1 Reve adanshi A̱sulazuva a̱ ta̱wa̱ ya̱ Yehu ulobo wa Hanani adama a Basha: 2 <<N 'ya̱sa̱n wu ta̱ diga a̱ ma̱buta̱, reve n zuwa wu zagbain va ama a̱ va̱ aza a Isra'ila. Amma vu kuru ta̱ ure wa Yerobowam a̱vu vu zuwa ama a̱ va̱ aza a Isra'ila a yuwan unusu, reve a zuwa mu n yuwan upan adama o unusu u na a yuwain. 3 Adama o ndolo n ta tasa Basha nu u'wa wa̱ yi, reve n ka̱mbuwa̱ u'wa wa̱ wu tsa za va Yerobowam ulobo wa Neba. 4 Musa̱n n ta tama vuma na suru ri vuma va Basha za na suru a̱a̱ kuwa̱ a̱tsuma̱ a̱ lyuci, asala waru n ta̱ ka̱ɗa̱ aza a na a̱ kuwa̱i a atsusa.>>

5 Akapi o ulinga u tsugono tsa Basha, ni ili i na u yuwain nu ucira u tsugono tsa a̱ yi a ɗana le ta̱ a̱tsuma̱ a aatagada a labari o ngono ma Isra'ila. 6 A̱vu Basha kuwa̱ ucina nkaya ma̱ yi reve a̱ ciɗo yi a Tirza. A̱vu Ela ulobo wa̱ yi u lyuwa tsugono o una̱ wa̱ yi.

7 A̱yi nda a̱ yi ɗa ili i na adanshi a̱ A̱sulazuva a dammai o una̱ vumava̱sula̱ Yehu ulobo wa Hanani adama a Basha nu u'wa wa̱ yi adama e iwuya i na u yuwain suru e ekere a̱ A̱sulazuva, na u zuwa niyi u yuwain upan adama e ili i na u yuwain, reve wo o'wo tsu u'wa wa Yerobowam, na adama a na waru u kototo Yerobowam.

8 A̱tsuma̱ aa'wan o ushin na̱ a̱za̱ a̱ ta̱li o tsugono tsa Asa mogono ma Yahuda, a̱vu Ela ulobo wa Basha wo o'wo mogono ma Isra'ila a Tirza. A̱vu u yuwan tsugono a'wan e re.

9 Amma a̱vu Zimri, vuma ta̱ a̱tsuma̱ a azagbain a̱ yi, za na ri na̱ tsugbain tsu uɓatsulai wi ikeke yi ido ya̱ yi, u foɓoo yi ikpa'a. Ela shi ta̱ Tirza a mantsa'a, a̱vu u sowo hali wo o'wo usowu o u'wa wa Arza, za na a̱ ka̱lyusa̱n ukobu u tsugono a Tirza. 10 Zimri uwa ta̱ pe, reve u ga̱la̱ yi wu una yi. Ili ya̱ o ndolo i fara ta̱ a̱tsuma̱ a aa'wan o ushin na̱ a̱za̱ e cindere o tsugono tsa Asa mogono ma Yahuda. Reve wo o'wo mogono o una̱ wa̱ yi. 11 Ana Zimri o'woi mogono, a̱yi a̱ da̱nu o ootogu o tsugono, reve wu una ali o u'wa wa Basha suru. U lyawa ko mawun ma vali ma̱ ta̱ wuma shi, ko umatsun wu u'wa ko i'utsa̱. 12 Ne ɗa Zimri kototoi ama o u'wa wa Basha suru, cine adanshi a̱ A̱sulazuva a dammai a aci a Basha nu una̱ wa̱ Yehu vumava̱sula̱, 13 adama o unusu wa Basha suru na̱ unusu wa Ela ulobo wa̱ yi nu unusu u na a zuwai Isra'ila yuwain, hali gba a zuwa A̱sulazuva A̱sula̱ a Isra'ila a yuwan upan, adama a̱ a̱ma̱li e pere e le.

14 Akapi o ulinga u tsugono tsa Ela, ni ili i na u yuwain biti, a ɗana le ta̱ a̱tsuma̱ a aatagada a labari o ngono ma Isra'ila.

15 A̱tsuma̱ a aa'wan o ushin na̱ a̱za̱ e cindere o tsugono tsa Asa mogono ma Yahuda, Zimri yuwan ta̱ tsugono tsa Tirza rana cindere. Reve a̱soja a̱ ka̱nda̱ruwa̱ lyuci va Gibeton, lyuci va aza a Filistiya. 16 Ana a̱soja a Isra'ila a na a̱ ri uba̱ta̱ o uvon a̱ tsura̱i alabari a na Zimri foɓoo ta̱ mogono ikpa'a a̱vu wu una yi, ɗaɗa a zuwai Omri yali ya̱ a̱soja, mogono a aci a Isra'ila o urana u ndolo ɗe o uva̱la̱ta̱'a̱. 17 A̱vu Omri na̱ a̱soja a Isra'ila suru a vadala a lyawa Gibeton reve a̱ka̱nda̱ruwa̱ Tirza nu uvon. 18 Ana Zimri enei a lyuwa ta̱ lyuci'i, a̱vu u ka̱ra̱ u uwa a̱tsuma̱ o uba̱ta̱ wu ucira wu ukobu u mogono a̱vu u daɓa yi akina uka̱nda̱ruwu na̱ a̱yi hali u kuwa̱. 19 Ili ya̱ o ndolo i fara ta̱ adama o unusu u na u yuwain, ni iwuya i na u yuwain e esu a̱ A̱sulazuva na̱ mmalu o ure wa Yerobowam nu unusu u na u yuwain na u zuwai a aza a Isra'ila a yuwain.

20 Akapi o ulinga u tsugono wa Zimri, ni ikpa'a u na u yuwain, a ɗana le ta̱ a̱tsuma̱ a aatagada a labari o ngono ma Isra'ila.

21 Ana Zimri kuwa̱i ama a Isra'ila e ne'eshen ta̱ ure, akapi a̱ kuru ta̱ Tibni ulobo wa Ginat, adama a na wo o'wo le mogono. Reve akapi a̱ kuru Omri, adama a na wo o'wo le mogono fo. 22 Amma ama a na a̱ kuruyi Omri a la'a ta̱ aza a na a̱ kuruyi Tibni ulobo wa Ginat ucira. Ɗaɗa Tibni kuwa̱i reve Omri o'wo mogono.

23 A̱tsuma̱ aa'wan mata'atsu na̱ za ta̱ o tsugono tsa Asa mogono ma Yahuda, Omri lyuwai tsugono tsa Isra'ila, a̱vu u yuwan tsugono tsa a'wan kupa ne ejere. A̱tsuma̱ a'wan o ndolo u yuwan ta̱ a'wan a̱ ta̱li a yuwusan tsugono a̱tsuma̱ a Tirza. 24 A̱vu u tsula agaɗi a Samariya o ukere wa Shema o ukunzuwu u azurufa ure, a̱vu u suwa ɗe lyuci a agaɗi'i reve u zuwa lyuci'i aala Samariya, adama a cuwusa na̱ Shema za na wina niyi a agaɗi'i.

25 Amma Omri yuwan ta̱ iwuya e ekere a̱ A̱sulazuva hali u la'a aza a na a yuwain tsugono elime a̱ yi. 26 U kuru ta̱ ure wa Yerobowam ulobo wa Neba nu unusu wa̱ yi, u na u zuwai Isra'ila yuwain, hali a zuwa A̱sulazuva A̱sula̱ a Isra'ila a yuwan upan na̱ a̱ma̱li e pere e idaba e le.

27 Akapi o ulinga u tsugono tsa Omri, ni ili i na u yuwain nu ucira wa̱ yi, a ɗana le ta̱ a̱tsuma̱ a aatagada a labari o ngono ma Isra'ila. 28 Omri kuwa̱ ta̱ ucina nkaya ma̱ yi reve a̱ ciɗo yi a̱tsuma̱ a Samariya. A̱vu ulobo wa̱ yi Ahabu lyuwa tsugono o una̱ wa̱ yi.

29 A̱tsuma̱ a a'wan mata'atsu na̱ kunla̱ tso tsugono tsa Asa mogono ma Yahuda, Ahabu ulobo wa Omri wo o'wo ta̱ mogono ma Isra'ila a̱tsuma̱ a Samariya, a̱vu u yuwan tsugono tsa Isra'ila a'wan ushin ne ejere. 30 Ahabu ulobo wa Omri u yuwan ta̱ iwuya i na i la'ai aza a na a yuwain tsugono elime a̱ yi e ekere a̱ A̱sulazuva. 31 U tara yi ili yu usa̱n i ɗa u yuwan cu'un vu unusu u na Yerobowam ulobo wa Neba u yuwain goon shi, amma hali u zuwa Yezebel usheli wa Etba'al mogono ma aza a Sidon, reve u reme a yuwusaan Ba'al a̱ga̱nda̱. 32 U shuwa̱a̱ ta̱ Ba'al masa'a a̱ a̱a̱'isa̱ a Ba'al za na u suwai a̱tsuma̱ a Samariya. 33 U yuwan ta̱ waru a̱a̱shuwutsu a̱ a̱ma̱li a ka Ashera. U yuwan ta̱ ili yu uwuyanu ya̱ a̱bunda̱ i na i zuwai A̱sulazuva A̱sula̱ a Isra'ila a yuwain upan lon upasu na̱ ngono nna n yuwain tsugono elime a̱yi. 34 A mantsa ma Ahabu, Hiye vuma va Betel suwisa ta̱ Jeriko. Ana u varai usa'a, a̱vu Abiram mawun mo ufaru ma̱ yi ulobo u kuwa̱. A mantsa ma na u shuwa̱i na̱ntsu lyuci'i, a̱vu Segu mawun mo ukosu ma̱ yi ulobo u kuwa̱, cine adanshi a̱ A̱sulazuva a dammai o una̱ wa̱ Josuwa ulobo wa̱ Nun.