1 Reve oɓolo a ama̱sula̱ a damma Elisha, <<Ka̱lyuwa̱, uba̱ta̱ u na tsu tsu ga'an na̱ a̱vu u ka̱la̱ma̱ tsu ta̱. 2 Lyawa tsu 'ya̱wa̱i o Uɗolu wa̱ Urudu adama koyan ɗa gasa uɗanga tsa̱ra̱ tsu suwai uba̱ta̱ u na tsa̱ da̱nuyi ɗe.>>

Reve u damma le, <<Walai.>>

3 A̱vu za ta̱ a̱tsuma̱ ama̱sula̱'a̱ u damma Elisha, <<Zagbain ko vu ta yuwan ankuri vu 'ya̱wa̱ oɓolo na agbashi a̱ wu.>>

<<A̱vu u usu u toni le.>> 4 A̱vu u ka̱ra̱ oɓolo na̱ le. Ana a rawai upasu wu Uɗolu wa̱ Urudu, a̱vu e teme mokoɗo ma ɗanga. 5 A mantsa ma na za ta̱ ri a magasa mo uɗanga, a̱vu rumu vo aɓau va̱ yi sa̱nga̱ a̱vu u riya̱ a̱ mini. A̱vu vuma'a u saala u damma, <<O'o zagbain va̱! Agba apa aɓau a nda n kopoi ta̱ ɗa.>>

6 A̱vu vuma va̱ A̱sula̱'a̱ we ece yi u damma, <<A te ɗa gba uriya̱ yi?>> Ana u roco yi Elisha uba̱ta̱'a̱, a̱vu Elisha kuɗa maɗanga a̱vu u vari yi lo uba̱ta̱'a̱, a̱vu rumu vo aɓau ndolo mo 'yon zuva mini'i. 7 A̱vu Elisha damma yi, <<Zuwa ukere adama a na va a tara.>> A̱vu u zuwa u kere wa yi u tara.

8 Ele lo a mantsa ma na mogono ma Suriya me teme yi uvon na aza Isra'ila, a̱vu u zami a̱sa̱la̱ uba̱ta̱ u nan yali ya̱ a̱soja a̱ yi u damma, << Va̱la̱ta̱ va̱ to o nda na̱ nda.>> 9 Amma vuma va̱ A̱sula̱ lyungu ta̱ nu u dammu uba̱ta̱ mogono ma aza a Isra'ila, << A ɓarasa yi she u 'ya̱wa̱ zuzu nu uba̱ta̱ u ndolo wan, adama a na aza a Suriya a̱ tu lo ufoɓu ni itana yu uvon.>> 10 A̱vu mogono ma Isra'ila ma̱ lyungu wa ama a na a tawa utyo, adama o uba̱ta̱ u na vuma va̱ A̱sula̱'a̱ u rono niyi atsuvu'u ulobonu. Elisha tsu rono so ta̱ mogono'o atsuvu a mantsa suru.

11 A̱vu mogono ma Suriya ma uwa u dammu lon adama o ndolo. A̱vu u ɓoloto nan yali ya̱ a̱soja a̱ yi we ece le u damma, << Damma nu mu a̱tsuma̱ a̱ɗu za ne ɗa tsu pa̱lu'wa̱sa̱ mu ekere mogono ma a Isra'ila?>>

12 A̱vu za ta̱ a̱tsuma̱ ele damma, <<Zagbain wuma wa wu u jima, ko za. Amma Elisha ɗa vumava̱sula̱ va Isra'ila ɗa adansa mogono ma Isra'ila adanshi a na va yuwusan, ko vu tu pe a̱tsuma̱ asula e nven u a̱ wu ɗa.>>

13 A̱vu mogono ma ca u dammu adama a na a zami uba̱ta̱ u na Elisha ri ereme yi. A̱vu a̱tsura̱ u dammu a na u ri pe a̱tsuma̱ Dotan. 14 A̱vu u lyungu ni ido ni ikeke yi ido na̱ a̱soja a̱bunda̱ ɗe uba̱ta̱'a̱. A̱vu a̱ ka̱ra̱ naa ayin a̱ ka̱nda̱ruwa̱ lyuci'i.

15 Ana aagbashi a vuma va̱ A̱sula̱ 'yon yi wu uta̱i na̱ wasasa, reve we ene a̱soja ni ido ni ikeke yi ido i ka̱nda̱ruwa̱ lyuci'i. A̱vu za na a yuwusan Elisha a̱ga̱nda̱ aa yuwan yisali u damma, <<Aya, zagbain! Nye ɗa tsa yuwan gogo nda?>> 16 A̱vu Elisha usu u damma, <<She vu uwwa wovon wan, adama a na a aza na a̱ ri yo oɓolo na̱ tsu, a la'a ta̱ a aza a na a̱ ri yo oɓolo na̱ le.>> 17 A̱vu Elisha vasa uba̱ta̱ wa̱ A̱sulazuva u damma, <<A̱sulazuva n ta pati shi wu, lyawa a na va̱ kpa̱tu'wa̱ esu a̱yi adama a na we ene.>> A̱vu A̱sulazuva a̱ kpa̱tu'wa̱ e esu o ulobo u na wa yuwusan a̱ga̱nda̱'a̱, a̱vu we ene masasan ma gbain ma na ma̱ ri yu uka̱nda̱ruwu na̱ Elisha oɓolo na̱ ido na̱ ikeke yi ido ya akina.*

18 A mantsa ma na aa aza a Suriya a̱ zura̱i a̱ cipa̱ adama a na a̱ riya̱ yi nu uvon, a̱vu Elisha pati ya̱ A̱sulazuva u damma, <<A̱sulazuva lyawa vu zuwa o'o nrumba̱!>> A̱vu gba u usu avasa yi a̱vu u zuwa le o'o nrumba̱. 19 A̱vu Elisha damma le, <<Uba̱ta̱ u nda ɗa ure'e shi, agba pa ɗa lyuci'i shi. Kuru nu mu adama a na ma tara ɗu a̱ tyo uba̱ta̱ u vuma na yaa zama.>> Adama o ndolo a̱vu u tara le a̱ tyo a̱ lyuci va Samariya.

20 A mantsa ma a uwai a̱tsuma̱ aa Samariya, a̱vu Elisha vasa uba̱ta̱ wa̱ A̱sulazuva u damma, <<Lyawa a na va̱ kpa̱tu'wa̱ le esu adama a na ene.>> A̱vu A̱sulazuva a̱ kpa̱tu'wa̱ le esu a̱vu ene aciya le e memere ma a aza aa Samariya.

21 Ana mogono ma Isra'ila me ene nle a̱vu u damma Elisha, <<Dada va̱, mu una le? Mu una le gogo?>>

22 A̱vu Elisha damma, <<She vu una le wan. Cine vo una a̱soja a na vu remei uba̱ta̱ wu uvon na̱ Matsun me pe'eni na aya a̱ wu? Vu ca le ilyalya na̱ mini mo oso a na a lyuwa a̱vu o sowo, adama o ndolo a̱vu vu lyawa le a̱ ka̱ra̱ adama a na a̱ ka̱mba̱ uba̱ta̱ wu zagbain le.>> 23 A̱vu u foɓoo le a̱buki a gbain. A mantsa ma na o kotoi alya no o sowoi, a̱vu u lyawa le a na a̱ ka̱ra̱, a̱vu a̱ ka̱ra̱ a̱ tyo uba̱ta̱ wu zagbain le. Diga a mantsa mo ndolo, aza a Suriya a̱ da̱shi 'ya̱wa̱a̱ na aza a Isra'ila nu uvon shi.

24 Ele lo a̱vu Ben Hada mogono ma Suriya mo ɓoloto a̱soja a̱yi, a̱vu a̱ ka̱ra̱ a̱ tyo adama a na a̱ ka̱nda̱ruwa̱ iɗa ya Samariya adama a na a yuwan uvon na̱ yi. 25 Adama a na a jima ta̱ a na a̱ ka̱nda̱ruwa̱i iɗa'a, reve ambulu a uwa a̱ ilyuci'i, hali na a winai aaci o mololi azurufa kupakunla̱, etele a muɗa waru a ta wina san le azurufa ton.

26 Uranu u ro mogono ma Isra'ila ma̱ da̱na̱ ta̱ a mmalu o ukari u lyuci, a̱vu ka ro saala u damma, <<Zagbain wuma wa wu u jima! Vu kamba mu, mogono!>>

27 A̱vu mogono ma̱ usuyi u damma, <<Nna̱ A̱sulazuva aa kamba wu shi, cine maa gura kamba wu? Diga o osoroto, ko diga uba̱ta̱ u kpoko u mini ma̱ ina̱bi?>> 28 A̱vu mogono ma̱ da̱shi damma ka'a, <<Nye ɗa vu cigai?>>

A̱vu ka'a usu u damma, <<Ka nda ɗa dammai tsu una mawun ma va adama a na tsa tama yi ana'an, a̱vu nu usana u tawa a̱vu tsu tama za va yi. 29 Ne ɗa tsu su'wain mawun ma̱ va̱ a̱vu tsu tama. Amma a na usana u tawai a na'an n damma niyi tsu una za va̱ yi tsu tama, a̱vu u soko yi.>>

30 Ana mogono ma uwwai ne a̱vu wu kara a̱tugu a̱yi. Adama a na mogono ma̱ da̱na̱ ta̱ a mmalu o ukari u lyuci'i, a̱vu ama ene yi u oto wu na̱ a̱tugu a̱tsuma̱la̱ngu a̱ lipu va̱ yi. 31 A̱vu mogono ma damma, <<Lyawa A̱sula̱ a ca mu oforo o usuɗu lon, n na̱ n koɗo aciya Elisha ulobo wa Shafa a na'an shi!>> 32 A̱vu mogono ma̱ lyungu nanza a na wa̱ 'ya̱wa̱ u reme Elisha.

Elisha gba da̱na̱ ta̱ nden a̱tsuma̱ o u'wa wa̱ yi oɓolo na̱ mbara ma Isra'ila. Amma babu malingata'a u rawa, a̱vu Elisha damma mbara'a, <<Ye ene ta̱ ko, za mo una ma nda ma̱ lyungu ta̱ a na a̱ ta̱wa̱ o koɗo mu aci. To, amma n na̱ malingata'a ma rawa, a̱vu i ɓa̱ru wu una̱ntsu i ɓa̱ru yi ugbamu adama a̱yi. Babu ujumu za na lyungu ni yi u to toni yu ure.>>

33 Babu Elisha uɓa̱ruwu una̱ wa̱ yi, a̱vu malingata'a ma rawa a̱vu mogono ma damma, <<A̱sulazuva a ɗa a̱ ta̱wa̱a̱ n tsu na̱ cu'un va̱ a̱tsuma̱lima̱ a nda. Adama nye ɗa ma zuwa okolo va̱ uba̱ta̱ wa̱ A̱sulazuva waru?>>