1 Ana Sulemanu kotoi usaa wa̱ A̱a̱'isamapaɗa wa̱ A̱sulazuva nu ukobu u mogono, oɓolo ni ili i na u yuwain majiyan ma na wa yuwan suru, 2 reve A̱sulazuva a̱ ta̱wa̱ ya̱'a̱ yi we ire, cine u yuwain ɗe Gibiyon. 3 Reve A̱sulazuva a damma yi, <<Mu uwwa ta̱ avasa a̱ wu ni ipati i na vu yuwain e ekere a̱ va̱, n tawa ta̱ A̱a̱'isamapaɗa a nda, za na vu suwai waru n zuwa ta̱ Ala a̱ va̱ a̱ da̱na̱ pe babu ukotu. Esu a̱ va̱ no okolo a̱ va̱ a̱ ta̱ da̱na̱ pe kuci.

4 <<Amma a̱vu, na̱ vu yuwan mmalu a̱ ma̱ka̱ka̱n ma̱ va̱ no okolo a̱ a̱ɓula̱ na̱ mejege, cine dada va̱ wu Da̱wuda yuwain, reve vu yuwan ili i na suru n zuwai a̱vu vu yuwan tsutoni ni ili i na dammai, 5 to, n ta̱ shuwa̱ ootogu o tsugono tsa̱ wu a aci a Isra'ila babu ukotu, cine n yuwayin dada va̱ wu Da̱wuda nzuwulai na n dammai, <Vaa lamba vuma na a̱a̱ da̱nu o ootogu o tsugono tsa Isra'ila shi.>

6 <<Agba na̱ a̱vu ko olobo a̱ wu i ɓatsa i lyawa mu reve i 'yuwan a yuwan tsutoni ni ili i na n zuwai ni ili i na n dammai i na n ca nɗu agba reve i ka̱ra̱ a̱vu i yuwaan musula̱ n ro tsugbashi a̱vu i yuwaan le a̱ga̱nda̱, 7 a̱mu gba n ta kasa Isra'ila ni iɗa i na n ca nle a̱vu waru n 'yuwan A̱a̱'isamapaɗa a nda za na n tawai adama a Ala a̱ va̱. Isra'ila to o'wo ili ya avandaru ni ili yu ulamu e ekere a ama suru. 8 A̱yi A̱a̱'isamapaɗa a nda gba u to o'wo edemu a gbain. Vuma na a̱ ka̱ra̱ na̱ lo suru, u ta yuwan asalama, reve u cira u damma, <Nye i zuwai A̱sulazuva a yuwain ni iɗa i nda na̱ A̱a̱'isamapaɗa a nda tsunda?> 9 Ozo o ro gba a̱ ta̱ usu, <Adama a na a lyawai itoni ya̱ A̱sulazuva A̱sula̱ e le, za na uta̱a̱ yi nkaya nle diga e iɗa ya Masar, a̱vu a gbagbala musula̱ n ro, a̱vu a yuwaan le a̱ga̱nda̱ na̱ tsugbashi, a̱yi ɗa i zuwai A̱sulazuva a̱ ta̱wa̱a̱ nle na̱ a̱tsuma̱lima̱ a nda suru.> >>

10 O ukosu wa a'wan ushin, a̱tsuma̱ a mantsa ma na Sulemanu suwai saa re nda, A̱a̱'isamapaɗa A̱sulazuva nu ukobu u mogono, 11 Mogono Sulemanu ca ta̱ Hiram mogono ma Taya ilyuci ushin wu upasu wa̱ Ga̱lili, adama a na Hiram ta̱wa̱a̱ yi ta̱ na akpata a ɗanga sida na aza a fir na̱ zinariya na u cigai suru. 12 Amma a na Hiram uta̱i diga Taya adama we ene ilyuci i na Sulemanu ca niyi, o yo'onoto yi okolo shi. 13 Ɗaɗa u dammai, <<Icu'un yi ilyuci i ne i ɗa vu ca numu tsunda, za va̱?>> Reve u ca le ala iɗa ya *Kabul, ala a na a̱ ri ne ele hali na ana'an. 14 Hiram gba lyunguwa̱ ta̱ mogono zinariya vu ume ukpaku nu ushin (120).

15 Apa nda a̱bunda̱ o ulinga wu usa̱n u na Mogono Sulemanu zuwai wu usaa wa̱ A̱a̱'isamapaɗa a̱ A̱sulazuva, nu ukobu wa̱ yi, na̱ za va *Milo, oɓolo nu ukari u lyuci wa̱ Urishelima, waru usuwisa ta̱ ilyuci ya Hazo na̱ Megido na̱ Geza. 16 Firi'awuna mogono ma Masar ma̱ shi ta̱ ma̱ riya̱a̱ Geza nu uvon a̱vu u lyuwa yi. U shi ta̱ u kula̱to yi. Reve wu una aza a Ka'ana a̱za̱ a̱ lyuci'i, reve u ca usheli wa̱ yi ka va Sulemanu a̱yi une'e u lolo. 17 Reve Sulemanu suwisa Geza. A̱vu u suwa Bet Horon va̱ Za̱la̱, 18 na̱ Ba'ala oɓolo na̱ Tadmo a̱tsumona, a̱tsuma̱ e iɗa'a, 19 oɓolo ni ilyuci yi izuwa ya̱ yi suru ni ilyuci adama e ikeke yi ido ya̱ yi ni ido ya̱ yi, ili i na suru u cigai u suwa suru a̱tsuma̱ a̱ Urishelima na̱ Lebanon na̱ a̱tsuma̱ e iɗa i na suru u yuwain tsugbain.

20 Suru ama a na a pasai a̱tsuma̱ aza a Amoriya na aza a Hitiya na aza a Feriziya na aza a Hiwiya na aza a Jebusiya ama a nda aza a Isra'ila a ɗa shi, 21 limatan le na buwai e iɗa'a, aza a na aza a Isra'ila a gura kototoi shi, ele nda Sulemanu oto le ta̱ a̱tsuma̱ o ulinga u tsugbashi wu usa̱n, ne ɗa gba u ri hali na ana'an. 22 Amma Sulemanu ka̱mbuwa̱ ko vuma va aza a Isra'ila aagbashi shi. Ele ɗa a̱ shi a̱soja a̱ yi na azagbain a̱ yi azagbain a̱ a̱soja a̱ yi na̱ nan yali yi ikeke yi ido na aza a na akumba e ido ya̱ yi. 23 Ele ɗa a̱da̱na̱i azagbain ukpakuton na̱ kupoton (550) a na a̱ ka̱lyuwusa̱i ulinga wu usa̱n vu cu'un vu linga va Sulemanu suru.

24 Ana usheli wa Firi'awuna wu uta̱i diga a̱ Lyuci Gbain va̱ Da̱wuda a̱ tyo o u'wa u na Sulemanu suwaa niyi, ɗaɗa Sulemanu suwai lyuci va Milo.

25 Sulemanu tsu ca ta̱ kucci vu ukula̱tosu uta'atsu a̱tsuma̱ a aa'wan na̱ kucci muwwulai a masa'a ma na u suwayi A̱sulazuva. Reve u kula̱to a̱tsuka̱ a̱ ma̱guru a̱ ma̱ka̱ka̱n ma̱ A̱sulazuva oɓolo ne ele. Ne ɗa u kotoi usaa wa̱ A̱a̱'isamapaɗa.

26 Mogono Sulemanu waru yuwan ta̱ antsun a gbagbain a Eziyon Geba, za na ri zuzu na̱ Ela a̱tsuma̱ a Edom a ayuwun a Mala ma̱ Shili. 27 Hiram lyungu ta̱ agbashi a̱ yi aza a na a gurai uluwu wa antsun, aza a na e revei mala'a, a yuwan ulinga oɓolo na ama a Sulemanu. 28 Reve a̱ luwa̱ a̱ tyo Ofi a̱ ta̱wa̱a̱ Mogono Sulemanu na̱ zinariya kilo ukpaku una̱shi nu ushin (420).