1 A̱tsuma̱ aa'wan cindere o tsugono tsa̱ Yehu ɗa, Yowash wo woi mogono, a̱vu u yuwan tsugono tsa Urishelima a'wan amunga. Aala aa mma va yi ɗa Zibiya, diga a̱tsuma̱ e iɗa ya Biyasheba. 2 Yowash yuwan ta̱ ili i na i ri mejege elime A̱sulazuva, ununa Yehoyida ganu cuɗuwa ni yi. 3 Amma suru na̱ tsu ndolo fo, u kototo wu uba̱ta̱ musula̱ shi, a̱vu a ama a lyuwa elime a ca su kucci le na̱ une'e u le ba̱ta̱ va̱ a̱ga̱nda̱.

4 A̱vu Yowash damma nan ganu, <<ɓoloto yi suru ikebe i na a̱ ta̱wa̱ yi a̱tsuma̱ A̱a̱'isamapaɗa a̱ A̱sulazuva ni ikebe i na oɓoloto yi uba̱ta̱ mekece, ni ikebe i na a̱ ushiyi uba̱ta̱ wa ama adama a akucunu a na a yuwain, na̱ suru ikebe i na a ca yi nu ucigu wo okolo ele a na a̱ ta̱wa̱a̱ yi A̱a̱'isamapaɗa a̱ A̱sulazuva.* 5 Lyawa ikebe i na nan ganu a̱ ushiyi e ekere a ama, u da̱na̱ ulobonu u na a tara pe a̱tsuma̱ e ikebe i ndolo, adama a na a yuwan ulapulu wu uba̱ta̱ u na ucigai ulapulu a̱tsuma̱ a̱ A̱a̱'isamapaɗa a̱ A̱sulazuva.>>

6 Amma hali a cina a'wan ushin na̱ aza a ta'atsu o tsugono tsa mogono Yowash, nan ganu a gura lapula A̱a̱'isamapaɗa'a shi. 7 Adama o ndolo a̱vu mogono Yowash ɗe Yehoyida ganu na̱ akapi a nan ganu suru a̱vu we ece le, <<Adama nye ɗa i kuɗa̱i a na yaa lapula A̱a̱'isamapaɗa? To, diga gogo she i da̱shi ushi ikebe diga o ukere wa̱ ozo o ucasu adama aa aciya a̱ɗu wan. O una̱ o ndolo i ca ikebe'e tsura̱ a yuwan ulapulu wa̱ A̱a̱'isamapaɗa a̱ A̱sulazuva.>> 8 A̱vu nan ganu a̱ usu a na a buwa a na a̱ da̱shi ushi yi ikebe diga o ukere wa aa ama adama aciya̱ le waru shi, waru a buwa a yuwan ulapulu wa̱ A̱a̱'isamapaɗa naa aciya le shi.

9 A̱vu Yehoyida ganu tara akpati, a̱vu u yuwaan yi una̱ e ikpa̱ta̱tsu u zuwai zuzu na̱ masa'a lo o ukere usa'ani, n na̱ vuma ta uwa a̱tsuma̱ A̱a̱'isamapaɗa a̱ A̱sulazuva. A̱vu nan ganu a na a yuwusan ipiri ya̱ A̱a̱'isamapaɗa a̱ A̱sulazuva a̱ ta̱wa̱ ni ikebe'e adama a na a zuwa le pe a̱tsuma̱ akpati'i. 10 Suru mantsa ma na e enei ikebe i yuwan ta̱ a̱bunda̱ a̱tsuma̱ akpati'i, a̱vu za vi iɗana i mogono na̱ ganu gbain a̱ tsu ta̱wa̱ ta̱ adama a na e kece ikebe i na a̱ ta̱wa̱ yi a̱tsuma̱ A̱a̱'isamapaɗa a A̱sulazuva'a, reve a̱ nla̱ le a zuwa le a̱tsuma̱ e tsa̱n. 11 A̱vu a ca ikebe'e ekere aza na a̱ ka̱lyusa̱n ulinga wa̱ A̱a̱'isamapaɗa'a. Ni ikebe i ndolo ɗa a tsupusaa yi ozo o ulinga wa̱ A̱a̱'isamapaɗa a̱ A̱sulazuva, na̱ nan kafinta, na̱ aza a na a yuwusan usaa, 12 na̱ aza a na a yuwusan ikunku, na̱ a̱za̱ wu uɓosu wa atali. Agba a ta yuwusan ulinga na̱ ikebe adama a na a tsula akpata na̱ atali a na a lapula A̱a̱'isamapaɗa a̱ A̱sulazuva, na̱ waru adama a na a cina a na a tsupa suru ili i na a tsulai adama o ulapulu wa̱ A̱a̱'isamapaɗa. 13 Ikebe i na a̱ ta̱wa̱sa̱ a̱tsuma̱ A̱a̱'isamapaɗa'a o una le adama a na a yuwan akwanu a azurufa shi, ko ili i na a̱ ri a na a kimusa̱ fitila shi, ko a akwanu azurufa, ko abulu, ko itana i zinariya na̱ aza a azurufa adama A̱a̱'isamapaɗa a̱ A̱sulazuva shi. 14 A yuwan ta̱ ulinga ni ikebe'e adama a na a tsupa aza a na a yuwusaan ulapulu wa̱ A̱a̱'isamapaɗa a̱ A̱sulazuva. 15 Agba a zami aza a na e idanusan ulinga'a shi, ekere aza a na a ca yi ikebe'e ko a tsupa ozo o ulinga'a shi, adama a na a yuwan ta̱ ulinga u le na̱ mejege na a amayun.* 16 Ikebe i na a̱ ta̱wa̱ yi adama a kucci makuɗa ma̱ wila̱, na̱ kucci vu unusu a̱tsuma̱ A̱a̱'isamapaɗa a̱ A̱sulazuva aza a nan ganu a ɗa.*

17 A mantsa o ndolo, Mogono Hazayel va Suriya ma̱ ka̱ra̱ ta̱ adama a na wa̱ 'ya̱wa̱ yuwan uvon na̱ Gat a̱vu u lyuwai. A̱vu u vadala a adama u riya̱a̱ Urishelima nu uvon. 18 Amma a̱vu mogono Yowash va Yahuda ma̱ pura̱ suru une'e u na a ca yi nkaya nle Jehoshafa na̱ Jehoram na̱ Ahaziya, ngono ma a Yahuda na̱ ne'e n na a̱yi na aciya yi u tawai u zinariya, na a̱ tsura̱i a̱tsuma̱ asula e izuwa A̱a̱'isamapaɗa a̱ A̱sulazuva, na̱ za vu u'wa u mogono suru, a̱vu u lyungu le a̱ tyo ya mogono Hazayel va Suriya, a̱vu u lyawa Urishelima.

19 Akapi o ulinga u tsugono tsa Yowash, na̱ suru ulinga u na u yuwain, a̱ da̱na̱ ta̱ tu pe uɗanu a̱tsuma̱ a aatagada a alabari o ngono ma Yahuda. 20 A̱vu ozo o ro diga a̱tsuma̱ azagbain a̱ yi o oɓolo una̱ o unai a̱tsuma̱ o u'wa u ro a Bet Milo, o ure u na u zura̱i a̱ tyo wu upasu wa Sila. 21 Azagbain a na o una ni yi ele ɗa, Yozaba ulobo wa Shimeya na̱ Yehozaba ulobo wa Shome. A̱vu a̱ ciɗo yi oɓolo na̱ nkaya ma̱ yi a̱tsuma̱ a̱ lyuci gbain va̱ Da̱wuda. A̱vu ulobo wa̱ yi Amaziya wo o mogono o una̱ wa̱ yi.