1 Ka vuma ro a̱tsuma̱ o oɓolo a ama̱sula̱ 'ya̱wa̱ ta̱ uba̱ta̱ wa Elisha u damma, <<Vali va̱ aagbashi a̱ wu a̱ kuwa̱ ta̱, agba vu reve ta̱ a na a̱yi vuma ɗa na shi a uwwusa wovon wa̱ A̱sulazuva. Amma gogo a̱yi ɗa nda za ro na oo tono yi utan u ta̱wa̱i adama u tara olobo e re a̱ va̱ o o'wo yi agbashi.>>

2 A̱vu Elisha damma ka'a, <<Nye maa yuwaan wu? Damma mu, nye vu ri na̱ a̱yi o u'wa wa̱ wu?>>

A̱vu ka'a u damma, <<Aagbashi a̱ wu a̱ ri ni ili i ro pe shi, she mamani'in ma̱ zetun goon.>>

3 A̱vu Elisha damma ka'a, <<'Ya̱wa̱ uba̱ta̱ wu nron mu nden ma̱ wu vu kopo nden m mani'in n na n ri ni ili pe shi. She vu kopo wa'a wan. 4 Reve vu uwa a aasula vu ɓa̱ru una̱ntsu a̱vu no olobo a̱ wu. Vu tsun mani'in a̱ nde'en suru, za na shiwan vu zuwa yi a̱ nge'en.>>

5 A̱vu gba ka'a u ka̱ra̱ u lyawa yi. A̱vu u ɓa̱ru una̱ntsu a̱yi no olobo a̱yi. Reve o olobo a̱yi ta̱wusa̱a̱ yi na̱ nde'en a̱vu u uwa a̱ tsusun pe mani'in. 6 Ana nde'en suru a shiwain, a̱vu u damma ulobo wa̱ yi, <<Ta̱wa̱a̱ mu na̱ za ro.>>

Amma a̱vu u usu, <<Ko meden ma̱ ta̱ ma buwa shi.>> Ɗaɗa mani'in ma lyawai mota̱. 7 A̱vu u 'ya̱wa̱ u damma vuma va̱ A̱sula̱'a̱, reve a̱yi u damma yi, <<'Ya̱wa̱ vu wina mani'i'in vu tsupa utan wa̱ wu, ili i na i buwai gba a̱vu no olobo a̱ wu i tsura̱ ili i na yaa lyuwa.>>

8 Urana u ro, reve Elisha 'ya̱wa̱ a̱ lyuci va̱ Shunem. Ka vu utsuru ro da̱na̱ ta̱ pe, a̱vu u banu Elisha wi isawan u lyuwa ilyalya o u'wa wa̱ yi. Diga lo, nu u kuru na̱ nlo suru, u tsi isawan ta̱ lo u lyuwa ilyalya. 9 A̱vu ka'a u damma vali va̱ yi, <<N reve ta̱ a na vuma na a̱ ta̱wusa̱ pa kuci vuma va akiza va̱ A̱sula̱ ɗa. 10 Lyawa tsu suwa masula ɗe zuva, a̱vu tsu zuwaa yi a̱a̱ga̱da̱ na apada no ootogu na̱ fitila ɗe. Nu u ta̱wa̱ uba̱ta̱ u tsu biti u ta gura da̱nu pe.>>

11 Urana u ro a na Elisha ta̱wa̱i lo, a̱vu u kumba a aasula a̱ yi a̱vu u von. 12 A̱vu u damma aagbashi a̱ yi Gehazi, <<Ɗewe mu ka va Shune'um.>> Ɗaɗa u ɗe niyi, reve wisawan elime a̱ yi. 13 Ɗaɗa Elisha dammai aagbashi a̱ yi Gehazi, <<Damma ka'a, <A̱yi ɗa nda vu yuwaan tsu a̱ga̱nda̱ a nda suru, nye aa yuwaan wu? A yuwaan adanshi o una̱ wa̱ wu uba̱ta̱ u mogono ko uba̱ta̱ wa yali va̱ a̱soja?> >>

A̱vu ka'a u usu, << O'o n ta̱ nden a̱tsuma̱ a ama a̱ va̱, n ciga ili i ro shi.>>

14 A̱vu Elisha ece Gehazi, <<Nye aa yuwaan yi?>>

Reve Gehazi damma, <<To, u ri nu ulobo shi agba vali va̱ yi ɗa nda kutsai ɗe.>>

15 Reve Elisha damma, <<Ɗe yi u ta̱wa̱.>> Ɗaɗa Gehazi ɗe niyi, reve u rawa wi isawan o una̱ntsu wa aasula'a. 16 Reve Elisha damma yi, <<Acina mantsa ma nda nkoli, vu te sheɗe ulobo ne e ekere a̱ wu.>>*

Reve ka'a u damma, <<O'o, zagbain va̱, she vu luluma̱ mu wan!>>

17 Reve gba ka'a u yuwan a̱tsuma̱, reve a na aa'wan a tawai a mantsa mo ndolo gan, a̱vu u matsan ulobo, cine Elisha damma niyi.

18 A na ulobo'o u kungwai, reve urana u ro wu uta̱ a̱ 'ya̱wa̱ uba̱ta̱ wa dada va̱ yi o uɗuma̱ za na shi oɓolo na̱ a̱za̱ o ugasa. 19 Reve u saala dada va̱ yi, <<Aaci a̱ va̱! Aci a̱ va̱!>>

Reve dada va̱ yi damma aagbashi a̱ ta̱, <<Sheɗe yi a̱ tyo o u'wa ya mma va̱ yi.>> 20 Ana aagbashi'i u sheɗe niyi a̱ tyo ya mma va̱ yi, a̱vu ulobo'o u von a aagutsu a mma va̱ yi hali urana u rawa a aci, reve gba u kuwa̱. 21 A̱vu ka'a u kumba zuva a̱vu u voton yi a̱ a̱a̱ga̱da̱ a vuma va̱ A̱sula̱, a̱vu u ɓa̱ru una̱ntsu a̱vu u ka̱ra̱ o uta̱. 22 Reve u ɗe vali va̱ yi u damma, <<Yuwan ankuri lyunguwa̱ mu na aagbashi a̱ ta̱ na̱ mololi adama n 'ya̱wa̱ uba̱ta̱ u vuma va̱ A̱sula̱ gogogo a̱vu n ka̱mba̱.>>

23 A̱vu vali'i we ece yi, <<Adama a̱ nye va̱a̱ 'ya̱wa̱ ya̱'a̱ yi ana'an? Ana'an Woto u Sa'avu wa̱ a̱buki a ɗa shi ko gba Ashibi shi.>>*

A̱vu u usu, <<Babu ili i ro gbaga ɗa.>>

24 A̱vu u zuwaa mololi urutsu a̱vu u damma aagbashi a̱ yi, <<Gba̱ra̱ mololi, she vu yuwan ben adama a̱ va̱ wan she na̱ n damma wu.>> 25 Ɗaɗa u remei ure a̱vu u rawa uba̱ta̱ u vuma va̱ A̱sula̱ a Masasan ma Kame. Ana vuma va̱ A̱sula̱ ene niyi diga makasu, a̱vu u damma aagbashi a̱ yi Gehazi, <<Ka̱lyuwa̱! Ndeɗe ka va Shunem! 26 Suma vu ga'an na̱ a̱yi ve ece yi, <Vu ta̱ gbaga? Vali va̱ wu ta̱ gbaga? Mawun ma̱ wu ma̱ ta̱ gbaga?> >>

A̱vu ka'a u usu, <<Babu ili i ro gbaga ɗa.>>

27 Ana u rawai uba̱ta̱ wa Elisha a masasan, reve u gbagbala ana a̱ yi. A̱vu Gehazi rawa zuzu tsa̱ra̱ u ca̱co yi, amma reve Elisha damma yi, <<Lyawa yi! U ta̱ na̱ a̱tsumola̱ngu lon, agba A̱sulazuva o sokoo mu ta̱ aɗa a nda agba u damma mu ili i na i zuwai shi.>>

28 Reve Ka'a u damma, <<Zagbain, m pati wu ta̱ vu ca mu ulobo? N damma she vu luluma̱ mu wan shi?>>

29 A̱vu Elisha damma Gehazi, <<Nla̱ utugu wa̱ wu a gbakala va̱ wu, vu tara aaɗanga a̱ va o ukere wa̱ wu a̱vu vu suma. Na̱ vu ga'an na̱ nanza she vu ca̱sa̱ yi wan, waru na̱ nanza ca̱sa̱ wu, she vu usu yi wan. 'Ya̱wa̱ vu kuru aaɗanga a̱ va̱ o urewesu wu ulobo'o.>>

30 Reve mma mawu'un u damma Elisha, <<N kucina ta̱ na̱ A̱sulazuva a na a̱ ri wuma, oɓolo na̱ wuma wa̱ wu, maa lyawa wu shi.>> Ɗaɗa Elisha 'yoyin reve u kuru yi.

31 Reve Gehazi uwa elime, reve u kuru aaɗanga a Elisha o urewesu wu ulobo'o, agba babu ilama ko oroci a̱ wivuwun. Ɗaɗa Gehazi ka̱mba̱i ya Elisha, reve u damma yi, <<Ulobo'o u 'yon shi.>>

32 Ana Elisha rawai o u'wa'a, ulobo u ɗaɗa gba ndolo nven ukwa̱ a̱ a̱a̱ga̱da̱ a̱ yi. 33 Reve u uwa, a̱vu u ɓa̱ru una̱ntsu diga a̱yi she ulobo'o, reve u yuwan avasa a̱ tyo e ekere a̱ A̱sulazuva. 34 Reve u von a̱ lipu vu ulobo'o, reve u ɓolo una̱ wa̱ yi nu una̱ wu ulobo'o, esu a̱ yi ne esu o ulobo'o, ekere a̱ yi ne ekere o ulobo'o. Ana wu ba̱ruwa̱i lipu va̱ yi a̱ lipu vu ulobo'o, a̱vu lipu vu ulobo'o u teme a̱ ka̱mba̱sa̱ sheshen.* 35 Reve Elisha 'yon u ka̱ra̱ a mmalu, nu u 'ya̱wi nu u ka̱mbi a̱tsuma̱ a aasula'a. Reve u kumba a̱ga̱da̱'a̱ reve u vowison a̱ lipu vu ulobo'o. Reve ulobo'o wu disha toto ucindere a̱vu u kpa̱tu'wa̱ esu a̱ yi!

36 Reve Elisha ɗe Gehazi a̱vu u damma, <<Ɗewe mu ka va Shune'um.>> A̱vu u ɗe yi. Ana u uwai, reve Elisha damma yi, <<Tara ulobo wa̱ wu!>> 37 A̱vu u uwa u kingyo a̱ ma̱ka̱ka̱n ma̱ yi. Reve u tara ulobo wa̱ yi u ka̱ra̱ o uta̱.

38 A̱vu Elisha ka̱mba̱ Gilgal, agba a̱ da̱na̱ ta̱ a yuwusan ambulu upasu wi iɗa'a. A mantsa ma na oɓolo a ama̱sula̱ a̱ da̱na̱i e iɓolo na̱ a̱yi, a̱vu damma aagbashi a̱ yi, <<Punga̱ upondo u gbain vu yuwaan ama̱sula̱ a nda usa'an.>>

39 Za ta̱ a̱tsuma̱ e le 'ya̱wa̱ ta̱ atsusa adama u zami a̱vu'un reve u tsura̱ otopino ataci a̱ ina̱bi. A̱vu wu taɓa umatsun wa̱ yi a̱vu u shiton utugu wa̱ yi. Ana u ka̱mba̱i a̱vu wu paɗa le a̱vu u tsun le a̱tsuma̱ o upondo wu usa'an ko na wo o'woi ko za reve nye i ɗa shi. 40 A̱vu e kenee ama'a usa'an, reve gba a na e temei alya, a̱vu a saala, <<Vuma va̱ A̱sula̱, tsukono tsa̱ ta̱ pe a̱tsuma̱ o upondo'o!>> Agba a gura lyuwa yi shi. 41 A̱vu Elisha damma, <<Ta̱wa̱i na̱ yira.>> A̱vu u tsun pe a̱tsuma̱ o upondo'o, reve u damma, <<Cayi ama a lyuwa.>> A̱vu gba wo o'wo babu pe tsukono a̱tsuma̱ o upondo'o.

42 Vuma ro uta̱ ta̱ diga Ba'al Shalisha, a̱vu ta̱wa̱a̱ vuma va̱ A̱sula̱ na akpatali o opopofu a na a yuwain ni icu'un i muwun mu ufaru no oroci a yitabo ushin, na akita e ishina i sa'ani a̱tsuma̱ a̱ a̱buhu a̱ yi. Reve Elisha damma, <<I ca ama'a adama a lyuwa.>>

43 Amma a̱vu aagbashi a̱ yi a damma, <<Vu ta majiyan u ta rawa ama ukpaku (100)?>>

Amma a̱vu Elisha usu yi, <<Ca ama'a a lyuwa, adama a na A̱sulazuva a ɗa a dammai, <A ta lyuwa hali akapi a buwa.> >> 44 A̱vu u ca ama'a, a̱vu a lyuwa hali akapi a pasa, cine adanshi a̱ A̱sulazuva a dammai.