1 A̱tsuma̱ aa'wan kupa na̱ a̱za̱ cindere o tsugono tsa Peka ulobo wa Remaliya, Ahaz ulobo wa Yotam mogono ma Yahuda me temei tsugono. 2 Ahaz da̱na̱ ta̱ na a aa'wan ushin a na wo o yi mogono, a̱vu u yuwan tsugono tsa Urishelima aa'wan kupa na̱ a̱za̱ ta̱li. U yuwan ununa Da̱wuda yuwain shi, agba u yuwan ili i na i ri mejege elime A̱sulazuva A̱sula̱ a̱yi shi. 3 Amma u yuwan ta̱ mmalu a̱tsuma̱ o u re wu ngono ma aza a Isra'ila, hali u ca olobo a̱ yi kucci vu ukula̱tosu, a̱vu u da̱na̱ a yuwusan ili yi idaba oɓolo na̱ nɗa n na A̱sulazuva a̱ gba̱ra̱i elime aza a Isra'ila.* 4 U ca ta̱ kucci vu ukula̱tosu na̱ kucci vi ili i ma̱guru ba̱ta̱ masa'a, na̱ zuva va agaɗi, na̱ suru a̱tsuma̱ aa ɗanga na ri kpa̱la̱m.

5 A̱vu mogono Rezin va Suriya na̱ Peka ulobo wa Remaliya mogono ma Isra'ila ma̱ ka̱ra̱ adama a na a yuwan uvon a̱tsuma̱ a Urishelima a̱vu a̱ ka̱nda̱ruwa̱ Ahaz nu uvon, amma a gura lyuwai nu uvon shi.* 6 A mantsa mo ndolo mogono Rezin va Suriya ma̱ ushi ta̱ iɗa ya Ela adama a Suriya, a̱vu a̱ gba̱ra̱ a ama a Yahuda diga Ela, reve aza a Edom a̱ ka̱ra̱ a̱ tyo Ela a̱vu a̱ da̱nu ɗe hali acina a na'an nda.

7 A̱vu Ahaz lyungu na̱ nlingata a̱ tyo ya̱ mogono Tigla Pilesa vi iɗa ya a Asuriya, <<A̱mu aagbashi a̱ wu a ɗa, ulobo wa̱ wu waru. Ta̱wa̱ adama a na va wawa mu diga o ukere u mogono ma Asuriya na̱ waru diga o ukere u mogono ma aza a Isra'ila, aza a na a̱ riya̱sa̱ mu nu uvon.>> 8 A̱vu Ahaz pura̱ azurufa na̱ zinariya diga a̱tsuma̱ A̱a̱'isamapaɗa a̱ A̱sulazuva na̱ diga uba̱ta̱ wi izuwa yu ukobu u tsugono, a̱vu u lyungu ne le une'e a̱ tyo ya mogono ma Asuriya. 9 A̱vu mogono ma Asuriya mo foɓo adama a na wa̱ riya̱a̱ Dimaska nu uvon, a̱vu gba u lyuwai nu uvon. A̱vu u pura̱ suru ama a̱ yi a̱ tyo Kir tsugbashi, a̱vu wu una Rezin ɗe.

10 A̱vu Mogono Ahaz ma̱ ka̱ra̱ a̱ tyo Dimaska adama a na wa a ga'an na̱ mogono Tigla Pilesa va Asuriya. A̱vu we ene'e Masa'a a̱tsuma̱ Dimaska, a̱vu u lyunguwa̱a̱ Uriya ganu u rono masa'a'a ni iɗana agalaci ununa aa suwa ni yi. 11 A̱vu Uriya ganu u suwa masa'a'a ununa mogono Ahaz ma damma ni yi za na u lyunguwa̱a̱ niyi diga Dimaska, a̱vu waru u kotoi kafu mogono Ahaz ma vadala a̱ ka̱mba̱. 12 A mantsa ma na mogono ma̱ ka̱mba̱i diga Dimaska, a̱vu we ene'e masa'a'a, a̱vu u ta̱wa̱ zuzu, a̱vu u ca ɗe kucci. 13 A̱vu u ca kucci vu ukula̱tosu na̱ za vi ishina, a̱vu u tsun ɗe kucci vi ili yo oso, a̱vu wu kyo'onu mpasa kucci muwwulai zuva masa'a'a. 14 Masa'a ma̱ rumushili ma na ma̱ ri mishin elime A̱sulazuva, a̱vu a̱ ta̱wa̱ na̱ yi zuzu na̱ A̱a̱'isamapaɗa diga masa'a ma sa'avu ma̱ A̱a̱'isamapaɗa a̱ A̱sulazuva, a̱vu a zuwai o upasu wu ugana u masa'a ma sa'avu.*

15 A̱vu mogono Ahaz ma damma Uriya ganu, <<Zuva masa'a ma sa'avu'u, vu ca kucci vu ukula̱tosu vu usana ɗe, na̱ kucci vi ishina yu ulivu, na̱ kucci vu ukula̱tosu na̱ vi ishina i mogono, na̱ kucci vu ukula̱tosu wa a ama suru wi iɗa'a, na̱ kucci vi ishina na̱ za vi ili yo oso. A̱vu waru wu kyo'onu mpasa n kucci vu ukula̱tosu na̱ i kucci suru zuva va Masa'a. Amma n ta yuwan ulinga na̱ masa'a ma̱ rumushili, adama a na a̱mu me e reve ili i na yaa fara.>> 16 A̱vu Uriya ganu yuwan u ununa Ahaz mogono ma damma ni yi.

17 A̱vu mogono Ahaz ma paɗa suru ukosu wu uba̱ta̱ wa̱ yi, a̱vu wu uta̱a̱ pe aakwanu a gbain diga pe. A̱vu a tawa pe akwanu a gbai'in, za na da̱na̱i lo a̱ mɓa̱nga̱ mi inan yi rumushili, a̱vu u zuwa yi zuva va aatali.* 18 A̱vu u tawa ili i na a̱ ɓa̱ru yi ure za na a suwai pe a̱tsuma̱ A̱a̱'isamapaɗa o uranu wa ashibi, a̱vu waru u tawa itana i na i ri o una̱ntsutsu u ma uwa ma̱ A̱a̱'isamapaɗa a̱ A̱sulazuva za mogono. Adama a na mogono Asuriya me e ne'e le wan.

19 Akapi o ulinga u na Ahaz yuwain o tsugono tsa yi, na̱ ili i na u yuwain biti, a̱ da̱na̱ ta̱ pe uɗanu a̱tsuma̱ aatagada alabari o ngono ma a Yahuda. 20 A̱vu Ahaz kuwa̱ ucina nkaya ma̱ yi, a̱vu a̱ciɗyo yi a̱tsuma̱ lyuci va Da̱wuda. A̱vu Hezekiya ulobo wa̱ yi mo o mogono o una̱ wa̱ yi.*