1 A mantsa ma tsugono tsa Yehoyakim, reve Nebukanaza mogono ma Babila ma̱ ta̱wa̱ ta̱ nu uvon e iɗa'a, a̱vu Yehoyakim wo o aagbashi a̱yi a aa'wan ata'atsu. Adama o ndolo a̱vu u vadala okolo a̱ yi a̱vu u 'ya̱susa̱a̱n mogono ma Babila aci.* 2 A̱vu A̱sulazuva a lyungu aza a Kaldiya na̱ Asuriya na̱ Mowa na̱ a aza a Amon uba̱ta̱ wa̱ yi a yuwan uvon na̱ yi. U lyungu le ta̱ adama a na o kototo iɗa ya a Yahuda, ununa adanshi a A̱sulazuva a dammai a̱tsuma̱ o una wa agbashi a̱ yi ama̱sula̱. 3 Amayun ili ndolo cina ta̱ aza a Yahuda ununa A̱sulazuva a dammai, a na o kototo le diga elime a̱ yi, adama o unusu wa Manase, na̱ suru ulinga u naa u yuwain, 4 adama a na wu una ta̱ a aza a na a̱ ri nu unusu shi. A̱vu u shiton Urishelima na̱ mpasa ma a aza a babu unusu, agba A̱sulazuva a ciga u yuwaan le gafura shi.*

5 Akapi o ulinga u na Yehoyakim yuwain na̱ suru ili i na u yuwain o tsugono tsa yi, a̱ da̱na̱ ta̱ pe uɗanu a̱tsuma̱ aatagada alabari o ngono ma a Yahuda. 6 A̱vu Yehoyakim kuwa̱ ucina nkaya ma̱ yi. A̱vu Yehoyakin ulobo wa̱ yi wo o mogono o una̱ wa̱ yi.

7 Mogono ma Masar ma̱ da̱shi uta̱ diga a̱tsuma̱ e iɗa ya̱ yi shi, adama a na mogono ma Babila ma usa ta̱ upasu wi iɗa ya Masar, diga o Uɗolu wa Masar a̱ tyo wu upasu Uɗolu wa Yufiriti.

8 Yehoyakin da̱na̱ na ta̱ na a aa'wan kupa na̱ kunla̱ a mantsa ma na wo o'woi mogono, a̱vu u yuwan tsugono tsa woto ta'atsu a̱tsuma̱ a Urishelima. Aala mma va̱ yi ɗa Nehushata usheli wa Elinata va Urushalima. 9 A̱vu u yuwan iwuya elime A̱sulazuva, ununa dada va̱ yi yuwain.

10 A mantsa mo ndolo agbashi a Nebukanaza mogono ma Babila a̱ ta̱wa̱ ta̱ Urishelima, a̱vu a̱ ka̱nda̱ruwa̱ lyuci'i adama o uvon. 11 A̱vu Nebukanaza mogono ma Babila na̱ aciya̱yi u rawa a̱ lyuci'i a mantsa ma na a̱soja yi a̱ ka̱nda̱ruwa̱i lyuci'i adama o uvon. 12 Yehoyakin Mogono ma a Yahuda, u ca ta̱ aciya̱yi e ekere mogono ma Babila, na̱ mma va yi na̱ agbashi a̱ yi na̱ azagbain o ukobu wa̱ yi suru. A̱vu mogono ma Babila ma tara yi a̱tsuma̱ aa aa'wan a̱ kunla̱ o tsugono tsa yi, a̱vu Yehoyakin wo o'wo aagbashi.* 13 A̱vu Nebukanaza pura̱ suru utsuru wa̱ A̱a̱'isa̱mapaɗa a̱ A̱sulazuva na̱ za vu ukobu u mogono, a̱vu waru wu ta̱ ili i na i ri na̱ zinariya a aza a na Sulemanu Mogono ma Isra'ila ma yuwain adama A̱a̱'isa̱mapaɗa a̱ A̱sulazuva, cine A̱sulazuva a dammai.* 14 Nebukanaza pura̱ ta̱ ama a Urishelima reve u ka̱ra̱ na̱ le suru. U ɓolo ta̱ pe na azagbain na̱ nan yali ya̱ a̱soja, na aza a linga ve ekere na̱ a̱za̱ o uruma, ama ukpaku kupa (10,000). A̱za̱ o ulambu a ɗa goon u lyawai pe.

15 A̱vu u tara Yehoyakin a̱ tyo Babila. Oɓolo na̱ mma va̱ yi egbere na̱ a̱ma̱ci a̱ yi na azagbain a̱ yi, na a azagbain e iɗa'a. Suru n le u pura̱ le ta̱ diga Urishelima a̱ tyo e iɗa ya Babila tsugbashi. 16 A̱vu mogono ma Babila ma̱ ta̱wa̱ na agbashi a aza a na a gurai uvon a̱tsuma̱ Babila a̱bunda̱ ele ukpaku kupocindere (7,000) a ɗa, aza o ucira na̱ aza a na a gurai uvon, a̱vu waru u tara aza a na a gurai ulinga wu ukere na̱ a ruma ukpaku uta̱ (1,000). 17 A̱vu mogono ma Babila ma zuwa Mataniya, za wa'a va dada va Yehoyakin wo o'wo mogono o una̱ wa̱ yi, a̱vu u vadala aala a̱ yi a̱ tyo Zedekiya.*

18 Zedekiya da̱na̱ ta̱ na̱ aa'wan ushin na̱ za ta̱ a mantsa ma na u temei tsugono. U yuwa ta̱ tsugono a̱tsuma̱ a̱ Urishelima a'wan kupa na̱ za ta̱. Aala mma va̱ yi ɗa Hamuta usheli wa̱ Irimiya vuma va Libina.* 19 U yuwan ta̱ iwuya elime a̱ A̱sulazuva, ununa mogono Yehoyakim yuwain. 20 Adama o upan wa̱ A̱sulazuva a ɗa ili i nda suru u cinai aza a Urishelima na̱ Yahuda, a̱vu u kototo le elime yi. A̱vu Zedekiya 'ya̱sa̱a̱n mogono ma Babila aci.

Ɗaɗa Zedekiya 'ya̱sa̱a̱n yi mogono ma Babila aci.