1 A̱vu mogono ma̱ lyungu wa̱a̱ mbara ma a Yahuda na̱ Urishelima a̱vu o ɓoloto uba̱ta̱ wa̱ yi suru. 2 A̱vu mogono ma̱ ka̱ra̱ a̱ 'ya̱wa̱ a̱tsuma̱ a̱ A̱a̱'isa̱mapaɗa a̱ A̱sulazuva oɓolo na ama a Yahuda, na a aza a Urishelima, na̱ nan ganu na ama̱sula̱, na a ama suru zagbain na̱ za ke'en. A̱vu u ɗe nu una̱ atsuvu le suru adanshi a na a̱ ri a̱tsuma̱ aatagada a nzuwulai, za na a̱ tsura̱i pe a̱tsuma̱ a̱ A̱a̱'isa̱mapaɗa a̱ A̱sulazuva. 3 A̱vu mogono me e isawan zuzu na atsura a̱vu u yuwisan nzuwulai n sa'avu elime a̱ A̱sulazuva, a na wo toni A̱sulazuva a̱vu u kuru udammu wa̱ yi, nu uritosu wa yi na̱ wila̱ na̱ Ookolo a̱ yi na̱ wuma wa̱ yi suru, a̱vu u yuwan ulinga ni ili i na a ɗana yi pe a̱tsuma̱ aatagada nzuwulai'i. A̱vu ama suru a̱ kuru yi adama nzuwulai'i. 4 A̱vu mogono ma damma Hilikiya ganu gbain, na̱ ganu na ri na̱ tsugbain ire na̱ aza e piri yu una̱ntsutsu o uta̱a̱ itana i na i ri pe a̱tsuma̱ A̱a̱'isa̱mapaɗa a̱ A̱sulazuva na̱ suru itana ya Ba'al na aza a Ashera, na̱ ozo o urana na̱ woto na̱ a̱za̱ a̱ italyo'o ya zuva. A̱vu u kuloto le alanga Urishelima atsusa o uka̱ri wa Kidron a̱vu u pura̱ okomo le a̱ tyo Betel.* 5 Reve u gba̱ra̱ nan ganu a̱ musula̱ aza a na ngono ma a Yahuda n zuwai a na a̱ kuloto ili i ma̱guru ba̱ta̱ va̱ a̱ga̱nda̱, a̱tsuma̱ e ilyuci ya a Yahuda na̱ suru Urishelima, aza a na a̱ kula̱tosu ili i ma̱guru a̱ tyo ya Ba'al, na̱ a̱ tyo o urana na̱ woto na̱ italyo'o ya zuva na̱ suru ili i na a yuwain zuva. 6 A̱vu u tara a̱ma̱li Ashera diga a̱tsuma̱ A̱a̱'isa̱mapaɗa a̱ A̱sulazuva a̱ tyo o uka̱ri wa Kidron, alanga a Urishelima a̱vu u kuloto yi ɗe. Reve wu ira yi tsa okomo avu u baza ma̱buta̱'a̱ zuva vo oso ama e pere. 7 A̱vu wu mura asula ashakala a̱ a̱a̱'isa̱ a̱ma̱ci na ali aza a na a̱ da̱na̱i a̱tsuma̱ a̱ A̱a̱'isa̱mapaɗa a̱ A̱sulazuva, uba̱ta̱ u na a̱ma̱ci a̱ tsu ɗava sa itana adama a yuwan Ashera a̱ga̱nda̱.*

8 A̱vu wu uta̱a̱ suru nan ganu aza a na a̱ da̱na̱i a̱tsuma̱ e lyuci ya Yahuda, a̱vu u lungusa̱ uba̱ta̱ e idaba ya̱ a̱ga̱nda̱ a̱ a̱ma̱li e le, diga Geba a̱ tyo Biyasheba, uba̱ta̱ u na nan ganu a̱ tsu kuloto ili i ma̱guru. Reve wu ɓoso a̱ma̱li a na a̱ ri o na̱ntsutsu wu uwata wa Josuwa, gwamna lyuci'i, za na ri o ukere wu ugula̱ wu uwata wi iɗa'a. 9 Suru na̱ ne, nan ganu aza a na a̱ da̱na̱i uba̱ta̱ wa̱ a̱ga̱nda̱, a̱ 'ya̱wa̱ a yuwan a̱ a̱ga̱nda̱ a masa'a ma̱ A̱sulazuva a̱tsuma̱ Urishelima shi, amma a gura ta̱ a tama opopofu a na a̱ ri na̱ wolilo shi oɓolo na̱ a̱za̱ le nan ganu.

10 A̱vu mogono mo o to Tofe idaba, uba̱ta̱ wa̱ a̱ a̱ga̱nda̱ a na a̱ ri yu upasu wu Uka̱ri wa̱ Hinom, ununa babu za na a gura ca ulobo wa̱ yi ko usheli wa̱ yi kucci vu ukula̱tosu uba̱ta̱ wa Mole.* 11 A̱vu u tawa uruma wi ido aza a na mogono ma a Yahuda ma zuwai ɗe adama a̱ a̱ga̱nda̱ a̱ tyo uba̱ta̱ o urana, diga o una̱ntsutsu wa̱ A̱a̱'isamapaɗa a̱ A̱sulazuva. A̱ da̱na̱ ta̱ pe a̱tsuma̱, zuzu na aasula a zagbain na a̱ tsu ɗe Natan Mele. A̱vu Josiya kuloto ikeke yi ido aza a na a yuwan yi urana. 12 A̱vu wu ɓoso musa'a aza a na ngono ma a Yahuda n suwai zuva va aasula o u'wa u mogono Ahaz, na̱ musa'a aza a na Manase suwai a asula re a na ri pe A̱a̱'isa̱mapaɗa a̱ A̱sulazuva. Avu u tawa le pe, wu ɓoso le miri miri a̱vu wo oco le a̱tsuma̱ o Uka̱ri wa̱ Kidron.* 13 A̱vu mogono mo o to uba̱ta̱ a̱ma̱li idaba a na a̱ ri asana a Urishelima a̱ tyo wu uyagi a aagaɗi o ukototosu, aza a na Sulemanu Mogono ma Isra'ila ma suwayi Ashitore musula̱ mi idaba ya̱ aza a Sidon na̱ Kemosh a̱ma̱li a̱ Mowa na̱ Mole a̱ma̱li a Amon.* 14 A̱vu Josiya mumura atsura uba̱ta̱ wa̱ a̱ a̱ga̱nda̱ le, a̱vu wu gasa a̱shuwutsu a Ashera, a̱vu u ɓa̱ru uba̱ta̱'a̱ na̱ etele ama.

15 Waru fo na̱ masa'a ma na ma̱ a̱ ri a Betel, uba̱ta̱ wa̱ a̱ a̱ga̱nda̱ a na Yerobowam ulobo wa Neba ma suwai. Za na zuwai ama a Isra'ila a yuwain unusu, oɓolo nu masa'a mo o uba̱ta̱ wa̱ a̱ a̱ga̱nda̱ aagaɗi suru wu ɓoso le ta̱. Avu u kuloto u ba̱ta̱ wa̱ a̱ a̱ga̱nda̱ wo o okomo, a̱vu u kuloto a̱a̱shuwutsu a̱ a̱ma̱li a ka Ashera.* 16 Ana mogono Josiya vadala yi, a̱vu we e ne oso a na a̱ ri ɗe aatali. A̱vu u zuwa adama a na a̱ ta̱wa̱a̱ na̱ etele ele zuva Masa'a avu a̱ kuloto le ɗe, adama o'o to yi idaba, cine adanshi A̱sulazuva a dammai o una̱ u vuma va A̱sula̱ za na dammai ili i nda.* 17 A̱vu mogono ma damma, <<Cu'un vo oso ne ɗa me enei nda?>>*

A̱vu ama lyuci'i a̱ usu a damma, <<Oso a za vuma va̱ A̱sula̱ ɗa za na ta̱wa̱i diga a Yahuda a na u dammai cu'un vi ili i na vu yuwain a Masa'a ma̱ Betel.>> 18 A̱vu u damma, << Lyawa niyi, She vuma tara etele yi wan.>> A̱vu a lyawa etele yi lo goon, oɓolo na̱ etele a vumava̱sula̱ za na o uta̱i diga Samariya.

19 A̱vu Josiya lungusa̱ masa'a oɓolo na̱ ba̱ta̱ va̱ a̱ga̱nda̱ aza a na a̱ da̱na̱i e ilyuci ya Samariya, aza a na ngono ma aza a Isra'ila n yuwain, na a zuwai A̱sulazuva a yuwain upan. Reve u yuwan ne ele una̱ uta̱ na̱ cine u yuwain ɗe Betel. 20 A̱vu wu una nan ganu a̱ a̱za̱ a̱ a̱ma̱li a na a̱ ri uba̱ta̱ wa̱ a̱ga̱nda̱ ɗe a musa'a ma na ma̱ a̱ ri ɗe, reve u kuloto ɗe etele ama zuva le. A̱vu u ka̱mba̱ Urishelima.

21 A̱vu mogono ma damma ama suru, <<Yuwain A̱buki a Mapasa adama A̱sulazuva A̱sula̱ a̱ ɗu, ununa u ri uɗanu a̱tsuma̱ Aatagada a Nzuwulai.>> 22 Adama na ko to a̱ da̱shi yuwan A̱buki a Mapasa tsun nda shi, acina mantsa ma na a̱ tsura̱i a̱za̱ o uge'etosu a Isra'ila, ko a mantsa ma̱ ngono ma Isra'ila na̱ Yahuda shi. 23 A̱tsuma̱ a aa'wan kupa na̱ kunla̱ tsa tsugono mogono Josiya, a yuwan ta̱ na̱ a̱buki a Mapasa uba̱ta̱ wa̱ A̱sulazuva a̱tsuma̱ a̱ Urishelima. 24 Adama o ndolo, Josiya tawa ta̱ aza na o ɓoloso aci na̱ ruhu va̱ a̱kwa̱kwa̱ na̱ yindi, na̱ musula̱ mu u'wa, na̱ suru ili i na i ri idaba a na a suwai a̱tsuma̱ e iɗa ya Yahuda na̱ a̱tsuma̱ a̱ Urishelima. U yuwan ta̱ ne adama a na wa̱ shiton uritosu u wila̱ u na a ɗanai a̱tsuma̱ aatagada na Hilikiya ganu tsura̱i a̱tsuma̱ A̱a̱'isa̱mapaɗa a̱ A̱sulazuva. 25 Ko ta̱ a̱tsura̱ ko a̱ca̱pa̱ ko elime a̱ yi mogono tsa Josiya shi, za na vadala yi uba̱ta̱ wa̱ A̱sulazuva na̱ Ookolo yi suru na̱ wuma wa̱ yi suru nu ucira wa yi, cine wila̱ wa Musa u dammai.

26 Suru na̱ ne, A̱sulazuva a vadala diga a̱tsuma̱ o upan wu usuɗu wa̱ yi shi, za na upan wa̱ yi u da̱na̱i goon uba̱ta̱ wa aza a Yahuda, adama e ili i na suru Manase yuwain za na u zuwai A̱sulazuva a yuwain upan.* 27 A̱vu A̱sulazuva a damma, <<N ta̱ tawa Yahuda diga elime a̱ va̱, ununa n tawai Isra'ila, a̱vu waru n tawa urewesu u va̱ uba̱ta̱ wa Urishelima, lyuci na n ɗangulai, na̱ A̱a̱'isa̱mapaɗa a nda, na n dammai, <Aala a̱ va̱ a̱ ta̱ da̱na̱.> >>*

28 Gogo suru linga na Josiya yuwain a tsugono tsa yi, nu suru ili i na u yuwain, a̱ da̱na̱ ta̱ pe uɗanu a̱tsuma̱ aatagada alabari o ngono ma a Yahuda. 29 A mantsa ma ndolo ma ɗa Firi'awuna Neko mogono ma Masar ma̱ ka̱ra̱i a̱ tyo uba̱ta̱ o Uɗolu wa Yufiriti tsura̱ u kamba Mogono ma Asuriya uvon. A̱vu mogono Josiya ma̱ ka̱ra̱ adama a na wa yuwan uvon na̱ yi, ɗaɗa Firi'awuna Neko cina ni yi avu wu una yi uba̱ta̱ o uvon ɗe Megido. 30 A̱vu agbashi a̱ yi a tara lipu va̱ yi a̱tsuma̱ e ikeke yi ido yu uvon ya̱ yi diga Megido a̱ tyo Urishelima uba̱ta̱ u na a̱ ciɗo ni yi oso a̱ yi.

A̱vu ama e iɗa'a a̱ tsuwa̱a̱n Jehoha ulobo wa Josiya mani'in na wo o'wo mogono me ele o una̱ wa dada va̱ yi.

31 Jehoha da̱na̱ ta̱ na a aa'wan ushin na̱ aza a ta'atsu a mantsa ma na wo o yi mogono, a̱vu yuwan tsugono tsa woto ta'atsu a̱tsuma̱ a Urishelima. Aala mma va yi ɗa Hamuta, usheli wa Irimiya, vuma va Libina. 32 A̱vu Jehoha yuwan iwuya elime a̱ A̱sulazuva, cine nkaya ma̱ yi n yuwain.

33 A̱vu Firi'awuna Neko mogono ma Masar me remei a̱vu u ɓa̱ru yi a̱tsuma̱ lyuci va Ribla e iɗa ya Hamat, adama a na wa̱ kuɗa̱ a yuwan tsugono tsa Urishelima, a̱vu u zuwa iɗa'a adama a na a tsupa utafa ukpaku azurufa oɓolo na̱ zinariya. 34 A̱vu Firi'awuna Neko mogono ma Masar ma̱ zuwa Eliyakim ulobo wa Josiya mogono una̱ wa dada va̱ yi. A̱vu u vadala aala a̱ yi a̱ tyo Yehoyakim. Amma a̱vu u tara Jehoha a̱ tyo Masar, ɗe ɗa u kuwa̱i.*

35 Yehoyakim tsupa ta̱ Firi'awuna Neko azurufa na̱ zinariya cine u cigai. Adama u gura tsupa, a̱vu u paɗaa ama e iɗa a̱ yi utafa adama a na wa̱ tsura̱ azurufa na̱ zinariya u tsupa Firi'awuna ili i na u damma yi.

36 Yehoyakim da̱na̱ ta̱ na a aa'wan ushin no ozo o ton a mantsa ma na wo o yi mogono, a̱vu yuwain tsugono tsa Urishelima a aa'wan kupa na̱ za̱ ta̱. Aala mma va yi ɗa Zebida, usheli wa Fedaya za va Ruma.* 37 A̱vu u yuwan iwuya elime a̱ A̱sulazuva, cine nkaya ma̱ yi n yuwain.