1 A̱tsuma̱ aa'wan a ta'atsu o tsugono tsa Hosheya ulobo wa Ela mogono ma Isra'ila, Hezekiya ulobo u mogono Ahaz va Yahuda me temei tsugono. 2 U da̱na̱ ta̱ na aa'wan ushin na̱ ozo o ton a mantsa ma na wo o woi mogono, a̱vu u yuwan tsugono tsa Urishelima aa'wan ushin na̱ kucci. Aala a mma va yi ɗa da̱na̱i Abi, usheli wa Zakariya. 3 A̱vu u yuwan ulinga u na u da̱na̱i mejege elime A̱sulazuva, ununa akaya a̱ yi Da̱wuda yuwain. 4 A̱vu u kototo ba̱ta̱ va̱ a̱ga̱nda̱ na̱ atali a̱ga̱nda̱, a̱vu wu ɓuɓoso a̱shuwutsu a Ashera. A̱vu u kototo yo vu rumushili za na Musa yuwain, za na hali a acina a mantsa mo ndolo aza a Isra'ila a̱ da̱na̱i a yuwusan ukula̱tosu wi ili i ma̱guru ɗe. Za na a ca yi ala Nahushtan.* 5 Hezekiya zuwa ta̱ okolo yi uba̱ta̱ wa̱ A̱sulazuva A̱sula̱ a Isra'ila. Adama o ndolo ɗa a̱tsura̱ mogono mo ro a̱tsuma̱ aza a tsugono tsa Yahuda tsa yi shi, elime yi ko a̱ca̱pa̱ yi shi. 6 Hezekiya ɓana ta̱ A̱sulazuva. Agba u vadala diga a̱tsuma̱ e itoni ya̱ yi shi, amma a̱vu u yuwan tsutoni na̱ wila̱ u na A̱sulazuva a ca yi Musa. 7 Waru A̱sulazuva a̱ da̱na̱ ta̱ oɓolo na̱ yi. Suru uba̱ta̱ u na Hezekiya 'ya̱wa̱i, u tsu tsura̱ ta̱ ulyuwu wa aci. U 'ya̱sa̱a̱n ta̱ mogono ma Asuriya aci, a̱vu 'yuwan a na wa yuwan yi a̱ga̱nda̱. 8 A̱vu u lyuwa aza a Filistiya nu uvon a̱ tyo Gaza na̱ mulyuci ma̱ yi na acina ilyuci na̱ ri nu ukari.

9 A̱tsuma̱ aa'wan a̱ na̱shi o tsugono tsa mogono Hezekiya, za na da̱na̱i aa'wan cindere o tsugono tsa Hosheya ulobo wa Ela mogono ma Isra'ila, a̱vu mogono Shalmanesa va Asuriya ma̱ ta̱wa̱ nu uvon a̱tsuma̱ Samariya, a̱vu uka̱nda̱ruwa̱ lyuci'i. 10 Ana aa'wan a ta'atsu o ndolo o kotoi a̱vu Asuriya usai. A usa ta̱ Samariya a̱tsuma̱ aa'wan a̱ ta̱li va Hezekiya, a̱tsuma̱ aa'wan a̱ kucci o tsugono tsa mogono Hosheya mogono ma Isra'ila. 11 Mogono ma Asuriya ma̱ pura̱ ta̱ ama Isra'ila a̱ tyo Asuriya, a̱vu u da̱na̱to le a̱tsuma̱ a̱ lyuci va Hala, a̱tsuma̱ Goza za na da̱na̱i upasu wu uɗolu wa Habo, na̱ waru a̱tsuma̱ e ilyuci ya Midiya. 12 Ili ya nda icina le ta̱ adama na a̱ kuɗa̱i a na a uwwa uɗyo wa̱ A̱sulazuva A̱sula̱ e le, a̱vu a kuɗa akucunu a̱yi, suru ili i na Musa aagbashi A̱sulazuva a dammai, reve ama'a a 'yuwan a na uwwa, a̱vu a 'yuwan a na a yuwan tsutoni na̱ wila̱ wa̱ yi.

13 A̱tsuma̱ a aa'wan kupa na̱ a̱za̱ na̱shi o tsugono tsa mogono Hezekiya, Senakerib mogono ma Asuriya ma̱ 'ya̱wa̱ ta̱ nu uvon a̱tsuma̱ e ilyuci i na i ri nu ukari a̱tsuma̱ a Yahuda suru, reve usa le. 14 A̱vu Hezekiya mogono ma Yahuda ma̱ lyungu nu u dammu uba̱ta̱ mogono ma Asuriya a̱tsuma̱ lyuci va Lakish u damma, <<N yuwan wu ta̱ unusu, vu lyawa mu. Waru n ta tsupa wu suru ili i na vu damma nu mu.>>Adama o ndolo a̱vu mogono ma Asuriya ma zuwaa Hezekiya a na wa lyungwa̱ yi nu ukunzu ukpakukupa kupa (10,000) u azurufa na̱ ukunzu ukpakukupa (1,000) u zinariya. 15 Hezekiya ɓolotowo yi ta̱ suru azurufa na da̱na̱i a̱tsuma̱ A̱a̱'isamapaɗa A̱sulazuva na̱ waru suru a aza na a̱ da̱na̱i a̱tsuma̱ asula e izuwa i mogono. 16 A̱tsuma̱ a mantsa mo o ndolo Hezekiya mogono ma Yahuda ma kukura ta̱ zinariya na da̱na̱i o una̱ntsutsu nu usowoto wu upepu wa̱ A̱a̱'isamapaɗa A̱sulazuva, a̱vu u ca mogono ma Asuriya le.

17 A̱vu mogono ma Asuriya ma̱ lyungu nan yali ya̱ a̱soja a̱ yi, na̱ zagbain a̱ yi na azagbain o uvon a̱ yi, na̱ a̱soja a̱bunda̱, diga Lakish a̱ tyo ya mogono Hezekiya a̱tsuma̱ a Urishelima. A̱vu a̱ ka̱ra̱ a̱ tyo upasu wa̱ Urishelima a̱vu e isawan uba̱ta̱ u na mini ma̱ tsu utusa̱ aagaɗi, zuzu nu uba̱ta̱ u na a tsu yuwusan wuza̱'u.* 18 Reve e ɗe mogono, na̱ Eliyakim ulobo wa Hilikiya zagbain vu u'wa mogono, na̱ Shebena za vi iɗana mogono, na̱ Jowa ulobo wa Asa za vi iɗana ya alabari reve o uta̱.

19 A̱vu zagbain vo ozo o uvon u damma le, damma yi Hezekiya, <<Apa nda ili i na mogono ma gbain mogono ma a aza a Asuriya ma a dammai, <A̱ nye ɗa vu zuwai ucira wa̱ wu? 20 Vu ta majiyan adanshi a ɗa uvon, nu ucira wu uvon? Ekere za ne ɗa vu zuwai ucira wa̱ wu gogo, hali na va̱ 'ya̱sa̱a̱n a̱mu aci? 21 Ka̱lyuwa̱ gogo a na vu zuwai ucira wa̱ wu uba̱ta̱ wa Masar, za na ri ununa vu revei akunku a apumpu, za na tsu paɗa vuma o ukere, ko gba shi na̱ vu gbasato wo yi reve wamatowun! Na̱ ne ɗa mogono Firi'awuna ri na̱ suru aza a na a zuwa yi ucira u le ya̱ a̱ yi. 22 Agba n ni i damma mu ta̱, <<Tsu zuwa ta̱ ucira u tsu uba̱ta̱ wa̱ A̱sulazuva A̱sula̱ a̱ tsu,>> a̱yi ɗa za na ri nu uba̱ta̱ wa̱ a̱ga̱nda̱ a̱ musula̱ na̱ musa'a a na Hezekiya kototo yi shi? A̱vu u damma Yahuda na̱ Urushalima,<<I reve gba i yuwan ta̱ a̱ga̱nda̱ a̱ tyo uba̱ta̱ masa'a ma nda a̱tsuma̱ Urishelima shi>>?

23 << <Ta̱wa̱ gogo, vu yuwan n dammulai na̱ zagbain a̱ va̱, mogono ma Asuriya. N ta ca wu ido ukpakukupa ure (2,000), na̱ vaa gura zuwa akumbi zuva le! 24 Cine vaa gura lyuwa aaci a yali a̱tsuma̱ a aza a na a la'ai uka̱la̱mu a̱tsuma̱ a agbashi a zagbain va̱, ko na vaa zuwusaa Masar ucira adama e ikeke yi ido ya̱ yi oɓolo na akumbi e le? 25 Suru na̱ ne fo, oɓolo nu ucira wa̱ A̱sulazuva ɗa a na u damma na̱ a̱mu tsu ka̱ra̱ agawan adama a na kototo yi shi? A̱vu A̱sulazuva a damma mu, ka̱ra̱ adama a na va yuwan uvon ni iɗa nda, vu kototo yi.> >>

26 A̱vu Eliyakim ulobo wa Hilikiya, na̱ Shebena na̱ Jowa a damma yali vu uvo'on, <<Tsu pati wu ta̱ a na va yuwan adanshi na agbashi a̱ wu na̱ elentsu a Arama, adama a na tsu ta uwusa yi. She vu yuwan adanshi na̱ tsu ne elentsu a Yahuda atsuvu a ama a wan, aza a na a̱ ri zuva vu ukari u lyuci a ta uwusa wu.>>

27 Amma a̱vu yali'i usu u damma, <<Ekere a zagbain ɗu ɗa na̱ a̱ɗu goon a na zagbain va̱ lyungu numu a na ma damma ili i yaa nda shi, amma hali na a ama a na a̱ ri na̱ nden upasu wu ukari fo, a aza na a vari yi tsa a̱ɗu a na a lyuwa a̱ya̱n le, a̱vu waru o sowo mazara ma̱ e le.>>

28 Amma a̱vu yali'i u 'yon mishin u ya̱sa̱n uɗyo wa̱ yi nu ucira lon u yuwan a adanshi ne elentsu aza a Yahuda u damma,

<<Uwwa yi adanshi azagbain mogono, mogono ma Asuriya! 29 Mogono ma damma ta̱, <She i lyawa Hezekiya pala ɗu wan, adama a na wa gura wawa ɗu diga ekere a̱ va̱ shi.> >> 30 She i lyawa Hezekiya zuwa ɗu a na ya zuwa ucira u ɗu uba̱ta̱ wa̱ A̱sulazuva a na u dammai, <<Amayun gba A̱sulazuva a ta wawa tsu, lyuci nda a ca yi ekere mogono ma Asuriya shi.>>

31 <<Ili i na mogono'o ma dammai, to, a̱ yi ɗa, <She i zuwa atsuvu ɗu uba̱ta̱ wa Hezekiya wan. Amma i zami yi nden n lafiya na̱ a̱mu a̱vu yu uta̱ i ta̱wa̱ uba̱tu u va. Suru nɗu za ta a gura lyuwa diga a̱tsuma̱ ataci a̱ ina̱bi a̱ yi nu ubiri, a̱vu u sowo mini diga o ura'atsu wa̱ yi. 32 Hali a cina mantsa ma na ma̱a̱ ta̱wa̱ a̱vu n tara ɗu a̱ tyo e iɗa i na i ri za ɗu, iɗa i na i ri ni ishina na̱ masayan ma̱ inabi, ni ilyalya na̱ a̱ɗuma̱ a̱ inabi na̱ ɗanga mani'in ma̱ zetun, ni ishiki. Ɗangulai wuma a̱vu i lyawa ukwa̱! She izuwa atsuvu a̱ɗu uba̱ta̱ wa Hezekiya wan, a na wa pala ɗu u damma, A̱sulazuva a ta wawa tsu.> >> 33 A ta gura tsura̱ musula̱ mi nɗa i ro a na u wawa yi nɗa diga o ukere mogono ma Asuriya? 34 A tee ɗa musula̱ ma Hamat na̱ Afa? A tee ɗa gba musula̱ ma Sefarwayim na̱ Hena na̱ Iva? A gura ta̱ wawa aza a Samariya diga ekere a̱ va̱? 35 A̱tsuma̱ musula̱ mu uvaɗi nda suru, ma̱sula̱ ma̱ ne ɗa ma gura a na wa wawa ɗu ekere a̱ va̱? Sapu a na a damma A̱sulazuva a ta gura wawa Urishelima diga ekere a̱ va̱?

36 Amma reve a ama'a a̱ rungwa̱, agba a usu yi ko nu u dammu uta̱ shi, adama a na mogono ma damma ta̱, <<She a̱ usu yi wan.>> 37 A̱vu Eliyakim ulobo wa Hilikiya zagbain vu u'wa mogono, na̱ Shebena za vi iɗana i mogono, na̱ Jowa ulobo wa Asa za vi iɗana yi ili i na i farai, suru nle a̱vu a̱ ta̱wa̱ uba̱ta̱ wa Hezekiya, na̱ a̱tugu le wukaru, a̱vu a damma yi adanshi a na zagbain va yali ya̱ a̱soja'a u dammai.