1 Ana mantsa mo ro ma yuwain ili i ro i fara ta̱ a na u ɓoloi uɗuma̱ u na u ri za va Nabot va Yezebel a̱tsuma̱ Yezireyel o upasu wa Samariya, za na ri zuzu nu ukobu wa Ahabu mogono. 2 Reve Ahabu damma Nabot, << Lyawaa mu uɗuma̱ wi ina̱bi wa̱ a̱ wu adama a na ma cu'wa̱n itana ya̱ a̱rumbu, adama a na u ri lo zuzu nu ukobu u va̱. N ta ca wu uɗuma̱ ina̱bi za na la'a yi nda ulobonu, ko na̱ vu ciga, reve waru n tsupa wu na̱ azurufa na lobonoi.>>

3 A̱vu Nabot usu yi, << A̱sulazuva a para a na ma ca wu agadu a nkaya n va̱.>>

4 A̱vu Ahabu ka̱ra̱ a̱ tyo u'wa, na̱ a̱tsuma̱la̱ngu nu upan adama a na Nabot vuma va Yezireyel damma ta̱, <<Maa ca wu uɗuma̱ wa agadu a nkaya n va̱ shi.>> A̱vu u von a̱ a̱a̱ga̱da̱ yi nu u urewesu wa̱ yi a̱ tyo o upasu wu uɓaɓu reve u 'yuwan a na wa lyuwa ilyalya.

5 A̱vu ka va yi Yezebel ta̱wa̱ uba̱ta̱ wa̱ yi we ece yi, << Adama nye ɗa vu ri ya̱ a̱tsuma̱la̱ngu? Adama nye ɗa vu 'yuwain a na va lyuwa ilyalya?>>

6 Reve usu ka'a, <<Adama a na n damma ta̱ Nabot vuma va Yezireyel, <Wina mu uɗuma̱ wi inabi wa̱ wu, ko waru u ciga, a na ma ca yi uɗuma̱ wi inabi u ro ekere a za ndolo.>

<<Reve u usu, <A̱mu ma ca wu uɗuma̱ wi ina̱bi u va̱ shi.> >>

7 A̱vu Yezebel ka va yi damma,<<Tsun nda tsa ɗa va̱ da̱na̱ a yuwusan tsugono e ekere a aza a Isra'ila, mogono? 'Yon vu lyuwa ilyalya! Vu uwwa uyo'o wuma wa̱ wu. N ta̱ ushiya̱ wu uɗuma̱ wi ina̱bi ya Nabot vuma va Yezireyel.>>

8 Reve u ɗana mpepelime na ala Ahabu ukatalu na̱ urotsu wa̱ yi. Reve u ne'eshen mpepelime a̱ tyo wu uba̱ta̱ wu mbara na azagbain a lyuci na na Nabot ri na̱ nden oɓolo na̱ le. 9 Ili i na ri pe uɗanu a̱tsuma̱ mpepelime'e a̱yi ɗa,

<< Zuwai adama a na a yuwan akuli, reve i ɗe a ama reve izuwa Nabot elime ama'a. 10 A̱vu i zuwa ama e pere ejere aza a na a̱da̱na̱ a̱ka̱nla̱ a̱ yi, reve a tawa yi utyo adansa, wi isula ta̱ A̱sulazuva oɓolo na̱ mogono. Reve i tara yi o uta̱ alanga yi vara yi yu unai.>>

11 A̱vu mbara na a azagbain a̱ lyuci na ri nden oɓolo na̱ Nabot a yuwaan ununa Yezebel ɗanaa nle a̱tsuma̱ mpepelime n na u lyunguwa̱a̱ n le. 12 A̱vu a yuwaan yisali adama a na a yuwan akuli, reve a̱ ta̱wa̱ na̱ Nabot a zuwai elime ama'a. 13 A̱vu a ama e pere ejere ndolo a̱ da̱nu zuzu na̱ a̱ yi. Reve ama e pere o ndolo a̱ ta̱wa̱ na adanshi adama a Nabot a dansaa ama'a,<<Nabot isula ta̱ A̱sulazuva oɓolo na̱ mogono.>> Adama o ndolo a̱vu a tara yi a̱ tyo o ucina̱ u lyuci a̱vu a vara yi na aatali hali she na o una niyi. 14 Reve a̱ lyungu wi ikaka a̱ tyo ya Yezebel, <<A vara tu ɗe Nabot na atali hali u kuwa̱.>>

15 A mantsa ma na Yezebel tsura̱i ikaka i na a vara tu ɗe Nabot hali u kuwa̱, reve u damma Ahabu,<<'Yon! vu usa uɗuma̱ wi inabi va Nabot vuma va Yezireyel za na u 'yuwain a na wa wina wu. U buwa lo wuma shi, u kuwa̱ ta̱ ɗe.>> 16 A mantsa ma na Ahabu uwai a na Nabot vuma va Yezireyel kuwa̱ ta̱ ɗe, reve u 'yon u ka̱ra̱ adama a na wa usa uɗuma̱ wi ina̱bi ya Nabot adama a na wo o za va̱ yi.

17 A̱vu a adanshi A̱sulazuva a̱ ta̱wa̱ uba̱ta̱ wa Iliya vuma va Tishibe, 18 <<Ka̱ra̱ a adama a na va cina Ahabu mogono ma aza a Isra'ila, za na a yuwusan tsugono tsa Samariya. U tu lo o uɗuma̱ wi ina̱bi ya Nabot, u ka̱ra̱ ta̱ adama a na wa usai wo o za va̱ yi. 19 Vu damma yi, <Apa ili i na A̱sulazuva a dammai, <<Vu una ta̱ Vuma'a agba a̱vu ɗa nda vu cigai a na va usisa uɗuma̱ wa̱ yi?>> Reve vu damma yi, <<Apa ili i na A̱sulazuva a dammai, uba̱ta̱ u na musa̱n me pepeɗeyi mpasa ma Nabot, ne ɗa fo musa̱n me peɗe mpasa ma̱ wu amayun za va wu!>> > >>

20 Ana Iliya rawai a̱vu Ahabu damma yi, vu cina mu ta̱, ma'yuwatan ma̱ va̱!

Reve Iliya usu yi, n cina wu ta̱, adama a na vu ca ta̱ aciya̱wu uba̱ta̱ wi iwiya esu a̱ A̱sulazuva. 21 N ta̱ ta̱wa̱ wu na̱ a̱tsuma̱lima̱. N ta̱ kototo wu ugundo wa̱ wu a̱vu n koɗo suru muwun mo olobo ma Ahabu ko yi aagbashi ɗa ko yi aagbashi ɗa shi a̱tsuma̱ Isra'ila. 22 N ta̱ kototo wu u'wa wa̱ wu ununa n yuwain na̱ Yerobowam ulobo wa Neba, nu u'wa wa Basha ulobo wa Ahija, adama a na vu zuwa ta̱ n yuwan upan a̱vu waru vu zuwa ama Isra'ila a yuwaan unusu.

23 <<Adama a Yezebel waru gba A̱sulazuva a damma ta̱, <Musa̱n ma ta tama lipu va Yezebel a̱ a̱tsuma̱ a̱ lyuci va Yezireyel.>

24 <<Musa̱n ma ta tama ili i na i ri za va Ahabu za na kuwa̱i a̱tsuma̱ lyuci, agba asala n ta̱ ka̱ɗa̱ aza a na a̱ kuwa̱i a̱tsuma̱ nɗa.>>

25 A̱da̱na̱ na̱ lo na̱ vuma ro tsa Ahabu za na ca yi aciya yi adama u yuwan i iwiya esu A̱sulazuva, za na ka va yi Yezebel zuwa ni yi u yuwain shi. 26 U yuwusan ta̱ ulinga wi ili yi idaba lon a na u yuwusain musula̱ n ro a̱ga̱nda̱, tsa aza a Amoriya, aza a na A̱sulazuva a̱ gba̱ra̱i diga e iɗa kafu aza a Isra'ila.

27 A mantsa ma na Ahabu uwwai ne, a̱vu wu kara a̱tugu a̱ yi, reve woto a̱tugu a̱tsuma̱la̱ngu, a̱vu u yuwan a akuli. Reve u von na̱ a̱tugu a̱tsuma̱la̱ngu. Reve u teme mmalu ke'en ke'en ni iliyali.

28 Reve a adanshi A̱sulazuva a̱ ta̱wa̱ uba̱ta̱ wa Iliya vuma va a Tishibe, 29 << Ko ve e ene ta̱ ununa Ahabu tara yi aciya yi elime a̱ va̱ gba? A na wo'woi u tara aciya yi ili i ro elime va̱ shi, ma̱ ta̱wa̱ na̱ a̱tsuma̱lima̱ a̱tsuma̱ a mantsa ma̱ yi shi, Amma n ta̱ ta̱wa̱ na̱ yi a̱tsuma̱ o u'wa wa̱ yi a mantsa mo ulobo wa̱ yi.>>