1 A̱tsuma̱ a aa'wan o ukpaku una̱shi na̱ kupakunla̱ (480) na aza a Isra'ila o uta̱i diga Masar, a aa'wan a̱ na̱shi o tsugono tsa Sulemanu tsa Isra'ila, o woto wa Ziv, o woto we ire wa aa'wan na̱shi ɗaɗa u temei usaa wa̱ A̱a̱'isamapaɗa wa̱ A̱sulazuva.

2 A̱a̱'isamapaɗa a na Mogono Sulemanu suwayi A̱sulazuva washin wa̱ yi u rawa ta̱ uga'an e iɗa udasu kupa kucci na̱ washin udasu mata'atsu, nu uga'an mishin udasu amunga no ozo ton. 3 Ukobu wu u'uwata wu usaa u gbain wu u'wa'a u fele ta̱ washin wa̱ A̱a̱'isamapaɗa'a, u rawa ta̱ udasu mata'atsu reve wu uta̱ udasu kupoton diga elime a̱ A̱a̱'isamapaɗa'a. 4 U yuwaan ta̱ A̱a̱'isamapaɗa'a usowoto wu upepu wawa'a washin wa̱ a̱tsuma̱ a̱ yi u la'a ta̱ za va alanga. 5 Uba̱ta̱ wu uɓaɓu u na u ka̱nda̱ruwa̱i A̱a̱'isa̱'a̱, u suwa ta̱ asula a ta'atsu a na a̱ da̱na̱i ugeru ukumbulai uraɓatowu nu uɓaɓu'u. Asula'a a̱ da̱na̱ ta̱ uka̱nda̱ruwu e eɓele a ta'atsu wu uɓaɓu wa̱ A̱a̱'isa̱'a̱. 6 Washin wa asula a̱ za̱la̱ a̱ da̱na̱ ta̱ udasu ucindere na akapi, aasula e memere udasu kucci aasula a ta'atsu waru udasu kupa na akapi. U yuwan ta̱ uɓaɓu wu ugba̱mu a̱ka̱nda̱ruwa̱ alanga a̱ A̱a̱'isamapaɗa'a cine aa gura oto ili i ro a̱tsuma̱ o uɓaɓu wa̱ A̱a̱'isamapaɗa'a shi.

7 O usaa wa̱ A̱a̱'isamapaɗa'a, iponu i na e she'en uba̱ta̱ u na a̱ ka̱pusa̱ atali ɗa goon a yuwayin ulinga, babu ma̱ka̱ta̱ ko aɓau agba a uwwa ilama yi ili yu ulinga yi rumu ro na a uwwai uba̱ta̱ wa̱ A̱a̱'isamapaɗa a mantsa ma na a̱ shi a suwusa yi shi.

8 Una̱ntsu wa aasula a̱ za̱la̱ u shi ta̱ upasu wu uyagi wa̱ A̱a̱'isamapaɗa'a, nu ukumbata a gawan a̱ tyo zuva memere diga lo waru a̱ tyo a za va ta'atsu. 9 Ne ɗa Sulemanu kotoi usaa wa̱ A̱a̱'isamapaɗa, reve u ku'wa̱ yi na akpata a ɗanga sida. 10 Reve u suwa asula a̱ nge'en a̱ka̱nda̱ruwa̱ A̱a̱'isamapaɗa'a. Uga'an wu za ta̱ suru u da̱na̱ ta̱ udasu uton, waru o oɓolo yi ta̱ na̱ A̱a̱'isamapaɗa wa akpata a sida.

11 Reve A̱sulazuva a yuwan adanshi na̱ Sulemanu: 12 <<Adama a̱ A̱a̱'isamapaɗa a na vaa suwusa nda na̱ vu yuwan tsutoni ni ili i na n dammai a̱vu kuru ili i na n zuwai a̱vu vu guza̱ wila̱ u va̱ suru a̱vu vu yuwan tsutoni ne ele, n to shitowon wu akucunu a na n yuwayin Da̱wuda dada va̱ wu suru.>> 13 Reve n da̱na̱ oɓolo na ama a Isra'ila agba maa lyawa aza a Isra'ila ama a̱ va̱ shi.

14 Reve Sulemanu koto usaa wa̱ A̱a̱'isamapaɗa. 15 Reve u yuwan uɓaɓu wa̱ a̱tsuma̱ na akpata a sida, a̱vu u pala uɓaɓu'u diga e iɗa ya̱ A̱a̱'isamapaɗa'a a̱ tyo zuva, reve u pala iɗa'a na akpata a fir. 16 Reve u suwa Upasu u na u La'ai Akiza a̱tsuma̱ a̱ A̱a̱'isa'a̱ uga'an wa aasula'a u da̱na̱ ta̱ udasu ushin na akpata a sida diga e iɗa a̱ tyo zuva. 17 Aasula a gbain a na a̱ da̱na̱i elime o uba̱ta̱ wa Akiza'a u da̱na̱ ta̱ uga'an udasu kupota̱li. 18 A̱tsuma̱ a̱ A̱a̱'isa̱'a̱ a yuwan yi ta̱ na̱ ɗanga sida, a̱vu e she'en yi yironishi i mudele na̱ yipa̱lu uɓosu. Ili biti a yuwan le ta̱ na̱ ɗanga seda, ko atali ee ene shi.

19 Reve u foɓo A̱a̱'isa̱ a̱ a̱tsuma̱ a̱ A̱a̱'isamapaɗa uba̱ta̱ u na aa zuwa Akpati a Nzuwulai a̱ A̱sulazuva. 20 A̱tsuma̱ a̱ A̱a̱'isa̱ u da̱na̱ ta̱ uga'an e iɗa udasu mata'atsu, washin udasu mata'atsu nu uga'an mishin udasu mata'atsu. Wu pala ta̱ a̱tsuma̱ na̱ zinariya can, reve waru wu pala masa'a na̱ ɗanga sida. 21 Sulemanu gba pupala ta̱ a̱tsuma̱ na̱ zinariya can, a̱vu wu uta̱a̱ akani a zinariya a paɗala elime o Uba̱ta̱ u na u la'a yi Akiza. 22 Reve Sulemanu pupala a̱tsuma̱ a̱ A̱a̱'isamapaɗa'a na̱ zinariya. Reve waru wu pala masa'a ma̱ A̱a̱'isa̱ mo Uba̱ta̱ u na u la'a yi Akiza wa̱ a̱tsuma̱ na̱ zinariya.

23 Reve Sulemanu yuwan ikerobobi i re na akpata a̱ zetun a̱tsuma̱ a̱ A̱a̱'isa̱ a̱ a̱tsuma̱, za ta̱ suru udasu kupa no ozo o ton uga'an wa̱ yi. 24 Suru nan ikerobobi a̱ da̱na̱ ta̱ una̱ta̱, mgbain n le waru una̱ta̱. Uvelu kerobobi suru u da̱na̱ ta̱ udasu kupa no ozo o ton, uga'an wu uvelu u nda acina uvelu u de ɗe u da̱na̱ ta̱ udasu wu ucindere na akapi. 25 Ikerobobi i re'e una̱ta̱ u ɗa a̱ shi a mgbain nu uruma. 26 Uga'an wu za ta̱ suru u da̱na̱ ta̱ udasu kupa no ozo o ton. 27 Sulemanu zuwa ta̱ ikerobobi'i a̱tsuma̱ a aasula a na a̱ ri pe pe wa̱ A̱a̱'isamapaɗa, ne evelu e le wuba̱ruwu. Uvelu u kerobobi u ta̱ u ju'wa̱n ta̱ uɓaɓu u ta̱, reve za ve ire waru u ju'wa̱n uɓaɓu we ire. A̱vu evelu e le a̱ ju'wula̱in e memere ma aasula'a. 28 Reve wu pala ikerobobi'i na̱ zinariya.

29 Reve u she'en ikerobobi na̱ ɗanga vu shuwa na̱ yipa̱lu uɓosu a̱ka̱nda̱ruwa̱ uɓaɓu wa̱ A̱a̱'isamapaɗa'a suru A̱a̱'isa̱ a̱ a̱tsuma̱ na asula a̱tsuma̱. 30 Wu pala ta̱ waru iɗa ya aasula a̱ a̱tsuma̱ na aasula a alanga na̱ zinariya. 31 A̱vu u yuwaan A̱a̱'isa̱ a̱ a̱tsuma̱ na̱ntsu va akpata a̱ zetun no okonji o ton e eɓele. 32 Reve ɗe akpaku re'e va akpata a̱ zetu'un reve u she'en ɗe ikerobobi na̱ ɗanga vu shuwa na̱ yipa̱lu uɓosu, a̱vu wu pala ikerobobi'i na̱ ɗanga vu shuwa'a na̱ zinariya. 33 Ne ɗa waru u yuwain okonji a̱ na̱shi a akpata a̱ zetun adama o u'uwata wa̱ A̱a̱'isa̱mapaɗa. 34 U yuwan ta̱ waru kpaku re na̱ akpata a fir, za ta̱ o tsu konzo yi ta̱ a̱ tyo upasu u ndeɗi za ve ire waru a̱ tyo upasu u ndeɗe. 35 U she'en ta̱ Kerobobi na̱ ɗanga vu shuwa na̱ yipa̱lu yu uɓosu zuva le, reve wu pala le na̱ zinariya suru.

36 Reve u suwa ukobu wa̱ a̱tsuma̱ o ukuruwu uta'atsu wa atali a na e she'ein biti u zuwa ta̱ ukuruwu u ta̱ wa akpata a sida.

37 A vara ta̱ ikyun yu usaa wa̱ A̱a̱'isamapaɗa A̱sulazuva a aa'wan a̱ na̱shi o tsugono tsa Sulemanu a̱tsuma̱ o woto wa̱ Zif. 38 A̱tsuma̱ a aa'wan a kupa na̱ za ta̱ a̱tsuma̱ o woto u Bul, o woto wa̱ kunla̱, ɗaɗa o kotoi usaa wa̱ A̱a̱'isamapaɗa ma̱ɓula̱ ma̱ yi cine u ri uronuwu. Sulemanu yuwan ta̱ a'wan e cindere a suwusa yi.