1 Ana Hiram mogono ma Taya ma uwwai a na a̱ tsuwa̱n ta̱ Sulemanu mani'i wo o'wo mogono o una̱ wa dada va̱ yi Da̱wuda, u lyungu ta̱ agbashi a̱ yi uba̱ta̱ wa̱ Sulemanu, adama a na u ta̱ a̱ tsu'utsa̱ na̱ Da̱wuda.

2 Sulemanu fo lyunguwa̱ ta̱ Hiram ni ikaka ya̱ yi: 3 <<Adama o uvon u na u damatoyin dada va̱ Da̱wuda a̱ mɓa̱nga̱ suru, u gura suwa A̱a̱'isamapaɗa shi adama a ala a̱ A̱sulazuva A̱sula̱ a̱ yi hali she na A̱sulazuva a zuwai n'yuwatan ma̱ yi za̱la̱ va ana a̱ yi. 4 Amma gogo A̱sulazuva A̱sula̱ a̱ va̱ a ca mu ta̱ wivuwun a̱ mɓa̱nga̱ suru, babu u'ya̱susa̱n wu ugbozu na̱ meleshe. 5 Adama o ndolo, n te ifoɓi i na maa suwaa ala a̱ A̱sulazuva A̱sula̱ a̱ va̱ A̱a̱'isamapaɗa, cine A̱sulazuva a dammai dada va̱ Da̱wuda, a na u dammai, <Ulobo wa̱ wu za na maa zuwa tsugono o una̱ wa̱ wu a̱yi ɗa waa suwa A̱a̱'isamapaɗa adama ala a̱ va̱.>

6 <<Gogo vu zuwa a paɗaa mu ɗanga sida va Lebanon. Ama a̱ va̱ a ta linga oɓolo na̱ a̱za̱ a̱ wu, agba n ta tsupa ama a̱ wu ulinga u le cine vaa zuwa. Vu reve ta̱ tsu ri na aza a na a gurai mapaɗa ma akpata tsa aza a Sidon shi.>>

7 Ana Hiram uwwai ikaka ya Sulemanu, u yuwan ta̱ ma̱za̱nga̱ lon a̱vu u damma, <<Ica za va̱ A̱sulazuva ɗa ana'an, a na u cayi Da̱wuda ulobo wu urevu u na waa yuwan tsugono tsi iɗa i gbain i nda.>>

8 A̱vu Hiram lyunguwa̱ Sulemanu nu udammu: <<Mu uwwa ta̱ ikaka i na vu lyunguwa̱ numu waru n ta̱ ufoɓu n ta yuwan ili i na vu cigai biti na maa ca wu akpata a sida na̱ fir. 9 Ama a̱ va̱ a̱ ta̱ cipa̱ ne ele diga Lebanon a̱ tyo a mala, n ta zuwa a yuwan ozoro e le waru a̱ luwa̱ le a mala a̱ tyo uba̱ta̱ u na vu cigai. Ɗe ɗa ma̱ba̱ɗa̱ le reve vu pura̱ le a̱ ka̱ra̱. Reve a̱vu waru vu ca mu ili i na n cigai na vaa ca u'wa u tsugono tsa̱ va̱ ilyalya.>>

10 Tsunda tsa ɗa Hiram ta̱wa̱yi Sulemanu na akpata a sida na̱ a̱za̱ a̱ fir a na u cigai. 11 A̱vu Sulemanu ca Hiram ibuhu ukpakukupa ushin (20,000) vo oroci a yitabo ilyalya adama o u'wa wa̱ yi, na̱ waru muden ukpakukupa ushin (20,000) u mani'in ma̱ zetun. Sulemanu yuwusaan ta̱ Hiram ne a'wan a'wan. 12 A̱sulazuva a ca ta̱ Sulemanu ugbozu, cine u yuwain nzuwulai na̱ a̱yi. Hiram na̱ Sulemanu a̱ da̱na̱ ta̱ a̱ nden n sa'ani, avu ele ra a yuwunlai nzuwulai.

13 Reve mogono Sulemanu zuwa ali ukpakukupa mata'atsu (30,000) a̱tsuma̱ e iɗa ya a Isra'ila suru a yuwan ulinga u babu ucigu. 14 Reve u lyungu le a̱ 'ya̱wa̱ Lebanon oɓolo ukpakukupa kupa (10,000) ɗa u ne'eshen le o woto, oɓolo suru a ta a yuwan woto uta̱ ɗe Lebanon avu a yuwan woto re o u'wa. Adoniram ɗa da̱na̱i ee idanasa a̱za̱ o ulinga u tsugbashi'i. 15 Sulemanu da̱na̱ ta̱ na̱ a̱za̱ e itana ya atali ukpakukupa kupocindere (70,000) no ozo o moɓoso ma aatali ukpakukupa kupakunla̱ (80,000) ɗe a agaɗi. 16 U da̱na̱ ta̱ waru nu ukpakukupa uta'atsu nu ukpaku uta'atsu (3,300) a̱za̱ o uka̱lyuwusa̱ wu ulinga'a aza a na aa zuwa cine ama a yuwan ulingaꞌa. 17 Nu udammu u mogono e she'en ta̱ atali a gbagbain aza a sa'ani adama a vara ikyun yu usaa wa̱ A̱a̱'isamapaɗa'a. 18 Aza a linga ve ekere a̱ Sulemanu na̱ Hiram na ali a Geba a paɗa ta̱ avu o foɓo akpata na atali adama o usaa wa̱ A̱a̱'isamapaɗa.