1 Mogono Da̱wuda kutsa ta̱ na a'wan a̱ a̱bunda̱ lon, ko shi na a pala yi na amuna u tsu uwwa shen shen shi. 2 Ɗaɗa agbashi a̱ yi a damma niyi, <<Lyawa tsu zamiya zagbain tsu mogono usheli u na koto u revei vali shi u na wa̱a̱ da̱na̱ oɓolo na̱ a̱yi u goloɓuso yi. U ta̱ da̱na̱ o vosun e eɓele a̱ yi adama zagbain tsu mogono ma uwwusa shen shen.>>

3 Ɗaɗa a zamiyi usheli u sa'ani a̱tsuma̱ o upasu wa aza a Isra'ila suru, reve a̱ tsura̱ Abisha za va Shunem, a̱vu a̱ ta̱wa̱ na̱ a̱yi uba̱ta̱ u mogono. 4 Usheli'i u shi ta̱ ulobonu lon, reve u goloɓuso mogono u yuwusaan yi a̱ga̱nda̱, agba mogono me reve yi mawun ma ka shi.

5 Reve Adonija ulobo u na Hagit matsain u 'ya̱sa̱n aciya̱yi zuva a dansa, <<N to o'wo mogono.>> Ɗaɗa u foɓoyi aciya̱yi ikeke yi ido na akumbi e ido, na ama kupoton a na a uwaa yi elime. 6 Koto dada va̱ yi ɓara yi u damma, <<Nye i zuwai vaa yuwusan ne tsunda?>> Waru ulobo u sa'ani u ɗa u shi, a̱yi ɗa a matsain a̱ca̱pa̱ a Absalom.

7 Reve u ɓolo una̱ na̱ Yowab za na mma va̱ yi ɗa Zeruya na̱ Abiyata ganu, Reve a kamba yi. 8 Amma Saduku ganu na̱ Benaya ulobo wa̱ Yehoyida, na̱ Natan vumava̱sula̱ na̱ Shimai na̱ Reyi na̱ ali o uvon a̱ Da̱wuda a̱ kuru Adonija shi.

9 Reve Adonija ca kucci vi ikyon ni inan, na̱ za va ogono aza a na a̱ ri na̱ lipu a Aatali a Zohele zuzu na̱ lyusu mini wa̱ En Roge. U banu ta̱ a̱za̱ a̱ yi suru, olobo o mogono oɓolo na ali a Yahuda suru na agbashi o mogono uba̱ta̱ wa̱ a̱buki suru. 10 Agba u banu Natan vumava̱sula̱ shi ko Benaya ko ali o uvon ko mawun ma̱ a̱na̱wun ma̱ yi Sulemanu shi.

11 Reve Natan ece Bashaba, mma va Sulemanu, <<Koto vu uwwa a na Adonija, ulobo u na Hagit matsayin Da̱wuda wo o'woi mogono, babu zagbain tsu urevu shi? 12 Gogo lyawa n ca wu a̱sa̱la̱ cine vaa wawa wuma wa̱ wu oɓolo na̱ wuma wu ulobo wa̱ wu Sulemanu. 13 Ka̱ra̱ a̱ 'ya̱wa̱ uba̱ta̱ mogono Da̱wuda vu damma yi, <Zagbain va̱ mogono, vu yuwaan aagbashi a̱ wu akucunu shi: <<Amayun Sulemanu ulobo wa̱ wu u ɗa wo o'wo mogono a̱ca̱pa̱ a̱ va̱ reve u da̱nu o ootogu o tsugono tsa̱ va̱ shi?>> Adama a̱ nye a ɗa Adonija o'woi mogono?> 14 A mantsa ma na vu ri a cuɗuwusa mogono, n ta̱ ta̱wa̱ adama a na maa damma adanshi a̱ wu mejege ma ɗa.>>

15 Reve Bashaba uwa adama we ene mogono ma na ma kutsai a̱tsuma̱ a aasula a̱ yi, agba Abisha za va Shunem ma ɗa ma̱ da̱na̱i a yuwusan yi a̱ga̱nda̱. 16 A̱vu Bashaba kingyo nu urewesu wa̱ yi a̱ tyo e iɗa a̱ ma̱ka̱ka̱n mo mogono, reve mogono me ece, <<Nye i ɗa vu cigai?>>

17 Reve u usu, <<Zagbain va̱, a̱vu na aciya̱wu vu kucinaa mu ta̱ a̱mu aagbashi a̱ wu naa ala A̱sulazuva A̱sula̱ a̱ wu: <Sulemanu ulobo wa̱ wu mo to o'wo mogono a̱ca̱pa̱ va̱, reve u da̱nu zuva vo ootogu o tsugono tsa̱ va̱.> 18 Agba gogo Adonija o'wo ta̱ mogono, agba a̱vu, zagbain va̱ mogono, vu ri urevu na̱ a̱ yi shi. 19 U ca ta̱ kucci vo ogono e inan na̱ mudindim n na n ri na̱ lipu na̱ ikyon ya̱ a̱bunda̱, a̱vu u banu suru olobo o mogono, reve waru u banu Abiyata ganu na̱ Yowab yali ya̱ a̱soja uba̱ta̱ wa̱ a̱buki, agba u banu aagbashi a̱ wu Sulemanu shi. 20 Zagbain va̱ mogono, esu a aza a Isra'ila suru a̱ tu uba̱ta̱ wa̱ wu, adama e ene za na a̱a̱ da̱nu o ootogu o tsugono a zagbain va̱ mogono a̱ca̱pa̱ a̱ yi. 21 Na a yuwan ne shi, na̱ zagbain mogono ma̱a̱ kuwa̱ a na wee ivuwan oɓolo na̱ nkaya ma̱ yi, a̱mu nu ulobo u va̱ Sulemanu a ta yuwan na̱ a̱tsu tsa̱ a̱za̱ o unusu.>>

22 A̱yi a̱tsuma̱ a adanshi na̱ mogono, a̱vu Natan vumava̱sula̱ rawa. 23 A̱vu a damma mogono, <<Natan vumava̱sula̱ ta̱ pa.>> A̱vu u rawa a̱ ma̱ka̱ka̱n mo mogono u kingyo nu urewesu wa̱ yi a̱ tyo e iɗa.

24 A̱vu Natan damma, <<Zagbain va̱ mogono, vu damma ta̱ ana, <Adonija to o'wo mogono a̱ca̱pa̱ a̱ wu, reve u da̱nu zuva vo ootogu o tsugono tsa̱ wu?> 25 Ana'an u ka̱ra̱ ta̱ cipa̱ reve u ca kucci vo ogono e inan na̱ mudindim n na n ri na̱ lipu na̱ ikyon ya̱ a̱bunda̱. U banu ta̱ olobo o mogono suru, na̱ nan yali ya̱ a̱soja na̱ Abiyata ganu. Gogo tsunda a̱ te ɗe a alya no o sowi na a dammi, <Wuma u mogono Adonija u jima!> 26 Amma a̱mu aagbashi a̱ wu na̱ Saduku ganu, na̱ Benaya ulobo wa̱ Yehoyida, oɓolo na̱ Sulemanu aagbashi a̱ wu u banu tsu shi. 27 Ili i nda i ɗa zagbain va̱ mogono ma yuwain babu lyawa agbashi a̱ yi e reve za na a̱a̱ da̱nu o ootogu o tsugono tsa̱ yi tsa zagbain va̱ mogono a̱ca̱pa̱ a̱ yi?>>

28 A̱vu mogono Da̱wuda damma, <<Ɗewe numu Bashaba.>> A̱vu u ta̱wa̱ elime o mogono wi isawan.

29 A̱vu mogono ma tara akucunu, u damma, <<Na̱ A̱sulazuva a̱ ri wuma, za na wawa numu a̱tsuma̱ a addama suru, 30 ana'an nda n to shiton suru akucunu a na n yuwain e ekere a̱ A̱sulazuva A̱sula̱ a Isra'ila adansa, <Sulemanu ulobo wa̱ wu u ɗa woo o'wo mogono a̱ca̱pa̱ a̱ va̱,> a̱vu u da̱nu zuva vo ootogu o tsugono uba̱ta̱ u va̱.>>

31 A̱vu Bashaba kingyo nu urewesu wa̱ yi a̱ tyo e iɗa a̱ ma̱ka̱ka̱n mo mogono, a̱vu u damma, <<Lyawa zagbain va̱ mogono Da̱wuda tsura̱ wuma babu ukotu!>>

32 A̱vu mogono Da̱wuda damma, <<Ɗewe numu Saduku ganu, Natan vumava̱sula̱, na̱ Benaya ulobo wa̱ Yehoyida.>> Ana a̱ ta̱wa̱i a̱ ma̱ka̱ka̱n mo mogono, 33 a̱vu u damma le: <<Tarai agbashi a zagbain ɗu a̱ ka̱ra̱ oɓolo na̱ a̱ɗu reve i kumbato Sulemanu ulobo u va̱ zuva mololi mo do ma̱ va̱, a̱vu i tara yi i cipa̱ a̱ tyo Gihon. 34 A̱vu i zuwa Saduku ganu na̱ Natan vumava̱sula̱ a̱ tsuwa̱n yi mani'in ɗe adama wo o'wo mogono e ekere Isra'ila. A̱vu yi ivula̱ avana a̱vu i saala, <Wuma u mogono Sulemanu u jima!> 35 A̱vu i ka̱ra̱ a gawan oɓolo na̱ a̱yi, a̱vu i ta̱wa̱ na̱ a̱yi u da̱nu o ootogu o tsugono tsa̱ va̱ u yuwan tsugono o una̱ u va̱. N zuwa ta̱ wo o'wo mogono e ekere a Isra'ila na̱ Yahuda.>>

36 A̱vu Benaya ulobo wa̱ Yehoyida usu mogono u damma, <<Lyawa wo o'wo ne! Lyawa A̱sulazuva A̱sula̱ zagbain va̱ mogono zuwa wo o'wo ne. 37 Cine A̱sulazuva a̱ da̱na̱i oɓolo na̱ zagbain va̱ mogono, lyawa fo u da̱na̱ oɓolo na̱ Sulemanu u zuwa ootogu o tsugono tsa̱ yi tsa la'a za vu zagbain va̱ mogono Da̱wuda!>>

38 Ɗaɗa Saduku ganu na̱ Natan vumava̱sula̱ na̱ Benaya ulobo wa̱ Yehoyida na aza a *Keretiya na aza a Feletiya a̱ ka̱ra̱ a̱ cipa̱ a̱vu a kumbato Sulemanu zuva mololi mo do mogono Da̱wuda, a̱vu e shewun yi a̱ tyo Gihon. 39 Reve Saduku ganu tara aavana a mani'in diga o oogodo a akiza a̱vu u tsuwa̱n Sulemanu. A̱vu e ivula̱ aavana reve ama suru a saala, <<Wuma u mogono Sulemanu u jima!>> 40 A̱vu ama suru a gawan o toni yi e ivulusa̱ abulu na a yuwusain mere lon hali u zuwa iɗa i jinga̱ɗa̱ adama e elemu e le. 41 Adonija oɓolo no omocin a na a̱ shi oɓolo na̱ yi suru a uwwa ta̱ elemu e le, e le o mokotoo ma alya e ilyalya. Ana a uwwai mesun ma abulu, a̱vu Yowab ece, <<Elemu a̱ nye a ɗa a̱ ri a̱tsuma̱ a̱ lyuci?>>

42 A̱yi a̱tsuma̱ a adanshi, a̱vu Jonata ulobo wa Abiyata ganu u rawa. A̱vu Adonija damma, <<Uwa. Vuma va̱ a̱ɓula̱ tsa̱ wu vu ta yuwan vu ta̱wa̱a̱ na alabari a sa'ani.>>

43 A̱vu Jonata usu, <<Ne ɗa shi ko ke'en! Zagbain tsu mogono Da̱wuda zuwa ta̱ Sulemanu o o'wo mogono. 44 A̱vu mogono ma̱ lyungu Saduku ganu oɓolo na̱ a̱yi na̱ Natan vumava̱sula̱ na̱ Benaya ulobo wa̱ Yehoyida na aza a Keretiya na aza a Feletiya, waru a kumbato yi ta̱ zuva mololi mo do mogono. 45 Waru Saduku ganu oɓolo na̱ Natan vumava̱sula̱ tsuwa̱n yi ta̱ mani'in wo o'wo mogono a Gihon. Diga ɗe a gawan ta̱ a yuwusan ma̱za̱nga̱, a̱vu lyuci suru tara ne elemu. A̱yi ɗa elemu a na vaa uwwusa. 46 Gogo tsunda, Sulemanu ta̱ nden o ootogu o tsugono. 47 Waru agbashi o mogono a̱ ta̱wa̱ ta̱ a yuwaan zagbain tsu mogono Da̱wuda ma̱za̱nga̱ adansa, <Lyawa A̱sula̱ a̱ wu a zuwa ala a Sulemanu u la'a za va̱ wu, ootogu o tsugono tsa̱ yi waru a la'a za va̱ wu!> Reve mogono ma̱ kingyo u ka̱ɗa̱to u yuwan a̱ga̱nda̱ a̱ a̱ga̱da̱ a̱ yi. 48 Reve u damma, <Ica a̱ tyo e ekere a̱ A̱sulazuva, A̱sula̱ a Isra'ila, za na lyawai esu a̱ va̱ e ene za na ushiya̱ numu nden o ootogu o tsugono tsa̱ va̱ ana'an.> >>

49 Ana omocin a Adonija a uwwai ne suru, reve a uwwa wovon reve e bete'we. 50 Amma Adonija adama a na u da̱na̱ ta̱ a uwwusa wovon wa̱ Sulemanu, a̱vu u 'yon u ka̱ra̱ reve u reme avana a masa'a. 51 Reve a damma Sulemanu, <<Adonija ta uwwusa wovon wa̱ wu mogono Sulemanu a̱yi ɗa ndolo hali u reme avana ma masa'a. A̱vu u damma, <Lyawa mogono Sulemanu kucinaa mu ana'an nda a na woo una aagbashi a̱ yi na̱ matsun me pe'eni shi.> >>

52 Reve Sulemanu usu u damma, <<Nu u roco aciya̱yi a̱yi vuma va̱ a̱ɓula̱ ɗa, ko a̱nji a̱ ta̱ a aaci a̱ yi a̱ riya̱ e iɗa shi. Agba nna̱ a̱ tsura̱ yi ni iwuya u ta̱ kuwa̱.>> 53 A̱vu mogono Sulemanu lyungu ama, a̱vu a̱ cipa̱to yi diga a masa'a. A̱vu Adonija ta̱wa̱ a̱vu u ka̱ɗa̱ta̱wa̱ mogono Sulemanu. A̱vu Sulemanu damma, <<Ka̱ra̱ a̱ tyo o u'wa wa̱ wu.>>