɗa ya̱ wu a̱tsuma̱ Anatot. Adama a na wu ntsaa ta̱ mu una wu, amma mo una wu gogo shi, adama a na vu tsu tarasa ta̱ akpati a nzuwulai o Mogono ma̱ A̱sulazuva elime Dada va Da̱wuda, agba suru a̱tsuma̱lima̱ a na a cinai Dada va̱, vu da̱na̱ ta̱ oɓolo na̱ yi.>> 27 Adama o ndolo a̱vu Sulemanu cipa̱to Abiyata diga o ulinga u tsuganu a̱tsuma̱ o u'wa wa̱ A̱sulazuva. Tsundolo fara ta̱ adama a na o shiton adanshi a na A̱sulazuva a yuwain a̱ Shilo a aci o u'wa wa̱ Eli.

28 A matsan ma na Yowab uwwai adanshi o ndolo, a̱vu u suma a̱ tyo o u'wa wa̱ A̱sulazuva a̱vu u reme u gbagbala avana a na a̱ ri a masa'a a̱tsuma̱ o u'wa wa̱ A̱sulazuva. Adama a na Yowab da̱na̱ ta̱ a yuwusan tsutoni na̱ Adonija, amma ɗe nu ufaru u yuwan tsutoni na̱ Absalom shi. 29 Ana a dammai mogono Sulemanu ana, Yowab suma ta̱ a̱ tyo o oogodo a̱ A̱sulazuva waru u ta̱ lo zuzu na̱ masa'a, reve Sulemanu damma Benaya ulobo wa̱ Yehoyida,<<'Ya̱wa̱ vu una Yowab!>>

30 A̱vu Benaya ka̱ra̱ a uwa o oogodo a̱ A̱sulazuva a̱vu u damma Yowab, <<Mogono ma damma,<Vu uta̱!> >> A̱vu usu yi, << O'o, mo uta̱ shi, pa nda ɗa ma̱a̱ kuwa̱.>> A̱vu Benaya ka̱mba̱ uba̱ta̱ u mogono reve u ka̱mbuwa̱i ili i na Yowab damma niyi.

31 A̱vu mogono Sulemanu damma yi, <<Vu yuwan ili i na u damma nuwu vu yuwan. A̱vu vu una yi reve vu ciɗo yi, tsundolo tsa ɗa vaa kasa a̱mu na̱ u'wa wa dada va̱ ni imini yi mpasa n na Yowab ocoyi babu unusu. 32 Adama o ndolo A̱sulazuva a ta tsupa mpasa ma ama ma na wu unai aza a na dada va̱ Da̱wuda da̱na̱i nu urevu shi. Wu una ta̱ ama e re na̱ matsun me pe'eni, Abna ulobo wa̱ Ner, yali ya̱ a̱soja a Isra'ila, na̱ Amasa ulobo wa̱ Yeta, yali ya̱ a̱soja a Yahuda, aza a na a la'a niyi a̱ɓula̱ ni isa'ani. 33 Lyawa mpasa n le n ka̱mba̱ a aci a̱ Yowab nu ugundo wa̱ yi babu ukotu. Amma Da̱wuda, nu ugundo wa̱ yi, nu u'wa wa̱ yi, na̱ waru tsugono tsa yi, lyawa asuvu nden a̱ A̱sulazuva a̱ da̱na̱ oɓolo na̱ yi hali hali.>>

34 A̱vu Benaya ulobo wa̱ Yehoyida u ka̱ra̱ wu una Yowab, a̱vu a̱ ciɗo yi a̱tsuma̱ e iɗa ya̱ yi a̱tsuma̱ o una. 35 A̱vu mogono ma zuwa Benaya ulobo wa̱ Yehoyida yali ya̱ a̱soja o una̱ wa̱ Yowab, reve u zuwa Saduku ganu o una̱ wa Abiyata.

36 A̱vu mogono ma̱ lyunguwa̱ Shimeyi a̱vu u damma yi, << Vu suwaa aciya̱wu u'wa a̱tsuma̱ a̱ Urishelima adama vu da̱nu pe, she vu ka̱ra̱ tyo uba̱ta̱ u ro wan ko ke'en. 37 Urana u na vu pasai uka̱ri wu upasu wa̱ Kidron, vu reve vu ta̱ kuwa̱, imini yi mpasa ma̱ wu n ta̱ a aci a̱ wu.>>

38 A̱vu Shimai usu mogono, <<Ili i na vu dammai u tu ulobonu. Aagbashi a̱ wu a ta yuwan ununa zagbain mogono ma̱ va̱ ma dammai.>> Reve Shimeyi da̱nu a̱tsuma̱ a̱ Urishelima rana a̱ a̱bunda̱.

39 A mantsa ma na a yuwain a'wan a ta'atsu, a̱vu agbashi e re a Shimai a suma a̱ tyo ya Akish ulobo wa Ma'aka, mogono ma Gat, a̱vu a damma Shimeyi, <<Agbashi a̱ wu a̱ ta̱ pe a̱tsuma̱ a Gat.>> 40 A̱vu u 'yon wu nla̱a̱ mololi ma̱ yi urutsu, a̱vu u ka̱ra̱ a̱ tyo Gat uba̱ta̱ wa Akish adama u zami agbashi yi. A̱vu Shimeyi ka̱ra̱ a̱vu u ta̱wa̱ na agbashi yi diga Gat.

41 A mantsa ma na a dammai Sulemanu a na Shimeyi lyawa ta̱ Urishelima a̱ tyo Gat amma gogo u ka̱mba̱ ta̱, 42 reve mogono me ɗe Shimeyi a̱vu u damma yi, <<N zuwa wu vu kucina na̱ A̱sulazuva a̱vu waru n rono wu atsuvu shi, <Suru mantsa ma na vu ka̱ra̱i uba̱ta̱ u ro biti, a̱vu vu reve a na va̱a̱ kuwa̱ shi?> A mantsa mo ndolo a̱vu vu damma mu,<Ili i na vu dammai u tu ulobonu. N ta yuwan tsutoni na̱ a̱vu.> 43 Adama a̱ nye ɗa vu kuɗai akucunu a na vu yuwain na ala a̱ A̱sulazuva a̱vu vu 'yuwan aa yuwan tsutoni na̱ wila̱ u na n ca nuwu?>>

44 A̱vu mogono ma damma Shimeyi, << Vu reve ta̱ o okolo a̱ wu suru iwuya i na vu yuwayin dada va̱ Da̱wuda. Tsundolo tsa ɗa A̱sulazuva aa tsupa wu iwuya i na vu yuwain. 45 Amma mogono Sulemanu ta̱ da̱na̱ za va aba'un, ne ɗa tsugono tsa̱ Da̱wuda tsa̱a̱ da̱na̱ lo uba̱ta̱ wa̱ A̱sulazuva babu ukotu.>>

46 A̱vu mogono Sulemanu ca Benaya ulobo wa̱ Yehoyida udammu, u ka̱ra̱ wu una Shimai. A̱vu u ka̱ra̱ wu una yi. A mantsa mo ndolo gba tsugono tsa̱ Sulemanu tsa̱ da̱shi ta̱ ucira lon.