1 A yuwan ta̱ a'wan a ta'atsu Aram na̱ Isra'ila a yuwan uvon shi. 2 Amma a̱tsuma̱ a aa'wan a ta'atsu a̱vu Yehoshafa mogono ma Yahuda ma̱ 'ya̱wa̱ adama we ene mogono ma a Isra'ila. 3 Mogono ma a Isra'ila ma̱ shi ta̱ ɗe ma damma azagbain a̱ yi, <<I reve ta̱ a na Ramot Giliyadu za tsu ɗa agba suru na̱ ne tsaa yuwusan ili i na tsaa usa yi e ekere o mogono Aram shi?>> 4 A̱vu we ece Yehoshafa, <<Vu ta̱ 'ya̱wa̱ oɓolo na̱ a̱mu tsu yuwan uvon na̱ Ramot Giliyadu?>> A̱vu Yehoshafat usu mogono ma a Isra'ila, <<A̱mu na̱ a̱vu ili i ta̱ i ɗa, ama a̱ va̱ ama a̱ wu a ɗa, ido i va̱ ido ya̱ wu i ɗa.>> 5 A̱vu Yehoshafa damma mogono ma a Isra'ila, <<Vu zami ne'e ifoɓi ya̱ A̱sulazuva.>>

6 Ɗaɗa mogono ma Isra'ila mo ɓolotoi ama̱sula̱, a ta rawa ama ukpaku una̱shi (400) a̱vu wee ece le, <<N 'ya̱wa̱ n yuwan uvon na̱ Ramot Giliyadu, ko she n 'ya̱wa̱ wan?>> A̱vu a̱ usu yi, <<'Ya̱wa̱, adama a na A̱sulazuva a ta ca yi e ekere o mogono.>> 7 Amma a̱vu Yehoshafa ece, <<Babu pa vumava̱sula̱ va̱ A̱sulazuva ro za na tsee ece yi?>>

8 A̱vu mogono ma a Isra'ila ma̱ usu yi, <<Vuma ta̱ buwa ta̱ za na tsee ece adama a̱ A̱sulazuva, amma n ciga yi shi adama a na u tsu yuwan adanshi e ili i na yaa fara i sa'ani a̱ tyo ya̱'a̱ va̱ shi, she iwuya. A̱yi ɗa Mikaya ulobo wa Imla.>>

A̱vu Yehoshafa usu, <<She mogono ma damma ne wan.>>

9 Ɗaɗa mogono ma Isra'ila me ɗeyi vuma ta̱ a̱tsuma̱ a̱soja a̱ yi a̱vu u damma, <<Jika̱ vu ta̱wa̱a̱ mu na Mikaya ulobo wa Imla.>>

10 Mogono ma Isra'ila na̱ mogono Yehoshafa va Yahuda o oto ta̱ a̱tugu o tsugono tsa̱ le, uba̱ta̱ wo osoroto o u'uwata wu una̱ntsu u lyuci va Samariya, na ama̱sula̱ lo suru a yuwusan adanshi e ili i na yaa fara a̱ ma̱ka̱ka̱n ma̱ yi. 11 A̱vu Zedekiya ulobo wa Kenana u yuwan avana e irumu a̱vu u damma, <<Apa nda ili i na A̱sulazuva a dammai, <Na avana a nda a ɗa vaa sapa aza a Aram hali she na̱ a̱ kuwa̱ suru.> >>

12 Akapi a ama̱sula̱ suru a adansa ne fo. A̱ da̱na̱ ta̱ a dansa, <<Gawan a̱ tyo Ramot Giliyadu vu ta lyuwa aci, adama a na A̱sulazuva a ta yi e ekere o mogono.>>

13 Reve malingata ma na ma̱ 'ya̱wa̱i u ɗe Mikaya ma a damma yi, <<Ka̱lyuwa̱, akapi a ama̱sula̱ a ta yuwusaan mogono adanshi o ulyuwu wa aci una̱ u ta̱. Lyawa adanshi a̱ wu o o'wo una̱ta̱ na̱ za le, vu yuwan adanshi a sa'ani.>>

14 Amma a̱vu Mikaya damma, <<N kucina ta̱ na̱ A̱sulazuva a na a̱ ri wuma, ili i na A̱sulazuva a damma numu goon ɗa maa damma yi.>>

15 Ana u rawai, a̱vu mogono me ece yi, <<Mikaya, tsu 'ya̱wa̱ Ramot Giliyadu nu uvon, ko tsu 'ya̱wa̱ wan?>>

A̱vu u usu, <<'Ya̱wa̱ vu lyuwa aci, adama a na A̱sulazuva a ta ca yi e ekere o mogono.>>

16 A̱vu mogono ma damma yi, <<Hali uyan u ɗa maa zuwa wu vu kucina she vu damma mu ili i ro wan she amayun a̱tsuma̱ a ala a̱ A̱sulazuva?>>

17 Reve Mikaya usu, <<Mee ene ta̱ Isra'ila suru ubete'u a agaɗi tsi ikyon i na i ri babu za va aguɓa, a̱vu A̱sulazuva a damma, <Ama a nda a̱ ri na̱ zagbain shi, lyawa koyan ɗa ka̱mba̱ o u'wa no okolo nden.> >>

18 A̱vu mogono ma Isra'ila ma damma Yehoshafa, <<N damma wu shi a na u tsu yuwan adanshi e ili i na yaa fara i sa'ani adama a̱ va̱ shi ko ke'en, amma she iwuya goon?>>

19 Mikaya gba lyuwa ta̱ elime, u damma, <<Adama o ndolo uwwa adanshi a̱ A̱sulazuva, me ene ta̱ A̱sulazuva nden o ootogu o tsugono tsa̱ yi no oɓolo a̱ a̱soja a zuva mishin na̱ a̱yi o ukere u sa'ani nu ugula̱ wa̱ yi. 20 A̱vu A̱sulazuva a damma, <Zane ɗa a̱a̱ pura̱ Ahabu ugbozu adama u 'ya̱wa̱a̱ Ramot Giliyadu uvon a̱vu u kuwa̱ ɗe?> A̱vu za nda ta̱wa̱a̱ na̱ a̱sa̱la̱ a nda za ro waru ta̱wa̱a̱ na̱ a̱sa̱la̱ o ro. 21 O ukosu, a̱vu ruhu ta̱ ta̱wa̱, a̱vu wi isawan a̱ ma̱ka̱ka̱n ma̱ A̱sulazuva u damma, <N ta̱ pura̱ ugbozu wa̱ yi.>

22 <<A̱vu A̱sulazuva e ece yi, <Nu ure u ne?> A̱vu u usu, <N ta̱ 'ya̱wa̱ mo o'wo ruhu ve epen o una̱ wa ama̱sula̱ a̱ yi suru.> Reve A̱sulazuva a damma, <Vu ta gura pura̱ ugbozu wa̱ yi, 'ya̱wa̱ vu yuwan ne.>

23 <<Reve gba A̱sulazuva a zuwa ruhu ve epen o una̱ wa ama̱sula̱ a̱ wu a nda suru. A̱sulazuva na aciya̱yi u zuwaa wu ta̱ ɗe a̱tsuma̱lima̱.>>

24 A̱vu Zedekiya ulobo wa Kenana u rawa zuzu reve u ɓasa Mikaya o ugbaguzu. A̱vu we ece yi, <<Ure u ne u ɗa ruhu va̱ A̱sulazuva kuruyi a naa u lyawa numu a̱vu u yuwan adanshi na̱ a̱vu?>>

25 Reve Mikaya usu yi, <<Vu te reve urana u na vu sumai vu pa'ain a aasula a̱ a̱tsuma̱.>>

26 A̱vu mogono ma a Isra'ila ma a damma, <<Remei Mikaya i ka̱mba̱to yi ya Amon zagbain lyuci nu Yowash ulobo u mogono. 27 A̱vu i damma le, <Apa nda ili i na mogono ma dammai: Zuwai vuma nda o u'wa wa ali, agba she i casu yi ili wan she opopofu wa'a na̱ mini she urana u na n ka̱mba̱i gbaga.> >>

28 A̱vu Mikaya damma, <<Hali na̱ vu ka̱mba̱ gbaga, A̱sulazuva a yuwan adanshi na̱ a̱mu shi.>> A̱vu u da̱shi damma, <<Guza̱i adanshi a̱ va̱, a̱ɗu ama suru!>>

29 A̱vu Ahabu mogono ma Isra'ila na̱ Yehoshafa mogono ma a Yahuda a gawan a̱ 'ya̱wa̱ riya̱a̱ lyuci va Ramot a̱tsuma̱ Giliyadu nu uvon. 30 A̱vu mogono ma a Isra'ila ma a damma Yehoshafa, <<N ta̱ pusa̱n iroci a̱ va̱, n uwa uvon amma a̱vu vo oto a̱tugu o tsugono tsa̱ wu.>> Ɗaɗa mogono ma a Isra'ila ma̱ pusa̱yin iroci a̱ yi a̱vu u uwa a̱tsuma̱ o uvon.

31 Mogono ma Suriya ma zuwa ta̱ nan yali yi ikeke yi ido ya̱ yi mata'atsu ne ejere, u damma, <<She i yuwan uvon na̱ za ro wan, ko vuma ke'en ko zagbain, she mogono ma Isra'ila goon.>> 32 Ana nan yali yi ikeke yi ido'o e enei Yehoshafa, a yuwan ta̱ majiyan, <<Amayun a̱yi nda a̱yi ɗa mogono ma a Isra'ila.>> Reve a vadala adama a yuwan uvon na̱ a̱yi, amma a na wo oruwoi, 33 a̱vu nan yali'i e reve a na mogono ma a Isra'ila ma ɗaɗa shi, ɗaɗa a lyawai masaɓa ma̱ yi.

34 Amma a̱vu nanza tewin liya va̱ yi ivama, a̱vu u tawan mogono ma Isra'ila nu upasu wi itana yu uvon wa̱ yi. A̱vu mogono ma damma za na a̱a̱ gba̱rusa̱ ikeke yi ido ya̱ yi, <<Vadala vu uta̱a̱ mu uba̱ta̱ wu uvon, adama a na a amaton mu ta̱ lon.>> 35 Uvon u suɗuwa ta̱ lon urana u ndolo ma̱ɓula̱. A̱vu e keɗe mogono a gawan a̱tsuma̱ a̱ keke vi ido va̱ yi elime a aza a Aram. A̱vu mpasa mo oco pe a̱tsuma̱ a̱ keke'e, nu ulivu u ndolo reve u kuwa̱. 36 Urana azama ma̱riya̱a̱, ɗaɗa a saalayi a̱soja: <<Koyan ka̱mba̱ a̱ lyuci le, koyan ka̱mba̱ e iɗa ya̱ yi!>>

37 Ne ɗa mogono ma̱ kuwa̱i a̱vu a̱ ta̱wa̱ na̱ a̱yi Samariya, a̱vu a̱ ciɗo. 38 A̱vu a̱ za̱'wa̱ keke vi ido'o a aabata a̱tsuma̱ a Samariya uba̱ta̱ u na ashakala a̱ sumba̱i, reve musa̱n mu peɗe mpasa ma̱ yi cine adanshi a̱ A̱sulazuva a dammai.

39 Adama a akapi o ulinga u tsugono tsa na Ahabu yuwain suru, oɓolo ni ili i na u yuwain suru, nu ukobu u tsugono tsa na u suwai reve u sura yi na anga a agiwa, ni ilyuci i gbagbain i na u suwayi kari a ɗana le ta̱ a̱tsuma̱ a aatagada a alabari o ngono ma Isra'ila. 40 Ahabu kuwa̱ ta̱ ucina nkaya ma̱ yi. Reve Ahaziya ulobo wa̱ yi o'wo mogono o una̱ wa̱ yi.

41 Yehoshafa ulobo wa Asa wo o'wo ta̱ mogono ma a Yahuda a̱tsuma̱ a aa'wan a̱ na̱shi a Ahabu mogono ma Isra'ila. 42 Yehoshafa da̱na̱ ta̱ na a'wan mata'atsu no ozo o ton mantsa ma na wo o'woi mogono, a̱vu u yuwan tsugono a̱tsuma̱ a̱ Urishelima a'wan ushin no ozo o ton. Aala a mma va̱ yi a ɗa Azuba usheli wa Shilihi. 43 A̱tsuma̱ e ili biti u kuru ta̱ ure wa dada va̱ yi Asa, agba u ɓatsa shi, u yuwan ta̱ ili i na i ri mejege e ekere a̱ A̱sulazuva. Amma wu tawa ba̱ta̱ va̱ a̱ga̱nda̱ va̱ a̱ma̱li shi, reve gba ama a̱ ka̱ra̱ a casu kucci na̱ a̱ kula̱tosuyi a̱tsuka̱ a̱ ma̱guru ɗe. 44 Waru Yehoshafa da̱na̱ ta̱ a̱ nden ma lafiya na̱ mogono ma Isra'ila.

45 Adama a akapi o ulinga u tsugono tsa na Yehoshafa yuwain, ni ili i na u yuwain nu uvon u na u yuwain, a ɗana le ta̱ a̱tsuma̱ a aatagada a alabari o ngono ma Yahuda. 46 u gba̱ra̱ ta̱ ashakala a ali a̱ a̱'isa̱ a na a̱ shi a buwai a mantsa mo tsugono tsa Asa dada va̱ yi. 47 A mantsa'a a̱ shi na̱ mogono a̱tsuma̱ e iɗa ya Edom shi, she dodu mogono ma ɗa a̱ shi na̱ a̱yi.

48 Yehoshafa shi ta̱ yuwan antsu a̱ mini a Tarshishi a na a̱ ri n 'ya̱wusa̱ Ofi adama a tanusu zinariya, amma antsu'un a̱ 'ya̱wa̱ shi, adama a na o ɓoso ta̱ a Eziyon Geba. 49 A mantsa mo ndolo Ahaziya ulobo wa Ahabu ma damma ta̱ Yehoshafa, <<Lyawa ama a̱ va̱ a̱ 'ya̱wa̱ oɓolo na ama a̱ wu.>> Agba Yehoshafa 'yuwan ta̱.

50 Reve Yehoshafa kuwa̱ ucina nkaya ma̱ yi, a̱vu a̱ ciɗo yi oɓolo ne ele a̱tsuma̱ lyuci va̱ Da̱wuda dada va̱ yi. A̱vu Jehoram ulobo wa̱ yi wo o'wo mogono o una̱ wa̱ yi.

51 Ahaziya ulobo wa Ahabu o'wo ta̱ mogono ma Isra'ila a̱tsuma̱ a Samariya a̱tsuma̱ a aa'wan a kupa ne a̱za̱ e cindere tso tsugono tsa Yehoshafa mogono ma Yahuda, a̱vu u yuwan tsugono tsa Isra'ila a'wan e re. 52 U yuwan ta̱ iwuya e ekere a̱ A̱sulazuva, adama a na u kuru ta̱ ure wa dada va̱ yi na̱ mma va̱ yi, waru nu ure wa Yerobowam ulobo wa Neba, za na zuwai Isra'ila yuwain unusu. 53 U yuwaan ta̱ Ba'al tsugbashi a̱vu u yuwaan yi a̱ga̱nda̱, reve u zuwa A̱sulazuva, A̱sula̱ a Isra'ila a yuwan upan, cine dada va̱ yi yuwain.