1 A mantsa ma na Ataliya mma va Ahaziya enei a na ulobo wa̱ yi u kuwa̱ ta̱, a̱vu u 'yon adama a na wo o kototo muwun n na n ri pe a̱tsuma̱ o u'wa u tsugono suru. 2 Amma a̱vu Yehosheba, usheli u Mogono Joram mawun ma̱ a̱na̱wun ma Ahaziya, tara Yowash ulobo wa Ahaziya adama a na wa suma na̱ yi a̱tsuma̱ akapi olobo a na a̱ da̱na̱i pe a̱tsuma̱ o u'wa u tsugono, a za na a cigai a na o kototo le. A̱vu u zuwa yi oɓolo na̱ za na a̱ da̱na̱ e idanusan yi a̱tsuma̱ asula e nven adama a na wa pa'an to yi diga e ekere a Ataliya, adama o ndolo a̱tsura̱ o unai shi. 3 A̱vu u da̱na̱ usokowu oɓolo na̱ za na kungwatoi ni yi a̱tsuma̱ A̱a̱'isamapaɗa a̱ A̱sulazuva a cina a'wan a̱ ta̱li, a mantsa ma na Ataliya da̱na̱i o tsugono a̱tsuma̱ e iɗa'a.

4 A̱tsuma̱ a'wan e cindere a̱vu Yehoyida ganu lyungu na e ɗe nan yali a̱soja o ukpaku ukpaku, aza a na a yuwusan ipiri i mogono oɓolo na̱ a̱soja a na a yuwusan ipiri yu u'wa u mogono, a na a̱ ta̱wa̱ uba̱ta̱ wa̱ yi a̱tsuma̱ A̱a̱'isamapaɗa a̱ A̱sulazuva. Lo ɗa u zuwa n le a yuwain nzuwulai oɓolo na akucunu ana, a̱ ta̱ usu ifoɓi i na u ri na̱ yi. Lo ɗa u roco n le Yowash ulobo u mogono Ahaziya. 5 A̱vu u yuwan adanshi na̱ le u damma, <<Apa ili i na ya yuwan, a mantsa ma na i ta̱wa̱i uba̱tu wu ulinga a̱tsuma̱ o uranu wa Ashibi. Reve i ne'eshen aciya a̱ ɗu oɓolo a ta'atsu. Oɓolo o ufaru a ta yuwan ipiri yu u'wa i mogono. 6 Oɓolo e ire waru a ta yuwan ipiri yu una̱ntsu wa Sur, wa̱ ta'atsu o ndolo waru a ta isawan a̱ca̱pa̱ akapi a̱soja a na a̱ ri a yuwusan ipiri yu ukobu mogono. 7 Oɓolo i re waru fo aza a na a̱ 'yon ulinga o urana wa ashibi, a ta yuwan ipiri ya̱ A̱a̱'isamapaɗa a̱ A̱sulazuva adama a̱ piri wuma u mogono. 8 A̱vu i ka̱nda̱ruwa̱ suru uba̱ta̱ u mogono, vuma suru ni itana yu uvon ya̱ yi o ukere wa̱ yi. Suru za na ta̱wa̱i zuzu na̱ ɗu a̱vu yu unai, a̱vu i da̱na̱ zuzu na̱ mogono suru uba̱ta̱ u na u 'ya̱wa̱i biti.>>

9 A̱vu nan yali a̱soja a yuwan ununa Yehoyida ganu cuɗuwa n le. Suru nan yali ya̱ a̱soja a̱ ta̱wa̱ ta̱ na a ama le aza a na a fara ulinga o urana wa Ashibi, oɓolo na aza a̱ 'yon ulinga o urana'a. Suru n le a̱ ta̱wa̱ ta̱ uba̱ta̱ wa Yehoyida ganu.

10 A̱vu ganu'u u ca nan yali a̱soja'a ibata na̱ a̱ra̱ga̱ a aza a na a̱ shi a̱za̱ Mogono Da̱wuda, aza a na a zuwai pe a̱tsuma̱ A̱a̱'isamapaɗa a̱ A̱sulazuva. 11 A̱soja e ipiri'i, za suru ni itana yu uvon ekere yi a̱vu a̱ ka̱nda̱ruwa̱ mogono, zuzu na̱ masa'a oɓolo na̱ A̱a̱'isamapaɗa, diga o upasu wu uyagi acina upasu wu ugana wa̱ A̱a̱'isamapaɗa.

12 A̱vu Yehoyida uta̱ na̱ ulobo u mogono, a̱vu wo oto yi okokolo o tsugono aaci ya̱ yi. A̱vu u ca yi aatagada a̱ wila̱, a̱vu u damma le apa mogono. A̱vu a̱ tsuwa̱yin mani'in, a̱vu a ama a ɓasa ekere e le na̱ ma̱za̱nga̱ a dansa, <<Wuma wa̱ wu u jima, mogono!>>

13 A mantsa ma na Ataliya uwwai a̱gidi'ya̱ diga uba̱ta̱ wa̱ a̱soja aza a na a yuwusan ipiri oɓolo na̱ akapi ama, a̱vu u ka̱ra̱ a̱ tyo uba̱ta̱ wa akapi a ama a na a̱ ri pe a̱tsuma̱ A̱a̱'isamapaɗa a̱ A̱sulazuva. 14 A mantsa ma na u ka̱lyuwa̱i a̱vu we ene mogono mishin lo uba̱ta̱ wa aatsura, ununa a tsu yuwusan. A̱vu waru we ene azagbain a̱soja na̱ aza a na a tsu ivula̱ avana lo zuzu na̱ mogono'o, ama e iɗa'a suru a̱ da̱na̱ ta̱ a̱ ma̱za̱nga̱ na̱ a̱ ivulusa̱ yi avana. A̱vu Ataliya a kara a̱tugu yi a̱vu u saala a dansa, <<Ili ya nda yipaalishi i ɗa, yipaalishi i ɗa!>>*

15 A̱vu Yehoyida ganu damma nan yali a̱soja o ukpaku aza a na a̱ da̱na̱i yali ya̱ oɓolo a̱soja u damma, <<U ta̱ yi na̱ yi diga e memere ma̱ a̱soja, a̱vu yu una za na cigai wawa yi suru na̱ matsun me pe'eni.>> Adama a na ganu damma ta̱, <<She o unai a̱tsuma̱ A̱a̱'isamapaɗa a̱ A̱sulazuva wan.>> 16 A̱vu e remei a tara yi nu una̱ntsu wi ido a̱ tyo o ure wu u'wa u mogono, a̱vu o unai ɗe.

17 Yehoyida gba yuwan ta̱ nzuwulai a̱ tyo wu uba̱ta̱ wa̱ A̱sulazuva na̱ mogono oɓolo na ama, adama a na o'wo ama a̱ A̱sulazuva. A̱vu fo u zuwa mogono ma yuwan nzuwulai na a ama. 18 A̱vu ama e iɗa'a suru a̱ ka̱ra̱ a̱ tyo a̱a̱'isa̱ a Ba'al, a̱vu o kototo yi. A̱vu waru o kototo musa'a, a̱vu o kototo fo iroci musula̱, a̱vu o una Matan ganu va Ba'al aza a na da̱na̱i lo elime a masa'a ma Ba'al. Yehoyida ganu zuwa ta̱ aza a na a yuwan ipiri ya̱ A̱a̱'isamapaɗa a̱ A̱sulazuva. 19 A̱vu u tara oɓolo a nan yali ya̱ a̱soja ukpaku, oɓolo na̱ a̱soja a na a yuwusan ipiri i mogono, na aza a na a yuwusan ipiri yu ukobu u mogono, oɓolo na akapi a ama'a suru adama a̱sha̱wu Yowash diga a̱tsuma̱ A̱a̱'isamapaɗa a̱ A̱sulazuva a̱ tyo o u'wa u mogono. A̱vu a uwa na̱ mogono diga o na̱tsutsu wa aza a na a yuwusan ipiri a̱ tyo o a̱tsuma̱ o u'wa wa̱ yi. A̱vu mogono ma kumba ootogu o tsugono reve u da̱nu. 20 A̱vu suru ama e iɗa'a a yuwan ma̱za̱nga̱. Lyuci'i gba u da̱na̱ ta̱ na̱ nden ma asuvu, adama a na a paɗa ta̱ Ataliya na̱ matsun me pe'eni a̱tsuma̱ o u'wa u mogono.

21 Yowash da̱na̱ ta̱ na aa'wan e cindere a mantsa ma na u temei tsugono a̱tsuma̱ a Yahuda.