1 Josiya da̱na̱ ta̱ na a aa'wan kunla̱ a na wo o yi Mogono, a̱vu u yuwan tsugono a aa'wan mata'atsu na̱ za ta̱ a̱tsuma̱ Urishelima. Aala a mma va yi ɗa Yedida usheli wa Adaya vuma va Bozuka. 2 A̱vu u yuwan ili i na i ri mejege elime A̱sulazuva u yuwan ta̱ mmalu suru a̱tsuma̱ o ure wa dada va̱ yi Da̱wuda, agba u vadala ugula̱ ko u sa'ani shi.

3 A̱tsuma̱ aa aa'wan kupa na̱ kunla̱ o tsugono tsa Mogono Josiya, a̱vu u lyungu Shafa a̱ tyo a̱ A̱a̱'isa̱mapaɗa a̱ A̱sulazuva. Shafa ulobo wa Azaliya ulobo wa Meshulam za na da̱na̱i za vi iɗana i mogono. Reve Josiya damma, 4 <<Ka̱ra̱ a gawan a̱ 'ya̱wa̱ ya Hilikiya ganu gbain vu zuwai a na we kece ikebe i na a̱ ta̱wa̱ yi A̱a̱'isa̱mapaɗa a̱ A̱sulazuva, a aza a na a̱ a̱za̱ e ipiri yu una̱ntsu o oɓoloto yi diga ekere a ama. 5 Adama le a ca ikebe'e ekere aza a na a̱ ka̱lyuwusa̱ a aza na a yuwusan ulinga a̱ A̱a̱'isa̱mapaɗa. A̱vu ama'a a tsupa a̱ a̱za̱ o ulinga a na a lapulusa A̱a̱'isamapaɗa a̱ A̱sulazuva, 6 na̱ nan kafinta na̱ ozo o ulinga na̱ ozo o usaa. Reve a tsula akpata na̱ atali a sa'ani adama a na a lapula A̱a̱'isa̱mapaɗa a̱ A̱sulazuva. 7 Agba a̱ ri ne ece le cine o una yi ikebe i na a ca n le shi, adama a na a ta yuwusan ulinga u le na amayun.>>*

8 A̱vu Hilikiya ganu gbain damma Shafa za vi iɗana, <<N tsura̱ ta̱ Aatagada a̱ Wila̱ a̱ A̱a̱'isa̱mapaɗa a̱ A̱sulazuva.>> A̱vu u ca Shafa, za na ɗe yi nu una̱. 9 Avu Shafa za vi iɗana ka̱ra̱ a̱ ka̱mba̱ uba̱ta̱ mogono a̱vu u damma yi, <<Agbashi a̱ wu a tara ta̱ ikebe i na i da̱na̱i a̱tsuma̱ A̱a̱'isa̱mapaɗa a̱ A̱sulazuva, a̱vu a ca aza a na a̱ ri o ulinga nu ka̱lyuwusa̱ wa̱ A̱a̱'isa̱mapaɗa.>> 10 A̱vu Shafa za vi iɗana damma mogono, <<Hilikiya ganu ca mu ta̱ aatagada.>> A̱vu Shafa ɗe nu una̱ elime mogono.

11 A mantsa ma na mogono ma uwwai adanshi Aatagada a̱ Wila̱, a̱vu wu kara a̱tugu yi. 12 A̱vu u damma Hilikiya ganu, na̱ Ahikam ulobo wa Shafa na̱ Akbo ulobo wa Mikaya, Shafa za vi iɗana na̱ Asaya aagbashi a̱ mogono, 13 <<Ka̱ra̱ yi adama a na ya̱ ece A̱sulazuva adama a̱ va̱ na adama ama waru na̱ suru Yahuda, adama adanshi a na a̱ ri uɗanu aatagada na a̱ tsura̱i. Adama a na upan wa̱ A̱sulazuva a̱ tu usuɗu aci a̱ tsu, adama a na nkaya n tsu a yuwan tsutoni na adanshi a aatagada a nda shi. A yuwan ko ili i ta̱ i na suru i ri uɗanu pe adama a̱ tsu shi.>>

14 A̱vu Hilikiya ganu, na̱ Ahikam na̱ Akbo na̱ Shafa na̱ Asaya a̱ 'ya̱wa̱ uba̱ta̱ wa Hulda ka ro vumava̱sula̱, za na da̱na̱i ka va Shalum ulobo wa Tikiva, ulobo wa Harha, za na tsu idanusan asula a̱ a̱tugu. U da̱na̱ ta̱ na̱ nden Urishelima, a̱ lyuci sa'avu. 15 A̱vu u damma le, <<Apa ili i na A̱sulazuva a̱ A̱sula̱ a Isra'ila a dammai, <Damma yi vuma na lyungu ɗu ya̱ a̱ va̱, 16 Na amayun A̱sulazuva a damma ta̱, n ta̱ ta̱wa̱ na̱ a̱tsuma̱lima̱ uba̱ta̱ u nda oɓolo na ama a̱ yi, cine u ri uɗanu suru a aatagada a na mogono ma Yahuda me ɗe yi nu una̱. 17 Adama a na a 'yuwan numu avu a̱ kuloto wa̱ musula̱ n ro ili i ma̱guru, reve a zuwa mu n yuwan upan adama a̱ma̱li a na a yuwan yi na̱ ekere ele, upan u va̱ u ta̱ kula̱ uba̱ta̱ u nda agba wa̱ koto shi.> >> 18 Amma vu damma mogono ma a Yahuda, za na lyungu nɗu adama a na ya ece yi uba̱ta̱ wa̱ A̱sulazuva, apa ili i na A̱sulazuva A̱sula̱ a Isra'ila a dammai, adama adanshi a na vu uwwai, i damma, 19 <<Ana wo o'woi Ookolo a̱ wu a vadala shi, agba vu tara aciya̱ wu ili i ro uba̱ta̱ wa̱ A̱sulazuva shi, a na vu uwwai ununa n yuwain adanshi adama o uba̱ta̱ nda na ama a̱ yi, a na a̱ ka̱mba̱ okongo nu una, a̱vu vu kakara a̱tugu a̱ wu na̱ mesun elime a̱ va̱, to, a̱mu fo A̱sulazuva mu uwwa ta̱ avasa a̱yi 20 Adama o ndolo n ta zuwa wu a na va̱ kuwa̱ vu toni nkaya ma̱ wu, waru a̱vu a̱ ciɗo wu gbaga. Esu a̱ wu ene a̱tsuma̱lima̱ a na ma̱ ta̱wa̱a̱ uba̱ta̱ u nda shi.>>

A̱vu a̱ ta̱wa̱a̱ mogono ni ikaka i nda.