1 Jehoram ulobo wa Ahabu wo o'wo ta̱ mogono ma Isra'ila a̱tsuma̱ a Samariya, a a'wan a kupa na̱ kunla̱ o tsugono tsa Jehoshafa mogono ma Yahuda, a̱vu u yuwan tsugono a'wan kupa ne ejere. 2 Agba u yuwan ta̱ iwuya e ekere a̱ A̱sulazuva, amma u rawa cina dada va̱ yi na̱ mma va̱ yi yuwain shi. Wu tawa ta̱ atali a̱ a̱ga̱nda̱ a Ba'al a na dada va̱ yi yuwain. 3 Amma suru na̱ ne wu kasa nu unusu wa Yerobowam ulobo wa Neba shi, za na u zuwai Isra'ila yuwain, u lyawa le shi.

4 Mesha mogono ma̱ Mowa gba za va aguɓa e ikyon i ɗa. U shi ta̱ u tsu ca mogono ma Isra'ila ikyon ukpakukupa ukpaku (100,000) na̱ eleme a̱ a̱giri'i ukpakukupa ukpaku (100,000). 5 Amma a na Ahabu mogono ma Isra'ila ma̱ kuwa̱i, a̱vu mogono ma̱ Mowa ma̱ 'ya̱sa̱a̱n mogono ma Isra'ila aci. 6 Ɗaɗa a mantsa'a mogono Jehoram mo uta̱i diga Samariya reve u ɓoloto a̱soja a Isra'ila suru adama o uvon. 7 A̱vu waru u lyunguwa̱ Jehoshafa mogono ma Yahuda ni ikaka u damma, <<Mogono ma̱ Mowa ma̱ 'ya̱sa̱a̱n mu ta̱ aci. Vu ta̱ 'ya̱wa̱ oɓolo na̱ a̱mu tsu yuwan uvon na̱ Mowa?>>

A̱vu usu, <<N ta̱ 'ya̱wa̱ oɓolo na̱ a̱vu. A̱mu na̱ a̱vu ili i ta̱ i ɗa. A̱soja a̱ va̱, a̱soja a̱ wu a ɗa, ido i va̱, ido ya̱ wu i ɗa.>>*

8 A̱vu Jehoshafa ece, <<Nu ure u ne u ɗa tsoo toni?>>

A̱vu Yehoram usu, <<Na̱ a̱tsumona a Edom.>>

9 Ɗaɗa mogono ma Isra'ila na̱ mogono ma Yahuda na̱ mogono ma Edom o uta̱i. Ana a yuwain rana cindere a̱ a̱ka̱nda̱riya̱ reve mini mo koto a̱soja'a oɓolo ni iliyamunga i le. 10 A̱vu mogono ma Isra'ila ma damma, <<Nye! A̱sulazuva o ɓoloto tsu ta̱ ngono n ta'atsu n nda adama u ca tsu e ekere a̱ Mowa?>>

11 Amma a̱vu Jehoshafa ece, <<Vumava̱sula̱ va̱ A̱sulazuva pa za na tsa zami urewesu wa̱ A̱sulazuva e ekere a̱ yi shi?>>

A̱vu za ta̱ a̱tsuma̱ a agbashi o mogono ma Isra'ila u damma, <<Elisha ulobo wa Shafa u ta̱ pa. A̱yi kambi va Iliya ɗa shi.>> 12 A̱vu Jehoshafa damma, <<Adanshi a̱ A̱sulazuva a̱ ta̱ oɓolo na̱ a̱yi.>> Adama o ndolo reve mogono ma Isra'ila na̱ mogono ma Yahuda na̱ mogono ma Edom a̱ ka̱ra̱ a̱ 'ya̱wa̱ uba̱ta̱ wa̱ yi.

13 A̱vu Elisha damma mogono ma Isra'ila, <<Nye i bura numu na̱ a̱vu? Ka̱ra̱ a̱ 'ya̱wa̱ uba̱ta̱ wa ama̱sula̱ a dada va̱ wu na ama̱sula̱ a mma va̱ wu.>>

Amma a̱vu mogono ma Isra'ila ma damma yi, <<O'o, adama a na A̱sulazuva a ɗa e ɗe ntsu ngono n ta'atsu adama u ca tsu e ekere a̱ Mowa.>>

14 A̱vu Elisha damma, <<N kucina ta̱ wuma wa̱ A̱sulazuva oɓolo a̱ a̱soja a zuva, za na maa yuwusaan a̱ga̱nda̱, na a damma adama a na maa casu Jehoshafa mogono ma Yahuda tsugbain shi, n shi a̱ ka̱lyuwa̱ wu shi, ko gba n reve a na vu ri lo shi. 15 Gogo ta̱wa̱a̱ na̱ numu za na gurai tsuwe'e tsa̱ kumburu.>> A mantsa ma na za tsuwe'e vu kumburu'u u ri a wa'asa kumburu'u, a̱vu ukere wa̱ A̱sulazuva u cipa̱a̱ Elisha, 16 A̱vu u damma, <<Apa nda ili i na A̱sulazuva a dammai, <Ka̱pa̱i oko'o o uka̱ri u nda suru.> >> 17 Adama a na apa ili i na A̱sulazuva a dammai, <<Ye ene upepu ko iro'i shi, suru na̱ ne uka̱ri u nda u ta shiwan na̱ mini, a̱vu a̱ɗu ni inan i ɗu na akapi e iliyamunga i na i buwai i sowo. 18 A̱yi nda ili yu usa̱n u ɗa shi e ekere a̱ A̱sulazuva. Waru u ta ca ɗu Mowa e ekere a̱ ɗu. 19 I ta lyuwa lyuci vu ukari suru na̱ lyuci sa'ani suru. I to koɗo uɗanga wu ulobonu suru, reve i gulu esu a̱ mini suru, a̱vu i lungusa̱ uɗuma̱ u sa'ani suru na atali.>>

20 Ana usana u tawai nu usana, a mantsa ma na a tsu ca kucci, a̱vu mini me yene diga o upasu wa Edom! A̱vu iɗa'a i shiwan na̱ mini.

21 A̱za̱ a̱ Mowa gba suru a uwwa ta̱ a na ngono'o n ta̱wa̱i adama a yuwan uvon ne ele, ɗaɗa ali suru aza a na a rawai a na a̱ guza̱ itana yu uvon, zagbain na̱ za ke'en, reve e ɗe le a zuwa le a dara o utyo wu upasu wi iɗa i le. 22 Ana a̱ 'yoyin nu usana usana, urana u shi ta̱ e ikanasa mini'i. Uba̱ta̱ wa̱ a̱za̱ a̱ Mowa mavada ma̱ mini'i mo rotso ta̱ ushili tsa mpasa. 23 Reve a ama Mowa oruwo, <<Mpasa n ɗa! U ta gura o'wo ngono ndolo n yuwan ta̱ nla̱ngi a̱vu a paɗalai va̱ni le. A̱za̱ Mowa, lyawai tsu 'ya̱wa̱i tsu pura̱i itana i le!>>

24 Agba a mantsa ma na a rawai o uva̱la̱ta̱ wa aza a Isra'ila, reve aza a Isra'ila a̱ 'yon a̱vu a yuwan uvon ne ele hali she na a sumai. A̱vu aza a Isra'ila a uwa iɗa'a a̱vu o una a̱za̱ a̱ Mowa. 25 A̱vu a̱ lungusa̱ ilyuci'i. A̱vu vuma suru vari aatali o uɗuma̱ u sa'ani suru hali she na a shiwain na atali. A̱vu waru a̱ gulu esu a̱ mini suru a̱vu o koɗo uɗanga u sa'ani biti. Kir Harese ɗa goon shi buwai na atali a̱ yi, amma reve a̱soja a̱ shi ufoɓu na̱ a̱bitsutsu a̱ ka̱nda̱ruwa̱ yi a̱vu a̱ riya̱a̱ yi nu uvon.

26 A mantsa ma na mogono ma̱ Mowa me enei uvon u vadala ta̱ a̱ tyo ya̱'a̱ yi, ɗaɗa u tarai a̱soja a na a̱ ri na̱ mutsun mu pe'eni a̱soja ukpaku ucindere (700) adama o utula̱i a̱ tyo uba̱ta̱ u mogono ma Edom, agba a gura shi. 27 Reve gba u tara ulobo wa̱ yi mawun mo ufaru ma na ma lyuwa tsugono o una̱ wa̱ yi, a̱vu u yuwan kucci vu ukula̱tosu na̱ yi o uɓaɓu u lyuci'i. Reve aza a Isra'ila a uwwa wovon lon, ɗaɗa a vadalai a̱ ka̱mba̱i e iɗa i le.