1 A̱vu Vumava̱sula̱ Elisha ɗe vuma ta̱ diga oɓolo agbashi ama̱sula̱ a̱vu u damma yi, <<Vu foɓo a̱vu vu nla̱ gbakala, vu tara medele ma mani'in, a̱vu vu ka̱ra̱ a̱ tyo Ramot Giliyadu. 2 A mantsa ma na vu rawai ɗe, a̱vu vu zami Yehu ulobo wa Jehoshafa ulobo wa̱ Nimishi. A̱vu vu zuwa yi u 'yon u lyawa a̱za̱ a̱ yi a̱vu i uwa a̱tsuma̱ a aasula. 3 A̱vu vu tara medele ma mani'i'in vu tsuwa̱n yi a aaci vu damma, <Apa ili i na A̱sulazuva a damma yi, n tsuwa̱n wu ta̱ mani'in vo o'wo mogono ma aza a Isra'ila.> Reve vu kpa̱tu'wa̱ una̱ntsu vu suma, she vu lungusa̱ mantsa wan!>>

4 A̱vu ulobo u ndolo, za na ri vumava̱sula̱, ka̱ra̱ a̱ tyo Ramot Giliyadu. 5 Ana u rawai a̱vu u cina oɓolo a nan yali ya̱ a̱soja e iɓolo. A̱vu u damma, <<N ta̱ ni ikaka adama a̱ wu, yali ya a̱soja,>>

A̱vu Yehu usu u damma, <<Ikaka'a gba za va zane ɗa a̱tsuma̱ a̱ tsu?>>

A̱vu u usu <<A̱ ta̱wa̱ uba̱ta̱ wa̱ wu u ɗa yali zagbain.>> 6 A̱vu Yehu 'yon a̱vu a uwa a̱tsuma̱ aasula. Reve u tsuwa̱a̱n Yehu mani'in a aaci u damma yi, <<Apa ili i na A̱sulazuva A̱sula̱ a Isra'ila a dammai,<N tsuwa̱n wu ta̱ mani'in vo o'wo mogono ma aza a Isra'ila.* 7 Vu to kototo u'wa wa Ahabu zagbain va̱ wu, adama n tsupa e ekere a Yezebel mpasa ma agbashi a̱ va̱ ama̱sula̱, na̱ mpasa ma ama A̱sulazuva agbashi a̱ va̱. 8 N to kototo u'wa wa Ahabu suru. N ta̱ o una ulobo wa Ahabu suru ko aagbashi a ɗa ko aagbashi a ɗa shi, a̱tsuma̱ a Isra'ila. 9 N ta zuwa u'wa wa Ahabu wo o'wo tsu u'wa wa Yerobowam ulobo wa Neba na̱ waru tsu u'wa wa Basha ulobo wa Ahija. 10 Musa̱n n ɗa ma tama lipu va̱ Yezebel a̱tsuma̱ o upasu wi iɗa ya Yezireyel, a̱a̱ tsura̱ za na a̱ ciɗo yi shi,> >> A̱vu u kpa̱tu'wa̱ una̱ntsu a̱vu wu uta̱ u suma.

11 A mantsa ma na Yehu uta̱i a̱ tyo uba̱ta̱ u nan yali ya̱ a̱soja, a̱vu e ece yi, <<Lafiya ɗa gba? Nye ɗa i ta̱wa̱ to yi ajarata ndolo na u ta̱wa̱i ya̱'a̱ wu?>>

Reve Yehu usu le, <<A̱ɗu i gura ta̱ reve cu'un vuma ndolo na̱ cu'un va adanshi a̱ yi.>>

12 A̱vu a damma yi, <<Epen a ɗa vaa yuwusan!>> <<Damma tsu ili i na u damma nuwu!>>

A̱vu Yehu damma le, <<Nda ili i na A̱sulazuva a dammai, n tsuwa̱n wu ta̱ mani'in vo o'wo mogono ma aza a Isra'ila.>>

13 A̱vu o foɗo a̱tugu a tsugbain tsa e le a̱vu o polo le e iɗa adama a na Yehu a wala ɗe zuva le. A̱vu e ivula̱ avana na a saali<<Yehu ɗa mogono!>>

14 Ɗaɗa Yehu ulobo wa Jehoshafa ulobo wa Nimishi yuwain ifoɓi cine o una mogono Jehoram. A mantsa mo ndolo Jehoram na aza a Isra'ila suru a̱ da̱na̱ ta̱ ɗe Ramot Giliyadu a yuwusan ipiri yi iɗa'a, adama she Hazayel mogono ma Suriya ma̱ riya̱ yi nu uvon wan. 15 Amma Jehoram mogono u ka̱mba̱ ta̱ ɗe Yezireyel adama u yuwan opocino a antsu a na aza a Suriya amaton niyi uba̱ta̱ wu uvon u na a yuwain na̱ Hazayel mogono ma Suriya. A̱vu Yehu damma, <<Nna̱ tsunda tsa ɗa i cigai, she i lyawa nanza wu uta̱ a̱ lyuci a̱vu u 'ya̱wa̱ u ca ucuɗuwu u nda ɗe Yezireyel wan. >> 16 A̱vu Yehu kumba ikeke yi ido ya̱ yi a̱vu u ka̱ra̱ a̱ tyo Yezireyel, uba̱ta̱ u na Jehoram da̱na̱i e ivuwusan, Ahaziya mogono ma Yahuda ma̱ ka̱ra̱ ta̱ a̱ 'ya̱wa̱ ɗe adama u ca̱sa̱ yi.

17 Ana za na a yuwusan ipiri i lyuci zuva va atsura vu ukari wa Yezireyel, we enei Yehu na̱ a̱soja a̱ yi a̱ ta̱wa̱, a̱vu u ya̱sa̱n uɗyo u damma <<Apa a̱soja a̱ ta̱wa̱.>>

A̱vu mogono Jehoram damma, <<A̱ lyungu nanza za na tsu kumba ido a na wa̱ 'ya̱wa̱ we ece le, <lafiya ɗa? > >> 18 Za na kumbai do a̱vu u ka̱ra̱ a̱ tyo ya Yehu a̱vu u damma yi, <<Mogono ma damma ta̱, <U ta̱ wu wa̱ wu lafiya ɗa gba?> >>

A̱vu Yehu usu yi u damma, <<A̱ te ɗa i mini ma̱ wu ko lafiya ɗa? Ka̱mba̱ a̱ca̱pa̱ vu kuru mu.>>

A̱vu za na aa yuwusan ipiri'i u damma, <<Za na a̱ lyunguyi a̱ tyo uba̱ta̱ wa ama ndolo u rawa ta̱, amma u ka̱mba̱ shi.>>

19 A̱vu mogono ma̱ da̱shi lyungu nanza wa̱ ire za na tsu kumbusa ido adama a na wa̱ 'ya̱wa̱. Ana u rawai ya̱ a̱ le a̱vu damma, <<Apa ili i na Mogono ma dammai, <Lafiya ɗa?> >>

A̱vu Yehu dammisa, <<A̱ te ɗa i mini ma̱ wu ko lafiya ɗa? Ka̱mba̱ a̱ca̱pa̱ vu kuru mu.>>

20 A̱vu za na aa yuwusan ipiri i lyuci'i u da̱shi damma, <<U rawa ta̱ ye'e ele, agba a̱ yi fo u ka̱mba̱ shi. Zagbain le gba ta a mmalu ununa vu revei Yehu ulobo wa Nimishi, adama a na ilaɗi yi ido ya̱ yi i ta̱ ununa vu revei ajarata.>>

21 A̱vu Jehoram mogono u ca u dammu, <<Foɓo nu mu ikeke yi ido i va̱,>> Ana a foɓo ni yi, a̱vu Joram mogono ma Isra'ila na̱ Ahaziya mogono Yahuda o uta̱, za suru e ikeke vi ido ya̱ yi, adama a na aa ga'an na̱ Yehu. A̱vu waru gba a ga'an na̱ yi ɗe atsusa a Nabot vuma va Yezireyel. 22 Ana Jehoram ene yi Yehu a̱vu we ece yi, <<Yehu lafiya ɗa vu ta̱wa̱i pa?>>

A̱vu Yehu usu yi u damma, <<Cine tsu ɗa wo o'wo lafiya,>> <<Ana wo o'woi ama suru a̱tsuma̱ a nɗa o o'woi a yuwusan tsipere na̱ nkunu na̱ a̱ga̱nda̱ a̱ tyo wu uba̱ta̱ u musula̱ ma mma va wu Yezebel.>>

23 A̱vu Jehoram vadala ido ya̱ yi a̱vu u suma wa aa adansa Ahaziya, <<A̱ yi nda ifoɓi i ɗa, Ahaziya!>> 24 A̱vu Yehu rono utan wa̱ yi a̱vu u lyawa yi a̱vu u tawan Jehoram e memere maa avangaci ma̱ yi. A̱vu liya uwa acina okolo a̱ yi a̱vu Jehoram riya̱ a̱tsuma̱ keke vi ido ya̱ yi. 25 A̱vu Yehu damma Bidika, za na a yuwusan yi a̱ga̱nda̱, <<Vu uta̱a̱ lipu va̱ yi a na va vari yi a̱tsuma̱ atsusa a Nabot vuma va Yezireyel. Ko vu ta cuwan nu uranu u na tsu da̱na̱i a mmalu e ikeke yi ido na̱ dada va yi Ahabu, a na A̱sulazuva a yuwain adanshi adama yi. 26 <Yon da me ene ta̱ mpasa ma Nabot na̱ mpasa mo o olobo a̱ yi, a̱mu A̱sulazuva, Adama o ndolo vu ta tsupa yi pa e iɗa i nda, A̱sulazuva a dammai.> Tara yi a̱vu vu va ri yi pe a̱tsuma̱ atsusa a nda, ununa adanshi A̱sulazuva a dammai.>>*

27 Ana Ahaziya mogono ma Yahuda me enei ne, a̱vu u suma o ure a̱ tyo Bet Haga. A̱vu Yehu toni yi u sala u damma, <<Una niyi fo!>> A̱vu a amaton yi e ikeke yi ido ya̱ yi a mantsa ma na u ri a̱ tyo Gur za na ri zuzu na̱ Ibileyam, amma a̱vu u la'a u suma a̱ tyo Megido ɗe ɗa u kuwa̱i. 28 A̱vu agbashi a̱ yi a tara yi a̱tsuma̱ e ikeke yi ido a̱ tyo Urishelima, a̱vu a̱ ciɗo yi a̱tsuma̱ o oso a̱ yi oɓolo na̱ nkaya ma̱ yi a̱tsuma̱ lyuci va Da̱wuda.

29 A̱tsuma̱ a aa'wan kupa na̱ za ta̱ o tsugono tsa Jehoram mogono ulobo wa Ahabu, a̱vu Ahaziya teme tsugono tsa a Yahuda.

30 A mantsa ma na Yezebel uwwai a na Yehu ta̱wa̱ ta̱ Yezireyel, a̱vu u yuwan yisukumishi o urewesu wa̱ yi, a̱vu u lapula a̱nji aaci a̱ yi a̱vu wi idana yi nu usowoto wu upepu. 31 A mantsa ma na Yehu rawai uba̱ta̱ wu una̱ntsu u na wa uwa, a̱vu Yezebel ya̱sa̱n uɗyo wa yi a̱vu u damma yi <<A̱vu za na tsu una zagbain va̱ yi, tsa Zimri, lafiya ɗa vu ta̱wa̱i?>>*

32 A̱vu Yehu ya̱sa̱n esu a̱ yi zuva a̱vu we enei, a̱vu u damma, <<Zane ɗa ri upasu u va̱? Zane ɗa?>> A̱vu mbara n re ko ama ta'atsu a̱vu o roco aciya le ya̱ a̱ yi. 33 A̱vu Yehu damma le, <<Vari ni yi e iɗa!>> A̱vu a vari yi nu usowoto wu upepu a̱ tyo e iɗa, a̱vu Yehu zuwa ido ya̱ yi a dasa mpasa ma̱ yi.

34 A̱vu Yehu cu'wan o u'wa u mogono u lyuwa ilyalya u sowo. Ana a yuwain ne a̱vu u damma, <<Tara yi ka ndolo za naa a yuwayin una̱, adama a na ya̱ ciɗo yi, adama a na a̱ yi usheli u mogono u ɗa.>> 35 Amma ama a na a̱ 'ya̱wa̱i a̱ ciɗo yi, agba acina lipu va yi shi she Ookoluwo goon na̱ etele ana na̱ ekere a̱ yi. 36 Avu a̱ ka̱mba̱ a damma Yehu, za na dammai, <<Apa adanshi a̱ A̱sulazuva na u dammai o una̱ wa aagbashi a̱ yi Iliya vuma va Tishibe, uba̱ta̱ wu upasu wa Yezireyel musa̱n ɗa ma tama lipu va Yezebel.* 37 Lipu va̱ Yezebel to o'wo tsa̱ a̱ everi, e iɗa ya Yezireyel, hali na babu za na a gura damma, <Yezebel ɗa gba.> >>