1 A̱tsuma̱ a aa'wan o ushin na̱ a̱za̱ e cindere o tsugono tsa Yerobowam Mogono ma Isra'ila, a̱vu Azariya ulobo wa Amaziya mogono ma Yahuda ma̱ teme tsugono. 2 U da̱na̱ ta̱ na aa'wan kupa na̱ a̱za̱ ta̱li a mantsa ma na u temei tsugono'o, agba a̱vu u yuwan aa'wan kupoton na̱ ejere a yuwusan tsugono a̱tsuma̱ a Urushelima. Aala a mma va yi ɗa Yekoliya, diga Urishelima. 3 U yuwan ta̱ ili i na i ri mejege elime A̱sulazuva, ununa Dada va yi Amaziya yuwain. 4 Amma suru na̱ ne, o kototo ba̱ta̱ va̱ a̱ga̱nda̱ shi, a̱vu a ama a̱ da̱na̱ a yuwusan ukula̱tosu le na̱ ili ma̱guru ba̱ta̱'a̱.

5 A̱vu A̱sulazuva a lyunguwa̱ mogono'o na̱ mɓa̱la̱ mu ukutu ma̱ lipu hali u kuwa̱, u da̱na̱ ta̱ utakatsuwu nu u'wa wa̱ yi e nde'en. Ulobo wa̱ yi Yotam ɗa da̱na̱i e idanusan ukobu u mogono nu u yuwusan yi tsugbain tsa ama e iɗa'a.

6 Akapi o ulinga u na Azariya yuwain suru a̱ da̱na̱ ta̱ pe uɗanu a̱tsuma̱ aatagada alabari o ngono ma a Yahuda. 7 A̱vu Azariya kuwa̱ ucina nkaya ma̱ yi, a̱vu a̱ciɗyo yi a̱tsuma̱ a̱ lyuci gbain va̱ Da̱wuda. A̱vu Yotam ulobo wa̱ yi mo o mogono o una̱ wa̱ yi.*

8 A̱tsuma̱ a aa'wan mata'atsu na̱ kunla̱ tsa tsugono tsa mogono Azariya va Yahuda, Zakariya ulobo wa Yerobowam mo o'woi mogono ma Isra'ila a̱tsuma̱ Samariya, a̱vu u yuwan tsugono tsa woto ta̱li. 9 Agba u yuwan ta̱ iwuya elime A̱sulazuva, ununa nkaya ma̱ yi n yuwain. U vadala diga o unusu wa Yerobowam ulobo wa Neba shi, a aza a na u zuwai a aza a Isra'ila a yuwain.

10 A̱vu Shalum ulobo wa Jabesh yuwan ifoɓi i na wo o una Zakariya. A̱vu a̱ ga̱la̱i o unai elime a ama, reve a̱yi wo o mogono. 11 Akapi o ulinga u na Zakariya yuwain, da̱na̱ ta̱ pe uɗanu a̱tsuma̱ aatagada alabari ngono ma Isra'ila. 12 Adama o ndolo ɗa a adanshi a na A̱sulazuva a yuwain o una̱ wa Yehu shiwain. Za na u dammai, <<Ugundo wa wu u ta yuwan tsugono tsa a Isra'ila acina a mantsa ma̱a̱ na̱shi.>>*

13 Shalum ulobo wa Jabesh mo o ta̱ mogono a̱tsuma̱ aa'wan mata'atsu na̱ kucci o tsugono tsa mogono Uziya va Yahuda, waru u yuwan ta̱ tsugono tsa a Samariya woto uta̱.

14 A̱vu Menahem ulobo wa Gadi ma̱ ka̱ra̱ a̱ tyo Tirza ɗe Samariya. A̱vu u riya̱ Shalum ulobo wa Jabesh nu uvon ɗe Samariya, a̱vu wu u unai wo o mogono. 15 Akapi o ulinga u na Shalum yuwain, na̱ suru ifoɓi i na u yuwain, a̱ da̱na̱ ta̱ pe uɗanu a̱tsuma̱ aatagada alabari o ngono ma Isra'ila.

16 A mantsa ma na Menahem da̱na̱i a mmalu a̱ tyo Tirza, a na wa̱ ta̱wa̱ u kototo iɗa ya Tifsa, a̱vu a ama a lyuci'i a 'yuwan a na a̱ kpa̱tu'wa̱ una̱ntsutsu u lyuci. A̱vu u kototo Tifsa hali wu ɗa̱ra̱ a̱ma̱ci a na a̱ shi na̱ a̱tsuma̱.

17 A̱tsuma̱ aa'wan mata'atsu na̱ kucci o tsugono tsa Azariya mogono ma Yahuda, Menahem ulobo wa Gadi va Isra'ila me temei yi tsugono, a̱vu u yuwan tsugono tsa a Samariya aa'wan kupa.

18 U yuwan ta̱ iwiya elime A̱sulazuva. Suru a rana wuma wa̱ yi u vadala diga o unusu wa Yerobowam ulobo wa Neba shi, a aza a na u zuwai a aza a Isra'ila a yuwain.

19 A̱vu Pul mogono ma a Asuriya ma̱ ta̱wa̱ nu uvon a̱tsuma̱ e iɗa'a, a̱vu Menahem ca yi ukunzuwu u azurufa ukpakukupa (1,000) adama a na wa a kamba yi ununa tsugono tsa yi tsa e isawan nu ucira lon.* 20 Menahem tsura̱ ta̱ ikebe diga uba̱ta̱ wa ozo utsuru wa a aza a Isra'ila. Za vu utsuru biti ta̱wa̱ ta̱ nu utafu wa̱ yi uba̱ta̱ mogono Asuriya azurufa kupoton. A̱vu mogono ma Asuriya ma̱ ka̱mba̱, agba u ta̱wa̱ nu uvon a̱tsuma̱ e iɗa'a waru shi.

21 Akapi o ulinga u na mogono Menahem ma yuwain, na̱ suru ili i na u yuwain a̱ da̱na̱ ta̱ pe uɗanu a̱tsuma̱ aatagada alabari o ngono ma Isra'ila. 22 A̱vu Menahem kuwa̱ ucina nkaya ma̱ yi. A̱vu ulobo wa̱ yi Pekahiya mo o'wo mogono o una̱ wa̱ yi.

23 A̱tsuma̱ a aa'wan kupoton o tsugono tsa mogono Azariya va Yahuda, Pekahiya ulobo wa Menahem ma temei tsugono tsa Isra'ila a̱tsuma̱ a Samariya, a̱vu u yuwan tsugono tsa a'wan e re. 24 Pekahiya yuwan ta̱ ulinga wi iwuya e ekere A̱sulazuva. Agba u vadala diga o unusu wa Yerobowam ulobo wa Neba shi, a aza a na u zuwai a aza a Isra'ila a yuwain. 25 A̱vu yali ya̱ a̱ a̱soja a̱yi Peka ulobo wa Remaliya u zami yu ure u na wa una yi. A̱vu u tara a̱soja kupoton diga Giliyadu oɓolo na̱ yi, a̱vu wu una Pekahiya, oɓolo na̱ Argo na̱ Ariya, a̱ yi pe o ukobu u tsugono tsa Samariya. A̱vu Peka una Pekahiya a̱vu wo o mogono.

26 Akapi o ulinga u na Pekahiya yuwain, na̱ suru u linga u na u yuwain a̱ da̱na̱ ta̱ pe uɗanu a̱tsuma̱ aatagada alabari o ngono ma Isra'ila.

27 A̱tsuma̱ aa'wan kupoton na̱ ejere o tsugono tsa mogono Azariya va Yahuda, Peka ulobo wa Remaliya me temei tsugono tsa a Isra'ila a̱tsuma̱ a Samariya, a̱vu u yuwan tsugono tsa aa'wan ushin. 28 A̱vu u yuwan iwuya ekere a̱ A̱sulazuva. Agba u vadala diga o unusu u na Yerobowam ulobo wa Neba ma yuwain shi, a aza a na u zuwai a aza a Isra'ila a yuwain.

29 A mantsa ma tsugono tsa mogono Peka va Isra'ila, Tigla Pilesa mogono ma Asuriya ma̱ ta̱wa̱ ta̱ usa lyuci va Iyon, na̱ za va Abel Bet Ma'aka na̱ Yanowa na̱ Kedesh na̱ Hazo. A̱vu u usa Giliyadu na̱ Ga̱lili, oɓolo na̱ suru upasu wa Nafutali, a̱vu u tara ama'a a̱ 'ya̱wa̱ tsugbashi a̱ lyuci va Asuriya. 30 A̱vu Hosiya ulobo wa Ela ma yuwaan ifoɓi adama a na wa una Peka ulobo wa Remaliya. A̱vu u ga̱la̱i yi wu u unai, a̱vu wo o'wo mogono a̱tsuma̱ aa'wan o ushin u tsugono tsa Yotam ulobo wa Uziya. 31 Suru akapi o ulinga wa Peka na̱ suru ili i na u yuwain a̱ da̱na̱ ta̱ pe uɗanu a̱tsuma̱ aatagada alabari o ngono ma Isra'ila.

32 A̱tsuma̱ a aa'wan e ire o tsugono tsa Peka ulobo wa Remaliya mogono ma Isra'ila, Yotam ulobo wa Uziya mogono me temei tsugono tsa Yahuda. 33 U da̱na̱ ta̱ na aa'wan ushin na̱ ejere a mantsa ma na wo o yi mogono, a̱vu u yuwan tsugono tsa Urishelima aa'wan kupa na̱ a̱za̱ ta̱li. Aala a mma va yi ɗa Yerusha usheli wa Saduku. 34 A̱vu u yuwan ili i na i ri mejege uba̱ta̱ wa̱ A̱sulazuva, ununa Dada va yi Uziya yuwain. 35 Amma suru na̱ ne, o kototo ba̱ta̱ va̱ a̱ga̱nda̱ shi, a̱vu a ama a̱ da̱na̱ a yuwusan ukula̱tosu u le ni ili i ma̱guru uba̱ta̱'a̱. Yotam suwisa ta̱ una̱ntsutsu wa zuva wa̱ A̱a̱'isamapaɗa a̱ A̱sulazuva.

36 Suru akapi o ulinga u na Yotam yuwain o tsugono tsa yi, na̱ suru ili i na u yuwain a̱ da̱na̱ ta̱ pe uɗanu a̱tsuma̱ aatagada alabari o ngono ma a Yahuda. 37 A̱tsuma̱ a rana ndolo ɗa A̱sulazuva a fara a̱ lyungusa̱ yi mogono Rezin va Suriya na̱ mogono Peka ulobo wa Remaliya uvon a̱tsuma̱ a Yahuda. 38 A̱vu Yotam kuwa̱ ucina nkaya ma̱ yi, a̱vu a̱ciɗyo yi a̱tsuma̱ a̱ lyuci gbain va̱ kaka va̱ yi Da̱wuda. A̱vu ulobo wa̱ yi Ahaz mo o mogono o una̱ wa̱ yi.