1 Ana Hezekiya Mogono ma uwwai adanshi'i, reve wu kara a̱tugu yi, a̱vu woto a̱tugu a̱tsuma̱la̱ngu. A̱vu uwwa a̱tsuma̱ A̱a̱'isa̱mapaɗa a̱ A̱sulazuva. 2 Reve u lyungu Eliyakim zagbain vu u'wa u mogono, na̱ Shebena za vi iɗana oɓolo na zagbain nan ganu, suru le wotowu na̱ a̱tugu a̱tsuma̱la̱ngu, a̱ tyo u uba̱ta̱ u vumava̱sula̱ Ishaya ulobo wa Amoz. 3 A̱vu a damma yi, <<Nda ili i na Hezekiya dammai, ana'an urana wa atakaci a ɗa, urana u tsuɓari nu wu casu u wono. Ununa muwun n tsu rawa mantsa ma limatan agba babu ucira una a matsan le. 4 U ta gura wo o A̱sulazuva A̱sula̱ a̱ ɗu a uwwa ta̱ suru adanshi a yali vu uvo'on, za na zagbain va yi, mogono ma Asuriya, ma lyunguyi u yuwaan A̱sulazuva a wuma tsu zo'o, agba u ta yuwaan yi tsuɓari adanshi a na A̱sulazuva A̱sula̱ a̱ ɗu a uwwai. Waru vu vasa adama akapi ama a na abuwai wuma.>>

5 A mantsa ma na Ishaya uwwai ikaka i mogono Hezekiya diga uba̱ta̱ wa azagbain a̱ yi, 6 a̱vu Ishaya damma le, <<Damma yi zagbain ɗu, <Nda ili i na A̱sulazuva a damma yi, she vu uwwa wovon wa adanshi a na vu uwwai o una̱ mogono ma Asuriya a na u yuwain tsu zo'o aciya va̱ wan. 7 Uwwa! n ta zuwa ruhu a̱tsuma̱ yi a na nu uwwa adanshi o ro, u ta̱ ka̱mba̱ e iɗa ya̱ yi, ɗe ɗa ma zuwa a na o unai na̱ matsun me pe'eni.> >>

8 Ana yali ya̱ a̱soja o mogono u ka̱mba̱i, reve u ga'an na̱ mogono ma Asuriya a yuwusan uvon na̱ Libina, adama a na yali'i wu uwwa ta̱ ɗe alabari a na mogono'o ma lyawa ta̱ ɗe lyuci va Lakish. 9 Gogo a na mogono ma uwwa n le adanshi adama a ɗa a Tirhaka mogono ma̱ Itiyofiya,* reve wu uta̱ na̱ a̱soja a̱ yi adama a na a̱ riya̱ yi nu uvon. A̱vu mogono ma̱ lyungu nlingata a̱ tyo wu uba̱ta̱ wa Hezekiya a dansa, 10 <<Damma yi Hezekiya mogono ma Yahuda, she vu lyawa A̱sula̱ a̱ wu a̱ luma̱ luma̱ wu wan, u damma <A ca Urishelima ekere mogono ma Asuriya shi.> >> 11 <<Amayun ɗa vu uwwa ta̱ ili i na mogono ma Asuriya ma yuwain na̱ nɗa, a na u kototo le suru suru. Agba a̱vu vu ta majiyan ma na vu ta la'a? 12 Musula̱ mu nɗa i na nkaya n va̱ o kototo yi n wawa le ta̱, musula̱ ma̱ Goza na̱ Haran na̱ Reze na̱ ama Adini aza a na a̱ da̱na̱i Telasa? 13 A tee ɗa mogono ma Hamat na̱ mogono ma Afa, a̱ tee ɗa mogono ma̱ lyuci va Sefarwayim na̱ mogono ma Hena ko za va Iva?>>

14 Hezekiya ushi ta̱ mepepelime uba̱ta̱ wu nlingata'a a̱vu ɗe nu una̱. Avu u ka̱ra̱ na̱ yi a̱ tyo A̱a̱'isa̱mapaɗa a̱ A̱sulazuva a̱vu pa̱lu'wa̱ yi a̱ ma̱ka̱ka̱n ma̱ A̱sulazuva. 15 A̱vu Hezekiya yuwan avasa a̱ tyo uba̱ta̱ wa̱ A̱sulazuva u damma,

<<A̱sulazuva, A̱sula̱ a Isra'ila, mogono ma na ma̱ ri yi nden zuva vi ikerobobi,* a̱vu ɗa A̱sula̱ a aza a tsugono tsu vu uvaɗi suru. A̱vu ɗa vu yuwain zuva ni iɗa.* 16 Zuwa atsuvu A̱sulazuva, a na va uwwa mu, kpa̱tu'wa̱ esu wu, A̱sulazuva a na ve ene, uwwa adanshi o tsu zo'o a na mogono Senakerib lyungu yi a na wi isulai A̱sula̱ a na a̱ ri wuma. 17 Amayun ɗa A̱sulazuva, ngono ma Asuriya n ɗa n kototo yi nɗa ya̱ a̱bunda̱ ni iɗa i le. 18 Adama a na oco ta̱ musula̱ a̱tsuma̱ akina tsura̱ o kototo le, adama a na musula̱ n ɗa uruma wu vaɗilima̱ va aakpata na aatali, adama ndolo ɗa a gura kototo n le.* 19 Gogo, A̱sulazuva A̱sula̱ a̱ tsu, wawa tsu ekere a̱yi, adama a na suru tsugono tsu o uvaɗi e reve a na a̱vu ɗa A̱sulazuva A̱sula̱ goon.>>

20 A̱vu Ishaya ulobo wa Amoz u lyungu wa̱ Hezekiya ni ikaka u damma, << Apa ili i na A̱sulazuva, A̱sula̱ a Isra'ila, a dammai, <Mu uwwa ta̱ avasa a̱ wu adama Senakerib mogono ma Asuriya.> >> 21 Apa adanshi a na A̱sulazuva a yuwain adama a̱ yi,

<<Usheli wa̱ Sihiyona

u tara wu ili shi,

waru u ta yuwusaan wu ulamu.

Usheli wa Urishelima

u ta̱ ga̱ɗishi aaci a̱ yi a̱ca̱pa̱ a̱ wu.

22 Za ne ɗa ve isulusa na̱ vu yuwusain ulamu?

Waru za ne ɗa va̱ 'ya̱susa̱a̱n uɗyo?

Agba za ne ɗa va̱ kpa̱tu'usa̱ esu?

e ekere A̱sula̱ za va Akiza a Isra'ila!>>

23 A̱tsuma̱ a nlingata ma̱ wu vu isula ta̱ A̱sulazuva.

A̱vu vu damma, <<Na̱ a̱bunda̱ e ikeke yi ido i va̱ i ɗa,

n kumbai zuva vu nsasan mu ugaɗi,

acina ukosu wa agaɗi a Lebanon.

Mu koɗo ta̱ ɗanga vu uga'an va sida,

a aza a na ala'a yi uga'an,

oɓolo na̱ ɗanga Fir na la'a yi ulobonu.

N rawa ta̱ o tyo wa agaɗi a Lebanon,

a̱vu vu uwa pe pe a̱tsuma̱ a̱rumbu a̱ yi.

24 N ka̱pa̱ ta̱ oko'o

reve n sowo mini ma na ma̱ ri za vi iɗa ya̱ a̱ wu shi,

na̱ wu dasu wa ana a̱ va̱ mu kwan ta̱

suru ɗolu va Masar.>>

25 <<Koto vu uwwa shi?

ɗe nu ufaru ne ɗa n zuwai a na wa a fara.

Ɗe arana vu ufaru n foɓoi ta̱ ne,

ili i na mo shiton su gogo,

ununa va̱ ka̱mbuwa̱,

ilyuci i naa ri nu ukari ookongo.

26 Ununa nda̱na̱ta̱ mu nɗa'a ma lamba ucira,

a ta uwwa wovon reve a̱ ra̱pula̱.

A̱vu a̱ da̱na̱ tso ogozo a̱tsuma̱ a atsusa,

tsa̱ a̱vu'un e ke'en ke'en,

ko tsa anlya a na o topoi zuva vu ukwa̱'a̱,

za na upepu u tsu 'yeweto yi babu u kungwa.

27 <<Agba n reve ta̱ na̱ nda̱na̱ta̱ ma̱ wu,

na̱ mantsa ma̱ mo uta̱ ma̱ wu na̱ ma̱ ka̱mba̱ ma̱ wu,

nu upan u na va yuwusan aci a̱ va̱.

28 Ana wo o'woi vu yuwan ta̱ upan lon aci a̱ va̱,

agba alabari aciyogbamu wa̱ wu a rawa ta̱ atsuvu a̱ va̱,

to, n ta zuwa wu gon a̱ vunu,

naa amunga o una̱ wa wu,

waru n ta vadala to wu,

a̱ tyo wu o ure u na vu uta̱i.>>

29 A̱vu Ishaya damma mogono Hezekiya, <<Apa ili i na yo o wu iroci. A̱tsuma̱ a aa'wan nda a̱ 'ya̱wa̱ i ta̱ tsura̱ a̱ta̱pa̱shi a̱tsuma̱ e ili i na yu uta̱i diga e iɗa naa aciya yi a na ya lyuwa, aa'wan ire i ta lyuwa ili i na a̱ta̱pa̱shi'i a matsain, amma a̱tsuma̱ a aa'wan a ta'atsu i ta̱ cuwa̱n ishina i ɗu hali i gasa i le, a̱vu i shuwa̱ inabi a̱ uɗuma̱ ɗu, a̱vu i lyuwa muwun le. 30 Akapi ama a na abuwai a̱tsuma̱ o u'wa wa Yahuda a ta̱ yuwan aralu, waru a̱ ta̱ shuwa̱ reve a bala, tsu uɗanga u naa aralu a̱ yi, a̱ ka̱ra̱i a̱cipa̱ a̱tsuma̱ e iɗa, waru eten a̱ yi a na a̱ ri zuva a ca a̱ yi muwun. 31 Adama a na diga a̱tsuma̱ Urishelima, akapi a ama a̱ to o uta̱, diga masasan ma Sihiyona, a̱ ta̱ tsura̱ oɓolo akapi a ama a na ala'a. Adama a̱ tsushu'un tsi icigi ya̱ A̱sulazuva o oɓolo a̱ a̱soja a zuva a ɗa a yuwan tsundolo.>>

32 <<Adama o ndolo apa ili i na A̱sulazuva a dammai a aci ya̱ o mogono ma Asuriya, <Waa uwa a̱tsuma̱ lyuci gbain n da shi, ko gba u tewin iliya pe shi, ko gba shi u ta̱wa̱a̱ yi na̱ a̱a̱ra̱ga̱ shi, ko gba u ɓoloto ma̱bula̱ adama a na wa kumba ukari wa̱ yi shi. 33 A̱tsuma̱ o ure u na wo o toni a̱ ta̱wa̱ pa o ure u ɗaɗa wo toni ya̱ a̱ ka̱mba̱, waru wa uwa pe a̱tsuma̱ a̱ lyuci gbai'in shi. A̱mu A̱sulazuva n damma ta̱. 34 Adama a na n ta para lyuci gbai'in waru n wawa a̱ yi, adama a̱ba̱jini aala a̱ va̱, na waru adama aagbashi a̱ va̱ Da̱wuda.> >>

35 A̱tsuma̱ ayin o ndolo a̱vu malingata ma̱ A̱sulazuva ma̱ ka̱ra̱ a̱ 'ya̱wa̱ o uva̱la̱ta̱ wa aza a Asuriya reve wu una ama ukpakukupa kupa nu kpakukupa kunla̱ na̱ ozo ton (185,000). Ana a ama a̱ 'yon yi usana, a̱vu acina a̱kwa̱kwa̱ uba̱ta̱ biti.* 36 A̱vu mogono Senakerib va Asuriya ma̱ 'yon a̱vu u ka̱mba̱ a̱tsuma̱ e iɗa ya yi a̱tsuma̱ a Niniva. 37 Urana u lo a̱yi pe a yuwusaan ma̱sula̱ ma̱ yi Nisiro a̱ga̱nda̱, a̱vu olobo a̱ yi Adaramalek na̱ Shareza o unai na̱ matsun me pe'eni, a̱vu asuma a̱ tyo a̱ lyuci va Arara. Adama o ndolo a̱vu ulobo wa̱ yi za na a̱ tsu ɗe Esahadon wo o mogono.