1 Manase da̱na̱ ta̱ na aa'wan kupa na̱ ejere a mantsa ma na wo o yi mogono, u yuwan ta̱ tsugono tsa yi aa'wan kupoton na̱ ozo o ton a̱tsuma̱ a̱ Urishelima. Aala a mma va yi ɗa Hefiziba. 2 U yuwan ta̱ iwuya a̱ ma̱ka̱ka̱n ma̱ A̱sulazuva, a yuwusan ili yi idaba i na nɗa n na A̱sulazuva a̱ gba̱ra̱i elime ama a Isra'ila.* 3 A̱vu mogono Manase ma̱ suwisa ba̱ta̱ va̱ a̱ga̱nda̱ na dada va yi Hezekiya o ɓosoi, a̱vu waru u suwaa Ba'al musa'a, avu u yuwisan ma̱sula̱ ma Ashera, ununa Mogono Ahabu va Isra'ila yuwain. A̱vu u kingyo a̱ tyo uba̱ta̱ wu urana na̱ woto na̱ italyo'o ya zuva avu u yuwan le a̱ga̱nda̱. 4 A̱vu Manase suwa musa'a a̱ A̱a̱'isamapaɗa a̱ A̱sulazuva, a na A̱sulazuva dammai, <<A̱tsuma̱ a̱ Urishelima ɗa ma zuwa aala a̱ va̱.>>* 5 A̱vu u suwa musa'a adama a na a yuwaan urana na̱ woto na̱ italyo'o ya zuva a̱ga̱nda̱, a̱tsuma̱ asula a̱ re A̱a̱'isa̱mapaɗa a̱ A̱sulazuva. 6 Manase ca ta̱ ulobo wa̱ yi kucci vu ukula̱tosu. Waru u ta yuwusan yindi na̱ u ɓoloso ya aci na̱ ruhu va̱ a̱kwa̱kwa̱. Agba u ta yuwusan tsuboci fo. U yuwan ta̱ ulinga wi iwuya elime A̱sulazuva, za na u zuwai A̱sulazuva a yuwain upan na̱ yi lon.

7 A̱vu u tara uruma u Ashera u ma̱sula̱ ma na u yuwain a̱vu u zuwai pe a̱tsuma̱ A̱a̱'isa̱mapaɗa, za na A̱sulazuva a dammai Da̱wuda na̱ ulobo wa̱ yi Sulemanu, <<A̱tsuma̱ A̱a̱'isa̱mapaɗa a nda pe Urishelima, na n ɗangulai a̱tsuma̱ o gundo va aza a Isra'ila suru, a na ma zuwa aala a̱ va̱ hali hali.* 8 Ma̱ da̱shi lyawa ama a Isra'ila o uta̱ diga a̱tsuma̱ e iɗa i na n ca yi nkaya n le shi, n na a yuwan tsutoni reve a̱kuru ili i na n damma nle, na̱ wila̱ u na aagbashi a va Musa ca nle.>> 9 Amma ama'a a uwwa shi. A̱vu Manase ra̱pula̱ le, u zuwa le a na a yuwan iwuya i na i la'a yi ama a na A̱sulazuva o kototo yi a̱tsuma̱ e iɗa'a i na u ca yi ama a Isra'ila a̱ da̱nu pe.

10 A̱vu A̱sulazuva a yuwan adanshi o una̱ wa agbashi a̱ yi ama̱sula̱ u damma, 11 <<Manase Mogono ma Yahuda ma yuwan ta̱ ulinga wi ili yi idaba i nda. U yuwan ta̱ iwuya lon i na i la'a yi aza a Amoriya, a aza a na a̱ da̱na̱i pe kafu a mantsa ma̱ yi, avu u zuwa ama a Yahuda a yuwan unusu e itoni i musula̱ ma̱ yi. 12 Adama o ndolo apa ili i na a̱mu A̱sulazuva, A̱sula̱ a aza Isra'ila, n dammai, n ta̱ ta̱wa̱ na̱ a̱tsuma̱lima̱ aciya a Urishelima na̱ Yahuda na vuma naa uwwai biti u ta̱ lima̱.* 13 Adama o ndolo waru a̱vu n kunzu aza a Urishelima na̱ amunga o u kimusa̱sa̱ u na n yuwain ulinga na̱ yi ekere aza a Samariya, na̱ waru za naa n yuwain ulinga na̱ yi a̱tsuma̱ o u'wa wa Ahabu. Na̱ ne ɗa ma tasa aza a Urishelima ununa vuma tsu tasa akwanu, a̱vu u kpa̱to yi mavada. 14 A̱vu n vari a agadu a̱ va̱ a zana a buwai, reve waru n ca le ekere aa n'yuwatan n le. Waru ele oto o aza a na e remei tsu itana yu uvon yi n'yuwatan n le, 15 adama a na a yuwan ta̱ iwuya esu a̱ va̱ a̱vu a zuwa mu n yuwan upan diga o urana u na nkaya n le mu uta̱i a̱tsuma̱ a Masar hali acina ana'an nda.>>

16 Na̱ ne suru, Manase gba una ta̱ aza a na a̱ ri nu unusu shi lon, a̱vu u shiton Urishelima na̱ mpasa n le diga upasu u nda acina upasu u de ɗe, ba nu unusu u na u zuwai aza a Yahuda a yuwain, a̱vu a yuwan iwuya elime A̱sulazuva.

17 Akapi o ulinga wa Manase, na̱ suru linga naa u yuwain, na̱ suru unusu u na u yuwain, a̱ da̱na̱ ta̱ pe uɗanu a̱tsuma̱ aatagada alabari o ngono ma a Yahuda. 18 Manase kuwa̱ ta̱ ucina nkaya ma̱ yi a̱vu a̱ ciɗo yi pe a̱tsuma̱ a̱a̱rumbu o u'wa wa̱ yi, a̱a̱rumbu a Uza. A̱vu ulobo wa̱ yi Amon mo o mogono o una̱ wa̱ yi.

19 Amon da̱na̱ ta̱ na a aa'wan ushin na̱ ejere a mantsa ma na wo o'woi mogono, a̱vu waru u yuwan tsugono tsa Urishelima a aa'wan e re. Aala mma va̱ yi ɗa Meshuleme usheli wa Haru diga a̱tsuma̱ a Yoba. 20 A̱vu u yuwan iwuya elime A̱sulazuva ununa dada va yi Manase yuwain. 21 A̱vu yuwan suru mmalu ma̱ yi a̱tsuma̱ o ure wa dada va̱ yi, u yuwusan a̱ga̱nda̱ a̱ tyo uba̱ta̱ musula̱ naa dada va̱ yi yuwusaan yi a̱ga̱nda̱, reve u kingyo wa̱ le. 22 A̱vu u lyawa A̱sulazuva, A̱sula̱ a nkaya ma̱ yi, a̱vu u 'yuwan a yuwan mmalu o ure wa̱ A̱sulazuva. 23 Azagbain o mogono Amon oɓolo ta̱ una̱ u le reve o unai a̱tsuma̱ o u'wa wa̱ yi. 24 Amma a̱vu ama e iɗa'a suru o una aza a na o ɓoloi aci o unai Amon, reve a ɗangula Josiya ulobo wa̱ yi o una̱ wa̱ yi. 25 Suru akapi o ulinga u na Amon yuwain, na̱ linga va̱ yi, a̱ da̱na̱ ta̱ pe uɗanu a̱tsuma̱ aatagada alabari o ngono ma a Yahuda. 26 A̱vu a̱ ciɗo yi ason a̱yi pe a̱tsuma̱ a̱a̱rumbu a Uza. A̱vu ulobo wa̱ yi Josiya wo o mogono o una̱ wa̱ yi.