1 Ahabu da̱na̱ ta̱ no olobo kupocindere aza a na a̱ da̱na̱i nden a̱tsuma̱ a Samariya. A̱vu Yehu ɗana mepepelime a̱vu u lyungu a̱ tyo Samariya a̱ 'ya̱wa̱a̱ azagbain e iɗa ya Yezireyel, a̱ tyo we mbara, na̱ waru aza a na a idanusan olobo a Ahabu. A̱vu u damma le,

2 << A mantsa ma na mepepelime ma nda ma rawai o ukere u ɗu biti, a na wo woi olobo a zagbain ɗu o to oɓolo na̱ a̱ ɗu agba i ta̱ na̱ ikeke yi ido ni ido, na̱ lyuci naa ri nu ukari oɓolo na̱ itana yu uvon, 3 a̱vu i ɗangula za na la'ai a̱ɓula̱ a̱tsuma̱ olobo a zagbain ɗu a̱vu i katala yi okokolo ootogu a dada va̱ yi. Adama o ndolo a̱vu i yuwan uvon adama o u'wa u mogono ma̱ ɗu.>>

4 Amma a̱vu wovon u reme le lon, a̱vu a damma, <<N na̱ n ngono n re n gurai shi, cine tsu ɗa a̱ tsu tsa gura na̱ yi?>> 5 Adama o ndolo a̱vu azagbain o u'wa u mogono, na̱ nan gwamna a̱ lyuci'i, na̱ mbara na̱ aza naa a tsu idanusan olobo o mogono a̱vu oɓoloto adama a na a̱ lyunguwa̱ Yehu ni ikaka a̱vu a damma, <<A̱tsu agbashi a̱ wu ɗa. Tsu ta yuwan ili i na vu damma n tsu tsu yuwan suru. Tsa katala nanza mogono shi, vu yuwan suru ili i na ve enei u lobono nu wu.>>

6 A̱vu Yehu ɗanaa le mepepelime me ire u damma, <<N na̱ i ta yuwusan tsutoni na̱ a̱mu, waru i ta toni mu, a̱vu i ta̱wa̱ mu naa aci olobo a zagbain ɗu, a̱vu i ta̱wa̱ mu na̱ le ɗe Yezireyel acina mantsa ma nda nfa'an.>>

Olobo o mogono kupocindere, a̱ da̱na̱ ta̱ oɓolo na azagbain a̱ lyuci'i a̱ ɓa̱na̱sa̱ le. 7 A mantsa ma na mepepelime'e ma rawai o ukere u le, a̱vu e reme olobo o mogono kupocindere'e a̱vu a paɗa le, a̱vu o koɗo aciya le a̱ tsu le a̱tsuma̱ asaka a̱vu a̱ lyungu na̱ le a̱ tyo ya̱ Yehu a̱tsuma̱ a̱ Yezireyel.

8 Ana malingata ma̱ ta̱wa̱i ma damma yi Yehu a̱ tu ɗe a̱ ta̱wa̱yi na aci olobo o mogono, a̱vu u damma, <<Izuwa le oɓolo e re lo elime o una̱ntsu u lyuci, i lyawa le lo she nfa'an nu usana.>> 9 Nu usana reve Yehu uta̱ alanga. A̱vu wi isawan elime a ama a̱vu u damma, <<A̱ɗu ozo o unusu ɗa shi. A̱mu ɗa za na yuwain ifoɓi yi iwiya aciya zagbain ɗu a̱vu mu unai, amma nan za ne ɗa o unai suru aza a nda? 10 I gura ta̱ reve na adanshi a na A̱sulazuva a yuwain adama o u'wa Ahabu amayun ɗa a na u shunwai. A̱sulazuva o shiton ta̱ adanshi yi a na u yuwain diga o una̱ wa aagbashi yi Iliya za naa u dammai ne ɗa wa fara.>> 11 Adama o ndolo a̱vu Yehu una suru akapi a ama o u'wa wa Ahabu a̱tsuma̱ Yezireyel, oɓolo na̱ azagbain a̱ yi, na̱ n utsa̱n n zuzu ma̱ yi, oɓolo na̱ nan ganu a̱ yi, a lyawa yi ko aaci a̱ ta̱ wuma shi.*

12 A̱vu Yehu reme ure a̱ tyo Samariya. A̱tsuma̱ Bet Eke va a aza a aguɓa, 13 a̱vu u ga'an na̱ ozo o ro a̱tsuma̱ mmaci ma Ahaziya mogono ma Yahuda, a̱vu we ece le u damma, <<A̱ɗu nan za ne ɗa gba?>>

A̱vu usu yi, <<A̱tsu mmaci mu u'wa wa Ahaziya ɗa, tsu ta̱wa̱ ta̱ adama a na tsa yuwan ica̱su yu u'wa u mogono oɓolo no olobo e egbere.>>

14 A̱vu Yehu damma, <<E reme le na̱ wuma u le!>> A̱vu e reme le wuma reve a paɗa le zuzu na̱ a̱ka̱ri Bet Eke, ama amunga na̱ a̱za̱ na̱shi ɗa a̱ shi. Babu za a na a lyawai na̱ wuma wa̱ yi.

15 A mantsa ma na u yoyin diga lo, a̱vu u ga'an na̱ Yehonada ulobo wa Rekab, za na da̱na̱i a̱ ta̱wa̱ adama a na a ga'an. A̱vu Yehu ca̱sa̱ yi u damma, <<Ko vu tara mu ta̱ diga okolo a̱ wu na amayun ununa n tara nu wu a̱tsuma̱ okolo a̱ va̱ gba?>>

A̱vu Yehonada usu yi u damma yi, <<N usu wu ta̱!>>

A̱vu Yehu damma yi, <<N na̱ ne ɗa, vu ca mu ukere wa̱ wu.>> A̱vu u ca Yehu ukere wa̱ yi. A̱vu Yehu rono yi ukere u kumba to yi e ikeke yi ido ya̱ yi. 16 A̱vu Yehu damma yi, <<Ta̱wa̱ oɓolo na̱ a̱mu, adama a na ve ene ukadu u na n ri na̱ yi a̱ tyo wu uba̱ta̱ wa̱ A̱sulazuva.>> A̱vu Yehonada ka̱ra̱ oɓolo na̱ yi a̱tsuma̱ e ikeke vi ido ya̱ yi.

17 A mantsa ma na Yehu rawai Samariya, a̱vu wu una suru za na buwai diga a̱tsuma̱ o u'wa wa Ahabu, reve u kototo le, ununa adanshi A̱sulazuva a dammai a̱tsuma̱ o una̱ wa Iliya.

18 A̱vu Yehu ɓoloto ama a Samariya a̱vu u damma le, <<Ahabu yuwaan ta̱ Ba'al a̱ga̱nda̱ ke'en, amma Yehu ta yuwaan Ba'al a̱ga̱nda̱ kpara. 19 Ɗe nu mu ama̱sula̱ a̱ musula̱ ma Ba'al suru, na̱ suru aza a na a yuwusaan yi a̱ga̱nda̱ oɓolo na̱ nan ganu a̱ yi. Yi idana ulobonu babu za na a lamba, adama a na n ta̱ ta̱wa̱ a na ma ca kucci gbain a̱ tyo ya Ba'al. Suru za na 'yuwain a̱ ta̱wa̱ a̱ ta̱ o unai.>> Amma Yehu yuwan ta̱ ugbozu adama a na wo o kototo aza a na a yuwusan a̱ga̱nda̱ a̱ tyo ya Ba'al. 20 A̱vu Yehu ca u dammu u damma, <<Lyawa a na a tawa urana ko'o adama a na a yuwaan Ba'al a̱ga̱nda̱.>> A̱vu waru gba a tawa urana. 21 A̱vu Yehu lyungu na̱ mepepelime suru a̱tsuma̱ Isra'ila, oɓolo na̱ suru a za na a yuwusaan Ba'al a̱ga̱nda̱ a̱ ta̱wa̱, a̱vu suru n le a̱ ta̱wa̱, babu za na kuɗa̱i a na wa̱ ta̱wa̱, hali a shiwan a̱tsuma̱ o u'wa wa Ba'al tapu diga o ufaru a̱ tyo okosu. 22 A̱vu Yehu damma a aza a na tsu idanusan a̱tugu a na a tsu yuwusaan a̱ga̱nda̱ a na a̱ ta̱wa̱a̱ na̱ a̱tugu suru aza a na a yuwusaan Ba'al a̱ga̱nda̱. A̱vu u ca suru n le a̱tugu.

23 <<A̱vu Yehu na̱ Yehonada ulobo wa Rekab a̱ ka̱ra̱ a uwa pe a̱tsuma̱ masa'a ma Ba'al. A̱vu Yehu damma aza a na a yuwusaan Ba'al a̱ga̱nda̱, i ka̱lyuwa̱ uba̱ta̱ suru i reve babu lo agbashi A̱sulazuva oɓolo na̱ a̱ɗu, a̱ɗu ɗa goon aza a na yaa yuwusan Ba'al a̱ga̱nda̱.>> 24 A̱vu a uwa pe adama a na a ca kucci vu ukula̱tosu wu une'e u le. Yehu gba zuwaa le ta̱ lo ama kupa kunla̱ adama a na a̱ ka̱nda̱ruwa̱ uba̱ta̱'a̱, a̱vu u ca le u dammu, <<N na̱ za ta̱ ɗu lyawa suru nanza a̱tsuma̱ a za na n zuwai pa ekere a̱ɗu u suma, wuma wa̱ yi ɗa ne!>>

25 A mantsa ma na Yehu kotoi u ca su kucci vu ukula̱tosu, a̱vu u damma aza a na a yuwusan ipiri i nan yali ya̱ a̱soja, <<Uwa yi pe a̱tsuma̱ a̱vu yu una le kpa̱ra̱, She i lyawa nanza la'a wan.>> A̱vu o una le na̱ matsun me pe'eni, a̱vu aza a na a yuwusan ipiri i nan yali ya̱ a̱soja o uta̱a̱ lipu le alanga, a̱vu a uwa pe a̱tsuma̱ a masa'a ma Ba'al. 26 A̱vu o uta̱a̱ aatali a̱ga̱nda̱ a̱tsuma̱ a masa'a ma Ba'al alanga a̱vu a̱ kula̱to yi. 27 A̱vu o kototo aatsura a̱ga̱nda̱ a Ba'al, a̱vu oɓoso masa'a ma Ba'al, a̱vu a ama a̱ ka̱mbuwa̱ yi uba̱ta̱ u na a tsu yuwusan rulu hali acina na'an.

28 Na̱ ne ɗa Yehu kototo yi uba̱ta̱ u na a tsu yuwusan Ba'al a̱ga̱nda̱ a̱tsuma̱ a Isra'ila. 29 Amma Yehu vadala diga o unusu wa Yerobowam ulobo wa Neba shi, a na Yerobowam zuwai a aza a Isra'ila a yuwaan musula̱ n zinariya n na a̱ zuɗa̱i a̱ga̱nda̱, aza a na u zuwai a̱tsuma̱ Betel na̱ Dan.*

30 A̱vu A̱sulazuva a damma Yehu, <<Ko na wo o'woi vu yuwan ta̱ ili i na i ri mejege esu va̱ ni ili i na vu yuwain nu u'wa wa Ahabu suru, ili i na i da̱na̱i pe a̱tsuma̱ okolo a̱ va̱ a na ma yuwan, ugundo wa wu ta yuwaan tsugono tsa Isra'ila aa acina mantsa ma̱a̱ na̱shi.>> 31 Amma Yehu yuwan tsutoni ulobonu nu wila̱ wa̱ A̱sulazuva A̱sula̱ a Isra'ila shi, no okolo yi suru shi. U lyawa unusu u na Yerobowam zuwai aza a Isra'ila a yuwain shi.

32 A̱tsuma̱ a mantsa mo ndolo a̱vu A̱sulazuva e teme a jibusa upasu u ro wa aza a Isra'ila wa'a wa'a. A̱vu Hazayel usa upasu wa Isra'ila nu uvon. 33 Diga upasu wu Uɗolu wa̱ Urudu, na̱ a̱tsuma̱ e iɗa ya Giliyadu upasu wa Gadu suru, na̱ Roben na̱ Manase, za na ri ɗe asana hali a cina lyuci va Arowa, za na ri pe a̱tsuma̱ Uɗolu wa Anon acina Giliyadu na̱ Bashan.

34 Akapi o ulinga u na Yehu yuwain a̱ tsugono tsa̱ a̱ yi, na̱ suru ulyuwu we elime a̱ yi, a̱ da̱na̱ ta̱ tu pe uɗanu a̱tsuma̱ aatagada a labari o ngono ma aza a Isra'ila.

35 A̱vu Yehu kuwa̱ ucina nkaya ma̱ yi, a̱vu a̱ ciɗo yi a̱tsuma̱ a Samariya. A̱vu ulobo wa̱ yi Jehoha mo o mogono o una̱ wa̱ yi. 36 A mantsa ma na Yehu yuwain tsugono ekere a aza a Isra'ila a̱tsuma̱ a Samariya u da̱na̱ ta̱ na a'wan ushin na̱ kunla̱.