1 A̱tsuma̱ aa'wan kupa ne ejere o tsugono tsa mogono Ahaz va Yahuda, Hosheya ulobo wa Ela va Isra'ila me temei tsugono a̱tsuma̱ a Samariya, A̱vu u yuwan tsugono tsa aa'wan kucci. 2 Agba u yuwan ta̱ iwuya elime a̱ A̱sulazuva, agba u yuwan ununa ozo tsugono tsa Isra'ila aza a na a̱ da̱na̱i elime yi a yuwain shi.

3 A̱vu mogono Shalmanesa va Asuriya ma̱ 'ya̱wa̱a̱ mogono Hosheya nu uvon, za na da̱na̱i aagbashi aza a Shalmanesa a̱vu waru gba u tsupisa le utafa. 4 Amma mogono ma aza a Asuriya me e reve ta̱ a na Hosheya za va aciyogbamu u ɗa, adama a na u lyungu yi na̱ nlingata a̱ tyo uba̱ta̱ mogono So va Masar adama a na wa a kamba yi, agba u tsupisa utafa a̱ tyo ya Shalmanesa mogono ma Asuriya shi, ununa u tsu yuwusan a'wan a'wan. Adama o ndolo reve Shalmanesa me remei a̱vu zuwai a̱tsuma̱ o u'wa wa ali. 5 A̱vu mogono ma aza a Asuriya ma̱ ta̱wa̱ nu uvon suru uba̱ta̱'a̱ a̱tsuma̱ e iɗa'a, hali u rawa a̱tsuma̱ aza a Samariya a lyuwusa yi nu uvon hali acina aa'wan a ta'atsu. 6 A̱tsuma̱ aa'wan a̱ kuci tsa tsugono tsa Hosheya mogono ma Asuriya, ma lyuwa ta̱ Samariya nu uvon, a̱vu u tara ama a Isra'ila a̱ tyo a̱tsuma̱ e iɗa ya Asuriya. A̱vu u zuwa le a na a̱ da̱nu pe a̱tsuma̱ Hala, na̱ a̱tsuma̱ Goza vu Uɗolu wa̱ Habo na̱ a̱tsuma̱ e i lyuci ya Midiya.

7 Suru ili ya nda i fara ta̱ adama a na aza a Isra'ila a yuwain unusu u ɗa a̱ tyo ekere A̱sulazuva A̱sula̱ ele, za na uta̱ nle diga a̱tsuma̱ a Masar ekere mogono Firi'awuna mogono ma Masar. A̱vu waru aa yuwusaan musula̱ n ro a̱ga̱nda̱. 8 A̱vu a yuwusan mmalu a̱tsuma̱ o ure we iɗa i na A̱sulazuva a̱ gba̱ra̱i yi pe a̱tsuma̱ e iɗa'a, adama a na ama a Isra'ila a̱ da̱nu pe uba̱ta̱'a̱, a̱vu a̱ da̱na̱ a yuwusan mmalu a̱tsuma̱ e ili i na ngono ma Isra'ila n rito su yi*. 9 A̱vu ama a Isra'ila a yuwusan ili i ro yu usokowu i na i da̱na̱i babu ulobonu a̱ tyo uba̱ta̱ wa̱ A̱sulazuva A̱sula̱ ele. Reve a suwusaa aciya ele uba̱ta̱ wa̱ a̱ga̱nda̱ a̱tsuma̱ e lyuci i le, na̱ a̱tsuma̱ mulyuci hali a̱ tyo e ilyuci i gbain yu ukari vu ucira. 10 A̱vu a̱ a̱shiwa̱ atali a̱ a̱ga̱nda̱ na̱ a̱shuwutsu a Ashera zuva va aagaɗi suru, na̱ za̱la̱ vu uɗanga u kpa̱la̱m suru.* 11 A̱vu a casu ukula̱tosu wi ili i ma̱guru uba̱ta̱ wa̱ a̱ga̱nda̱ suru, ununa n nɗa n na A̱sulazuva a̱ gba̱ra̱i diga elime le a yuwusain. A yuwan ta̱ ili i iwuya za na a zuwai A̱sulazuva a yuwain upan. 12 A̱vu a yuwusan musula̱ n ro a̱ga̱nda̱, agba waru A̱sulazuva a damma ta̱, <<She i yuwan ne wan.>> 13 Mantsa suru A̱sulazuva a tsuɓarasa ta̱ Isra'ila na̱ Yahuda o una̱ wa a ama̱sula̱, na̱ o una̱ wa̱ a̱za̱ a̱ yindi suru u damma, <<I vadala a̱tsuma̱ o ure wi iwuya i ɗu! A̱vu i yuwan tsutoni na̱ wila̱ u va̱, nu uritosu u va̱, aza na n cayi nkaya nɗu, na aza a na n lyunguwa̱a̱ nɗu a̱tsuma̱ o una̱ wa agbashi a̱ va̱ ama̱sula̱.>> 14 A̱vu ama a Isra'ila a̱ kuɗa̱ a na uwwa, a̱vu a yuwan aciyogbamu, ununa nkaya nle n yuwain, aza a na a̱ kuɗa̱i na a ca okolo ele uba̱ta̱ wa̱ A̱sulazuva A̱sula̱ e le. 15 A̱vu a 'yuwan wila̱ wa̱ yi, oɓolo na̱ nzuwulai n na u yuwain na̱ nkaya nle, na̱ tsuɓari tsa yi a na u yuwaan le. A̱vu a yuwan tsutoni na̱ musula̱ me pere, reve le fo wo o ama e pere, a̱vu o uritosu i ili i na nɗa n ro n tsu yuwusan, aza a na a̱ ri uka̱nda̱ruwu na̱ le agba A̱sulazuva a damma le ta̱, <<She i yuwan ununa e le a tsu yuwusan wan,>> reve a yuwusan ili i na A̱sulazuva a damma n le a yuwan wan.

16 Ama Isra'ila a 'yuwan ta̱ a na a yuwan tsutoni na̱ A̱sulazuva A̱sula̱ e le. A̱vu a̱ zuɗa̱ aciya le iroci mudindim n re oɓolo na̱ musula̱ ma Ashera. A̱vu ama a yuwusan a̱ga̱nda̱ a̱ tyo wu uba̱ta̱ wu urana na̱ woto na̱ italyo'o, a̱vu waru a yuwusan Ba'al a̱ga̱nda̱.* 17 A̱vu a ca kucci vu ukula̱tosu muwun mo olobo n le na̱ esheli. A̱vu a yuwusan yindi, a̱vu a yuwusan nkunu a̱vu a ca aciya̱le ekere e ili i na i ri iwuya uba̱ta̱ wa̱ A̱sulazuva, za na a zuwa ni yi u yuwain upa'an.*

18 Adama o ndolo A̱sulazuva a̱ da̱na̱ ta̱ a yuwusan upan na̱ aza a Isra'ila, hali u tawa le a̱tsuma̱ o urewesu wa̱ yi. Ugundo wa Yahuda ɗa goon a lyawai.

19 Yahuda fo a yuwan tsutoni na̱ wila̱ wa̱ A̱sulazuva A̱sula̱ e le shi. A̱vu a yuwan tsutoni a̱tsuma̱ o ure u na aza a Isra'ila a̱ ta̱wa̱ yi. 20 Adama o ndolo ɗa A̱sulazuva a 'yuwain suru a ama a Isra'ila, a̱vu u zuwa le a̱tsuma̱lima̱, hali acina mantsa ma na u ca le e ekere a n'yuwatan nle, acina mantsa ma na a tawa nle elime yi.

21 A mantsa ma na wu kasai Isra'ila diga o u'wa wa Da̱wuda, reve a katala Yerobowam ulobo wa Neba mogono me le. Amma a̱vu Yerobowam putsa aza a Isra'ila adama a na a yuwan tsutoni na̱ A̱sulazuva, a̱vu u zuwa le a na a yuwan ulinga wu unusu gbain. 22 Ama Isra'ila a lyuwa ta̱ elime a yuwusan ulinga wu unusu u na Yerobowam yuwain agba a vadala diga uba̱ta̱ u le shi. 23 Acina mantsa ma na A̱sulazuva u tawa nle diga elime yi, ununa u yuwain adanshi diga a̱tsuma̱ o una̱ wa ama̱sula̱. Adama o ndolo a̱vu a tara a aza a Isra'ila diga o uba̱ta̱ wu nden n le a̱ tyo Asuriya, agba a buwa ta̱ ɗe hali acina a na'an.

24 A̱vu mogono ma Asuriya ma̱ ta̱wa̱ na a ama diga a Babila, na̱ aza a Kuta na̱ Awwa na̱ Hamat na̱ Sefarwayim a̱vu a̱ da̱nu lo a̱tsuma̱ lyuci va Samariya o una̱ wa aza a Isra'ila. A̱vu a usa Samariya a̱vu a̱ da̱nu pe a̱tsuma̱ e ilyuci ya̱ yi. 25 A̱tsuma̱ a̱ nden mu ufaru nle uba̱ta̱'a̱, agba a awwa wovon wa̱ A̱sulazuva shi, adama o ndolo ɗa u lyungu yi ni ikamu a̱tsuma̱ le, reve o una ozo o ro le. 26 A̱vu a̱ ta̱wa̱a̱ mogono ma Asuriya nu u dammu, <<Ama a na vu zuwai a̱tsuma̱ e ilyuci ya Samariya e reve na̱ wila̱ u musula̱ mi iɗa'a shi. Adama o ndolo musula̱ mi iɗa'a ma̱ lyunguwa̱ le ta̱ ni ikamu a aza a na a̱ ri mo una ma̱ le.>>

27 Reve Mogono ma Asuriya ma ca le u dammu u damma, <<Lyungu yi ganu ta̱ uba̱ta̱'a̱ diga a̱tsuma̱ a ama a Isra'ila, a̱tsuma̱ aza a na a̱ pura̱i diga Samariya u ka̱mba̱ ɗe, adama a na wo rito ama'a ili i na musula̱ mi iɗa'a n cigai.>> 28 Adama o ndolo a̱vu za ta̱ a̱tsuma̱ nan ganu aza a na a tarai diga Samariya, a̱vu u ka̱mba̱ u da̱nu a̱tsuma̱ Betel. A̱vu u rito le ununa a uwwa wovon wa̱ A̱sulazuva.

29 Amma iɗa suru a yuwan ta̱ musula̱ ma aciya̱ le a̱vu a zuwa le a̱tsuma̱ a̱ a̱'isa̱ ba̱ta̱ va̱ a̱ga̱nda̱, a aza a na aza a Samariya a̱ zuɗa̱i, iɗa suru u yuwan ta̱ ne a̱tsuma̱ e ilyuci na u ri na̱ nden. 30 A̱vu a ama diga Babila a yuwan Suko Beno, a̱vu a ama a Kuta a yuwan Nerga, a̱vu a ama diga Hamat waru a yuwan Ashima, 31 reve ama a Awwa a yuwan Nibha na̱ Tarta na a ama Sefarwayim a ca muwun nle adama a kucci vu ukula̱tosu a̱ tyo ya Adramele na̱ Anamale musula̱ ma Sefarwayim.

32 A̱vu a uwwa wovon wa̱ A̱sulazuva, reve a ɗangula a̱tsuma̱ ama ele e iwau aza a na a̱ da̱na̱ e idanasa le, nan ganu adama a na a ca ukula̱tosu u le ba̱ta̱ va̱ a̱ga̱nda̱'a̱.* 33 A̱vu a uwwa wovon wa̱ A̱sulazuva, suru na̱ ne a yuwusaan ta̱ musula̱ nle a̱ga̱nda̱, ununa nɗa n na n tara nle a̱ tyo tsugbashi a tsu yuwusan.

34 Sapu acina ana'an a nda a uwwa wovon wa̱ A̱sulazuva shi, agba a yuwusan tsutoni na̱ nzuwulai ma̱ yi shi, ko wila̱ wa̱ yi, ko uritosu wa̱ yi shi, ko wila̱ u na A̱sulazuva a ca yi ugundo wa Yakubu, za na u vadalai aala yi a̱ tyo Isra'ila.* 35 A mantsa ma na A̱sulazuva a yuwain nzuwulai na aza a Isra'ila, a̱vu u damma le, <<She yu uwwa wovon u musula̱ n ro wan, ko na ya̱ kingyowa̱ le, ko na ya yuwan le tsugbashi, ko waru a na ya ca le kucci.* 36 Amma A̱sulazuva za na uta̱a̱ n ɗu a̱tsuma̱ e iɗa ya Masar nu ukere wu ukadu wa̱ yi nu ulinga wa asalama, a̱yi ɗa goon yaa awwa wovon. A̱yi ɗa goon ya̱a̱ kingyowa̱a̱, a̱yi ɗa goon ya ca kucci ɗu.* 37 A̱vu i reve na a amayun i ta yuwusan tsutoni na̱ nzuwulai na̱ wila̱ na̱ uritosu wa̱ yi, nu uritosu u na u ɗanaa nɗu. Waru she yu uwwa wovon u musula̱ n ro wan. 38 She yi icina na̱ nzuwulai n na n yuwain na̱ a̱ɗu wan. A na she yu uwwa wovon u musula̱ n ro wan. 39 Amma, yu uwwa wovon wa̱ A̱sulazuva A̱sula̱ a̱ ɗu, a̱yi ɗa za na a̱ ta̱wa̱ u wawa a̱ ɗu ekere a n'yuwatan nɗu suru.>>

40 Amma suru na̱ ne, a̱vu a̱ kuɗa̱ adama a na uwwa, a̱vu a lyuwa elime na̱ tsutoni tsu ure u na u ri babu mejege.

41 Amma a̱vu nɗa nda a awwa wovon wa̱ A̱sulazuva, waru a̱vu a yuwusaan musula̱ n na a̱ zuɗa̱i a̱ga̱nda̱ fo. Sapu acina a ana'an muwun nle na̱ muwun n tsukaya nle a lyuwa ta̱ elime a yuwusan ununa nkaya nle n yuwusain.