1 Rehobowam 'ya̱wa̱ ta̱ Shekem adama a na aza a Isra'ila suru a̱ ka̱ra̱ ta̱ a̱ 'ya̱wa̱ ɗe tsa̱ra̱ a ca yi tsugono. 2 Ana Yerobowam ulobo wa Neba wu uwwai ne u shi ta̱ u buwa a̱tsuma̱ a Masar, uba̱ta̱ u na u sumaa yi Mogono Sulemanu a̱ tyo, reve u ka̱mba̱ diga Masar. 3 Ɗaɗa azagbain a Isra'ila a̱ lyunguwa̱i Yerobowam, reve a̱yi ni iɓolo ya aza a Isra'ila suru a̱ 'ya̱wa̱ ya Rehobowam a̱vu a damma yi: 4 <<Dada va̱ wu Sulemanu kuruwa̱ tsu ta̱ a̱a̱gba̱la̱ o ume, agba na̱ a̱vu vu jebe tsu a̱tsuma̱lima̱ o ulinga wu usa̱'a̱n na̱ a̱a̱gba̱la̱ o ume a na u kuruwa̱ ntsu, tsu ta yuwaan wu tsugbashi.>>

5 Reve Rehobowam usu le, <<Ka̱ra̱i rana ta'atsu, reve i ka̱mbisa̱ ya̱'a̱ va̱.>> Ɗaɗa ama'a a̱ ka̱ra̱i.

6 A̱vu Mogono Rehobowam ma zami a̱sa̱la̱ a mbara aza a na a yuwayin Sulemanu dada va̱ yi a̱ga̱nda̱ a mantsa ma na u shi wuma. We ece le ta̱, <<A̱sa̱la̱ a̱ ne yaa ca mu na ma̱a̱ usu ama a nda?>> 7 Reve a̱ usu, <<Nna ana'an vo o'wo aagbashi a ama a nda a̱vu vu yuwaan le a̱ga̱nda̱ reve vu usu ulobonu, ele gba o to o'wo agbashi a̱ wu kuci.>>

8 Amma Rehobowam 'yuwan ta̱ a̱sa̱la̱ a na mbara n ca niyi, reve u zami a̱sa̱la̱ o olobo aza a na a kungwai oɓolo na̱ a̱yi, aza a na aa casu yi a̱sa̱la̱. 9 We ece le ta̱, <<Nye i ɗa a̱sa̱la̱ a̱ ɗu? Cine ma̱a̱ usu ama a nda a na a damma numu, <Jebe ume wa̱ a̱a̱gba̱la̱ a na dada va̱ wu kuruwa̱ ntsu>?>>

10 Reve olobo a na a kungwai oɓolo na̱ a̱yi a̱ usu, <<Damma ama a nda a na a damma nuwu, <Dada va̱ wu kuruwa̱ tsu ta̱ a̱a̱gba̱la̱ o ume, amma vu jebee tsu ume wa̱ yi,> vu damma le, <Aakatsu e ke'en a̱ va̱ a la'a ta̱ ikyun ya dada va̱ ugba̱mu. 11 Dada va̱ kuruwa̱ ɗu ta̱ a̱a̱gba̱la̱ o ume, a̱mu gba n ta̱ da̱shi yi ume. Dada va̱ fufaba ɗu ta̱ na asuɗu, a̱mu gba n ta fufaba ɗu na agashi.> >>

12 Ana a yuwain rana ta'atsu reve Yerobowam oɓolo na ama'a suru a̱ ka̱mba̱ uba̱ta̱ wa Rehobowam, cine mogono ma dammai, <<I ka̱mba̱ uba̱ta̱ u va̱ a̱tsuma̱ a rana ta'atsu. >> 13 Reve mogono ma̱ usu ama'a nu upan. U 'yuwan a̱sa̱la̱ a na mbara n ca niyi, 14 u yuwaan le adanshi na̱ a̱sa̱la̱ a na olobo a ca niyi, u damma. <<Dada va̱ zuwaa ɗu ta̱ a̱a̱gba̱la̱ ume, a̱mu gba n ta da̱shi zuwa yi u la'a ume. Dada va̱ fufaba ɗu ta̱ na asuɗu, a̱mu n ta fufaba ɗu na agashi.>> 15 Ne ɗa gba mogono ma 'yuwain a uwwa ipati ya ama'a, adama a na A̱sulazuva a ɗa a zuwai ili'i yo o'wo ne, adama o shiton adanshi a na A̱sulazuva a yuwayin Yerobowam ulobo wa Neba o una̱ wa Ahija vuma va Shilo.

16 Ana ama Isra'ila suru e enei mogono ma 'yuwan ta̱ a uwwa le, a̱vu a̱ usu mogono: <<Akunda a̱ ne a ɗa tsu ri na̱ a̱yi ya̱ Da̱wuda, agadu a̱ ne tsu ri na̱ a̱yi uba̱ta̱ o ulobo wa̱ Yese? Ka̱mba̱i o ogodo a̱ ɗu, A̱ɗu aza a Isra'ila, lyawa Da̱wuda yuwan tsugono tsa aciya̱yi goon!>> Ne ɗa aza a Isra'ila e bete'wei, za suru ka̱mba̱ ta̱ o oogodo a̱ yi.✝ 17 Amma a̱vu Rehobowam ka̱ra̱ o tsugono tsa ama a Isra'ila aza a na a̱ ri nden e ilyuci yi iɗa ya Yahuda.

18 Reve Mogono Rehobowam lyungu Adoniram za na ee idanasa a̱za̱ o ulinga u tsugbashi, agba a̱vu aza a Isra'ila suru a vara yi na atali hali u kuwa̱. Amma na Mogono Rehobowam uwai adama a ɗa o ndolo reve u jika̱ u kumba keke vi ido va̱ yi a̱vu u suma a̱ tyo Urishelima. 19 Diga a mantsa mo ndolo, ne ɗa aza a Isra'ila a̱ 'ya̱sa̱yin u'wa wa̱ Da̱wuda aci hali a cina ana'an.

20 Ana ama a Isra'ila suru a uwwai a na Yerobowam ka̱mba̱ ta̱ diga e iɗa ya Masar, a̱vu a̱ lyungu e ɗe yi u ta̱wa̱ uba̱ta̱ e iɓolo'o reve a zuwa yi wo o'wo mogono ma Isra'ila suru. Ugundo wa Yahuza goon ɗa u shi u buwai oo tono u'wa wa̱ Da̱wuda. 21 Ana Rehobowam rawai Urishelima, u ɓoloto ta̱ u'wa wa Yahuza suru nu ugundo wa Banyami ama ukpakukupa ukpaku nu ukpakukupa kupakunla̱ (180,000) a̱za̱ o uvon aza a na aa yuwan uvon nu u'wa wa Isra'ila adama a̱ ka̱mba̱to le za̱la̱ tsugono tsa Rehobowam ulobo wa Sulemanu. 22 Amma a̱vu adanshi a̱ A̱sula̱ a nda a̱ ta̱wa̱ ya Shemaya vumava̱sula̱. 23 Vu damma Rehobowam ulobo wa Sulemanu mogono ma Yahuda, nu u'wa wa Yahuza na̱ Banyami suru na akapi a ama suru, 24 <<Apa ili i na A̱sulazuva a dammai: She i gawan a̱ 'ya̱wa̱ i yuwan uvon na̱ a̱za̱ a̱ wu aza a Isra'ila wan. Koyan ɗa ka̱mba̱ o u'wa, adama a na a̱yi nda uyuwun u va̱ u ɗa.>>Reve gba a uwwa adanshi a̱ A̱sulazuva, reve a̱ ka̱mbusa̱ a 'wa le cine A̱sulazuva a zuwai.

25 A̱vu Yerobowam suwa ukari a̱ka̱nda̱ruwa̱ Shekem a̱tsuma̱ e iɗa ya agaɗi ya Ifiramu, reve u da̱nu ɗe. Diga ɗe waru reve u 'ya̱wa̱ u suwa lyuci va̱ Feniye.

26 Reve Yerobowam jiyan o okolo a̱ yi ana, <<Gogo uba̱ta̱ u tsugono'o u ta̱ ka̱mba̱ o u'wa wa̱ Da̱wuda. 27 Na̱ ama a nda a gawan a̱ 'ya̱wa̱ a̱ ca kucci a̱ A̱a̱'isamapaɗa a̱ A̱sulazuva a̱tsuma̱ a̱ Urishelima, okolo e le waru a̱ ta̱ ka̱mba̱ uba̱ta̱ wu zagbain le, Rehobowam mogono ma Yahuda. A̱ to una mu a̱vu a̱ ka̱mba̱ uba̱ta̱ u Mogono Rehobowam.>>

28 Reve a na Yerobowam mogono ma zami yi a̱sa̱la̱, a̱vu u zuɗa̱ mudindim n re n zinariya. Reve u damma ama'a, <<Ma̱'ya̱wa̱ ma̱ ɗu Urishelima ma rawa ta̱ ne. Apa nda musula̱ n ɗu, a̱ɗu aza a Isra'ila, aza a na o uta̱a̱ nɗu e iɗa ya Masar.>> 29 A̱vu u zuwa za̱ ta̱ a̱tsuma̱ a Betel, za ve ire waru a̱tsuma̱ a Dan. 30 Reve ili i nda yo o'wo unusu, adama a na ama a̱ ka̱ra̱ ta̱ a̱ 'ya̱wusa̱ hali a̱ tyo Dan a yuwusan ma̱sula̱ ma na ma̱ ri ɗe a̱ga̱nda̱.

31 Reve waru u suwa a̱a̱'isa̱ na̱ ba̱ta̱ va̱ a̱ga̱nda̱, a̱vu u zuwa nan ganu vi icu'un ya ama suru, ko na ele nan Levi a ɗa shi.* 32 Reve Yerobowam zuwa a yuwusan a̱buki o urana wa kupa no ozo ton wo woto wa̱ kunla̱, tsa a̱buki a na a tsu yuwan a̱tsuma̱ a Yahuda, a̱vu a ca kucci a masa'a. Ne ɗa u yuwain a̱tsuma̱ e Betel a̱vu u ca mudindim n na u zuɗa̱i kucci. Reve u zuwa nan ganu ɗe a̱ a̱a̱'isa̱ a̱ ba̱ta̱ va̱ a̱ga̱nda̱'a̱ a na yuwain. 33 Reve u gawan a masa'a ma na u suwai a̱tsuma̱ a Betel o urana wa kupa no ozo o ton wo woto wa̱ kunla̱, woto u na u ɗangwai wa aciya̱yi, a̱vu u yuwan kucci a masa'a ma na u suwai. Ne ɗa u yuwayin aza a Isra'ila a̱buki, a̱vu u gawan a masa'a adama u ca kucci.