1 A̱tsuma̱ a aa'wan a̱ kucci o tsugono tso o mogono Zedekiya, o urana wa kupa o woto wa kupa, a̱vu Nebukanaza mogono ma Babila u ta̱wa̱ na̱ a̱soja a̱ yi suru adama a na a yuwan uvon a̱tsuma̱ a̱ Urishelima. A̱vu u uka̱nda̱ruwa̱ lyuci'i nu uvon, a̱vu a suwa ukari a̱ ka̱nda̱ruwa̱ adama o uvon.* 2 A̱vu u kandara i lyuci'i nu uvon hali acina a aa'wan kupa na̱ za ta̱ o tsugono tsa mogono Zedekiya. 3 A̱tsuma̱ o urana wa̱ kucci o woto wa̱ na̱shi, a mantsa ma na ambulu a yuwain lon a̱tsuma̱ e ilyuci'i, agba babu ilyalya i na ama a lyuwa, 4 a̱vu o ɓoso upasu u ro wu ukari u lyuci'i, a̱vu suru a̱soja'a a suma naa ayin nu una̱ntsu u na u ri e memere ma ɓaɓu na ri ejere, za na ri zuzu na̱ a̱a̱rumbu o mogono. A mantsa ma na a̱soja a Babila* a̱ da̱na̱i uka̱nda̱ruwu na̱ lyuci'i, a̱vu a suma a̱ tyo wu upasu wa a Araba. 5 A̱vu a̱soja a Babila a saɓa mogono Zedekiya a̱vu e reme yi agalaci a Jeriko. A̱vu a̱soja a̱ yi suru e bete'we a lyawai. 6 A̱vu a̱soja a Babila e remei a̱ ta̱wa̱ na̱ yi uba̱ta̱ u mogono ma Babila za na ri na̱ nden Ribla, ɗe ɗa mogono ma Babila ma paɗa ni yi ili na a yuwan na̱ yi. 7 A̱vu a paɗa o olobo a Zedekiya esu a̱ yi. Reve a foɗo esu a̱ yi a̱vu a̱ nla̱yi na akani a̱ rumushili a tara yi a̱ tyo Babila.*

8 O urana wa cindere o woto wa tawun, za na da̱na̱i a aa'wan kupa na̱ kucci o tsugono tsa Nebukanaza mogono ma Babila, Nebuzarada, yali ya aza a na a yuwusan ipiri zagbain mogono ma Babila, ma̱ ta̱wa̱ ta̱ Urishelima. 9 A̱vu u kuloto A̱a̱'isa̱mapaɗa a̱ A̱sulazuva nu u'wa u mogono, na̱ suru 'wa va Urishelima. Reve fo u kuloto u'wa u sa'ani suru.

10 A̱vu suru a̱soja a Babila aza a na a̱ da̱na̱i za̱la̱ vu zagbain va̱ a̱za̱ e ipiri ya Nebuzarada, o ɓoso kari n na a̱ da̱na̱i uka̱nda̱ruwu na̱ Urishelima. 11 A̱vu Nebuzarada tara akapi a ama a na a buwai a̱tsuma̱ a̱ lyuci a̱ ka̱ra̱ a̱ tyo Babila, na aza a na a gurai ulinga wu ukere, oɓolo na aza a na a ca yi aciya̱ le e ekere o mogono ma aza a Babila. 12 Reve u lyawa pe aza a na a̱ ri nu ulambu a̱tsuma̱ e iɗa'a adama a na a cimba a̱vu waru e idana uɗuma̱ u inabi.

13 A̱vu a̱ a̱soja a Babila o ɓuɓoso atsura e irumushili na ri pe a̱tsuma̱ o u'wa wa̱ A̱sulazuva, oɓolo na̱ wisawatan na ri pe a̱tsuma̱ o u'wa'a, na̱ a̱a̱ba̱jini o ura'atsu wu rumushili a na a̱ tsu ɗe Mala. Reve a̱ a̱soja'a a̱ pura̱ le a̱ tyo Babila.* 14 A̱vu a̱ pura̱ mpondo na̱ isheburu, na̱ ili i na a̱ tsu zuwusa ifitila, na̱ ntaɗa na̱ suru ili i na a yuwain na̱ rumushili na yuwusan ulinga na̱ le pe a̱tsuma̱ A̱a̱'isa̱mapaɗa a̱ A̱sulazuva.* 15 A̱vu waru a̱ pura̱ mpara aza a na a̱ tsu purusa̱ akinkina na̱ ntaɗa, na̱ suru ili i na a yuwain za zinariya na̱ suru ili i na i ri za azurufa, Yali ya soja i pura̱ le ta̱ a̱vu u ka̱ra̱ na̱ le. 16 Rumushili na a yuwayin atsura e re, na aakwanu a gbain na̱ a̱shuwutsu a̱ mishin, aza a na Sulemanu yuwain adama A̱a̱'isa̱mapaɗa a̱ A̱sulazuva, a la'a ta̱ ucira u na a̱ kunzu le. 17 Suru atsura u da̱na̱ ta̱ udasuwu mishin ushin na̱ aza cindere. Rumushili na ri zuva va atsura'a suru u da̱na̱ ta̱ udasuwu una̱shi naa akapi, waru u da̱na̱ ta̱ wupalu na̱ yironishi u muwun mu uɗanga m peme suru va̱ yi. Akapi atsura, a̱ da̱na̱ ta̱ fo u na̱ uta̱.

18 Yali ya̱ a̱za̱ e ipiri yu u'wa u mogono ma Babila u tara ta̱ Seraya zagbain nan ganu na̱ Zafaniya za na o to yi, oɓolo na̱ ama a ta'atsu a aza a na a yuwusan ipiri yu una̱ntsutsu wa̱ A̱a̱'isamapaɗa a̱ A̱sulazuva. 19 Diga a̱tsuma̱ ama a na a buwai a̱tsuma̱ a̱ lyuci'i, a̱vu u tara yali ya̱ a̱soja, na̱ azagbain o ton o mogono, a̱vu waru u tara za vi iɗana i na nan yali ya̱ a̱soja za na ɓoloto yi ama a̱ lyuci'i, oɓolo na ama o ro kupota̱li aza a na a cina yi pe a̱tsuma̱ lyuci'i. 20 Nebuzarada pura̱ ta̱ a ama a nda suru u ta̱wa̱ na̱ le uba̱ta̱ u mogono ma Babila a Ribla. 21 A̱vu mogono ma Babila mo una le a̱tsuma̱ o upasu wa̱ Ribla wi iɗa ya Hamat. Ne ɗa o uta̱yi a ama a Yahuda diga e iɗa i le.

22 A̱vu Nebukanaza mogono ma Babila u zuwa Gedaliya ulobo wa Ahikam, ulobo wa Shafa, wo o'wo zagbain va aza a na a buwai a Yahuda. 23 Ana suru nan yali ya̱ a̱soja a uwwai a na mogono ma Babila u ɗangula ta̱ Gedaliya gwamna, a̱vu a̱ ta̱wa̱ uba̱ta̱ wa̱ yi a Mizfa. Ele ɗa Ishma'ila ulobo wa Netaniya na̱ Yohanan ulobo wa Kareya na̱ Seraya ulobo wa Tahume vuma va Netofa na̱ Yazaniya ulobo u vuma va Ma'aka, na̱ ama a̱ le. 24 A̱vu Gedaliya kucinaa le na akapi a̱soja'a u damma, <<Shi uwwa wovon wa azagbain a Babila wan. I da̱nu pe a̱tsuma̱ e iɗa'a, a̱vu i yuwaan mogono ma Babila a̱ga̱nda̱, i ta̱ a̱ da̱na̱ na̱ asuvu nden. >>

25 A̱tsuma̱ woto wa̱ cindere, ɗaɗa Ishma'ila ulobo wa Netaniya, ulobo wa Elishama, za na da̱na̱i diga o u'wa u mogono, ta̱wa̱i na ama kupa a̱vu wu una Gedaliya a̱vu waru wu una ama a Yahuda na aza a Babila a aza a na a̱ da̱na̱i oɓolo na̱ Gedaliya a̱tsuma̱ a Mizfa. 26 A̱vu suru ama'a, za ke'en na̱ zagbain, oɓolo na̱ nan yali ya̱ a̱soja a suma a̱ tyo e iɗa ya Masar, adama o wovon wa̱ a̱soja a Babila.

27 Mogono Yehoyakin va Yahuda yuwan ta̱ a'wan mata'atsu na̱ a̱za̱ e cindere o u'wa wa ali a Babila. A̱tsuma̱ o urana wu ushin no ozo o ton o woto wa kupa ne ejere aa'wan a na Ebilmeroda wo o'woi mogono ma Babila, reve u roco mogono Yehoyakin va Yahuda isa'ani wu uta̱ yi diga a̱tsuma̱ o u'wa wa ali.* 28 Mogono Ebilmeroda maa yuwaan yi ta̱ adanshi a sa'ani, reve u ca yi tsugono ula'awu na̱ ngono n na n da̱na̱i e ekere a̱ yi a̱tsuma̱ a Babila. 29 Reve a̱ usu wa̱ mogono Yehoyakin foɗo itana ya̱ yi yu u'wa wa ali. Diga a mantsa mo ndolo ɗa u temei a lyuwusa ilyalya apada oɓolo na̱ Mogono Ebilmeroda hali acina ukosu wu rana wuma va̱ yi suru. 30 Reve mogono Ebilmeroda va Babila ma zuwa a casu Yehoyakin mu kebe wa'a wa'a wa ana'an na̱ nfa'an, acina ukosu wu rana wuma va̱ yi suru.