1 A̱vu Elisha usu u damma, <<Uwwai a adanshi A̱sulazuva, A̱sulazuva a damma <Nfa'an nda a mantsa ma nda a ta wina makundatsu ma yira i lashi azurufa ta̱, na̱ waru makundatsu ma yitabo i re azurufa ta̱ o uwata wa Samariya.> >>

2 A̱vu yali ya̱ a̱soja za na a kambusa mogono u damma vuma va̱ A̱sulazuva'a, <<Ko na̱ shi wo o A̱sulazuva a ɗa na aciya̱yi a na a̱ kpa̱tu'wa̱ na̱ntsu va zuva, ili ya nda yaa a gura fara shi ko ke'en!>>

A̱vu Elisha damma yi, <<Vu ta ene ne esu a̱ wu, amma va lyuwa shi.>>

3 A̱ da̱na̱ ta̱ na ama a̱ na̱shi, aza a na a da̱na̱i na̱ mɓa̱la̱ mu ukutu a̱ lipu, aza a na a̱ da̱na̱i lo o una̱ntsu u lyuci va Samariya. A̱vu a damma la yi aciya̱ le, <<Adama nye ɗa tsu ri pa e ipiri pa aa nda she nu tsu kuwa̱ pa? 4 N na̱ tsu damma tsu ta uwa pe a̱tsuma̱ a̱ lyuci ambulu a ɗa a una tsu pe. Agba waru nu tsu da̱nu pa tsu ta kuwa̱. Adama o ndolo lyawa tsu 'ya̱wa̱ naa a aciya̱ tsu uba̱ta̱ wa aza a Suriya. Na̱ a lyawa tsu wuma, u ta da̱na̱ ulobonu. Na̱ waru o una tsu ta̱, wo o ta̱ a na tsa kuwa̱.>> 5 A̱vu a̱ 'yon nu ulivu e reme ure acina uba̱ta̱ u na a̱za̱ o upasu wa Suriya a̱ da̱na̱i na̱ nde. Amma a mantsa ma na a rawai uba̱ta̱ u na aza a Suriya a̱ da̱na̱i na̱ nde'en, agba acina lo za uba̱ta̱'a̱ shi. 6 A̱vu A̱sulazuva a zuwa aza a Suriya a na a uwwai ilama va damma oɓolo a̱soja a̱bunda̱ ɗa na̱ ikeke yi ido yu uvon, a̱vu a damma la yi va̱ni le, <<Apa nda mogono ma Isra'ila mo kopoi ngono ma aza a Hitiya na̱ aza a Masar adama a na a̱ riya̱ tsu nu uvon!>> 7 Adama o ndolo a ɗa a sumai nu ulivu, a̱vu a lyawa lo ogodo le na̱ ido i le na̱ nloli nle. A̱vu a lyawa uva̱la̱ta̱ ununa u ri a̱vu a suma adama a wuma u le.

8 A mantsa ma na a̱za̱ a̱ mɓa̱la̱ mu ukutu n na̱shi ndolo'o a rawai o una̱ wu uva̱la̱ta̱, uba̱ta̱ u na a̱ da̱na̱i uva̱lu a̱vu a uwa oogodo a̱ ta̱. A̱vu a lyuwa a̱vu o sowo, a̱vu a̱ pura̱ azurufa na̱ zinariya na̱ a̱tugu, a̱vu a̱ ka̱ra̱ adama a na o soko le. A̱vu waru a̱ ka̱mba̱ a uwa a̱tsuma̱ oogodo o ro, a̱vu a̱ pura̱ itana i ro diga pe a̱tsuma̱ yi, a̱vu waru o soko le. 9 Diga lo ɗaɗa a damma yi aciya̱ le, <<Tsu yuwan ili i na i ri yu ulobonu shi. Ana'an aa nda uranu wa a labari o uyo'o u ɗa, n na̱ tsu rungwa̱ kpen acina usana, iwuya i ta cipa̱ aciya̱ a̱ tsu. Adama o ndolo lyawa tsa 'ya̱wa̱ tsu damma ukobu u mogono.>>

10 A̱vu a̱ ta̱wa̱ o una̱ntsutsu u lyuci a̱vu e ɗe a̱za̱ e ipiri ilyuci,<<Tsu 'ya̱wa̱ ta̱ o uva̱la̱ta̱ wa aza a Suriya agba tsu cina pe vuma shi, ko ilama i vuma va uwwa shi, ido i ɗa na̱ nloli goon va cina wunlu, agba waru ogodo le a̱ tu lo babu pe vuma ununa a aza a Suriya a lyawa n le lo.>>

11 A̱vu a̱za̱ e ipiri yu una̱ntsu a̱ ya̱sa̱n uɗyo le aa asala, hali adanshi a rawa o ukobu u mogono. 12 A̱vu mogono mo 'yon naa ayin ndolo, a̱vu u damma azagbain a̱yi, <<Lyawa n damma ɗu ili i na aza aa Suriya a yuwain adama a̱ tsu. E reve ta̱ naa ambulu a na a̱ ri pa tsu, adama o ndolo a̱vu a lyawa uva̱la̱ta̱ u na a̱ ri na̱ nden a uwa a̱tsuma̱ o una a pa'an, a ta majiyan, <A mantsa ma na tsu u uta̱i a̱vu tsu ka̱ra̱ izami yi ilyalya, a̱vu e teme uvon na̱ tsu, a̱vu e reme tsu na̱ wuma, a̱vu a usa lyuci tsu.> >>

13 A̱vu za ta̱ a̱tsuma̱ azagbain o mogono ma damma, <<Lyawa a na tsa lyungu ama o ton adama a na aa tara ido i na i buwai pe a̱ lyuci. Ana a̱ ka̱ra̱ adama a na a̱ka̱lyuwa̱ ili i na tsu uwwai. Adama a na na̱ ili i ro i fara na̱ ele, wo o ili yu usa̱n i ro shi a na e isawan a̱tsuma̱ a̱ lyuci oɓolo na̱ tsu, adama a na suru ntsu nden mu ukwa̱ ɗa tsa yuwusan.>>

14 A̱vu a ɗangula ama o ro, a̱vu mogono ma̱ lyungu le na̱ ikeke yi ido ejere a na 'ya̱wa̱ ka̱lyuwa̱ ili i na i farai na̱ a̱soja a Suriya. 15 A̱vu ama o ndolo o toni le acina upasu wu Uɗolu wa̱ Urudu, suru a̱tsuma̱ o ure a̱vu acina a̱tugu ni itana yu uvon wo cu, a zana a aza a Suriya o ocoyi a mantsa ma na a̱ da̱na̱i a zama a na a suma. A̱vu nlingata a̱ ka̱mba̱ adama a na a ca alabari uba̱ta̱ u mogono. 16 A̱vu ama e iɗa ya Samariya o uta̱ ni ilaɗi, a̱vu a̱ ka̱ra̱ a̱ tyo o uva̱la̱ta̱ wa aza a Suriya a̱vu a̱ pura̱ itana. A̱vu a wina makundatsu ma yira i lashi azurufa ta̱, na̱ waru makundatsu ma yira i yitabo i re azurufa ta̱, cine A̱sulazuva a dammai.

17 A̱vu mogono ma zuwa yali ya̱ a̱soja kambi va̱ yi, a̱vu a zuwa yi a na wa piri yu una̱ntsu u lyuci'i. Adama a̱bunda̱ a ama a na a ɓoloto yi lo o una̱ntsu u lyuci, a̱vu e keɓe yi u riya̱ a̱vu aa a dadasa yi hali u kuwa̱, cine Elisha vuma va A̱sulazuva damma yi a mantsa ma na mogono ma̱ 'ya̱wa̱i adama a na we ene yi. 18 A̱vu gba wo o'wo cine vuma va A̱sula̱ dammai mogono, <<A na acina a mantsa ma nda nfa'an, a ta wina makundatsu ma yira i lashi azurufa ta̱, na̱ waru makundatsu ma yitabo i re i azurufa ta̱ o uwata wa Samariya.>>

19 A̱vu yali ya̱ a̱soja'a usu vuma va̱ A̱sula̱ u damma, <<N na̱ A̱sulazuva a ta̱ kpa̱tu'wa̱ na̱ntsutsu va zuva, iliya o ndolo ya fara shi ko ke'en!>> A̱vu Elisha damma, <<Vu ta ene ne esu a̱ wu, amma va lyuwa shi!>> 20 Ne ɗa ili yo ndolo i farai na̱ yi, a̱vu ama a dadasa yi lo o uwata u lyuci'i, hali u kuwa̱.