1 Ana Ahabu kuwa̱i, a̱vu Mowa 'ya̱sa̱a̱n Isra'ila aci.

2 Urana u ro Mogono Ahaziya ma Isra'ila ma̱ fa̱tsa̱ ta̱ diga uba̱ta̱ wu usowoto wu upepu wa aasula a zuva va̱ yi va Samariya, a̱vu wu uwwa usa̱n lon. Ɗaɗa u lyunguyi nlingata u damma le, <<'Ya̱wa̱i ye ece Ba'al Zebu, ma̱sula̱ ma Ekuron ma aza a Filistiya, ko n ta̱ ka̱mba̱ gbaga diga o usa̱n u nda.>> 3 Amma a̱vu malingata ma̱ A̱sulazuva ma damma Iliya vuma va Tishibe, <<'Yon, vu ka̱ra̱ vu ga'an na̱ nlingata m mogono ma Samariya a̱vu ve ece le, <Uwwai ne'e, babu pa A̱sula̱ a̱tsuma̱ a Isra'ila a ɗa, a na ya̱a̱ 'ya̱wusa̱ ye ece uba̱ta̱ wa̱ Ba'al Zebu ma̱sula̱ ma Ekuron?> 4 To, adama o ndolo apa a nda ili i na A̱sulazuva a dammai, <Va̱a̱ 'yon a̱ a̱ga̱da̱ a na vu ri nven shi. Ili i ro yi lo shi vu ta̱ kuwa̱!> >> Ɗaɗa Iliya ka̱ra̱i.

5 A na nlingata'a n ka̱mba̱i uba̱ta̱ u mogono, a̱vu we ece le, <<Adama a̱ nye i ka̱mba̱i?>>

6 A̱vu a̱ usu yi, <<Vuma ro ɗa tsu ga'ain na̱ a̱yi, reve u damma tsu, <Ka̱mba̱i uba̱ta̱ u mogono za na lyungu nɗu a̱vu i damma yi, <<Apa a nda ili i na A̱sulazuva a dammai, Uwwai ne'e, babu pa A̱sula̱ a̱tsuma̱ a Isra'ila a ɗa, a na ya̱a̱ 'ya̱wusa̱ ye ece uba̱ta̱ wa̱ Ba'al Zebu ma̱sula̱ ma Ekuron? Adama o ndolo va̱a̱ 'yon a̱ a̱ga̱da̱ a na vu ri nven shi. Ili i ro yi lo shi vu ta̱ kuwa̱!>> > >>

7 A̱vu mogono me ece le, <<Cine vuma na ga'ain na̱ a̱ɗu'u u ri, a̱vu u damma a̱ ɗu cu'un vi ili ya nda suru?>>

8 A̱vu a̱ usu yi, <<Vuma ɗa na da̱na̱i wotowu nu utugu we eleme na̱ gbakala vu ukwan e ikyun ya̱ yi.>>*

A̱vu mogono ma damma, <<Iliya ɗa vuma va Tishibe.>>

9 A̱vu u lyunguwa̱a̱ Iliya yali ya̱ a̱soja no oɓolo a̱ a̱soja a̱ yi kupoton a na e reme yi. Reve yali ya̱ a̱soja'a u ka̱ra̱ a gawan ya Iliya za na shi nden zuva va aagaɗi, a̱vu u damma yi, <<Vuma va̱ A̱sula̱, mogono ma damma vu cipa̱ a̱ ta̱wa̱!>> 10 A̱vu Iliya usu yali ya̱ a̱soja'a, <<Na̱ a̱mu vuma va A̱sula̱ ɗa, lyawa akina a̱ cipa̱ diga zuva u lyuwa wu oɓolo na ama kupoton a̱ wu!>> Reve gba akina a̱ cipa̱ shi diga zuva a̱vu u lyuwa yali ya̱ a̱soja'a na̱ a̱soja a̱ yi.*

11 A̱vu mogono ma̱a̱ lyunguwisa̱a̱ Iliya yali ya̱ a̱soja na̱ a̱soja kupoton a̱yi. A̱vu yali ya̱ a̱soja'a u damma yi, <<Vuma va̱ A̱sula̱, apa nda ili i na mogono ma dammai, <Vu cipa̱ gogogo!> >> 12 A̱vu Iliya damma yi, <<Nna̱ a̱mu vuma va A̱sula̱ ɗa, lyawa akina a̱ cipa̱ diga zuva reve u lyuwa wu oɓolo na̱ a̱soja kupoton a̱ wu!>> Ɗaɗa gba akina a̱ cipa̱ shi diga zuva a̱vu u lyuwa yali ya̱ a̱soja'a na̱ a̱soja a̱ yi.

13 A̱vu mogono ma̱ da̱shi lyunguwisa̱ yali ya̱ a̱soja va ta'atsu oɓolo na̱ a̱soja kupoton a̱ yi. Reve yali ya̱ a̱soja'a u ka̱ra̱ a gawan, a̱vu u kingyo a̱ ma̱ka̱ka̱n ma Iliya a̱vu u pati yi u damma, <<A̱vu vuma va̱ A̱sula̱, vu yuwan ankuri vu tara wuma u va̱ na̱ wuma wa ama kupoton a nda agbashi a̱ wu ili ya̱ a̱ɓula̱. 14 Agba a̱yi ɗa nda akina o uta̱i ɗe diga zuva reve u lyuwa nan yali ya̱ a̱soja e re e elime oɓolo na̱ a̱soja e le suru. Amma gogo vu tara wuma u va̱ ili ya̱ a̱ɓula̱!>> 15 A̱vu malingata ma̱ A̱sulazuva ma damma Iliya, <<She vu uwwa wovon wan. Cipa̱ vu ka̱ra̱ oɓolo na̱ a̱yi.>> Ɗaɗa Iliya 'yoyin a̱vu ka̱ra̱ oɓolo na̱ a̱yi a̱ tyo uba̱ta̱ u mogono. 16 A̱vu Iliya damma mogono, <<Apa nda ili i na A̱sulazuva a dammai, <Ana o o'woi vu lyunguyi nlingata a yuwan wu yeci uba̱ta̱ wa Ba'al Zebu ma̱sula̱ ma Ekuron, she damma babu A̱sula̱ a̱tsuma̱ a Isra'ila za na vaa zami urevu uba̱ta̱ wa̱ yi? O una̱ u na vu yuwain tsunda, va̱a̱ 'yon a̱ a̱ga̱da̱ a na vu ri nven shi ko ke'en. Vu ta̱ gba a̱ kuwa̱.> >>

17 Reve gba Ahaziya kuwa̱ cine adanshi a̱ A̱sulazuva a dammai o una̱ wa Iliya. Ana wo o'woi Ahaziya da̱na̱ nu ulobo shi, reve Jehoram mawun ma̱ a̱na̱wun ma̱ yi ma lyuwa tsugono o una̱ wa̱ yi, a̱tsuma̱ a aa'wan e ire a Yowash ulobo wa Jehoshafa mogono ma Yahuda. 18 Akapi a linga tsugbain tsa na Ahaziya yuwain suru a ɗana le ta̱ a̱tsuma̱ a aatagada a labari o ngono ma aza a Isra'ila.