1 A mantsa mo ndolo Hezekiya da̱na̱ ta̱ nu ubanakun hali u yuwan zuzu a na wa̱ kuwa̱. A̱vu Ishaya vumava̱sula̱ ulobo wa Amoz 'ya̱wa̱ uba̱ta̱ wa̱ yi a̱vu u damma yi, <<Apa ili i na A̱sulazuva a dammai, <Vu foɓo u'wa wa̱ wu, adama a na va la'a shi vu ta̱ kuwa̱.> >>

2 A̱vu Hezekiya vadala urewesu wa yi a̱ tyo o uɓaɓu a̱vu u pati ya̱ A̱sulazuva u damma, 3 <<A̱sulazuva vu cuwan, na̱ cine n yuwain mmalu elime a̱ wu, a̱tsuma̱ amayun na̱ suru okolo a̱ va̱ waru n yuwan ta̱ ulinga u na u ri mejege elime a̱ wu.>> A̱vu Hezekiya shon a̱bunda̱ nu usa̱n lon.

4 Kafu Ishaya u ta̱ u lyawa memere mo ukobu u mogono, a̱vu adanshi A̱sulazuva a̱ ta̱wa̱ ya̱ a̱ yi u damma, 5 <<Ka̱mba̱, vu damma Hezekiya mogono ma ama a̱ va̱, <Apa ili i na A̱sulazuva, A̱sula̱ a dada va̱ wu Da̱wuda dammai, mu uwwa ta̱ ipati ya̱ wu waru me ene ta̱ aɓara a̱ wu, n ta ca wu lafiya. A̱tsuma̱ o urana wa ta'atsu vu ta gawan a̱ 'ya̱wa̱ a̱tsuma̱ A̱a̱'isa̱mapaɗa a̱ A̱sulazuva vu yuwan a̱ga̱nda̱. 6 N ta̱ da̱shi wu a aa'wan kupa na̱ ozo ton a̱tsuma̱ a wuma wa̱ wu. A̱vu n wawa wu a̱tsuma̱ a̱ lyuci e ekere mogono ma Asuriya. N ta geshe iɗa i nda adama a̱ va̱, na̱ waru adama aagbashi a̱ va̱ Da̱wuda.> >>

7 A̱vu Ishaya damma, <<Lyawa a tara a̱a̱kutsu o ubiri reve a sukuma yi a aamici'in, tsa̱ra̱ u ka̱mba̱ gbaga.>>

8 A̱vu mogono Hezekiya e ece Ishaya, <<Nye ɗa ya̱ da̱na̱ iroci i na A̱sulazuva o roco mu a na ma̱ tsura̱ lafiya, a̱vu waru a̱tsuma̱ o urana wa a ta'atsu, a na ma gawan n ka̱ra̱ a̱ tyo A̱a̱'isa̱mapaɗa a̱ A̱sulazuva?>>

9 A̱vu Ishaya usu yi u damma, <<Apa iroci ya̱ A̱sulazuva a̱ tyo ya̱ a̱ wu a na A̱sulazuva a̱ ta̱ o shiton nzuwulai ma̱ yi, to, vu ɗangula ko vu ta ciga a na ululu wa̱ a̱ ka̱mba̱ a̱ca̱pa̱ udasuwu kupa, ko u 'ya̱wa̱ elime udasuwu kupa?>>

10 A̱vu Hezekiya usu <<Ili yu usa̱n iɗa shi a na ululu wa̱ 'ya̱wa̱ elime udasuwu kupa a na gba wa̱ ka̱mba̱ a̱ca̱pa̱ udasuwu kupa.>>

11 A̱vu Ishaya vumava̱sula̱ pati ya̱ A̱sulazuva, a̱vu A̱sulazuva a zuwa ululu u ka̱mba̱ a̱ca̱pa̱ udasu wu kupa, a na u ka̱ra̱la̱i pe a̱tsuma̱ uba̱ta̱ u na mogono Ahaz udasu yi.

12 A mantsa mo o ndolo Meroda Balada ulobo wa Baladan mogono ma Babila ma lyunguwa̱a̱ ta̱ Hezekiya na̱ mepepelime na̱ ne'e, adama a na wu uwwai a na Hezekiya ta̱ ubanakun. 13 A̱vu Hezekiya raba le. Reve u roco le suru asula e izuwa yu utsuru wa̱ yi, na̱ azurufa na̱ zinariya na̱ ili i ma̱guru na̱ mani'in ma sa'ani na̱ itana yu uvon ya̱ yi, na̱ utsuru u na u ri na̱ yi suru, a̱tsuma̱ asula e izuwa ya̱ yi. Babu ni ili i na i da̱na̱i o ukobu wa̱ yi suru, ko a̱ tsugono tsa yi a na Hezekiya kuɗa̱i a na wo roco le. 14 A̱vu Ishaya vumava̱sula̱ ta̱wa̱ uba̱ta̱ u Mogono Hezekiya a̱vu we ece yi u damma, <<Nye ɗa ama a nda adamma nuwu? Diga te ɗa waru o uta̱i?>>

<<A̱vu Hezekiya usu o uta̱ ta̱ diga e iɗa yaa alanga, diga e iɗa ya Babila.>>

15 A̱vu Ishaya vumava̱sula̱ da̱shi ece u damma <<Nye ɗa enei a̱tsuma̱ o ukobu wa̱ wu?>>

<<Avu Hezekiya usu ene ta̱ ili i na i ri pe o ukobu suru babu ili i na i ri pe a̱tsuma̱ asula e izuwa yu utsuru i va̱ a na n roco n le shi.>>

16 A̱vu Ishaya damma Hezekiya, <<Vu uwwa adanshi A̱sulazuva. 17 <Amayun a ɗa mantsa ma̱ tu lo a̱ ta̱wa̱ a na a̱ pura̱ suru ili i na vu ri na̱ yi a̱tsuma̱ o ukobu wa̱ wu, ili i na nkaya ma̱ wu n yuwain izuwa acina ana'an, a ta pura̱ le suru a̱ tyo Babila. Babu ili i na a lyawa. A̱mu A̱sulazuva n damma ta̱.* 18 Waru a̱ ta̱ pura̱ olobo a̱ wu o ro, a̱za̱ a̱ lipu na̱ mpasa ma̱ a̱ wu. Aza a na a matsan nuwu a̱vu a̱ ka̱ra̱ na̱ le, reve o'o to le ali a na a gura von na̱ a̱ma̱ci shi o ukobu u mogono ma Babila.> >>* 19 Avu Hezekiya damma Ishaya vumava̱sula̱, <<Adanshi a̱ A̱sulazuva a na vu ta̱wa̱ nu mu u tu ulobonu.>> Adama a na u da̱na̱ ta̱ a majiyan u damma, <<A̱ da̱na̱ na̱ nden ma lafiya a̱tsuma̱ a mantsa ma̱ va̱ shi?>> 20 Akapi o ulinga u na mogono Hezekiya yuwain, o ucira u tsugono tsa yi, nu ununa suru u suwa yi esu a̱ mini aza a na a̱ ta̱wusa̱ na̱ mini a̱tsuma̱ a̱ lyuci, a̱ da̱na̱ ta̱ pe uɗanu a̱tsuma̱ aatagada alabari o ngono ma a Yahuda. 21 Avu Hezekiya kuwa̱ ucina nkaya ma yi a̱vu ulobo wa yi Manase wo o mogono o una̱ wa̱ yi.