1 A̱tsuma̱ a aa'wan a̱ i re o tsugono tsa Yehowaha ulobo wa Jehoha mogono ma Isra'ila, Amaziya ulobo wa Yowash mogono ma a Yahuda me temei tsugono. 2 U da̱na̱ ta̱ na a'wan ushin no ozo o ton a na wo woi mogono, a̱vu u yuwan a'wan ushin na̱ kuci a yuwusan tsugono tsa Urishelima. Aala mma va yi ɗa Yehowadi, diga Urishelima. 3 U yuwan ta̱ ili i na i ri mejege elime A̱sulazuva, amma suru na̱ tsu ndolo u rawa ununa dada va̱ yi Da̱wuda yuwain shi. A̱vu u toni suru i ili i na dada va̱ yi Yowash yuwain. 4 Agba suru na̱ ne a tawa uba̱ta̱ u na u ri idaba shi, ama a lyuwa ta̱ elime a ca su kucci le nu u kula̱tosu ni itana i ma̱guru ɗe.

5 A mantsa ma na tsugono'o tsa shuwa̱i, a̱vu wu una a azagbain a na o unai dada va̱ yi mogono. 6 Amma wu una muwun ma aza a na o una ni shi, ununa u ri yu uɗanu a̱tsuma̱ a aatagada a̱ wila̱ wa Musa uba̱ta̱ u na A̱sulazuva a dammai, <<Aa una Dada adama o unusu mawun ma̱ yi shi, ko waru a na o una muwun adama o unusu wa Dada le shi. Suru vuma na yuwain unusu a̱ yi ɗa wa̱ kuwa̱.>>*

7 A̱yi ɗa vuma na kototo yi a aza a Edom ukpaku kupa (10,000), o uka̱ri wa akpaɗi, a̱vu u reme Sela uba̱ta̱ wu uvon, a̱vu ɗe yi Yokteye, naa ala o ndolo ɗa e tsu ɗe yi hali na na'an.

8 A̱vu Amaziya lyungu nlingata a̱ tyo ya Jehoha ulobo wa Yowash, ulobo wa Yehu, mogono ma Isra'ila, ni izami yi nla̱ngi, u damma, <<Vu uta̱ adama a na tsa ga'an esu na̱ esu.>>

9 Amma a̱vu mogono Yowash va Isra'ila lyunguwa̱ Amaziya mogono ma Yahuda, u damma <<Ɗanga va awanda ro va Lebanon lyunguwa̱ ta̱ ɗanga gbain va Sida a̱tsuma̱ a Lebanon, nu udammu u damma, <Vu ca mawun ma wu mo usheli adama a na ulobo u va̱ wa zuwa yi.> Amma a̱vu nama vu una u ro u ta̱wa̱ adama a na wa̱ ka̱ra̱ a̱vu wu dadasa awanda'a. 10 Amayun ɗa a na vu kototo yi a aza a Edom, ɗaɗa vu temei uvaɗu. Gogo a̱vu vu yuwan ma̱za̱nga̱ a na vu tsura̱i u lyuwu we elime, vu da̱nu a̱tsuma̱ o u'wa! Adama nye ɗa vu cigai a na va̱ ta̱wa̱ nu ulambu wu nden n lafiya za na a̱ ta̱wa̱ wu na̱ a̱risa̱, a̱vu ni i iɗa ya Yahuda fo?>>

11 Amaziya 'yuwan ta̱ a na wa uwwa adanshi, a̱vu mogono Yowash va Isra'ila ma̱ ka̱ra̱ adama a na a wa yuwan uvon na̱ Amaziya mogono ma Yahuda a̱tsuma̱ a Bet Shemesh va Yahuda. 12 A̱vu a aza a Isra'ila lyuwa a aza a Yahuda nu uvon, a̱vu suru ama a̱ ka̱ra̱ a̱ tyo a 'wa le. 13 A̱vu mogono Yehowash va Isra'ila reme mogono Amaziya va Yahuda, ulobo wa Yowash za vu ugundo wa Ahaziya, a̱tsuma̱ Bet Shemesh. A̱vu Yehowash ka̱ra̱ a̱ tyo Urushalima a̱vu u kototo ukari wa Urishelima diga o una̱ntsutsu wa Ifiramu a̱ tyo o una̱ntsutsu wu usokowu. 14 A̱vu u pura̱ suru zinariya na̱ azurufa, na̱ suru itana yu ulinga u na a̱ tsura̱i a̱tsuma̱ A̱a̱'isamapaɗa a̱ A̱sulazuva, oɓolo na̱ a aza a na a̱ ri pe a̱tsuma̱ e itana yi izuwa a̱tsuma̱ o ukobu mogono. A̱vu waru u tara a ama a na a̱ shi a pura̱i a̱vu u ka̱mba̱ na̱ le Samariya.

15 Akapi o ulinga u na Yowash yuwain, ni ili i na u yuwain biti oɓolo nu ulyuwu we elime, nu uvon u na u yuwain na̱ mogono Amaziya va Yahuda, a̱ da̱na̱ ta̱ pe uɗanu a̱tsuma̱ aatagada alabari ngono ma Isra'ila. 16 A̱vu Yowash kuwa̱ ucina nkaya ma̱ yi, a̱vu a̱ciɗyo yi a̱tsuma̱ a Samariya oɓolo na̱ ngono ma Isra'ila. A̱vu ulobo wa̱ yi Yerobowam mo o mogono o una̱ wa̱ yi.

17 Amaziya ulobo wa Yowash mogono ma a Yahuda ma yuwan ta̱ a'wan gendu a mantsa ma na Yehowash ulobo wa Jehoha mogono ma Isra'ila ma̱ kuwa̱i. 18 Akapi o ulinga u na Amaziya yuwain, a̱ da̱na̱ ta̱ tu pe uɗanu a̱tsuma̱ aatagada alabari o ngono ma Yahuda.

19 A̱vu a yuwan ifoɓi i na o unai a̱tsuma̱ a̱ Urishelima, a̱vu u suma a̱ tyo Lakish, amma a̱vu a̱ lyungu na a ama a̱ tyo Lakish reve o unai ɗe. 20 A̱vu a̱ ta̱wa̱ na̱ yi zuva vi ido a̱vu a̱ciɗyo yi a̱tsuma̱ a̱ Urishelima oɓolo na̱ nkaya ma̱ yi, a̱tsuma̱ a̱ lyuci gbain va Da̱wuda.

21 A̱vu suru ama a Yahuda a tara Azariya, za na da̱na̱i na a'wan kupa na̱ a̱za̱ ta̱li, a̱vu a katala yi okokolo o mogono o una̱ wa dada va yi Amaziya. 22 A̱yi ɗa za na suwisa yi lyuci va Ela, a̱vu u ka̱mbuwa̱i a̱ tyo Yahuda a mantsa ma na Dada va̱ yi mogono Amaziya ma̱ kuwa̱i.

23 A̱tsuma̱ aa'wan kupa na̱ ozo o ton o tsugono tsa mogono Amaziya ulobo wa Yowash, mogono ma Yahuda, a̱vu Yerobowam ulobo wa Yehowash mogono ma Isra'ila mo wo o mogono a̱tsuma̱ Samariya, A̱vu u yuwan tsugono tsa aa'wan amunga na̱ za ta̱. 24 U yuwan ta̱ iwuya elime A̱sulazuva. U vadala diga a̱tsuma̱ e iwuya i na Yerobowam ulobo wa Neba ma yuwain shi, za na u zuwai aza a Isra'ila a yuwain unusu. 25 A̱yi ɗa za na ka̱mbuwa̱ yi iɗa ya Isra'ila u ununa u da̱na̱i ɗe nu ufaru diga Lebo Hamat, a̱ tyo a mala ma Araba, ununa adanshi A̱sulazuva A̱sula̱ a Isra'ila a dammai, o una̱ wa aagbashi yi Yunana ulobo wa Amita, za na da̱na̱i vumava̱sula̱ diga a Gat Hefa*. 26 A̱sulazuva ene ta̱ a̱tsuma̱lima̱ a na suru vuma a̱tsuma̱ Isra'ila o sowuso, agbashi na̱ aza a na a̱ ri fa̱a̱n, suru nle a̱ da̱na̱ ta̱ a̱tsuma̱lima̱ lon. Waru babu za na a kamba le. 27 Agba A̱sulazuva a damma a na wa tasa ala aza a Isra'ila diga o uvaɗi shi, a̱vu u wawa le diga ekere Yerobowam ulobo wa Yowash.

28 Akapi o ulinga u tsugono tsa Yerobowam, na̱ suru ili i na u yuwain, na̱ suru u lyuwu wa̱ elime wa a̱soja a̱ yi, nu ununa u ka̱mbuwa̱a̱ yi a aza a Isra'ila na̱ lyuci va Dimaska na̱ Hamat, a aza a na a̱ ri a aza a Yahuda, suru ili ya nda a̱ da̱na̱ ta̱ pe uɗanu a̱tsuma̱ aatagada alabari o ngono ma Isra'ila. 29 A̱vu Yerobowam kuwa̱ ucina nkaya ma̱ yi ngono ma aza a Isra'ila. A̱vu Zakariya ulobo wa̱ yi mo o mogono o una̱ wa̱ yi.