1 Elisha damma ta̱ ka na u ka̱mbuwa̱ yi ulobo wa̱ yi wuma a na, <<'Yon a̱vu na̱ limatan va̱ wu a̱ tyo uba̱ta̱ u na vu tsura̱i biti, adama a na A̱sulazuva a̱ ta̱ ta̱wa̱ na ambulu a̱tsuma̱ e iɗa hali a'wan e cindere.>>* 2 A̱vu ka'a u yuwan cine vuma va̱ A̱sulazuva damma niyi. A̱vu u ka̱ra̱ oɓolo na̱ limatan va̱ yi suru a̱ tyo e iɗa ya Filistiya a̱vu a̱ da̱nu ɗe hali a'wan e cindere.

3 Ana a yuwain a'wan a cindere, a̱vu ka'a u ka̱mba̱ diga e iɗa ya Filistiya. A̱vu u 'ya̱wa̱ uba̱ta̱ mogono na̱ mesun adama a na a̱ ka̱mbuwa̱ yi nu u'wa wa̱ yi nu uɗuma̱ wa̱ yi. 4 A mantsa'a mogono ma yuwusan ta̱ adanshi na̱ Gehazi, aagbashi a vuma va̱ A̱sula̱, a̱vu u damma, <<Damma mu ili ya asalama a na Elisha yuwain suru.>> 5 A mantsa ma na waa dansaa mogono ununa Elisha 'ya̱sa̱in a̱kwa̱kwa̱, a̱vu ka na Elisha ka̱mbuwa̱i ulobo wa̱ yi wuma rawa shi u ta̱wa̱ uba̱ta̱ mogono, na̱ mesun a na a̱ ka̱mbuwa̱ yi nu u'wa wa̱ yi nu uɗuma̱ wa̱ yi. A̱vu Gehazi usu, <<Zagbain va̱ mogono, apa ka nu ulobo wa̱ yi a na Elisha ka̱mbuwa̱ yi wuma'a!>> 6 Ana mogono me ecei ka'a, a̱vu ka'a u cuɗuwa yi.

A̱vu mogono ma zuwa za ta̱ a̱tsuma̱ azagbain a yuwan adanshi adama adanshi'i a̱vu u damma yi, <<I ka̱mbuwa̱ ka'a suru ili i na i ri za va̱ yi, oɓolo na̱ itana yu uɗuma̱ wa̱ yi suru, diga urana u na u lyawai iɗa'a hali a̱ tyo urana u na u ka̱mba̱i.>>

7 <<A̱vu Elisha ka̱ra̱ a̱ tyo Dimaska a mantsa ma na mogono Ben Hada va Suriya da̱na̱i babu lafiya. A̱vu nanza damma Ben Hada mogono, Elisha vuma va̱ A̱sula̱ ta̱wa̱ ta̱ pa a̱tsuma̱ a̱ lyuci nda,>> 8 a̱vu mogono ma damma Hazayel a na, <<Vu tara une'e vu 'ya̱wa̱a̱ uba̱ta̱ u vuma va A̱sula̱. Vu damma yi u patiya mu A̱sulazuva, <Ko n ta̱ tsura̱ lafiya diga a̱ mɓa̱la̱ nda?> >> 9 A̱vu Hazayel ka̱ra̱ a̱ tyo uba̱ta̱ wa̱ Elisha oɓolo na̱ ne'e icu'un icu'un diga Dimaska, aza a na arakumi amunga a tanuyi. Ana u rawai wi isawain elime a̱ Elisha a̱vu u damma, <<Ulobo wa̱ wu Ben Hada mogono ma Suriya ma ɗa ma̱a̱ lyungu numu uba̱ta̱ wa̱ wu, adama a na u ciga ta̱ wu uwwa, ko u ta̱ ka̱mba̱ gbaga o ubanakun u na n ri na̱ yi?>>

10 A̱vu Elisha damma, <<Ka̱ra̱ vu damma yi u ta̱ tsura̱ lafiya, amma A̱sulazuva o roco mu ta̱ na amayun u ta̱ kuwa̱.>> 11 A̱vu Elisha varaa Hazayel esu hali she na Hazayel uwwai wono. Adama o ndolo a̱vu Elisha ɓosho na̱ mesun.

12 A̱vu Hazayel ece yi, <<Nye i zuwai zagbain va̱ ri a̱ mesun?>>

A̱vu Elisha damma, <<Adama a na n reve ta̱ iwuya i na vaa yuwaan ama a Isra'ila. Vu ta̱ kula̱to ɓaɓu vu ucira le na akina, a̱vu vu una olobo e le na̱ matsun me pe'eni, waru vu to o ɓoso aci muwun n keke'en n le e iɗa, a̱vu vu ɗa̱ra̱ a̱ma̱ci e le a na a̱ ri na̱ a̱tsuma̱.>>

13 A̱vu Hazayel damma, <<Cine a̱mu aagbashi a̱ wu ma gura yuwan a̱ba̱jini e ili tsu nda, a̱mu na n ri musa̱n me pere?>>*

A̱vu Elisha damma yi, <<A̱sulazuva o roco mu ta̱ a na voo o'wo mogono ma Suriya.>>

14 A̱vu Hazayel lyawa Elisha a̱vu u ka̱mba̱ uba̱ta̱ wu zagbain va̱ yi. Ana Ben Hada ece niyi, <<Nye ɗa Elisha damma nuwu?>>

A̱vu Hazayel damma, <<Elisha damma amayun ɗa vu ta̱ tsura̱ lafiya.>> 15 Amma a na usana u tawai, a̱vu Hazayel tara umuna wu ugba̱mu u tsupu yi a̱tsuma̱ a̱ mini a̱vu wu pala o urewesu u mogono, hali u kuwa̱. Na̱ ne ɗa Hazayel wo o'woi mogono o una̱ wa̱ yi.

16 A̱tsuma̱ a'wan a tawun o tsugono tsa mogono Jehoram ulobo wa Ahabu va Isra'ila, a na Jehoshafa da̱na̱i mogono ma Yahuda, ɗaɗa Yowash ulobo wa Jehoshafa me temei tsugono a̱tsuma̱ a Yahuda. 17 Yehoram da̱na̱ ta̱ na a'wan mata'atsu ne ejere a mantsa ma na wo o'woi mogono, a̱vu waru u yuwan tsugono tsa a Urishelima a'wan kula̱. 18 U toni ta̱ a hali o ngono ma Isra'ila, cine u'wa wa Ahabu yuwain, adama a na u zuwa ta̱ usheli wa Ahabu. U yuwan ta̱ ili i iwuya a̱ ma̱ka̱ka̱n ma̱ A̱sulazuva. 19 Amma na̱ ne suru A̱sulazuva o kototo iɗa ya Yahuda shi adama aagbashi a̱ yi Da̱wuda, adama a na u yuwan ta̱ nzuwulai a na waa ca yi ekan nu ugundo wa̱ yi babu ukotu.*

20 A mantsa ma na mogono Yehoram ma̱ da̱na̱i o tsugono e iɗa ya Yahuda, reve a ama a Edom a̱ 'ya̱sa̱yin aci, ɗaɗa a katala yi aciya̱ le mogono.* 21 Adama o ndolo a̱vu Joram ka̱ra̱ a̱ tyo Zayi ni ikeke yi ido ya̱ yi suru. A̱vu a̱soja Edom a̱ ka̱nda̱ruwa̱ yi oɓolo na̱ nan yali yi ikeke yi ido ya̱ yi, amma na ayin u tsura̱ ta̱ ure u na wu uta̱i, a̱vu a̱soja a̱ yi a suma a̱ tyo a 'wa le. 22 Hali a cina ana'an Edom ri na̱ nden ma a lafiya na̱ Yahuza shi. A̱tsuma̱ a mantsa'a aza a Libina a̱ 'ya̱sa̱a̱n ta̱ aza a Yahuza aci.

23 Akapi o ulinga u na Joram yuwain suru a̱ da̱na̱ ta̱ pe uɗanu a̱tsuma̱ aatagada a labari o ngono ma aza a Yahuda. 24 A̱vu Joram kuwa̱ ucina nkaya ma̱ yi a̱vu a̱ ciɗo yi a̱tsuma̱ a̱ lyuci va̱ Da̱wuda. A̱vu ulobo wa̱ yi Ahaziya wo o'wo mogono o una̱ wa̱ yi.

25 A̱tsuma̱ a'wan kupa ne ejere o tsugono tsa̱ Jehoram ulobo wa Ahabu mogono ma Isra'ila, Ahaziya ulobo u mogono Yowash mogono ma Yahuda ma lyuwa ta̱ tsugono. 26 Ahaziya da̱na̱ ta̱ na a a'wan ushin ne ejere a mantsa ma na wo o'woi mogono, a̱vu u yuwan tsugono tsa Urishelima aa'wan a̱ ta̱. Aala a mma va̱ yi a ɗa Ataliya, mawun ma tsukaya mo mogono Omri va Isra'ila. 27 U toni ta̱ a hali o u'wa wa Ahabu. A̱vu u yuwan ili iwuya a̱ ma̱ka̱ka̱n ma̱ A̱sulazuva cine u'wa wa Ahabu u yuwain, adama a na a̱yi toto vu u'wa ɗaɗa.

28 A̱vu Ahaziya 'ya̱wa̱ oɓolo na̱ Yoram ulobo wa Ahabu tsa̱ra̱ a yuwan uvon na̱ Hazayel, mogono ma Suriya a̱tsuma̱ a Ramot Giliyadu. A̱vu gba aza a Suriya a uwwato Jehoram usa̱n. 29 A̱vu mogono Jehoram ka̱mba̱ a̱tsuma̱ e iɗa ya Yezireyel, adama u yuwan opocino a̱ wuntsu u na u tsura̱i diga e ekere aza a Suriya ɗe Rama, a na a̱ da̱na̱i a yuwusan uvon na̱ Hazayel mogono ma Suriya.

A̱vu Ahaziya ulobo wa Yowash mogono ma a Yahuda 'ya̱wa̱ u ka̱lyuwa̱ Jehoram ulobo wa Ahabu, a̱tsuma̱ Yezireyel adama a na u da̱na̱i nu usa̱n.