1 Sulemanu Mogono ma ciga ta̱ a̱ma̱ci a na a̱ ri aza a Isra'ila shi babu nu usheli wa Firi'awuna, u zuwa ta̱ a̱ma̱ci a̱ a̱za̱ a̱ Mowa na aza a Amon na aza a Edom na aza a Sidon oɓolo na aza a Hitiya. 2 A̱ ta̱ a̱tsuma̱ a aza a na A̱sulazuva a dammai aza a Isra'ila, a na, <<She i yuwan nzuwulai ne ele wan, adama a na na amayun a ta vadala okolo a̱ ɗu a̱ tyo a̱ musula̱ n le.>> Suru na̱ ne Sulemanu suraa le ta̱ ni icigi. 3 U zuwa ta̱ esheli o ngono ukpaku ucindere (700), na̱ a̱ma̱ci a̱ nge'en ukpaku uta'atsu (300). A̱ma̱ci a̱ yi a vadala ta̱ okolo a̱ yi diga uba̱ta̱ wa̱ A̱sula̱. 4 Ana Sulemanu kutsai, a̱ma̱ci a̱ yi a vadala ta̱ okolo a̱ yi a̱ kuru musula̱ n ro, okolo a̱ yi a̱ kuru A̱sulazuva A̱sula̱ a̱ yi suru suru cine dada va̱ yi Da̱wuda da̱na̱i shi. 5 A̱vu Sulemanu toni Ashitore ma̱sula̱ ma ka ma aza a Sidon, na̱ Mole ma̱sula̱ me idaba ma aza a Amon. 6 Ne ɗa Sulemanu yuwain iwuya e ekere a̱ A̱sulazuva, u kuru A̱sulazuva no okolo a̱ ta̱ cine dada va̱ yi Da̱wuda yuwain shi.

7 Sulemanu suwa ta̱ uba̱ta̱ wa̱ a̱ga̱nda̱ a Kemosh ma̱sula̱ me idaba ma̱ Mowa a̱a̱'isa̱ zuva masasan asana a̱ Urishelima, oɓolo na̱ Mole ma̱sula̱ me idaba ma aza a Amon. 8 Reve waru u suwaa omoci a̱ a̱ma̱ci a̱ yi suru uba̱ta̱ u na a̱ kula̱tosuyi a̱tsuka̱ a̱ ma̱guru a̱vu a ca kucci a̱ tyo a̱ musula̱ n le.

9 A̱sulazuva gba a yuwan ta̱ upan na̱ Sulemanu adama a na okolo a̱ yi a vadala ta̱ u lyawa A̱sulazuva, A̱sula̱ a aza a Isra'ila, za na roco niyi aciya̱yi toto ure. 10 Ko na wo o'woi A̱sulazuva a putsa ta̱ Sulemanu she u kuru musula̱ n ro wan, Sulemanu kuru ili i na A̱sulazuva a zuwai shi. 11 Ɗaɗa A̱sulazuva a dammai Sulemanu, <<Ana wo o'woi a̱yi nda a̱yi ɗa ili i na vu yuwain agba vu kuru wila̱ u va̱ ni ili i na n dammai, aza a na n zuwaa nuwu shi, ili i ro yi lo shi n ta̱ gba a ɓatsalai uba̱ta̱ u tsugono tsa̱ wu diga e ekere a̱ wu, reve n ca aagbashi a̱ wu. 12 Suru na̱ ne adama a̱ Da̱wuda dada va̱ wu, ma yuwan yi a mantsa maa wuma wa̱ wu shi. N te ne'eshen yi o ukere wu ulobo wa̱ wu. 13 Suru gba na̱ ne, maa ɓatsalai tsugono'o suru diga o ukere wa̱ a̱ yi shi amma n ta ca yi ugundo u ta̱ adama a̱ Da̱wuda aagbashi a̱ va̱ na adama a̱ Urishelima, za na n ɗangwai.>>

14 A̱vu A̱sulazuva a zuwa Hada vuma va Edom diga o ugundo u tsugono wa Edom u 'ya̱sa̱a̱n Sulemanu aci. 15 Ɗe a̱ca̱pa̱ ana Da̱wuda yuwain uvon na̱ aza a Edom, Yowab yali ya̱ a̱soja, za na ka̱ra̱i adama u ciɗo a̱kwa̱kwa̱, a na u da̱na̱i ɗe shi ta̱ wu una vali suru a̱tsuma̱ a Edom. 16 A̱vu Yowab na ama a Isra'ila suru a̱ da̱nu lo hali woto ta̱li, hali she na o kototoi ama a Edom suru. 17 Amma Hadad na shi buwai molobo, u suma ta̱ a̱ tyo Masar oɓolo na azagbain a Edom aza a na a̱ shi a̱ yuwayin dada va̱ yi tsugbashi. 18 A̱vu e reme mmalu diga Midiya a̱ tyo Faran. Reve a tara ali diga Faran a̱ ka̱ra̱ oɓolo ne ele, a̱ ka̱ra̱ ta̱ a̱ tyo Masar uba̱ta̱ wa Firi'awuna mogono ma Masar za na cayi Hadad u'wa ni iɗa reve waru u casu yi ilyalya.

19 Firi'awuna uwwa ta̱ uyo'o wa Hada hali u ca yi zawa'a vu ka va̱ yi Egbere Tafene lolo. 20 A̱vu u matsaan yi ulobo za na a cayi ala Genuba, za na Tafene kungwatoi o ukobu u tsugono. Pe ɗa Genuba da̱nuyi oɓolo no olobo a Firi'awuna.

21 A̱yi a̱tsuma̱ a Masar reve Hada uwwa a na Da̱wuda kuwa̱ ta̱ ucina nkaya ma̱ yi, waru Yowab yali ya̱ a̱soja fo u kuwa̱ ta̱. Ɗaɗa Hadad dammai Firi'awuna, <<Lyawa mu n ka̱ra̱ adama n ka̱mba̱ e iɗa i va̱.>>

22 Amma Firi'awuna damma yi ta̱, <<Nye vu lambai pa a na vu cigai vu ka̱mba̱ e iɗa ya̱ wu?>>

Reve Hadad usu, <<Ko ili, amma lyawa mu n ka̱ra̱!>>

23 A̱vu A̱sulazuva a̱ 'ya̱sa̱a̱n Sulemanu ma'yuwatan mo ro, Rezon ulobo wa Eliyada, za na sumai diga e ekere a zagbain va̱ yi, Hadadeza mogono ma Zoba. 24 U ɓolotowo ta̱ aciya̱yi ali a̱vu wo o'wo zagbain va̱ a̱za̱ o u'ya̱susa̱n wu ugbozu a mantsa ma na Da̱wuda kototoi a̱soja a Zoba, a̱vu a̱ ka̱ra̱ a̱ tyo Dimaska a̱vu a̱ da̱nu ɗe, a̱vu a katala yi mogono ma Dimaska. 25 Rezon o'wo ta̱ ma'yuwatan ma Isra'ila a mantsa ma na Sulemanu da̱na̱i wuma, u kapasa ta̱ addama ununa Hada yuwain. Ne ɗa Rezon yuwain tsugono a̱tsuma̱ a Suriya, u 'yuwan ta̱ aza a Isra'ila.

26 Yerobowam ulobo wa Neba waru 'ya̱sa̱a̱n ta̱ mogono Sulemanu aci. U shi ta̱ a̱tsuma̱ a azagbain a̱ yi, vuma va Ifiramu ɗa diga Zereda, mma va̱ yi ma̱runa̱ ma ɗa ma̱ shi za na a̱ shi a̱ tsu ɗe Zeruya.

27 Apa cine u 'ya̱sa̱a̱yin mogono aci: Sulemanu shi ta̱ suwa Milo a̱vu wu ula angu o uɓaɓu u lyuci va dada va̱ yi Da̱wuda. 28 Yerobowam vuma vu urevu ɗa, reve ana Sulemanu enei cine ulobo'o u yuwain ulinga wa̱ yi ulobonu, ɗaɗa u zuwa niyi zagbain vu ulinga wu usa̱n vu u'wa wa̱ Isuhu goon.

29 A mantsa mo ndolo Yerobowam a̱ mota̱a̱ a̱tsuma̱ a̱ Urishelima, reve Ahija vumava̱sula̱ va̱ Shilo u ga'an na̱ a̱yi o ure, wotowu nu utugu u sa'avu. Ele ɗa a̱ da̱na̱i lo ama e re a agalaci. 30 Reve Ahija reme utugu u na u shi wotowu na̱ a̱yi, reve wu kara yi mukari kupa ne ejere. 31 Reve u damma Yerobowam, <<Taraa aciya̱wu mukari kupa, adama a na apa ili i na A̱sulazuva, A̱sula̱ a Isra'ila a dammai: <Uwwa nda, n ta kara tsugono diga e ekere a Sulemanu a̱vu n ca wu gundo kupa. 32 Agba adama a aagbashi a̱ va̱ Da̱wuda na̱ Urishelima, lyuci na n ɗangwai a̱tsuma̱ o gundo va Isra'ila suru u ta̱ da̱na̱ nu ugundo u ta̱. 33 N ta yuwan ne adama a na a lyawa numu reve a yuwaan Ashitore ma̱sula̱ ma ka va aza a Sidon na̱ Kemosh ma̱sula̱ ma aza a Mowa na̱ Mole ma̱sula̱ ma aza a Amon a̱ga̱nda̱, agba a yuwan mmalu o ure u va̱ shi, ko a yuwan ili i na i ri mejege e esu a̱ va̱ shi ko a̱ guza̱ ili i na n zuwai na̱ wila̱ u va̱ cine Da̱wuda dada va Sulemanu yuwain shi.

34 << <Suru na̱ ne, maa usa uba̱ta̱ u tsugono'o suru e ekere a Sulemanu shi, n ta lyawai wo o'wo mogono mantsa ma wuma wa̱ yi suru adama a̱ Da̱wuda aagbashi a̱ va̱, za na n ɗangwai za na waru guza̱i ili i na n dammai ni ili i na n zuwai. 35 Amma n ta usa uba̱ta̱ u tsugono e ekere o ulobo wa̱ yi reve n ca wu gundo kupa. 36 Amma n ta ca ulobo wa Sulemanu ugundo u ta̱, tsa̱ra̱ limatan va aagbashi a̱ va̱ Da̱wuda da̱na̱ a yuwusaan tsugono a̱tsuma̱ a̱ Urishelima, lyuci na n ɗangwai tsa̱ra̱ n zuwa Ala a̱ va̱. 37 Amma o una̱ wa̱ wu, n ta tara wu, waru vu ta yuwan tsugono tse ili i na suru okolo a̱ wu a cigai, vu to o'wo mogono ma Isra'ila. 38 Na̱ vu yuwan ili i na suru maa dansa wu, reve vu yuwan mmalu a̱tsuma̱ o ure u va̱, a̱vu vu yuwan ili i na i ri mejege e ekere a̱ va̱, a̱vu vu toni ili i na n zuwai ni ili i na n dammai, cine aagbashi a̱ va̱ Da̱wuda yuwain, n ta̱ da̱na̱ oɓolo na̱ a̱vu kuci. N ta suwa u'wa wa̱ wu nu ucira tsu za na n suwayi Da̱wuda reve n ca wu Isra'ila. 39 N to foro limatan va̱ Da̱wuda, adama o unusu wa̱ Sulemanu, agba babu ukotu shi.> >>

40 Sulemanu gba yuwan ta̱ mpolo wu una Yerobowam, amma a̱vu u suma a̱ tyo uba̱ta̱ wa Shisha mogono ma Masar, reve wi isawan ɗe hali she na Sulemanu kuwa̱i.

41 Akapi a linga tsugono tsa Sulemanu, ni ili i na u yuwain suru nu ugbozu wa̱ yi, a ɗana le ta̱ a̱tsuma̱ a atagada a alabari a Sulemanu. 42 Sulemanu yuwan ta̱ tsugono tsi iɗa ya Isra'ila suru a̱tsuma̱ a̱ Urishelima a'wan amunga. 43 A̱vu Sulemanu kuwa̱ ucina nkaya ma̱ yi, a̱vu a̱ ciɗo yi a̱tsuma̱ a̱ lyuci va̱ Da̱wuda dada va̱ yi, Reve Rehobowam ulobo wa̱ yi wo o'wo mogono o una̱ wa̱ yi.