1 A̱tsuma̱ a aa'wan ushin na aza ta'atsu o tsugono tsa mogono Yowash ulobo wa Ahaziya mogono ma a Yahuda, Jehoha ulobo wa Yehu me temei tsugono tsa Isra'ila a̱tsuma̱ a Samariya. A̱vu u yuwan tsugono tsa a aa'wan kupa na̱ a̱za̱ cindere. 2 Amma u yuwan ta̱ iwuya esu A̱sulazuva a na u yuwain mmalu a̱tsuma̱ o ure wi iwuya ya Yerobowam ulobo wa Neba, za na zuwai ama a Isra'ila a yuwain unusu agba u vadala diga uba̱ta̱ wi i toni i le shi. 3 A̱vu A̱sulazuva a yuwan upan na aza a Isra'ila, a̱vu u lyuwa elime a ca su le e ekere mogono Hazayel ma Suriya ne e ekere o ulobo wa̱ yi Ben Hada. 4 Reve Jehoha patiya ya̱ A̱sulazuva, a̱vu A̱sulazuva a̱ usu yi, adama a na we ene'e ta̱ a̱tsuma̱lima̱ a na Mogono ma Suriya ma aa ca su aza a Isra'ila. 5 Reve A̱sulazuva a ca aza a Isra'ila za vi iwawi, a̱vu a la'a diga e ekere aza a Suriya. A̱vu ama Isra'ila a̱tsura̱ nden ma asuvu ununa a̱ da̱na̱i ɗe nu ufaru. 6 Suru na̱ ne a vadala diga uba̱ta̱ wu unusu u le za vu u'wa wa Yerobowam shi, aza a na u zuwai ama a Isra'ila o toni shi, a̱vu a lyuwa elime na̱ le. Amma a̱vu a lyawa musula̱ ma Ashera a̱tsuma̱ a Samariya. 7 Babu ili i na i buwai ya aza a Jehoha she a̱soja a na a tsu kumbusa ido kupoton goon, ni ikeke yi ido yu uvon kupa, na̱ a̱soja e iɗa ukpakukupa (10,000). Adama a na mogono ma Suriya ma̱ kototo ta̱ ili'i suru suru, reve wo o ununa vu revei ma̱buta̱ ma̱ tsu lapa.

8 Akapi o ulinga u na Jehoha yuwain, na̱ suru linga va̱ yi nu ulyuwu we elime, a̱ da̱na̱ ta̱ tu pe uɗanu a̱tsuma̱ a aatagada a alabari o ngono ma Isra'ila. 9 A̱vu Jehoha kuwa̱ ucina nkaya ma̱ yi, a̱vu a̱ciɗyo yi a̱tsuma̱ a Samariya. A̱vu ulobo wa̱ yi Yowash mo o mogono o una̱ wa̱ yi.

10 A̱tsuma̱ a aa'wan mata'atsu na̱ a̱za̱ cindere o tsugono tsa mogono Yowash va Yahuda, reve Yehowash ulobo wa Jehoha teme tsugono tsa aza a Isra'ila a̱tsuma̱ a Samariya, a̱vu u yuwan tsugono tsa aa'wan kupa na̱ a̱za̱ ta̱li. 11 U yuwan ta̱ iwuya elime A̱sulazuva. Agba u vadala diga a̱tsuma̱ o unusu u na Yerobowam ulobo wa Neba ma a zuwai ama a Isra'ila a yuwain shi. Amma a̱vu u lyuwa elime na̱ le.

12 Akapi o ulinga wa Yowash, na̱ suru ili i na u yuwain nu ulyuwu we elime wa̱ yi, oɓolo nu uvon u na u yuwain na̱ Amaziya mogono ma a Yahuda, a̱ da̱na̱ ta̱ tu pe uɗanu a̱tsuma̱ a aatagada a alabari o ngono ma a Isra'ila. 13 A̱vu Yowash kuwa̱ ucina nkaya ma̱ yi, a̱vu a̱ ciɗo yi a̱tsuma̱ a Samariya oɓolo na̱ ngono ma aza a Isra'ila. Reve Yerobowam ulobo wa̱ yi u da̱nu ootogu o tsugono tsa a̱ yi o una̱ wa̱ yi.

14 A mantsa ma na Elisha remei ubanakun u na u kuwa̱i. A̱vu Yowash mogono ma aza a Isra'ila ma̱ ka̱ra̱ a̱ tyo uba̱ta̱ wa̱ yi, a̱vu u yuwan mesun elime a̱ yi. A̱vu u damma <<Dada va̱! Dada va̱! Ikeke yi ido, na akumbi e ikeke yi ido ya Isra'ila!>>*

15 A̱vu Elisha damma yi, <<Tara utan ni iliya.>> Reve u tara. 16 A̱vu u damma mogono ma aza a Isra'ila vu tara utan e ekere a̱ wu, a mantsa ma na u tarai, a̱vu Elisha kuru ekere a̱ yi ekere mogono.

17 A̱vu u damma yi, <<Vu kpa̱tu'wa̱ usowoto wu upepu u na we idanusan asana.>> A̱vu u kpa̱tu'wa̱ usowoto wu upepu'u. A̱vu Elisha damma yi, <<Vu tewin liya'a!>> A̱vu gba u tewiyin. A̱vu Elisha damma, <<A̱yi nda ɗa iroci yi iliya wu ulyuwu wa aci a̱ A̱sulazuva ekere aza a Suriya! Vu to kototo aza a Suriya a̱tsuma̱ Afe suru suru.>>

18 A̱vu u dammai yi, <<Tara iliya >> A̱vu mogono ma tara le. A̱vu Elisha damma mogono ma Isra'ila, <<Sapa iɗa.>> A̱vu u sapa yi toto u ta'atsu reve u lyawa ne. 19 A̱vu vuma va̱ A̱sula̱ yuwan upan na̱ yi, a̱vu u damma, <<Vu shi ta̱ a sapa iɗa'a toto ton ko gbashi uta̱li, na̱ tsun ndolo tsa ɗa vu shi o kototo aza a Suriya suru suru. Amma gogo gba vu ta lyuwa yi u ta'atsu ɗa goon.>>

20 A̱vu Elisha kuwa̱ a̱vu a̱ ciɗo yi.

Agba aza a Mowa a̱ tsu ta̱wa̱sa̱ ta̱ nu uvon a̱tsuma̱ a Isra'ila suru aa'wan. 21 Ele lo a̱tsuma̱ o uranu u ro a mantsa ma na aza a Isra'ila a̱ ri ya̱ ciɗosu vuma ro, a̱vu ene oɓolo ama a na a̱ tsu ta̱wusa̱ le nu uvon, babu usa̱n reve a vari lo vuma'a a̱tsuma̱ ason a Elisha. Amma a mantsa ma na lipu vuma'a u ju'wa̱in etele Elisha, a̱vu vuma'a u ka̱mbisa̱ wuma reve u yon mishin wisawan na ana yi.

22 A̱vu mogono Hazayel va Suriya ca aza a Isra'ila a̱tsuma̱lima̱ suru a rana tsugono tsa mogono Jehoha.* 23 Amma a̱vu A̱sulazuva o roco le icigi ni isa'ani ya̱ yi. A̱vu wu uwwa iliyali i le adama a nzuwulai n naa u yuwain na̱ Ibrahim na̱ Ishiyaku na̱ Yakubu. Agba acina a na'an u yuwan majiyan ma na wo kototo le ko u vari le diga elime yi shi.

24 Ana Hazayel mogono ma aza a Suriya ma̱ kuwa̱i a̱vu Ben Hada ulobo wa̱ yi mo o mogono o una̱ wa̱ yi. 25 A̱vu Yowash ulobo wa Jehoha ma̱ tsura̱ ulyuwu we elime aciya a Ben Hada ulobo wa Hazayel a na u usai uba̱ta̱ wa dada va̱ yi Jehoha uba̱ta̱ wu uvon. Toto u ta'atsu u ɗa u lyuwa ni yi, a̱vu u ka̱mbuwisa̱ ilyuci i na a̱ shi a usai a aza a Isra'ila i ɗa suru.