1 Na'ama yali ya̱ a̱soja o mogono ma Suriya ma ɗa shi. Vuma gbain ɗa u shi e ekere a zagbain va̱ yi waru u shi ta̱ u tara yi na̱ tsugbain lon, adama a na e ekere a̱ yi a ɗa A̱sulazuva a cayi aza a Suriya ulyuwu wa aci. A̱yi soja vu ucira ɗa, amma u ta̱ na̱ mɓa̱la̱ mu ukutu.* 2 Aza a Suriya a̱tsuma̱ a agara o uvon u le a̱ shi ta̱ e reme mesheli diga Isra'ila, reve u yuwusaan ka va Na'ama a̱ga̱nda̱. 3 Uranu u ro a̱vu mesheli'i u damma ka va Na'ama, <<Na a damma zagbain va̱ shi te ene vumava̱sula̱ na ri Samariya! U shi ta̱ a̱ ka̱mba̱to yi gbaga diga mɓa̱la̱ mu ukutu wa̱ yi.>>

4 A̱vu gba Na'ama 'ya̱wa̱ uba̱ta̱ wu zagbain va̱ yi, a̱vu u damma yi ili i na mesheli'i ma Isra'ila'a u dammai. 5 A̱vu mogono ma Suriya ma̱ usu, <<Ko cine aa yuwan suru, vu 'ya̱wa̱, n ta̱ lyunguwa̱a̱ mogono ma Isra'ila na̱ mepepelime.>>

Ɗaɗa Na'ama ka̱ra̱i a̱ 'ya̱wa̱ a̱vu u tara ukunzuwu u azurufa kupa na̱ ukunzuwu ukpakukupa uta̱li (6,000) u zinariya na̱ a̱tugu koko'o a zinariya kupa. 6 Mepepelime ma na u 'ya̱wa̱yi'i u shi ta̱ adansa, <<Na̱ mepepelime ma nda ma ɗa ma̱a̱ lyungusu aagbashi a̱ va̱ Na'ama ya̱'a̱ wu, adama vu ka̱mba̱to yi gbaga diga mɓa̱la̱ mu ukutu wa̱ yi.>>

7 Ana mogono ma Isra'ila me ɗeyi mepepelime'e nu una̱, a̱vu wu kara a̱tugu a̱ yi a̱vu u damma, <<A̱mu A̱sula̱ a ɗa, a na maa gura una reve waru n ka̱mba̱to wuma? Adama a̱ nye vuma nda lyunguyi vuma ro ya̱'a̱ va̱, adama a̱ ka̱mba̱to yi gbaga diga mɓa̱la̱ mu ukutu wa̱ yi? Ka̱lyuwa̱i cine u cigai u zami mu nla̱ngi!>>

8 Ana Elisha vuma va̱ A̱sula̱ uwwai a na mogono ma Isra'ila ma kakara ta̱ a̱tugu a̱ yi, a̱vu u lyunguwa̱ yi ni ikaka i nda, <<Adama nye vu kakarai a̱tugu a̱ wu? Zuwa a̱ ta̱wa̱ mu na̱ vuma'a agba u ta̱ reve a na vumava̱sula̱ a̱ tu pa a̱tsuma̱ a Isra'ila.>>

9 Ɗaɗa Na'ama ka̱ra̱i a̱ 'ya̱wa̱ oɓolo ni ido ya̱ yi ni ikeke yi ido, a̱vu wi isawan o una̱ntsu wu u'wa wa Elisha. 10 A̱vu Elisha lyungu malingata ma̱ 'ya̱wa̱ ma damma yi, <<Wala a̱ 'ya̱wa̱ vu sumba̱ toto ucindere o Uɗolu wa̱ Urudu, lipu va̱ wu gba ta̱ ka̱mba̱ gbaga, reve waru vo o'wo cece.>>

11 Amma a̱vu Na'ama ka̱ra̱ nu upan a̱vu u damma, <<N tara ta̱ a na u to uta̱ u ta̱wa̱ ya̱'a̱ va̱ wi isawan a̱vu u ɗe a ala a̱ A̱sulazuva A̱sula̱ a̱ yi, u ya̱sa̱n ukere wa̱ yi uba̱ta̱ wa abasa'a reve u ka̱mba̱to mu gbaga o ukutu u va̱. 12 Ashe Abana na̱ Farfa ɗolu va Dimaska a la'a mini ma Isra'ila suru shi? Ma gura sumba̱ a̱tsuma̱ e le a̱vu n ka̱mba̱ cece shi?>> Ɗaɗa u vadalai u ka̱ra̱i nu upan.

13 Amma a̱vu agbashi a̱ yi a̱ 'ya̱wa̱ ya̱'a̱ yi a̱vu a damma, <<Dada tsu, n na̱ vumava̱sula̱'a̱ gba u shi u damma wu vu yuwan ili i gbain, vu shi a yuwan yi shi? Bele ma a na u dammai, <Vu 'ya̱wa̱ vu sumba̱ vu to o'wo cece?> >> 14 Ɗaɗa u 'ya̱wa̱ u sumba̱i o Uɗolu wa̱ Urudu toto ucindere cine vuma va̱ A̱sula̱ damma niyi, reve gba lipu va̱ yi ka̱mba̱ gbaga wo o'wo cece cine vu revei za molobo.

15 A̱vu Na'ama oɓolo na ama a̱ yi a̱ ka̱mba̱ uba̱ta̱ vuma va̱ A̱sula̱'a̱. A̱vu wi isawan a̱ ma̱ka̱ka̱n ma vuma va̱ A̱sula̱'a̱ u damma, <<Gogo n reve ta̱ a na A̱sula̱ o ro o lo a̱tsuma̱ o uvaɗi suru shi she a̱tsuma̱ a Isra'ila. Yuwan ankuri ushi une'e diga e ekere a aagbashi a̱ wu.>>

16 A̱vu Elisha usu yi, <<N kucina ta̱ na̱ A̱sulazuva a na a̱ ri wuma za na maa yuwusaan a̱ga̱nda̱, ma̱a̱ ushi ko ili shi.>> Agba ko na Na'ama gbagbaa niyi, u 'yuwan ta̱.

17 A̱vu Na'ama damma, <<Na̱ va̱a̱ ushi shi, yuwan ankuri vu lyawa a̱mu a na me kene ma̱bula̱ me e iɗa i ɗu, aza a na nloli mi ido n re n va̱ a gura tanu wa mu a̱ 'ya̱wa̱ mu o u'wa. Adama a na diga gogo m buwa a ca kucci ko kucci vu ukula̱tosu uba̱ta̱ ma̱sula̱ mo ro shi she A̱sulazuva goon.* 18 Amma lyawa A̱sulazuva a yuwaan aagbashi a̱ wu gafura adama e ili i ta̱ i nda. A mantsa ma na zagbain va̱ uwai a̱ a̱a̱'isa̱ a Rimon adama u ka̱ɗa̱to u yuwan a̱ga̱nda̱ a̱yi, uraɓatowu ne ekere a̱ va̱ reve a̱mu fo n ka̱ɗa̱to pe, a mantsa ma na n ka̱ɗa̱toi a̱tsuma̱ a̱ a̱a̱'isa̱ a Rimon, lyawa A̱sulazuva a yuwaan aagbashi a̱ wu gafura adama e ili i nda.>>

19 A̱vu Elisha damma yi, <<Vu rawa lafiya.>> A̱vu Na'ama ka̱ra̱. Amma babu Na'ama yuwan alanga lon, 20 a̱vu Gehazi aagbashi a Elisha a damma aciya̱yi, <<Zagbain va̱ lyawa ta̱ Na'ama va Suriya nda ka̱ra̱ fa̱a̱n, agba u ushiyi ko ili i ta̱ diga a̱tsuma̱ e ili i na u ta̱wa̱yi shi. N kucina ta̱ na̱ A̱sulazuva a na a̱ ri wuma, n ta̱ kuru yi n tsura̱ ili i ro e ekere a̱ yi.>>

21 A̱vu Gehazi toni Na'ama ni ilaɗi. Ana Na'ama ene niyi a̱ ta̱wa̱ ya̱'a̱ yi ni ilaɗi, u cipa̱ ta̱ e keke vi ido adama u ga'aton yi. A̱vu we ece yi, <<N damma de lafiya ɗa?>>

22 A̱vu Gehazi usu, <<Lafiya ɗa. Zagbain va̱ ɗa lyungu numu n damma wu, <Olobo e re diga o oɓolo a ama̱sula̱ a̱ ta̱wa̱ ta̱ ya̱'a̱ va̱ gogo diga e iɗa ya agaɗi ya Ifiramu. Yuwan ankuri vu ca le ukunzuwu uta̱ u azurufa na̱ a̱tugu e re.> >>

23 A̱vu Na'ama damma, << Ko cine aa yuwan de, ushi ukunzuwu u azurufa u re.>> A̱vu gba Gehazi ushi le, a̱vu wu nla̱ ukunzuwu u azurufa'a e itsa̱n i re, na̱ wotowu wa̱ a̱tugu e re. A̱vu u ca agbashi e re a̱ yi ele, a̱vu a tanu a uwa elime a Gehazi. 24 Ana Gehazi rawai a aagaɗi a̱vu u ushi itana'a e ekere a agbashi'i a̱vu u zuwa le o u'wa. Reve u lyawa ama'a a̱ ka̱ra̱. 25 A̱vu u wi isawan a̱ ma̱ka̱ka̱n ma zagbain va̱ yi Elisha, A̱vu Elisha ece yi, <<Te shi vu 'ya̱wa̱i gba Gehazi?>>

A̱vu u usu, <<Aagbashi a̱ wu a̱ 'ya̱wa̱ ko uba̱ta̱ shi.>>

26 Amma a̱vu Elisha damma yi, <<Ruhu va̱ shi oɓolo na̱ a̱vu a na vuma'a u cipa̱i e keke vi ido va̱ yi tsa̱ra̱ u ga'an na̱ a̱vu shi? Gogo mantsa ma ɗa a na a̱a̱ ushi ikebe, ko a̱tugu ko a̱ɗuma̱ a zetun na̱ ina̱bi ko ikyon na̱ mgbele ko inan na agbashi ali na̱ a̱ma̱ci? 27 Adama o ndolo mɓa̱la̱ mu ukutu ma Na'ama n ta̱ suraa wu a̱vu nu ugundo wa̱ wu babu ukotu.>>

A̱vu Gehazi uta̱ u lyawa Elisha na̱ mɓa̱la̱ mu ukutu u'uri puwu.